Yéso anamisi n'dɔti
( Ɔna phɔtɔ Mat 9.1-8; Lóka 5.17-26)
2
1 Mbusa á b'esa abhɔa, Yéso áosikianaga na Kapɛɛnaúmu. Bakpa báɔɔka te a mɔtɛ bɔ. 2 Ka bondɔ, bakpa básii báodhondanaga oa, na ka bii bakpa dábabɔkani subi á endu phɔtɔ k'iso á mpume, Yéso n'aǒphɛa nyɔngɔ á Mokonga. 3 Mpɔ bakpa gena báobhika mɔtɛ á Yéso na bánkumbigi n'dɔti. 4 Dábákátɔki gǎkɛ bhiimisia á Yéso ka nyɔngɔ á bika á bakpa. Ka bondɔ, báodapha gǔ á endu, báobhaa ntɔndɔa, báondhidhisa n'dɔti ka nsinɔ n'ade k'eka. 5 Yéso aɔni ye beekea nɛbɔ, áongodea ndɔti te: «Mukuamɔ, bojede nɛkɔ aimiki.» 6 Cɔ, ka baphangigi-ɛɔphi bunde dábaiki oa, báoianaga subi abɔ te, 7 «Mogaa nde ayɔngi bo ka bó? Ambhómi Mokonga nga, ani mmbe aɔtɔka n'aími bojede na nna tɔndɔ Mokonga sasa akɛb?» 8 Kɛ̌kɛ ndɔ Yéso áoúbha ianaga abɔ. Mpɔ, áǒngodea: «Bona ianaga ndɔ ka měma anu ka bó? 9 Cɔ, kema sina nde aáphoo ka ngodea á n'dɔti te: ‹Bojede nɛkɔ aimiki›, na yɔnga: ‹Ma! Kumba eka nɛkɔ, ótambɛ!›? 10 Ka gea bóúbhɛ te, eme Muna-Nkpa, nena bukpɛkpɛ á íma á bojede ka mokonda.» Mpɔ, áǒphaia, áongodea n'dɔti te: 11 «Ma! Bhɛda eka nɛkɔ, ósikianɛgɛ mɔtɛ kɔ.» 12 Mɔngɔ moci, áoma, áokumba eka nɛkɛ, áojuana mosá á bakpa bɔbhu. Bɔ, báotangaaga, báombhebha Mokonga, báogea: «Bɛ́kɛ́ɔnimbɛ mɔnɔ k'inde!»Yéso amɔphani Láwi
( Ɔna phɔtɔ Mat 9.9-13; Lóka 5.27-32)
13 Yéso â goto oga ka mpɛphɛ á etuu Galiláia. Bakpa básii báobhika ondhonda. Yɛ, áǒphangiaga. 14 Cɔ, bii dátú otamba, áɔmɔ̌na Láwi,c Muna Aɔpháyɔ, n'aiki ka ntua á phendisaga á manjanja. Yéso áɔmɔphana, áongea: «Ómobea.» Kɛ̌kɛ ndɔ, Láwi áoma, áom'bea.
15 Mbusa, Yéso áoeaga mɔtɛ á Láwi. Baphendisigi-manjanja básii na batɔa-bojede báoeaga kimoci na Yéso na bagoigi nɛkɛ nga, bakpa básii á etéte ndɔ unge dábaom'bea. 16 BaPhaisáiɔ bunde bande baphangigi-ɛɔphi báɔni ye bii Yéso dátú oeaga na batɔa-bojede na baphendisigi-manjanja, báǒngodea bagoigi nɛkɛ te: «Yéso aoeaga na baphendisigi-manjanja na batɔa-bojede ka bó?»
17 Yéso aɔki ye muisiɔ nɛbɔ, áǒgea: «Basambi báunge bána siki á nsaku. Nna bunde bánaosamba. Kebhiki k'aphe á ɔphana á batɔa-bonjánja. Nebhiki ndiu ka ɔphana á batɔa-bojede.»
Yéso aɔphɛa ka nyɔngɔ á ika kanga á eaga ka nyɔngɔ á mɛma á Mokonga
( Ɔna phɔtɔ Mat 9.14-17; Lóka 5.33-39)
18 Esa moci, bagoigi ndea Yoáni na baPhaisáiɔ báɔika kanga á eaga ka nyɔngɔ á mɛma á Mokonga. Ka bondɔ, bakpa báondhonda Yéso, báomǔsia te: «Nyɔngɔ sina nde bagoigi ndea Yoáni na baPhaisáiɔ, báɔika kanga á eaga ka nyɔngɔ á mɛma á Mokonga, cɔ bagoigi nɛkɔ bákáogea bo ka bó?» 19 Yéso áǒsikisia te: «Batɔa-ɛkɛka báikimbɛ mɔnɔ kanga á eaga na mǒko á ɛkɛka a kimoci n'abɔ? Bɛɛndɔ. Ka mbenɔ bhui nde mǒko á ɛkɛka a kimoci na bɔ, bánaɔtɔka na báiki kanga á eaga. 20 Abande n'esa nde bámphuiande mǒko á ɛkɛka sɔsɔbɛ abɔ, k'esa ndɔ unge báikande kanga á eaga.»
21 «Nna na nkpa nde aophopha phaeka á bhɔngɔ á kɛ̌kɛ gǔ á bhɔngɔ á kala. Aogea bó, phaeka á bhɔngɔ á kěkɛ nnde báyami abhomande nnde á kala, bhomoka i áondanda phɛ̂. 22 Nna phɔtɔ na nkpa nde aodukia makana á kɛ̌kɛ subi á mboso á kalad. Aogea bó, makana á kɛ̌kɛ abhomande mboso. Makana na mboso bhui áoujukana. Akeni ndiu dukia á makana á kɛ̌kɛ subi á mboso á kɛ̌kɛ.»
Yéso ande Mɔkɔta á sabato
( Ɔna phɔtɔ Mat 12.1-8; Lóka 6.1-5)
23 Esa á sabátoe, Yéso na bagoigi nɛkɛ dábaɔnyɛ́nya ka ciko á nganɔf. Bagoigi nɛkɛ báokpanga kɔdaga á mbuka i ka mpɛphɛ á apheg. 24 Mpɔ, baPhaisáiɔ báongodea Yéso te: «Enjia phɔ! Bagoigi nɛkɔ báɔbhɛdanaga esa á sabato na bapheni bhɛdanaga k'esa ndɔ ka bóh?» 25 Yéso áǒsikisia te: «Bókótangimbɛ mɔnɔ kema nde Dhaúdhi na bakpa nɛkɛ dábagi mbenɔ nde dábáku na nja? 26 Dátú mbenɔ nde Abhiatái dátú ntobei-phɛa angbóngbó. Ka nyɔngɔ á nja, Dhaúdhi dángi subi á endu ndea Mokonga, áoea mokati á ɔphɛɔ. Â phɔtɔ ǒgabhea bakpa nɛkɛ. Nanga eea ndɔ dátú tɔ ka batobei-phɛa sasa abɔi.» 27 Yéso â phɔtɔ ɔ̌tɔmia te: «Mokonga dábhisi sabato kaphɔa á nkpa. Dákámbhisi gǎkɛ nkpa kaphɔa á sabato. 28 Ubhani gea te Muna-Nkpa aámbé ande phɔtɔ Mɔkɔta á sabato.»