Yéso aosokosa ecinji á bagoigi nɛkɛ
13
1 Cɔ, bhíbhí á jaí á Pasáka, Yéso dáúbhi gea, mbenɔ á toka akɛ ka mokonda nde na gǎ mɔtɛa Abhakɛ aju ye tɔ. Dékondi bakpa nɛkɛ, bunde bá ka mokonda. Dékondi bakpa nɛkɛ bunde dábatú ka mokonda, ásikia konda abɔ na ka sungiaga.2 Mbenɔ nde Yéso na bagoigi nɛkɛ dábatú oeaga ɔgɔgɔ, Nketi dábhisi ka měma á Yúdha Isikaliɔ́ta, muna-Simɔ́ni, mɔphɛ á tɔnga á Yéso.
3 Yéso dáúbhi gea, Mokonga dábhisi kema bhui ka njaga akɛ, dátoki mɔtɛa Mokonga, na ajande phɔtɔ ko. 4 Áǒmɛsia k'ɔma á eaga, áǒphuia bhɔngɔ nɛkɛ á gǔ, áɔ̌bɔɛa phaeka á bhɔngɔ nɛngbo ka cina-kudhu. 5 Mbusa, áodukia ibo subi á ɔphɛphɛ, áokpanga sokosa á ecinji á bagoigi nɛkɛ, áɔkɔmbɛaga u na phaeka á bhɔngɔ nde dátú ně ka cina-kudhu. 6 Akidi ye bhíbhí á Simɔ́ni Pɛ́tɛɛ, Pɛ́tɛɛ áomúisia Yéso te: «Mɔkɔta, ɔbɛ aámbé oomosokosa ecinji?»
7 Yéso áonsikisia te: «Kóúbhimbɛ phɔ́ nnde neogea kɛ̌kɛ nde. Oúbhande ndiu mbusa.»
8 Pɛ́tɛɛ â gǎkɛ ongodea Yéso te: «Bɛɛndɔ, kósokosɛku tanda ecinji ani.» Yéso áongodea be: «Aoba nekéosokosi, kobɛku ye kimoci n'eme.»
9 Mpɔ, Simɔ́ni Pɛ́tɛɛ áongodea: «Cɔ, Mɔkɔta, komosokosɛ tɔndɔ ecinji. Ómosokosa phɔtɔ njaga na mɔ.»
10 Yéso áongodea: «Nkpa nde ěsokosi nyama, a ye tɔ na siki á sokosa ecinji akɛ. Nga, nkiki nna ye k'ɔma bhui. Cɔ, benu, bókó na nkiki. Nna gǎkɛ benu bɔbhu.»
11 Yéso dámúbhi mmbe antɔngande. Ka bondɔ unge, dági: «Nna benu bɔbhu báunge boúki nkiki. »
12 Bii Yéso dágɔbi ye sokosa á ecinji abɔ, â goto tɔ ɔɔla bhɔngɔ nɛkɛ, áoika ka mɛja. Oa áǒusia: «Boúbhi odigimisa kema nde negi ka phɔanu? 13 Bogi anja ka ɔphana ani: «Mphangigi» na «Mɔkɔta» nga, eme nende yɛ. 14 Cɔ, kabɛ netónosokosi ecinji, eme «Mphangigi» na «Mɔkɔta», akeni benu ka benu bósokosanɛ phɔtɔ ecinji anu. 15 Cɔ, nenóophi mphangiɔ ndɔ gea te, bógeɛ bíndɔ nenógii. 16 Nenóngodi doni gea, nna na mbhɛdanigi nde anyɛ́nyi mɔkɔta nɛkɛ. Nna phɔtɔ na nteki nde anyɛ́nyi mmbe anteki. 17 Bii boúbhi ye nyɔngɔ ndɔ, bobande na maseye, aobá́ na bɔtɔtɔkisi u.
