Mɛní á nkonanigi
( Ɔna phɔtɔ Mat 13.1-9; Lóka 8.4-8)
4
1 Yéso dákpangi goto goisaga ka mpɛphɛ á etuú á ka Galiláia. Usɛsɛ ángbó á bakpa báodhondanaga bhíbhí akɛ. Ka bondɔ, áokambea ka koko, áɔika kau. Bakpa dábatú ka mocii ibo. 2 Mpɔ, áǒgoisaga nyɔngɔ ásii ka mɛní. Áǒngodea b: 3 «Cɔ, ɔkani! Nkpa moci dáge omisia mbo. 4 Cɔ, mbenɔ nde dátú omisia u, nɛngbo áogua ka mpɛphɛ á aphe, bambǔ báobhika, báoea u. 5 Nɛngbo áogua k'ɔma á ɛtae nnde dákátú na odo ásii. Mbo ndɔ áɔtɛa mbangɔ nga, odo ndɔ dákátú ásii. 6 Mbenɔ nde mani abɛti ye akpɛ, áotoboa u. Mbo kau áɔɔmɔkaka nga, dákátú na miigi. 7 Nɛngbo áogua ka odo á ngenge. Ngenge áɔtɛa, áophiphisa mbo kau, kagɔmbɛ ye. 8 Nɛngbo áogua ka odo anja. Aɔtɛa, áophonda, áɔgɔmbisa. Ejoko moci áɔgɔmba mbuka nkama isaɔ (30), nɛngbo nkama ngianjaga (60), nɛngbo mia moci (100). 9 Cɔ, mmbe a na kecue ka ɔkapha, áɔkɛ.»Yéso aɔyɔnga ka mɛní ka bo?
( Ɔna phɔtɔ Mat 13.10-17; Lóka 8.9-10)
10 Bii Yéso na bagoigi nkama na babɛ (12) na bunde dátúotámbaga na bɔ dábatú sasa abɔ, báomǔsia kantíti á mɛní. 11 Yéso áǒsikisia te: «Mokonga anoúbhisi nyɔngɔ á bɔsɔmɛa á koboamɛ nɛkɛ. Ka bundɔ bá gǎkɛ na nsɛngɛ, nyɔngɔ ɛ̌sɔmɛani ka mɛní. 12 Ka bondɔ unge,
«Báoenga, bákaɔnɛ mɔnɔ gǎkɛ.
Báɔɔka, bákadigimisɛ.
Atuoba na bádigimisi, ámbé báekěti ka Mokonga.
Yɛ, áoíma bojede nɛbɔa.»
Yéso aɔtɔmiaga bhase mɛní á nkonanigi
( Ɔna phɔtɔ Mat 13.18-23; Lóka 8.11-15)
13 Mpɔ, Yéso áǒgea te: «Ai! Bókódigimisimbɛ mɛní nde? Cɔ, bodigimisande gǎkɛ mɛní nɛngbo bhui bo? 14 Mbo nde nkpa ndɔ dátú ophanja, ande mbino á Mokonga. 15 Mbo nɛngbo dágu ka mpɛphɛ á aphɛ. Mpɛphɛ á aphe ndɔ, a bea bakpa nde báɔɔka mbino á Mokonga. Kanga iphia, Sɛtáni aophuia mbino kau subi abɔ. 16 Mbo nɛngbo dágu k'ɔma á ɛtae nde dákátú na odo ásii. Odo ndɔ a bea bakpa nde báɔɔka mbino á Mokonga. Báobeekea u mɔngɔ moci na maseye. 17 Aoba ka mbenɔ á kpaa á minyɔ na tambaga ka nyɔngɔ á mbino á Mokonga, bâ ndiu okamba u. Báogua nga, mbino á Mokonga dákángisi miigi subi abɔ. 18 Mbo nɛngbo dágu ka odo á ngenge. Odo á ngenge ndɔ a bea bakpa bunde báɔɔka mbino á Mokonga. 19 Mbino ndɔ kabɛ na ɔma subi abɔ, ka nyɔngɔ á ianaga á kema á ka mokonda. Bá gǎkɛ ǒdhemisaga n'ɛtɔi na konda kema danga-danga. Nndɔ bhui áophiphisa mbino á Mokonga subi abɔ. Kagɔmbɛ ye. 20 Mbo nɛngbo dágu ka odo ánjá. Odo ndɔ, a bea bakpa bunde báɔɔka mbino á Mokonga, báobeekea, áɔgɔmba subi abɔ. Moci áɔgɔmba mbuka nkama isaɔ (30), nɛngbo nkama ngianjaga (60), nɛngbo mia moci (100).»
