Yéso anamisi nkpa njaga akɛ n'aphɛphi
( Ɔna phɔtɔ Mat 12.9-14; Lóka 6.6-11)
3
1 Mbusa i, Yéso â goto ongia subi á endu á bɔphɛi. Kó, nkpa moci dátú na njaga akɛ n'aphɛphi. 2 BaPhaisáiɔ nde dábatú oa bâ gǎkɛ ɔmɔnjia bhǐbhíbhí ka gea te, báɔnɛ phɔ́ aobá́ n'anamisande n'dɔti ndɔ esa á sabato mpɔ, bábɛ ye tɔ na nyɔngɔ á tɔnga akɛ ně. 3 Yéso â gǎkɛ ongodea n'dɔti te: «Ma mosá á bakpa!» 4 Mpɔ áǒbusia te: «Cɔ, ɛɔphi nɛsu ka nyɔngɔ á sabato agi bo? Kabɛ gea kema ánjá, kabɛ kema ájede? Kabɛ amisa á nkpa, kabɛ kusa akɛ?» Bakpa bɔbhu bâ gǎkɛ ɔkɔba phio! 5 Yéso áǒtimba n'iso áǒenga n'esuia, áoba na bɔmbɛ ka nyɔngɔ á měma abɔ akpɛ. Áongodea n'dɔti te: «Cɔ, nanoa njaga akɔ.» Áonanoa njaga akɛ, áoama. 6 Kɛ̌kɛ ndɔ, baPhaisáiɔ báojuana, báoga odhondana na bakpa ndea Moamɛ Ɛlɔ́dhɛ ka maca. Báokaba moangɔ á mosa á Yéso.Usɛsɛ á bakpa báom'bea Yéso
7 Yéso na bagoigi nɛkɛ bâ gǎkɛ otoka sɔsɔbɛ á bakpa ndɔ. Báoga ka mpɛphɛ á etuú á ka Galiláia. Bakpa básii phɛ̂ báom'bea na bátoki na Galiláia, Yudhɛ́a, 8 kenombe á Yɛusalɛ́ma, Idhumɛ́a, kubh'ibo Yɔɔdháni na bunde á ka mpɛphɛ á kenombe á Tílɔ n'inde á ka Sidhɔ́na. Bɔbhu báombhikia Yéso nga, dábaɔki ekuma bhui nde dátúogea.
9 Cɔ, Yéso áǒngodea bagoigi nɛkɛ, bábhisɛ k'akɛ koko ka gea, bakpa bákam'bɔkanisɛmbɛ. 10 Báɔni ye bii Yéso ěamisi bakpa básii, basambi bɔbhu báokamisaga sɛkɛda ka mpɛphɛ akɛ ka gea, bɔbhu bámbhooɛ ka yɛ. 11 Buangbo dábatú na kukwa á bansombo. Bansombo ndɔ, bii bámɔ̌ni ye Yéso, báogua k'ecinji akɛ, báokoga, báogea: «Obɛ onde Muna-Mokonga.» 12 Yéso â gǎkɛ ǒimisia akpɛ gea, bákaubhisɛmbɛ gea, ande Muna-Mokonga.
Yéso ěsɔmbu bateki nɛkɛ
( Ɔna phɔtɔ Mat 10.1-4; Lóka 6.12-16)
13 Mpɔ Yéso áotaia gǔ á mamba, áɔ̌bɔphana bunde dékondi sɔmbɔa ka bɔ ka usɛsɛ á bakpa ndɔ, báoga kubii yɛ aɔ. 14 Aɔ̌sɔmbɔa sɔsɔbɛ abɔ bakpa nkama na babɛ (12), áǒsua bateki nɛkɛa ka gea bátambɛ kimoci na yɛ na teka abɔ ka gǎ á phɛa bakpa. 15 Â phɔtɔ ǒbopha kɔkɔta á beaga á bansombo subi á bakpa. 16 Bateki nɛkɛ nkama na babɛ (12) bunde dɛ́sɔmbu ina abɔ aunge: Simɔ́ni (mmbe dánsu Pɛ́tɛɛb), 17 Yakɔ́bɔ muna-Jɛbhɛdháiɔ, na muna-amakɛ Yoáni, (bundɔ babɛ ndɔ, Yéso désu ina Boanɛ́gɛ, ande gea te, báɔka á mbuac,) 18 Andɛɛ́, Philípɔ, Batɔlɔmáiɔ, Matáiɔ, Tɔmá, Yakɔ́bɔ muna-Alpháiɔ, Tadhɛ́ɔ, Simɔ́ni, manei ekuna nɛkɛ, 19 na Yúdha Isikaliɔ́tad, mmbe dántɔngi Yéso.
