Yéso anamisi ntɔa-kukua á bansombo
(Ɔna phɔtɔ Mat. 8.28-34; Lóka 8.26-39)
5
1 Mbusa i, Yéso na bagoigi báokidia kubhi á etuu, ka nji ndea baGɛási. 2 Yéso áotoka subi á koko. Kɛ̌kɛ ndɔ, ntɔa-kukua á bansombo moci áotoka na bhotaa ka dhondana na Yéso. 3 Ɔma á buiki nɛkɛ dátú ka bhota. Dákátú ye na nkpa nde aɔtɔka boaga akɛ nanga ába na ngoi á ngɔa. 4 Nga, dátú okakoaga ngoi á ngɔa nde dábatú omboaga ně k'écinji. Nna na nkpa nde dáɔtɔka phɔngisa akɛ. 5 Keiphe n'esa, dátú ɔkɔba ka bhota na ka mamba, n'aokoga, n'aǒtumaga n'etae. 6 Bii ntɔa-kukua á bansombo ndɔ amɔ̌ni ye tɔ Yéso danga, áoga mbangɔ kubii, áogua k'ecinji akɛ, 7 áokoga akpɛ phɛ̂: «Eke nde be n'ɔbɛ kau Yéso Muna-Mokonga mmbe a na kɔkɔta bhui? Nɛɔmɛmi k'ina á Mokonga, komotambisɛgɛmbɛ!» 8 Nga, Yéso dángi te: «Bansombo ca! Juanani subi á nkpa ndee!» 9 Mbusa, Yéso áomǔisia: «Ina akɔ ande ani?» Áonsikisia te: «Ina ani ande Ekombo á batɔa-emani nga, bebiki phɛ̂.» 10 Bansombo ndɔ, bâ gǎkɛ on'dengemisaga Yéso gea: «Kósóbeɛgɛmbɛ danga á nji.»11 Cɔ, bhíbhí á mamba nde dátú oa, nsamba ángbó á bangɛab dábatú oeaga. 12 Bansombo ndɔ bâ phɔtɔ on'dengemisaga Yéso te: «Ósoteka gea béngiɛ subi á bangɛa ndosi.» 13 Yéso áǒsosea. Mpɔ báojuana subi á ntɔa-kukua á bansombo, báongia subi á bangɛa. Nsamba á bangɛa ndɔ báodhidha mamba mbangɔ, báoguia subi á ibo, báosia. Dábatú bangɛa bea ɛɛphu ibɛ (2.000). 14 Babondigi-bangɛa báɔni ye bo, báotɛa, na gǎ tɔmiaga nyɔngɔ ndɔ ka kenombe na ka nji abhɔbhɔa. Mpɔ, bakpa báoga k'aphe á digimisa á nyɔngɔ nde dágeani. 15 Báobhika bhíbhí á Yéso, báɔmɔ̌na ntɔa-kukua á bansombo básii n'aiki ka odo, n'aɔli bhɔngɔ anja, n'aye tɔ oúbhapha. Bakpa ndɔ bâ gǎkɛ oba na kɔbɔbɔkɔ. 16 Cɔ, bundɔ dábaɔni nyɔngɔ ndɔ, báɔ̌tɔmia badhabɔ nyɔngɔ nde dátɔtɔkɛani ka phɔa á ntɔa-kukua á bansombo na ka phɔa á bangɛa. 17 Ka bondɔ, báokpanga dengemisaga á Yéso te, átokɛ ka nji nɛbɔ. 18 Mbenɔ nde Yéso dáokambea ka koko, nami ka kukua á bansombo ndɔ áon'dengemisaga gea, bágɛ na yɛ. 19 Yéso kabeekeɛ. Â ndiu ongodea te: «Gǎ mɔtɛ akɔ, ɔ́tɔmiɛ bakpa nɛkɔ kema bhui nde Mɔkɔta Mokonga agi k'obɛ na bii aokui ngomi.» 20 Yɛ, áoga nɛkɛ, áokpanga tɔmia nyɔngɔ bhui nde Yéso dági kaphɔa akɛ. Áɔtɔmiaga ka nji Dekapɔ́le. Bakpa bɔbhu báotangaaga.