Mɛní ɔ́bhɛa
( Ɔna phɔtɔ Lóka 8.16-18)
21 Mbusa á oa, Yéso â phɔtɔ ǒbuisia te: «Nkpa aɔtɔka n'abhiki n'ɔbhɛa ábhisa subi á mbeka kabɛ kusi á eka? Bɛɛndɔ. Bá ndiu otoboa ka bhisa i ka ngeɔb. 22 Nga, nna na ka kema á bɔsɔmɛa nde káɔnɛkanɛku. Nna phɔtɔ na ka nyɔngɔ á bɔsɔmɛa nde kángodokanɛku. 23 Cɔ, mmbe a na ketue ka ɔkapha, áɔkɛ.» 24 Mpɔ, Yéso áǒgea te: «Óengani na nyɔngɔ nde bɔɔɔka. Moangɔ nde bɔɔbhɛda ka tena á nyɔngɔ á bakpa bunɛngbo aunge Mokonga abhɛdande ka tena á nyɔngɔ nɛnu. Ayamɛande phɔtɔ. 25 Nga, mmbe ana ka kema aámbé báyamɛande k'ínɛkɛ. Mmbe nna gǎkɛ na ka kema, bámutande n'ǐndɔ aně.»
Mɛní á mbo nde ɛ̌tɛɛi sasakɛ
26 Yéso â phɔtɔ ogea: «Koboamɛ ndea Mokonga akengeani na mɛní ndee: Nkpa dáphanji mbo ka ciko. 27 Ka mbenɔ nde nkpa ndɔ áoda kiipha na jujuka kam'bimba, nna gǎkɛ oúbha mbenɔ nde mbo aɔtɛa na mɔta. 28 Nga, odo aɔtɛisa sasa akɛ: Ngbanga, mpɔ ejoko á mbuka ka nkɔgɔ ndɔ. 29 Mbuka â ye tɔ ɔmɔta, báokpanga dungua i na nkumba á dungu nɛbɔ nga, mbenɔ á dungu ajuc.»
Mɛní á mbo á Aladháli
( Ɔna phɔtɔ Mat 13.31-32, 34; Lóka 13.18-19)
30 Yéso â phɔtɔ ogea: «Bekenganisande koboamɛ ndea Mokonga na kema sina? Akengeani gǎkɛ na mɛní sina? 31 Cɔ, ande bea mbo, nkpa n'akoni ka ciko. Mbo ndɔ a bea Aladháli. A gǎkɛ abhɔa phɛ̂ ka mbuka bhubhui á ka mokonda. 32 A ye gǎkɛ oba na bákoni, áɔtɛa, áoba ángbóngbó phɛ̂ konyɛ́nya mbo bhubhui nde bákoni ka ciko. Aɔtɛisa ntambi-ntambi ángbóngbó nnde bambǔ báɔtɔka na báphɛ̌ki íbɔ abɔ kau ka nyɔngɔ á imbiɔ i.»
33 Yéso dátú gǎkɛ ɔ̌tɔmia bakpa mɛní danga-danga ka gea te bádigimisɛ u. 34 Yéso dákátú okamba mɛní ka bɔphɛi nɛkɛ. Â gǎkɛ ǒngodeaga bagoigi nɛkɛ kantíti i bhui ka bɔsɔmɛa.
Kɔkɔta á Yéso gǔ á sumbu
( Ɔna phɔtɔ Mat 8.23-27; Lóka 8.22-25)
35 Dátú ye ɔgɔgɔ ésa ndɔ, Yéso áǒngodea bagoigi nɛkɛ: «Béjabhɛni kubhi ndó.» 36 Báǒkamba bakpa, báoga ka koko nde Yéso dátú kau. Bakpa buangbo, bâ phɔtɔ oga na koko nɛngbo. 37 Oa, sumbu áobhika. Kɛtɛmbɔ akpɛ áobhɛta, ibo ásii â ye tɔ ongia subi á koko. 38 Yéso dátú gǎkɛ oda nci á na bɔba á koko, n'abhisi mɔ akɛ gǔ á monga. Báonjujukisa na gea akɛ te: «Mphangigi, nna kema k'obɛ aobá́ nebesi?» 39 Yéso ajujuki ye, áokea maiphianɔ, áongodea ibo étuu te: «Phɔnga phio!» Maiphianɔ áophɔnga, etuu áɔkɔba phio! 40 Mpɔ, Yéso áǒngodea: «Botú obanga ka bo? Bókóbimbɛ na beekea?» 41 Bagoigi bâ gǎkɛ obanga phɛ̂, báoianaga gea: «Ani mbe? Maiphianɔ n'ibo, áɔmɔ̌ka.»