Bamunamakɛ na Yéso báyé beekea akɛ
7
1 Mbusa á oa, Yéso áɔtɔmba Galiláia. Dákákondi gǎkɛ tɔmba á Yudhɛ́a, ka nyɔngɔ nde, baYúdha dábaokaba moa akɛ.2 Bii jaí ndea baYúdha á ɛmaa, dátu ye bhíbhí, 3 banamakɛ na Yéso, bâ gǎkɛ ongodea: «Toa oani, ógɛ na Yudhɛ́a ka gea te, bagoigi nɛkɔ báɔnɛ phɔtɔ ekuma nde ɔɔtɔtɔkisa. 4 Nga, aobá́ nkpa n'aokaba úbhukana, yɛ sasakɛ nn'aɔtɔka n'agi kema ka bɔsɔmɛa. Aoba n'ɔɔtɔtɔkisa ekuma b'indɔ cɔ, bhɛdanaga pɛ u ka gea, bakpa bɔbhu bákɔɔnɛ bhase. » 5 Nga, banamakɛ phɔtɔ dábákátúom'beekea.
6 Yéso áǒsikisia gea te: « Mbenɔ ánja k'eme kájumbɛ. Cɔ, ka benu, mbenɔ bhui a ndiu tɔ anja. 7 Batɔa ka mokonda bánáɔtɔka na bánokangei. Bámokangei ndiu eme nga, nɛɔtɔmiaga gea, ekuma nɛbɔ aájede. 8 Benu, gani ka jaí. Eme gǎkɛ kégɛku ka jaí ndɔ nga, mbenɔ nɛmɔ kájumbɛ. »
9 Mbusa á yɔnga akɛ bó, áojiga nɛkɛ na Galiláia.
Yéso a ka jaí á ɛma
10 Bii bamunamakɛ báge ye ka jaí, Yéso â phɔtɔ oga. Dáge ka bɔsɔmɛa, kanga á ɛ̌ɔnisa. 11 Bakɔta á baYúdha dábakpangi gǎkɛ kaba akɛ ka jaí ndɔ, báoúsianaga: «Nkpa ndɔ ama koni?»
12 Ka usɛsɛ á bakpa, bakpa dábaɔngɔngɔnaga ka phɔa akɛ phɛ̂. Buangbo dábáogea: «Yɛ, ande nkpa anjánja. » Buangbo bâ gǎkɛ ogea: «Nndakɛ! A ndiu ǒdhemaga bakpa. » 13 Cɔ, kabɛ gǎkɛ na nkpa nde dáɔyɔnga bhase ka phɔa akɛ nga, dábaǒbanga bakɔta ndea baYúdha.
14 Na bá phɔtɔ subi á jaí, Yéso áoga k'endu á Mokonga ka phangiaga. 15 Mpɔ, bakɔta á baYúdha báoyayama, báogea te: «Nkpa nde aúbhi tanga bo, na kágoigi? »
16 Yéso áǒsikisia: «Bɔphɛi nde nɛɔphɛa kátoki mɔtɛmɔ, atoki ndiu ka mmbe amoteki. 17 Aoba nkpa n'akondi tɔtɔkisa á mɔphɛ ndea Mokonga, aúbhande ámbe bɔphɛi nde nɛɔphɛa atoki ka Mokonga, kabɛ k'ophangɔ nɛmɔ sasani. 18 Mmbe aɔyɔnga nyɔngɔ nɛkɛ sasa akɛ, atookaba boombia nɛkɛ sasakɛ. Mmbe a ndiu okaba boombia á mmbe anteki, ande ntɔa-doni. Nna na bojede subi akɛ. 19 Cɔ, Mósa dákánophi phɔ ɛɔphi? Nna gǎkɛ na ka benu mmbe aomba ɛɔphi kau. Cɔ, bookaba moa ani ka bo? »
20 Usɛsɛ á bakpa báonsikisia te: « Ona bansombo! Ani mmbe aokaba moa akɔ?»
21 Yéso â gǎkɛ ǒngodea te: «Dɛ́gi tɔ ketangaɔ moci, benu bɔbhu bóoyayama. 22 Mósa dánososi gusa á baniki bǒko ganja. Nna gǎkɛ Mósa aámbé dábhisi ɛɔphi ndɔ. Dátoki ndiu ka batatanu. Benu, bɔ phɔtɔ ogusa ganja esa á Sabátob. 23 Cɔ, aobá́ na boongusa miki moci ganja esa á Sabáto kanga á buna ɛɔphi ndea Mósa, eke nde bɔmɔbeɛi ka nyɔngɔ á amisa á nkpa k'esa á Sabáto? 24 Bókótenɛmbɛ nyɔngɔ k'inde bɔɔna ka nsɛngɛ, tenani ndiu nyɔngɔ ka kodoni í. »
Yéso ande Kiísito?
25 Batɔa ka Yɛusalɛ́ma buangbo báogea te: «Nna phɔ nkpa nde aámbe báokaba moa akɛ? 26 Ɔnani! A tɔ ɔyɔnga bhase mosá á bakpa, bána gǎkɛ ongodea ka nyɔngɔ! Ande gea, bakɔta nɛsu bádigimisi anja gea, ande Kiísito? 27 Cɔ, nkpa nde beoúbha ɔma nde atoki. Kabhika á Kiísito, nna na nkpa nde aúbhaeka gǎkɛ ɔma nde atoki.»
