Yéso aɔtɔmiaga mɛní á m'bondigi-bamɔgɔgɔ anjanja
10
1 « Cɔ, nenóngodi doni. Mmbe nn'aongia ka kǐo á bogaɔ á bamɔgɔgɔ, â ndiu odapha ɔma nɛngbo, mmbɔ ande nkukuba, phɔtɔ nyóyombi. 2 Cɔ, mmbe a ndiu ongia ka kǐo, yɛ aámbé, ande m'bondigi-bamɔgɔgɔ. 3 M'bondigi-kǐo aomǔkuia m'bondigi bamɔgɔgɔ, bamɔgɔgɔ bâ phɔtɔ ɔɔka ɛsɔ akɛ. Aɔ̌bɔphana bamɔgɔgɔ nɛkɛ moci-moci k'ina abɔ, áǒjuanisa. 4 Mbenɔ nde aejuanisi ye bɔbhu, áɔ̌mɛa mosá, bamɔgɔgɔ báom'bea mbusa. Nga, báoúbha ɛsɔ akɛ. 5 Cɔ, bákámbeɛku tanda mɔkɛni, bánteande ndiu danga. Nga, bánaoúbha ɛsɔ á bakeni. »6 Yéso dáengodi mɛní ndɔ, bákadigimisɛ gǎkɛ nyɔngɔ nde dáɔyɔnga.
7 Ka bondɔ, Yéso â goto ǒngodea: «Nenóngodi doni gea, nende bea kǐo á bɔgaɔ á bamɔgɔgɔ. 8 Bunde dábakidi mosá ani, bánde bakukuba na bayóyombi. Bamɔgɔgɔ dábakɛ̌bɔki gǎkɛ. 9 Eme aámbé nende kǐo. Aoba nkpa n' angi k'eme, aamande ka měma. Angiande, â phɔtɔ ojuana, atɔande eea. 10 Nkukuba a tɔ ɔbhika nɛkɛ k'aphe á uba, moa na tukatuka. Nebhiki gǎkɛ gea te, bakpa bábɛ na enda, kanga á úka ka kema.
11 Eme, nende m'bondigi anjánjaa. M'bondigi anjánja aɔtɔka beekea kukua ka amisa á bamɔgɔgɔ nɛkɛ ka kukua. 12 Nkpa nde aɔbhɛdaneaga ophendɔ, mmbɔ nna m'bondigi, nna gǎkɛ mɛnɛ á bamɔgɔgɔ. Mbenɔ nde aɔmɔ̌na nyama akae bea mabhianga n'abhiki, áotea, áǒdeketa bamɔgɔgɔ. Mpɔ, nyama ndɔ áǒgoaga bamɔgɔgɔ, na phanja abɔ. 13 M'bhɛdanigi ndɔ ati ka nyɔngɔ nde, a tɔ ɔbhɛdaneaga ophendɔ, kanga á bhisa á měma akɛ ka bamɔgɔgɔ. 14 Eme, nende m'bondigi anjánja, neobúbha bamɔgɔgɔ nɛmɔ. Bɔ, bâ phɔtɔ omoúbha. 15 A tɔ bíndɔ Abhɛ amúbhi, eme, nê phɔtɔ omǔbha Abhɛb. Cɔ, nebeeki kukua ka nyɔngɔ á bamɔgɔgɔ nɛmɔ. 16 Nena bamɔgɔgɔ bunɛngbo, bunde báka gǎkɛ á k'ekombo ndee. Akeni phɔtɔ nétambisɛ bɔ. Báɔkande ɛsɔ ani, bábande ekombo moci na m'bondigi moci.
17 Cɔ, Abhɛ amokondi nga, ne beeki kukua ka gea, néendɛ goto. 18 Nna na nkpa nde aomouta enda, eme sasani tɔndɔ aámbé neodeketa u. Nga, ne na bukpɛkpɛ á phuia i, ne phɔtɔ na bukpɛkpɛ á boa i goto. Nndɔ ungɔ Abhɛ amososi.»