18 Nyɔngɔ nde nɛɔyɔnga nna ka benu bɔbhu. Néobúbha bunde dɛ̌sɔmbu. Akeni gǎkɛ nyɔngɔ nde a subi á buku á Mokonga á tɔtɔkɛanɛ. «Nkpa nde beoeaga na yɛ, aámbé ande m'bibia ania. » 19 kpanga á kɛ̌kɛ nde, nenóngodi nyɔngɔ ndɔ na kátɔtɔkeanimbɛ. Ka gea, a yé ɔtɔtɔkeɛana, mpɔ bóobeekea gea, EME NENDE EME. 20 Nenóngodi doni gea, nkpa nde ansesi mmbe nenteki, amosesi phɔtɔ. Nkpa nde amosesi, ansesi mmbe dámoteki. »
Yéso aɔtɔmia gea Yúdha antɔngande
(Ɔna phɔtɔ Mat 26.20-25; Malíkɔ 14.17-21; Lóka 22.21-23)
21 Mbusa á yɔnga bó, Yéso áotambaga ka měma mpɔ, áɔyɔnga bhase gea te: «Nenongodi doni gea, ka benu moci, amɔtɔngande. »
22 Bagoigi bâ gǎkɛ ɔɛnjianaga, kanga á digimisa á nkpa nde Yéso dáɔyɔnga ka phɔa akɛ.
23 Ka bagoigi moci, mmbe Yéso dánkondi dáiki bhíbhí akɛ kambenɔ á eaga. 24 Simɔ́ni Pɛ́tɛɛ áon'dua ngoigi ndɔ ka gea ámúsiɛ Yéso te: «Mɔkɔta nkpa ndɔ ande ani? »
25 Ngoigi ndɔ, áǒphaia kubii Yéso aɔ, aomúsia te: «Mɔkɔta, anima mmbɔ?»
26 Yéso áonsikisia: « Mmbe nemophande gbutuka á mokati nde neoubhia ka ɔphɛphɛ, yɛ aámbɔ. » Mpɔ, áoboa gbutuka á mokati ndɔ, áomopha Yúdha Isikaliɔ́ta, muna-Simɔ́ni. 27 Yúdha áɔbhɛda gbutuka á mokati ndɔ, mpɔ Sɛtáni áongia subi akɛ. Yéso áongodea: «Cɔ, kamisaga tɔtɔkisa á kema nde ogea ógeɛ. »
28 Nna na ka bo moci, ka bunde dábatú na bɔ ka mɛja mmbe dáúbhi ka nyɔngɔ á kema sina nde Yéso dángodi bo.
29 Bii Yúdha aámbé dáoambaga bangɔa, bagoigi buangbo báokanisia te, Yéso dángodi ágɛ̌ sombɛ kema nde akeni ka jaí, kabɛ nnde akeni phɔtɔ ka opha á baúki.
30 Cɔ, bii Yúdha dábhɛdi ye gbutuka á mokati ndɔ, áojuana. Oandɔ, esa áoipha.
Ɛɔphi á kɛ̌kɛ
31 Mbusa á juana á Yúdha, Yéso áogea: «Cɔ, kɛ̌kɛ nde, boombia á Muna-Nkpa, aɔnɛkani. Boombia ndea Mokonga aɔnɛkani ka yɛ. 32 Aoba boombia ndea Mokonga na dáɔnɛkani ka yɛ, boombia nɛkɛ aɔnɛkanande phɔtɔ ka Mokonga. Ageande u kanga á iphia.
33 Baniki amɔ, ne ye goto tɔ na benu oani ka mbenɔ abhɔa. Bomokabande. Nenóngodi tɔ bíndɔ déngodi baYúdha: « Bɔ́kɔ́ɔtɔka na boge k'ɔma nde nege. »
34 Nenophi ɛɔphi á kɛ̌kɛ: Kondanagani. Bindɔ eme dénókondi, benu kondhanagani phɔtɔ bó. 35 Aoba na bokondanigi, bakpa bɔbhu báúbhande gea, bonde bagoigi nɛmɔ. »
Yéso aɔtɔmia gea Pɛ́tɛɛ anganande
(Ɔna phɔtɔ Mat 26.31-35; Malíkɔ 14.27-31; Lóka 22.31-34) .
36 Simɔ́ni Pɛ́tɛɛ áomúsia: « Mɔkɔta, oma oga oa? » Yéso áonsikisia: « Kɔ́ɔtɔka na ɔmobi kubii neoga kɛ̌kɛ nde. Omobeande ndiu mbusa. »
37 Pɛ́tɛɛ áongea: « Mɔkɔta, ka nyɔngɔ á eke kɛ́ɔtɔka bea akɔ kɛ̌kɛ nde? Nga, nebeeki kukua ka nyɔngɔ akɔ.»
38 Mpɔ, Yéso áonsikisia: « Obeeki kukua ka nyɔngɔ ani doni? Nekongodi doni gea, omonganande mɔngɔ isaɔ, mosá á ɔsa á kɔkɔ. »