Nke nde dágu n'etoa
8
1 Yéso â gǎkɛ oga nɛkɛ ka mamba Mijɛitúni. 2 Mama i mɔkɛsuɛ, â goto ongia k'endu á Mokonga. Bakpa bɔbhu báombikia. Yɛ, áoika ka odo, ka phɛa abɔ.3 Baphangigi-ɛɔphi na baPhaisáiɔ, báombhikia na nke n'agu n'etoa. Báombhisa nke ndɔ mosá á bakpa, 4 báongodea Yéso: «Mphangigi, nke nde agu n'etoa. 5 Subi á ɛɔphi ndea Mósa asósosi gea, bake bea bunde, bɛ́bɛtɛ n'ɛtɛ, bákuɛ. Cɔ, ɔbɛ, ogi bo?»
6 Dábaɔyɔnga bo katombaga akɛ gea, bántɔngɛ. Yéso â gǎkɛ ǒkiikisa, áodundua ka odo na miki á njaga. 7 Bii dábasui úsiaga akɛ, Yéso áǒmɛsia, áǒgea te: «Mmbe nna na bojede ka benu, akpangɛ makea akɛ ɛtɛ á ma mosá-mosá.» 8 Mpɔ â goto ǒkiikisa, áodundua ka odo. 9 Bii báɔki ye bo, batɔngi bɔbhu báojuana moci-moci. Bagbɛga báokpanga juana, Yéso áojiga sasakɛ, nke ndɔ n'amamege tɔ mosá akɛ. 10 Yéso áǒmɛsia, áongea nke ndɔ te: «Nke nde ca!Batɔngi nɛkɔ bá oa? Nna na ka bɔ nde aotenei nyɔngɔ akpɛ?» 11 Nke ndɔ áonsikisia te: «Mɔkɔta kabɔ moci nna oa.» Yéso áongea: «Eme phɔtɔ, kétenɛku nyɔngɔ nɛkɔ akpɛ. Cɔ, gǎ nɛkɔ. kɛ̌kɛnde, Kogeɛmbɛ ye bojede.»]
Yéso ande oanga ka mokonda
12 Yéso â goto ǒngodea bakpa te: «Nende oanga ka mokondaa. Mmbe aomobea, kátámbɛku tanda ka keiphe, abande ndiu na oanga á enda.»
13 BaPhaisáiɔ báongea: «Oǒmamea ka nyɔngɔ nɛkɔ sasakɔ! Bii abo, nyɔngɔ nɛkɔ nnde oomamea nna á doni.»
14 Yéso áǒsikisia te: «Nanga nemamea nyɔngɔ nɛmɔ sasani, nnde nɛɔyɔnga, ande doni. Nga, neoúbha ɔma nde netoki na ɔma nde neoga. Cɔ, benu gǎkɛ, bókoúbha ɔma nde netoki, na ɔma nde neoga. 15 Benu, botootena nyɔngɔ akpɛ ka kokpa. Eme gǎkɛ, kéontenea nkpa nyɔngɔ akpɛ. 16 Atúkoba na ne gǎkɛ otena nyɔngɔ akpɛ, ámbe ne tɔ otena ka kodoni nga, kéotena sasani, abhɛ mmbe amoteki, be tɔ na ye kimoci.
17 Subi á ɛɔphi nɛnu bádundu gea, bakpa babɛ bá ye omamɛa nyɔngɔ, ámbé nyɔngɔ nde bámamei ande á donib. 18 Nena bamamei babɛ: eme sasani, na Abhɛ, mmbe amoteki. » 19 Bâ gǎkɛ omúsia: « Cɔ, abhakɔ a oa?» Yéso áǒsikisia: «Bókóomǔbha eme, bókó phɔtɔ omúbha Abhɛ. Bo ye omǔbha eme, ámbé bomúbhande phɔtɔ Abhɛ. »
20 Yéso dáyɔngi nndɔ, bii dáogoisaga k'endu ndea Mokonga, k'ɔma nde dábaobhisaga sanduku á sadáka. Nkpa dákándhungi gǎkɛ nga, mbenɔ nɛkɛ dákábhikimbɛ.