19 Ka nyɔngɔ á boabhi ndɔ, baYúdha bâ goto okatanaga. 20 Bakpa básii sɔsɔbɛ abɔ báogea: «Ana bansombo, ayai! Cɔ bɔɔmɔ̌ka ka bo?» 21 Bunɛngbo bâ gǎkɛ ogea: «Ntɔa-bansombo nnaɔyɔnga be. Bansombo báɔtɔka na bákodi iso á bakeíme-íme?»
BaYúdha ban'yege Yéso
22 Cɔ, esa moci ka mbenɔ á gua á jaí á ɛmɛmi ka kanisia esa á ukua endu á Mokonga na Yɛusalɛ́ma, dátú matu á phiɔ. 23 Oa, Yéso dátú otamba subi á endu ndea Mokonga, ka mɔɛba á Sɔlɔmɔ́na. 24 BaYúdha báontimba, báongea: « Odhidhisande měma asu mbenɔ sina? Aoba n'onde Kiísito, ósongodea bhase. »
25 Yéso â gǎkɛ ǒsikisia: «Neyénongodi, bókóbeekeɛ gǎkɛ. Ekuma nde nɛɔtɔtɔkisa k'ina Abhɛ, a unge aomoúbhukisa. 26 Bókó gǎkɛ obeekea ka nyɔngɔ nde, bókó ka bamɔgɔgɔ nɛmɔ. 27 Bamɔgɔgɔ nɛmɔ báɔɔka ɛsɔ ani. Eme, néǒbúbha, báomobea. 28 Néǒbopha enda á mɛyɔ, bákábungeɛka tanda. Nkpa nn'aɔtɔka n' aɛkpɔi ka njaga ani. 29 Abhɛ, mmbe amopi bamɔgɔgɔ ndɔ, aangbóngbó kɔnyɛ́nya kema bhui. Nna na nkpa nde aɔtɔka n'akpɔi kema ka njaga akɛ. 30 Abhɛ n'eme, be tɔ nkpa mo. »
31 Mpɔ, baYúdha bâ goto ɔbɔnya ɛtɛ ka gea, bámmoɛ ně. 32 Yéso â gǎkɛ ǒngodea: «Nɛtɔtɔkisi ekuma anja ásii k'iso anu ka bukpɛkpɛ ndea Abhɛ. Cɔ, k'ekuma ndɔ, kau sina nde boogea bómomoɛ n'ɛtɛ ka nyɔngɔ í?»
33 BaYúdha báonsikisia: «Békéokomoa n'ɛtɛ ka nyɔngɔ ékuma ánja. A ndiu ka nyɔngɔ á bhóma á Mokonga. Ka nyɔngɔ nde, obɛ imbɔ nkpa ogi sasakɔ te onde Mokonga. Nndɔ, ande bhóma á Mokongac. » 34 Yéso áǒsikisia: «Bákádundu phɔ́ k'ɛɔphi nɛnu gea, Mokonga agi te: « Benu bonde bakɔta á na kobhad. » 35 Cɔ, nna na nkpa nde aɔtɔka n'abuni nyɔngɔ nde a subi á buku á Mokonga. Ande gea te, Mokonga dáɛbɔphani bakɔta á na kobha bundɔ dábengodi nyɔngɔ á Mokonga. 36 Eme, Abhɛ amɔsɔmbu, áomoteka ka mokonda. Cɔ, ka nyɔngɔ sina nde bomogi neombhoma Mokonga bii negi te, nende Muna-Mokonga? 37 Aoba na kɛ́ɔbhɛdanaga ekuma ndea Abhɛ, bókómobeekeɛmbɛ. 38 Aoba na nɛtɔtɔkisi ndiu ekuma ndea Abhɛ, nanga bókómobeekea, cɔ, beekeani ye phɔ ekuma nɛmɔ. Úbhani na bɔ́ɔkɛ gea, ne subi á Abhɛ na Abhɛ a subi ani. »
39 Oandɔ, bâ goto okaba dhunga akɛ, â gǎkɛ ǒsodokana.