Yéso aɔmɛma ka phɔa á bagoigi nɛkɛ
17
1 Mbusa á Yéso yɔnga bó, áɔɛnjia na kobha, áɔyɔnga be: « Abhɛ, mbenɔ aju, n'dokomisa anakɔ gea te, anakɔ ákodokomisɛ. 2 Nga, dómophi kɔkɔta gǔ á bakpa bɔbhu ka gea, ébophɛ enda á mɛyɔ, bunde dómophi. 3 Enda á mɛyɔ ndɔ, ande ubha akɔ gea, obɛ sasakɔ aámbe onde Mokonga doni, na ubha á Yéso Kiísito mmbé dónteki. 4 Déodokomisi ka mokonda ka nyɔngɔ nde, dɛ́gɔbi ekuma nde dómopi. 5 Cɔ, Abhɛ, kɛ̌kɛ nde, ómopa boombia nde détú ně bhibhi akɔ mosá á conja á mokonda.6 Déúbhisi ina akɔ ka bakpa íbunde dɔ̌sɔmbu ka mokonda, ǒmopa. Bakpa ndɔ, dábátú buakɔ, ǒmopa, báoamba nyɔngɔ nɛkɔ. 7 Kɛ̌kɛ nde, báubhi ye tɔ gea, kema bhui nde dómopi, dátoki mɔtɛkɔ. 8 Nga, boabhi nde dómopi, dɛ́tɔ̌mi, báobeekea u. Bádigimisi domi gea, netoki mɔtɛ akɔ. Báobeekea gea, ɔbɛ aámbé dómoteki. 9 Ka nyɔngɔ abɔ unge, nɛɔkɔmɛma. Nna gǎkɛ ka nyɔngɔ á bakpa bɔbhu á ka mokonda, tɔndɔ bunde dómopi, nga, bánde bakpa nɛkɔ. 10 Kema nɛmɔ bhui, a tɔ akɔ. Kema nɛkɔ bɔbhu, a gǎkɛ tɔ amɔ. Ne na boombia ka nyɔngɔ bɔ. 11 Ké ye ka mokonda, negě mɔtɛ akɔ, bɔ, báunge bá phɔ́tɔ ka mokonda. Abhɛ ntɔa-bonjánja, óamba bɔ ka bukpɛkpɛ á ina akɔ. Ina ndɔ dómopi ka gea, bakpa nɛsu bábɛ kimoci, bíndɔ obɛ n'eme be kimoci. 12 Bii détú kimoci na bɔ, déǒamba ka bukpɛkpɛ á ina akɔ, ina ndɔ dómopi. Déambi phɛ̂, ka bɔ kabungɛgɛ, tɔndɔ mmbe dákeni ábungɛgɛ, ka gea te, moangɔ á buku á Mokonga átɔtɔkɛanɛa.
13 Cɔ, kɛ̌kɛ nde, negě mɔtɛ akɔ. Neyɔngi bó na nephɔ́tɔ ka mokonda ka gea, maseye nɛmɔ átumɛ subi abɔ pu! 14 Eme aámbé débophi nyɔngɔ nɛkɔ, batɔa ka mokonda báǒkangea ka nyɔngɔ nde, bána batɔa ka mokonda bíndɔ eme, ké ntɔa ka mokonda. 15 Kɛ́ɔmɛmi gea te, óphuiɛ bakpa ndɔ ka mokonda. A ndiu gea, óambɛ bɔ na ntombigib. 16 Bána batɔa ka mokonda, bíndɔ eme, ké ntɔa ka mokonda. 17 Ósokosea ka kodoni, nyɔngɔ nɛkɔ aunge ande doni, béyameɛ ka phɔa akɔ ka doni. 18 Bindɔ dómoteki ka mokonda, eme děteki phɔtɔ ka mokonda. 19 Ka nyɔngɔ abɔ unge, něyamei bhuani kóbhɛ, ka gea, bɔ phɔtɔ bábɛ bakpa nɛkɔ doni.
Yéso aɔmɛma ka phɔa bunde bám'beekeaeka bɔbhu
20 Ké tɔ ɔmɛma ka phɔa bunde, a ndiu phɔtɔ ka phɔa bunde bámobeekeande ka beana na bɔphɛi nɛbɔ. 21 Nɛɔmɛma ka gea, bɔbhu bábɛ kimoci, bíndɔ osubi ani, n'eme subi akɔ. Nɛmɛmi phɔtɔ gea, bábɛ subi asu ka gea, batɔa ka mokonda bábeekeɛ gea, obɛ aámbé dómoteki. 22 Cɔ, eme, něbophi boombia nde dómopi ka gea, bábɛ kimoci bíndɔ be kimoci. 23 Nɛɔmɛma gea, nebɛ subi abɔ, n'obɛ subi ani ka gea, bábɛ kimoci doni. Bondɔ unge, batɔa ka mokonda báubande gea, obɛ aámbé dómoteki, ǒkondi phɔtɔ bíndɔ omokondi.
24 Abhɛ, nekondi gea, bakpa nde omopi, báikɛ ɔma nde nebei, ka gea te, báɔnɛ boombia ani. Boombia ndɔ aunge dómopi ka nyɔngɔ nde, dómokondi mosá á conja á mokonda. 25 Abhɛ, obɛ ntɔa dɔni, batɔa ka mokonda báká tanda kokoúbha, eme ndiu aámbe dékuúbhi. Bakpa nɛmɔ bâ phɔtɔ oúbha gea, obɛ aámbé dómoteki. 26 Déúbhisi ina akɔ ka bɔ na netutisande úbhisa abɔ ka gea, ekondi nde oně ka phɔa ani, abɛ ka phɔa abɔ na eme sasani nebɛ subi abɔ.