Yéso ande aphe á gǎ mɔtɛ á Abhɛ
14
1 Yéso áǒngodea bagoigi be: «Bókotambɛgɛmbɛ ka měma. M'beekeani Mokonga, bómobeekeɛ phɔtɔ eme. 2 Endu ndea Abhɛ, a na ɔma á buiki ásii. Atú oba nǎna bó, ámbe ketónógodi, nege ɔnɔ́bɔnisiaga ɔma á buiki. 3 Bii nege ɔnɔ́bɔngisiaga ɔma á buiki, nebhikaeka goto ɔnɔ́bhɛda ka gea, ɔma nde neiki, benu boikɛ phɔtɔ bei. 4 Cɔ, boúbhi ye aphe á kubii nege.»5 Tɔmá áongea: «Mɔkɔta, békéoúbha ɔma nde oge. Cɔ, beubhande gǎkɛ aphe bo?»
6 Yéso áosikisia gea te: «Nende Aphe, Kodoni, na Enda. Nkpa nn'aobhika mɔtɛ a Abhɛ, na kányɛ́nyi k'eme. 7 Atúoba na bomoúbhi, ámbé botúmǔbhi phɔtɔ Abhɛ bo. Kɛ̌kɛ nde gǎkɛ, bomǔbhi ye yɛ, na ɔna akɛ.»
8 Philípɔ áongea: «Mɔkɔta, ósophangia Abhɛ mpɔ, ɔ́gɔbɛ siki asu.»
9 Yéso áongea be: «Philípɔ, esa ásii nnde beiki n'obɛ, kómoúbhimbɛ mɔnɔ? Cɔ, ogi, nékophangiɛ Abhɛ ka bo? 10 Kóobeekea gea te, ne subi á Abhɛ, Abhɛ â phɔtɔ oba subi ani? Yɔnga nde neonóngodea, nna tɔ otoka k'eme, andiu otoka k'Abhɛ, mmbe a subi ani ka tɔtɔkisa ekuma nɛkɛ.
11 Ómobeekeani bii neonógodea gea, ne subi á Abhɛ, yɛ â phɔtɔ oba subi ani. Kanga bondɔ, beekeani ye phɔ ka nyɔngɔ ékuma nɛmɔ. 12 Nenóngodi doni, nkpa nde amobeeki, abhɛdanagande ekuma bíndɔ nɛbhɛdanigi. Atɔtɔkisiande phɔtɔ kema ángbó kɔmɔnyɛ́nya. Nga, nege ye mɔtɛ á Abhɛ. 13 Nɛtɔtɔkisande phɔtɔ kema bhui nde bɔɔmɛma k'ina ani. Ka bondɔ unge, ban'dokomisande Abhɛ ka Anakɛ. 14 Aoba na bɔmɛmi kema sina k'ina ani, nɛtɔtɔkisande.
Yéso aɔku teka á Měma á Mokonga
15 Aoba na bomokondi, boambande ɛɔphi nɛmɔ. 16 Eme, nɛmɛmande Abhɛ, ánophɛ Nengi bangbo ka gea, áikɛ na benu esa bhui. 17 Ande Měma á doni, mmbé batɔa ka mokonda bánaɔtɔka na bám'beeki nga, bákáɔtɔka na bá mɔ̌ni na úbha akɛ. Benu gǎkɛ, bóomǔbha nga, yɛ aoika kimoci na benu, abande phɔtɔ subi anu.
18 Kénodeketɛku banici á jiga, nebhikande goto mɔtɛnu. 19 Ka mbenɔ abhɔa, batɔa ka mokonda bákámɔɔnɛku ye. Benu ndiu báunge bɔmɔɔnande ka nyɔngɔ nde, eme neoenda na benu phɔtɔ boendande.
20 K'esa ndɔ unge bodigimisande gea, eme ne subi á Abhɛ, benu subi ani, n'eme subi anu. 21 Nkpa nde aobeekea ɛɔphi nɛmɔ na amba i, aámbé amokondi. Nkpa nde amokondi, Abhɛ ankondande, n'eme phɔtɔ nenkondande, něphangiande ka yɛ.
22 Mpɔ, Yúdha (nna mmbɔ Isikaliɔ́ta) áongea te: « Mɔkɔta, ka nyɔngɔ sina nde ɔ tɔ ǒphangia ka besu, kǒphangiɛ gǎkɛ ka batɔa ka mokonda? »
23 Yéso áonsikisia te: « Aoba nkpa n' amokondi, aámbande nyɔngɔ nɛmɔ, Abhɛ ankondande. Eme na Abhɛ, bebhikande motɛ akɛ na ika kimoci na yɛ. 24 Nkpa nde nn'aomokonda, nna gǎkɛ oamba nyɔngɔ nɛmɔ. Nga, nyɔngɔ nde bɔɔɔka, nna nɛmɔ, a ndiu ndea abhɛ, mmbe amoteki.
25 Dénongodi nndɔ, bii dé phɔ́tɔ na benu. 26 Abhɛ anótekisiande Nengi, n'ande Měma á Mokonga k'ina ani. Anophangiagande kema bhui na kanisia á nyɔngɔ bhui nnde dénongodi.
27 Nenódeketei bɔjɛjɛ, nenóphia bɔjɛjɛ nɛmɔ. Kénophi bíndɔ batɔa ka mokonda báonóopha. Cɔ, měma anu kaágatanɛmbɛ, bókobɛmbɛ na kɔbɔbɔkɔ.
28 Bɔɔkima bii nenóngodima gea: «Nege, nejande gǎkɛ mɔtɛnu. » Atú oba na bomokondi, ámbé bona maseye, ka nyɔngɔ nde, nege mɔtɛ á Abhɛ. Nga, Abhɛ amɔnyɛ́nyi. 29 Cɔ, kɛ̌kɛ nde, nenóngodi nndɔ bhui mosá á tɔtɔkɛana i, ka gea te, a ye ɔtɔtɔkɛana, bóobeekea.