16
1 Dénóngodi nndɔ ka gea, bókodeketɛmbɛ beekea nɛnu. 2 Nga, bánobeagande k'endu á bɔphɛi. Abande na mbenɔ nde bundɔ bánomande, bákanisiande gea, báɔmbhɛdaneaga Mokonga. 3 Bágeande bo nga, bákámuubhi Abhɛ, bákámuubhi phɔtɔ eme . 4 dénongodi gǎkɛ nndɔ ka gea, mbenɔ ndɔ a ye okidia, bokanisiande gea, Dénóngodi ye.Měma ndea Mokonga aɔbhɛdanaga
Dékénongodi nndɔ mosá nga, détú na benu. 5 Kɛ̌kɛ nde, negě mɔtɛ a mmbé dámoteki. Cɔ, ka benu nna gǎkɛ omouisia gea: « Oge wani? » 6 Botumi gǎkɛ na bɔmbɛ bii nenóngodi ye nyɔngɔ ndɔ. 7 Cɔ, nenongodi gǎkɛ doni gea, atúanja kabenu négɛ̌. Nga, aobá́ nekégě, ámbe Nengi kábhikɛku mɔtɛnu. Cɔ, a gǎkɛ oba na negě, nénótekisiande yɛ. 8 Bii abhikaeka, ěngekisiande batɔa ka mokonda ka nyɔngɔ á bojede, kodoni na tena á nyɔngɔ akpɛa. 9 Aeengekisiande batɔa ka mokonda bojede, ka nyɔngɔ nde bákámobeeki. 10 Aeengekisiande batɔa ka mokonda kodini, ka nyɔngɔ á gǎ ani mɔtɛ a Abhɛ na bɔ́kɔ́mɔɔnɛku ye. 11 Aeengekisiande batɔa ka mokonda tena á nyɔngɔ, ka nyɔngɔ nde, bá ye teni nyɔngɔ ndea Moamɛ á ka mokonda ndee.
12 Ne goto na nyɔngɔ ásii ka ngodea anu. Bókó gǎkɛ ɔtɔka na bophiphii kɛ̌kɛ nde. 13 Mbenɔ nde yɛ Měma á kodoni abhikande, anɔ́sɔndɔɛande k'aphe á doni bhui. Káyɔngɛku ka kɔkɔta nɛkɛ sasa akɛ, nyɔngɔ bhui nde aɔkaeka mɔtɛ á Abhɛ, andiu unge anɔtɔmiande. Anɔ́tɔmiande nyɔngɔ nde abhikaeka. 14 Yɛ, amoombisande nga, kema nde anɔ́tɔmiande, atokande ně mɔtɛ amɔ. 15 Kema bhubhui nde abhɛ a ně, ande nɛmɔ. Ka nyɔngɔ índɔ unge dénóngodi, kema nde anɔ́tɔmiande, atokande ně mɔtɛ amɔ.
Tambaga ěgaiande ka maseye
16 « Ka mbenɔ abhɔa, bɔ́kɔ́ɔmɔɔnɛku ye, cɔ, mbusa á mbenɔ abhɔa, bɔmɔɔnande goto.» 17 Ka bagoigi nɛkɛ báɔyɔngaga sɔsɔbɛ abɔ te: « Asóngodi, ‹ka mbenɔ abhɔa, bɔ́kɔ́ɔmɔɔnɛku ye, cɔ, mbusa á mbenɔ abhɔa, bɔmɔɔnande goto.› Phɔtɔ ‹ka nyɔngɔnde negě mɔtɛa Abhɛ.› Kantíti á nyɔngɔ ndɔ abo? 18 Kantíti á nyɔngɔ nde agi: ‹Mbusa á mbenɔ abhɔa› abo? Nga, bekéodigimisa.» 19 Yéso dáúbhi gea, dábáokonda úsia akɛ. Ka bondɔ áǒngodea be: « Bookaba engekisa sɔsɔbɛ anu, kantiti á yɔnga nde nɛyɔngi gea te: « ka mbenɔ abhɔa, bókómɔɔnɛku ye, cɔ, mbusa á mbenɔ abhɔa, bɔmɔɔnande goto.› 20 Cɔ, nenóngodi doni gea, bogamande, bóoba n'oiɔ, batɔa ka mokonda bǎ gǎkɛ oba na maseye. Botambagande ka měma, tambaga ndɔ ěgaiande gǎkɛ ka maseye.
21 Mbenɔ nde nke áoba ka boae, áotambaga ka nyɔngɔ nde boae andondi. Mbenɔ nde a gǎkɛ koonja, áobosea tambaga ndɔ nga, a na maseye á bɔkɔtɛana a miki ka mokonda. 22 Benu gǎkɛ, kɛ̌kɛ nde bo phɔ́tɔ otambaga. Bii nɛnɔ́ɔnande goto, bobande na maseye. Maseye kau, nkpa kánuutɛku. 23 Esa ndɔ, bókómuusiɛku ye ka kema. Nga, nenóngodi doni gea, Abhɛ anóophande kema bhubhui nde bɔɔmɛma k'ina ani. 24 Na ka kɛ̌kɛ nde, bɔ́kɔ́mɛmimbɛ ka kema k'ina ani. Cɔ, mɛmani na bɔtɔande, mpɔ, botumɛ na maseye.
Yéso akindi mokonda
25 «Nɛtɔnɔ́tɔ̌mi kema ndɔ bhui ka mɛní, mbenɔ a gǎkɛ obhika, nnde kɛ́nɔtɔmiɛgɛku ye nyɔngɔ ka mɛní, nɛnɔ́tɔmiagande ndiu bhase, nyɔngɔ nde á Abhɛ. 26 K'esa ndɔ, bɔmɛmande Abhɛ k'ina ani. Kénóngodi te, eme aámbe nɛmɛmande Abhɛ kaphɔa anu. 27 Nga, Abhɛ sasa akɛ anókondi, ka nyɔngɔ nde, bomokondi na bô phɔtɔ obeekea gea, netoki mɔtɛ á Mokonga. 28 Cɔ, netotoki mɔtɛ á Abhɛ, néojua ka mokonda. Kɛ̌kɛ nde, netoki gǎkɛ ka mokonda, neji mɔtɛ á Abhɛ.»
29 Mpɔ, bagoigi nɛkɛ báongea: «Cɔ, kɛ̌kɛ nde ɔyɔngi bhase, kanga á yɔnga ye ka mɛní. 30 Kɛ̌kɛ nde, beúbhi gea, oúbha kema bhubhui, kóna siki á gea bákouisiɛ. Ka bondɔ unge bebeeki gea, dótoki mɔtɛ á Mokonga.»
31 Yéso áǒsikisia: « Bobeeki ye tɔ? 32 Cɔ, mbenɔ aobhika, n'a ye tɔ bei, bii benu bɔbhu bophanjekanande, nkpa na nkpa mɔtɛ akɛ, bóomodeketa sasani, ké gǎkɛ sasani nga, Abhɛ a kimoci n'eme.
33 Netónongodi nndɔ bhui ka gea, bóbɛ na bɔjɛjɛ kajukana anu n'eme. Botambagande ka mokonda. Cɔ, bani gǎkɛ na ntende, ne ye kindi mokonda.»