Yéso ěamisi nseka ndea Yaílɔ na nke nde dátú na kukua á juanaga magia
(Ɔna phɔtɔ Mat 9.18-26; Lóka 8.40-56)
21 Mbenɔ nde Yéso dákai goto ka koko kubhi á etuú, usɛsɛ á bakpa básii báodhondanaga bhíbhí akɛ n'aka motii á ibo. 22 Nkpa moci áokidia ina akɛ Yaílɔ. Dátú ka bakɔta á endu á bɔphɛi ndea baYúdha . Mbenɔ nde dámɔ̌ni Yéso, áogua k'ecinji akɛ, 23 áon'dengemisaga phɛ̂ na gea akɛ te: «Miki á nseka nɛmɔ aogea ákuɛ. Bhika óbhisɛ njaga akɔ gǔ akɛ ka gea, áamɛ na áendɛ.» 24 Mpɔ, Yéso báoga na yɛ. Usɛsɛ á bakpa básii báom'bea na báom'bɔkanisaga.
25 Cɔ, nke moci dátú sɔsɔbɛ abɔ, n'aiphi na kukua á juanaga á magia ka basaga nkama na babɛ (12). 26 Dátú otambaga ka gǎ mɔtɛ á basaku básii, áɔgɔba bangɔa nɛkɛ bhui kanga á ama. Kukua â ndiu ɔntɔka. 27 Nke ndɔ áɔɔka bakpa na báoabha ka phɔa Yéso. Mpɔ áongia subi á usɛsɛ á bakpa bunde dábaom'bɔkanisaga Yéso. Áodhunga bhɔngɔ ndea Yéso mbusa akɛ. 28 Nga, nke ndɔ dáyɔngi ka měma akɛ gea: «Aoba na nedhungi phɔ́taa ka bhɔngɔ ndea Yéso, neamande.» 29 Kɛ̌kɛ ndɔ tɔ, magia ndɔ dátú ojuana, áotenekeana. Yɛ, áǒyɔka ka nyama akɛ gea aami ka tambaga nɛkɛ. 30 Kɛ̌kɛ ndɔ tɔ Yéso áɔ̌yɔka gea ka bukpɛkpɛ antoki. Aǒphaia ka nkindi á usɛsɛ á bakpa, áǒgea te: «Ani mmbe adhungi bhɔngɔ nɛmɔ?» 31 Bagoigi nɛkɛ báonsikisia te: «Ai! Kɔ́máɔɔna usɛsɛ á bakpa bii báobɔkanisi nde? Oosoúsia gea te: ‹Ani mmbe amodhungi?›» 32 Yéso â gǎkɛ ǒtimaneaga ka gea ámɔ̌nɛ nkpa nde agi kema ndɔ. 33 Bii nke ndɔ aubhi ye gea aami, áobanga, áoekanaga, áobhika ogua k'ecinji á Yéso, áongodea nyɔngɔ bhui á doni. 34 Mpɔ, Yéso áongodea te: «Nseka, beekea nɛkɔ akoamisi. Cɔ, gǎ ka bɔjɛjɛ, oami ka kukwa ndɔ.»
35 Bii Yéso dá phɔ́tɔ ɔyɔnga na nke ndɔ, bakpa ndea Yaílɔ, báokidia, báongea te: «Kɔ́nɛisɛgɛmbɛ mphangigi nga, nseka nɛkɔ a ye ku.» 36 Yéso dákábhisi gǎkɛ měma ka nyɔngɔ ndea bakpa ndɔ, â tɔ ongodea Yaílɔ te: «Kɔ́bɛmbɛ na kɔbɔbɔkɔ, bá tɔ na beekea.» 37 Yéso dákábeeki ka bakpa ágɛ na yɛ, tɔndɔ: Pɛ́tɛɛ, Yakɔ́bɔ na Yoáni, muna-amakɛ na Yakɔ́bɔ. 38 Bii bákidi ye mɔtɛ á Yaílɔ, Yéso áɔ̌bɔna bakpa na bayomboki na báogama na koga akpɛ. 39 Yéso áongia subi á endu. Aǒgea te: «Nyɔngɔ sina nde boogea eongo kau, n'oboogama? Nseka ndɔ káku. A ndiu tɔ ka tɔ̌.» 40 Bakpa nde dábatú oa, báɔntɛbhɛa. Yéso â gǎkɛ ǒjuanisa bɔbhu, â tɔ ojiga n'abha-miki n'amakɛ na bunde dábage na yɛ. Báongia kubii dábabhisi mǒnda á miki. 41 Yéso áondhunga miki ndɔ ka njaga, áongodea ka yɔngɛa nɛbɔ: «Talita kumc!» Ande gea te: «Nseka, nekongodi, ómesia!»