Yéso atɔ̌mi nyɔgɔ á gǎ mɔtɛ á Abhakɛ
21 Yéso â goto ǒgea: « Cɔ, neoga. Bomokabande, bokuande gǎkɛ na bo phɔ́tɔ na bojede nɛnu. Bɔ́kɔ́ɔtɔka na boge kubii neoga. »
22 BaYúdha báɔyɔngaga sɔsɔbɛ abɔ gea: «Ande gea te ěkusande nga, dági ‹bɔkɔɔtɔka na boge kubii neoga.›»
23 Yéso áǒngodea be: «Bonde batɔa ka odo. Eme, ne gǎkɛ ntɔa á na kobha. Eme, ké ntɔa ka mokonda ndee. Benu ndiu báunge bonde batɔa ka mokonda. 24 Ka nyɔngɔ índɔ unge nenóngodi ye tɔ gea te, bokuande ka nyɔngɔ á bojede nɛnu. Nga, aobá́ na bókóbeeki gea te, ‹EME NENDE EME,› bokuande ka bojede nɛnuc. » 25 Mpɔ, báomúsia Yéso: « Onde ani? » Yéso áǒsikisia: «Netónongodi ye mosá. 26 Nena nyɔngɔ ásii á yɔnga na tena i akpɛ ka phɔanu. Cɔ, mmbe amoteki, ande ntɔa-doni. Nɛ tɔ ɔ̌tɔmia batɔa ka mokonda, nnde nɛɔki mɔtɛkɛ. »
27 Dábákáodigimisa gea dáɔyɔnga ka phɔa Abhɛ kɛ. 28 Mpɔ, Yéso áǒngodea: « Mbenɔ nde bontaisande Muna-Nkpa, boúbhande gea EME NENDE EME. Bâ phɔtɔ oúbha gea, kéogea kema ka kɔkɔta nɛmɔ sasani, ne gǎkɛ tɔ ɔyɔnga nnde Abhɛ dámogoisigi. 29 Mmbe atómoteki a kimoci n'eme. Kámodeketi sisani, ka nyɔngɔ nde, esa bhui, neogea kema nde am'bɔngɛi. »
30 Bii Yéso dáɔyɔnga bo, bakpa básii báom'beekea.
Toka ka kɔkɔbɛ á doni
31 Yéso áǒngodea baYúdha nde dábam'beeki áǒgea: «Aoba n'oboambi nyɔngɔ nɛmɔ, bonde bagoigi nɛmɔ doni. 32 Mpɔ, boúbhande kodoni, na kodoni ndɔ ánótokisande ka kɔkɔbɛ.»
33 Báonsikisia: «Besu, bende k'ɛbɔkɔti ndea Abhalaámud. Nkpa kásótugimbɛ mɔnɔ tanda. Cɔ, ɔɔtɔka n'osóngodi gea, betokande ka kɔkɔbɛ bo?» 34 Yéso áǒsikisia be: «Nenóngodi doni gea, nkpa bhuakɛ mmbe aogea bojede, ande nkɔbɛ á bojede. 35 Nkɔbɛ nn'aoika k'ekombo ndea mɔkɔta nɛkɛ esa bhui. Miki á ɔbɔkɔta aámbé aoika k'ekombo nɛkɛ esa bhui. 36 Aoba Muna-Mokonga n'anótokisi ka kɔkɔbɛ, botokande ka kɔkɔbɛ doni. 37 Eya, neoúbha gea te, bonde batɔa k'ɛbɔkɔti ndea Abhalaámu. Bo ndiu okaba moa ani ka nyɔngɔ nde, bókóobeekea nyɔngɔ nɛmɔ. 38 Nɛɔyɔnga nyɔngɔ nde nɛtɔ́ɔni mɔtɛ á Abhɛ. Benu gǎkɛ, boogea nnde abhanu dánongodi. » 39 Báonsikisia te: «Abhalaámu ande tatasu. » Yéso áǒgea: «Atúoba na bonde basukɔ á Abhalaámu doni, ámbé bɔtɔ́tɔtɔkisi ekuma nde dágie. 40 Cɔ, kɛ̌kɛ nde, nanga bii dénongodi nyɔngɔ á doni nde dɛ́ɔki mɔtɛ á Mokonga, botookaba moa ani. Abhalaámu dákági gǎkɛ bo. 41 Benu, bɔtɔɔbhɛdanaga ekuma ndea abhanu. » Bâ gǎkɛ ongea: «Béké bana-nka. Abhasu a tɔ mo, Mokonga. »