28 Mbenɔ nde Yéso dáogoisaga k'endu á Mokonga, áɔyɔnga akpɛ gea: «Eya, benu boogea te, boomoúbha na úbha á ɔma nde netoki. Kébhiki ka kɔkɔta nɛmɔ sasani. Mmbe amoteki, ande ntɔa-doni. Bókó gǎkɛ omúbha yɛ. 29 Eme, neomúbha nga, netoki mɔtɛkɛ na yɛ aámbé amoteki.»
30 Mpɔ, báokaba dhunga akɛ, nna gǎkɛ na nkpa nde dándungi nga, mbenɔ nɛkɛ dákájumbɛ. 31 Subi á usɛsɛ ndɔ, bakpa básii báom'beekea. Báogea te: «Mbenɔ nde Kiísito abhikande, atɔtɔkisande mphangiɔ kɔnyɛ́nya nkpa nde?»
Baphaisáiɔ báokaba dhungisa á Yéso
32 BaPhaisáiɔ báɔɔka usɛsɛ á bakpa na báɔngɔngɔnaga ka phɔa á Yéso. Bakɔta á batobei-phɛ́a ndea Mokonga na BaPhaisáiɔ bâ gǎkɛ ǒteka babondigi ka dhunga akɛ. 33 Yéso áogea: «Ne goto na benu ka mbenɔ abhɔa, mpɔ, nesikianagande mɔtɛ á mmbe dámoteki. 34 Bomokabande, bɔ́kɔ́mɔɔnɛku gǎkɛ. Nga, bɔ́kɔɔtɔka na bogě kubii neikande.»
35 BaYúdha bâ gǎkɛ ɔyɔngaga sɔsɔbɛ abɔ te: «Nkpa nde agande ɔma sina, ka gea bɛkɛmɔ̌nɛ? Aoga mɔtɛ á badhasu bunde báphanjekani ka nji á baGiíki gea, égoisɛgɛ baGiíki? 36 Kantíti á nyɔngɔ nde ayɔngi abo? ‹Bomokabande, bɔ́kɔ́mɔɔnɛku gǎkɛ. Nga, bɔ́kɔɔtɔka na bogě kubii neikande.›»
Yéso ande ibo á endisa á mɛyɔ
37 Esa á sungiaga a jaí ndɔ, esa á kau dátú esa angbo phɛ̂c. Esa ndɔ, Yéso áoma, áɔyɔnga n'ɛsɔ akpɛ gea: «Aoba nkpa n'aku n'ɛnyɔta, ábhikɛ mɔtɛmɔ, ánoɛ ibo. 38 Mmbe amobeeki, ibo á endisa ayokande ka měma akɛ, bíndɔ buku á Mokonga ayɔngid.» 39 Yéso dáɔyɔnga ka phɔa á Měma á Mokonga, nnde bunde bám'beekeande bátɔaande. Mbenɔ ndɔ, Měma á Mokonga dákájumbɛ ka nyɔngɔ nde, Mokonga dákán'dokomisimbɛ Yéso ka boombia.
Bakpa bákatanigi
40 Mbusa á ɔka abɔ nyɔngɔ ndɔ, bakpa bunɛngbo subi á usɛsɛ á bakpa báogea te: «Nkpa nde ande Mɔtu-nyɔngɔ doni. » 41 Bakpa buangbo báogea te: «Yɛ, ande Kiísito. » Bunɛngbo bâ ndiu ɔyɔnga te: « Kiísito aɔtɔka n'atoki na Galiláia? 42 Bádundu subi á buku á Mokonga gea, Kiísito abáeka mosuko á moamɛ Dhaúdhi. Atokande na Bhɛtɛlɛɛ́mu, ka nji ndɔ Dhaúdhie dábɔkɔtɛani kau. » 43 Ka bondɔ, usɛsɛ á bakpa ndɔ â gǎkɛ okatanaga, ka nyɔngɔ á Yéso. 44 Bakpa bunɛngbo sɔsɔbɛ abɔ báokaba dhunga akɛ, kabɛ gǎkɛ na nkpa nde andhungi.
Baamɛ ndea baYúdha bákam'beeki Yéso
45 Babondigi báosikianaga kubii baamɛ á batobei-phɛa na baPhaisáiɔ bá bei. Bɔ, báǒúsia babondigi gea: «Bókómbhiki na Yéso ka bo?» 46 Babondigi ndɔ báǒsikisia: «Tanda phɔ! Békémɔɔkimbɛ mɔnɔ nkpa n'aɔnyɔnga bea mmbɔ. »
47 Mpɔ, baPhaisáiɔ báǒgea te: «Benu bǒdhemisi phɔtɔ na yɛ bó? 48 Bɔɔkimbɛmɔnɔ, ka bakɔta nɛsu, kabɛ ka baPhaisáiɔ, n'ambeeki? 49 Batɔa-usɛsɛ ndɔ bánaoúbha ɛɔphi ndea Mósa. Bande bakpa nde báɛsɛmɛigi. »
50 MoPhaisáiɔ Nikɔdhɛ́mɔ, mmbe dángɛndɛi Yéso mosá, dátú oa. Áǒngodea te, 51 « Ɛɔphi nɛsu abeeki tena á nyɔngɔ á nkpa akpɛ, yɛ na káyɔngimbɛ na békédigimisimbɛ phɔtɔ kema nde agi? »
52 Báosikisia te: « Onde phɔtɔ ntɔa ka Galiláia? Cɔcɔa phɔ buku á Mokonga, ɔɔnande gea, ka baɔtu-nyɔngɔ moci nn'aɔtɔka n'atoki na Galiláia. »