Yéso, ande me á mujabhibhu á domi
15
1 «Nende Mujabhibhu á doni, Abhɛ ande gǎkɛ ngubhi. 2 Aotena ntabhi bhui nnde ajukani n'eme na nnaɔgɔmba. A gǎkɛ ɔbɔngisaga nnde aɔgɔmba ka gea te, ágɔmbɛ goto phɛ̂. 3 Cɔ Benu, bánosokosei ye tɔ ka měma ka nyɔngɔ á bɔphɛi nde dánogoisigi. 4 Ikani subi ani, n'eme, neikɛ phɔtɔ subi anu. Ntabhi nnaɔgɔmba sasa akɛ na kájukani na me á mujabhibhu. Bo phɔtɔ bó. Nga, boko phɔtɔ ɔtɔka n'ɔbɔgɔmbi ka měma, aobá́ na boko iki subi ani.5 Eya, nende bea me á mujabhibhu ndɔɔ. Bonde gǎkɛ bea ntabhi i. Mmbe aiki subi ani, néoika subi akɛ, agɔmbande phɛ̂ ka měma. Nga, bɔ́kɔ́tɔtɔkisɛku ka kema aobá́ na bɔkɔ tɔ kimoci n'eme. 6 Mmbe káiki subi ani, ande bea ntabhi nde báteni, báomaka, áɔɔmɔkaka. Mpɔ, báoboa ntabhi nde aɔmɔkaki, bómaka ka nsa, áosida. 7 Aoba n'oboiki subi ani, nyɔngɔ nɛmɔ n'aiki subi anu, cɔ, mɛmani kema bhui nde bokondi, na bɔtɔande. 8 Aoba n'ɔbɔgɔmbi phɛ̂ ka měma, ban'dokomisande Abhɛ, na bobande bagoigi nɛmɔ doni.
9 Bindɔ Abhɛ dánókondi, eme nenokondi phɔtɔ bo. Ikani k'ekondi nɛmɔ. 10 Aoba na boambi ɛɔphi nɛmɔ, boikande k'ekondi nɛmɔ, bíndɔ déambi ɛɔphi ndea Abhɛ na ika k'ekondi nɛkɛ. 11 Dɛ́nɔ́tɔ̌mi nndɔ ka gea, maseye nɛmɔ áikɛ subi anu, maseye nɛnu átɔtɔkɛanɛ phɔtɔ phɛ̂. 12 Ɛɔphi nɛmɔ a be: Kondanagani sɔsɔbɛ anu, bíndɔ dénókondi. 13 Nna na nkpa nde an'ekondi ángbo phɛ̂, kɔnyɛ́nya mmbe abeeki kukua ka phɔa badhakɛ. 14 Benu, bonde badhani, aobá́ n'obogi nnde nenososi.
15 Kɛ́nɔɔphanɛku ye bakɔbɛ nga, nkɔbɛ nnaoúbha kema nde mɔkɔta nɛkɛ aogea. Ne ye tɔ ɔnɔ́ɔphana badhani nga, nenóphangigi kema bhui nde Abhɛ amongodi.
16 Bɔ́kɔ́mɔsɔmbu, eme aámbé nɛnɔ́sɔmbu ndiu, na néonóteka ka gea, bógɔ̌gɔmbɛ mbuka á ka měma, nnde aoiphia phɛ̂. Ka bondɔ, Abhɛ anóophande kema bhui nnde bɔɔmɛmande yɛ k'ina ani. 17 Cɔ, ɛɔphi nde nenososi ande gea, Kondanagani sɔsɔbɛ anu.
Batɔa ka mokonda bánkangei Yéso na bagoigi nɛkɛ
18 Aoba batɔa ka mokonda na bánokangei, úbhani phɔ gea, eme aámbé bámokangei mosá. 19 Botúoba batɔa ka mokonda, ámbé bánokondigi. Batɔa ka mokonda bánokangei gǎkɛ ka nyɔngɔ nde, nɛnɔ́sɔmbu, néonótokisa sɔsɔbɛ abɔ. 20 Kanisiani phɔ nyɔngɔ nde dénóngodi gea: «Nna na mbhɛdanigi nde, ana boombia kɔnyɛ́nya mɔkɔta nɛkɛ.a» Bii bámotambisigi, bánotambisagande phɔtɔ bo. Atú oba nabáambi nyɔngɔ nɛmɔ, ámbé báambande phɔtɔ nɛnu. 21 Cɔ, bánotambisagande bó ka nyɔngɔ ani. Nga, bánaomúbha mmbe amoteki.
22 Aoba nedékébhiki, na dékěngodi nyɔngɔ nɛmɔ, ámbé bákátúbhɛku na bojede. Kɛ̌kɛ nde gǎkɛ, bákanganɛku ye bojede nɛbɔ. 23 Nkpa nde amokangei, ankangei phɔtɔ Abhɛ. 24 Atú oba nɛkɛ́tɔtɔtɔkisi ketangaɔ sɔsɔbɛ abɔ, nnde nkpa kátɔtɔkisimbɛ mɔnɔ, ámbé bákátúbhɛku na bojede. Kěkɛ nde, báɔni ye ketangaɔ ndɔ, báotútuisa kangea asu, eme na Abhɛ. 25 Bagi gǎkɛ bó ka gea, nyɔngɔ nde bádundu subi á ɛɔphi nɛbɔ atɔtɔkɛanɛ, ‹Bámokangei ecici.b›