42 Yéso áǒgeae: «Atú oba Mokonga n'ande abhanu, ámbé dóbomokondi. Nga, détoki mɔtɛ á Mokonga, néobhika oani. Kébhiki k'eme sisani, yɛ ndiu aámbé dámoteki. 43 Ka nyɔngɔ sina nde bókóodigimisa nyɔngɔ nde neonongodea? A tɔ ka nyɔngɔ nde, bɔ́kɔ́ɔtɔka ɔka á nyɔngɔ nɛmɔ. 44 Bonde bana-Nketi, bo phɔtɔ okaba tɔtɔkisa á mɔphɛ á abhanu. Ande ntɔa-kaiso kpanga ka nkpangeɔ, nn'aomama ka nyɔngɔ nde ande á doni nga, kodoni nna subi akɛ. Mbenɔ nde aɔyɔnga mbɛa, nndɔ atɔ obhigo nɛkɛ ka nyɔngɔ nde yɛ, ande ntɔa-mbɛa n'ande phɔtɔ Abha-mbɛa. 45 Cɔ, eme ne gǎkɛ ɔyɔnga doni, ka bondɔ unge bókóomobeekea. 46 Cɔ, ka benu sina nde amɔtɔngande gea negi bojede? Kabɛ nɛɔyɔnga doni, nyɔngɔ sina nde bókóomobeekea? 47 Nkpa ndea Mokonga aɔɔka ɛsɔ á Mokonga. Kabɛ na bɔ́kɔ́ɔɔka, ande ka nyɔngɔ nde bókó batɔ á Mokonga. »
Yéso na Abhalaámu
48 BaYúdha báonsikisia Yéso gea: «Nna phɔ́tɔ doni unge beogea, onde MoSamalía n'ona bansombo? »
49 Yéso áǒsikisia: «Ké na bansombo. Nendiu on'dokomisa Abhɛ. Cɔ, benu, bókóomodokomisa. 50 Kéokaba boombia nɛmɔ. A ndiu na nkpa moci mmbe aomokabea u, na tenea ani nyɔngɔ. 51 Nenóngodi doni, aobá́ nkpa n'aambi nyɔngɔ nɛmɔ, kákuɛka ye tanda. »
52 Mpɔ baYúdha báongodea: « Kɛ̌kɛ nde beúbhi ye tɔ gea ona bansombo. Abhalaámu, na baɔtu-nyɔngɔ, báku. Ɔbɛ gǎkɛ, ogi, ‹aobá́ nkpa n'aambi nyɔngɔ nɛmɔ, kákuɛka ye tanda.› 53 Ande gea te, onde ngbɛga kɔnyɛnya tata asu Abhalaámu, mmbɔ aku ndɔ, na baɔtu-nyɔngɔ phɔtɔ? Cɔ, obɛ onde ani?»
54 Yéso áǒsikisia: «Aoba na nědokomisi sasani, nndɔ nna na kantíti. Abhɛ, mmbɔ bogi te ande abhanu, mmbɔ aámbé aomodokomisa. 55 Bókóomǔbha yɛ, eme aámbé nendiu omǔbha. Aoba na netegi kéomǔbha, ámbé nebande ntɔa-mbɛa bea benu. Cɔ, neomǔbha, ne phɔtɔ oamba nyɔngɔ nɛkɛ. 56 Tatanu Abhalaámu dátú na maseye bii dákanisi te, aɔnande esa nde nebhikaeka. Dáɔni gǎkɛ, mpɔ áoba na maseye. »
57 BaYúdha báongodea: « Kójusimbɛ tanda basaga nkama bɔku (50), aunge ogi te dɔ́mɔ̌ni ka Abhalaámu?» 58 Yéso áǒsikisia: «Nenóngodi doni, Mosá a bɔkɔtɛana á Abhalaámu, EME NENDE EME. »
59 Mpɔ, báɔbhɔnya ɛtɛ ka makeaga akɛ. Yéso â gǎkɛ ɔ̌sɔmɛana, áojuana k'endu á Mokonga.