Batɔa á k'ekombo ndea Yéso bágeɔmbhɛda
20 Mpɔ, Yéso na bagoigi nɛkɛ, báosikianaga mɔtɛ bɔ. Bakpa básii bâ goto odhondana kó na ka bii Yéso na bagoigi nɛkɛ bákábe ye na ɔma á eaga. 21 Mbenɔ nde batɔa á k'ekombo nɛkɛ báɔki ye nyɔngɔ ndɔ, báoga k'aphe á bhɛda akɛ nga, dábaogea: «Mɔ̌ akɛ nna ye anja.»
Bánsu Yéso Bhɛljɛbhúli
22 Mpɔ, baphangigi-ɛɔphi bunde bátoki ka kenombe Yɛusalɛ́ma báogea: «Bɛljɛbhúli,e mɔkɔta á bansombo, a subi á Yéso. Yɛ aǒbeaga bansombo ka bukpɛkpɛ á Bɛljɛbhúli.» 23 Yéso â gǎkɛ ɔ̌bɔphana, áǒngodea mɛní nnde: «Cɔ, Sɛtáni aɔtɔka n'ěbigi sasa akɛ bo? 24 Nga aobá́ bakpa á ka koboamɛ moci na bákatanigi ngungu abɔ, koboamɛ ndɔ kámɛku. 25 A phɔtɔ oba batɔa-ekombo moci na bákatanigi ngungu abɔ, ekombo ndɔ kámamɛku. 26 Aoba Sɛtáni n'aǒmanisa sasa akɛ, bukpɛkpɛ nɛkɛ n'akatanigi, koboamɛ nɛkɛ kámɛku. A ye tɔ sungiaga akɛ.
27 Cɔ, nkpa nn'aɔtɔka n'angi subi á endu ndea ntɔa-bukpɛkpɛ ka uta nkumba nɛkɛ na kám'boegembɛ phɔ. A ye om'boaga, mpɔ amutande nkumba nɛkɛ. 28 Nyɔngɔ nde nɛɔnɔ́tɔmia, ande doni. Mokonga aimande bojede bhui ndea bakpa, na mbhóma bhui nde dábambhómi ně. 29 Nkpa nde a gǎkɛ ombhóma Měma á Mokonga, Mokonga káimɛeka tanda bojede ndɔ. Bojede nɛkɛ aikande mɛyɔ.»
30 Yéso déngodi bo nga, dábagi te: «Bansombo báiki subi akɛ.f»
Bamuna-amakɛ na Yéso bande ba ani?
( Ɔna phɔtɔ Mat 12.46-50; Lóka 8.19-21)
31 Mpɔ, ama-Yéso na bamuna-amakɛ, báobhika omama ka nsɛngɛ. Báonteka nkpa ka ɔphana akɛ. 32 Usɛsɛ á bakpa dábantimbi Yéso, bâ gǎkɛ ongodea te: «Cɔ, amakɔ, na bamunamakɔ, bá na nsɛngɛ, báokokaba.» 33 Aǒsikisia te: «Ayi na bamunayi bánde ba ani?» 34 Mpɔ, áǒtimba n'iso bakpa ndɔ dábantimbi, áǒngodea te: «Ayi na bamunayi báunge. 35 Nga, nkpa nde aotambea bíndɔ Mokonga akondi, mmbɔ aámbé ande munayi, awani na ayi.»