Malíkɔ 6

Batɔa á ka Najalɛ́ti bákám'beeki Yéso

( Ɔna phɔtɔ Mat 13.53-58; Lóka 4.16-30)

1 Mbusa i, Yéso áotoka k'ɔma ndɔ, áoga na Najalɛ́ti nji nɛkɛ á bɔkɔtɛana, bagoigi nɛkɛ báom'bea. 2 Abi ye esa á sabato, Yéso áokpanga phɛa subi á endu á bɔphɛi nɛbɔ. Cɔ, bunde dábatú ɔɔka bɔphɛi ndɔ dábabiki. Báotangaaga, báogea te: «Mogaa nde atoki na kema nde bhui oa? Nkpa sina nde amophi kɔbɔngɛ na bukpɛkpɛ á tɔtɔkisa ketangaɔ b'inde? 3 Nna phɔ́ ntɔa-bɔi á mɔphɛkɔ aámbé? Muna-Malía, muna-amakɛ na Yakɔ́bɔ, Yɔ́sɛ, Yúdha na Simɔ́ni? Cɔ, bawakɛ bána sɔsɔbɛ asu?» Ka bondɔ unge, dábákám'beeki. 4 Mpɔ, Yéso áǒgea te: «Mɔtu-nyɔngɔ ana bokutú ɔma bhui, nna gǎkɛ ně ka nji nɛkɛ á bɔkɔtɛana, batɔa á k'ekombo nɛkɛ na ekombo nɛkɛ.» 5 Oa,Yéso dákátɔki ye tɔtɔkisa ka ketangaɔ, tɔndɔ nndɔ á bhisa á njaga akɛ gǔ á basambi danga-danga ka amisa á ka bɔ. 6 Â phɔtɔ kotangaaga ka nyɔngɔ á bakpa ndɔ bá na kanga á beekea.

Yéso ěteki bateki

( Ɔna phɔtɔ Mat 10.5-15; Lóka 9.1-6)

Mbusa, Yéso áotimba nji bhui nde a bhǐbhíbhí á Najalɛ́ti n'aǒphɛa bakpa. 7 Aɔ̌bɔphana bateki nɛkɛ nkama na babɛ (12), áǒteka babɛ-babɛ, áǒbopha kɔkɔta gǔ á bansombo. 8 Aǒsosɛa gea te, bákabhɛdɛmbɛ ka kema ka tamba. Bábhɛdɛ ndui tɔ motumbɔ. Bákábhɛdɛmbɛ mokati, maibɔta na bangɔa subi á njɔmbi nɛbɔ. 9 Báɔlɛ biato. Bákáɔlɛmbɛ gǎkɛ ngɔmbɛ ibɛ-ibɛ.

10 Yéso â goto ǒngodea te: «Aoba na bokidi ɔma moci, ikani subi á endu nde bánosesi kau na ka bii bomɛande. 11 A gǎkɛ oba na bákánosesi ka nji moci na bákáɔnɔ́ɔka, tokani bei, titiagani mpusu á odo bhui nde a k'ecinji anu ka úbhisa abɔ gea te nyɔngɔ ěguiaeka.» 12 Mbusa i, bateki báoga, báɔ̌tɔmia bakpa te: «Kětiani tambea anu.» 13 Báǒbeaga bansombo básii subi á bakpa, báǒsia batɔa-kukwa básii gamba, báoama.

Kukua á Yoáni M'batisi

( Ɔna phɔtɔ Mat 14.1-12; Lóka 9.7-9)

14 Ka mbenɔ ndɔ, moamɛ Ɛlɔ́dhɛ dáɔki na báɔyɔngaga ka phɔa Yéso nga, ina akɛ dáubhikani ɔma bhui. Bakpa moci-moci báɔyɔnga gea: «Yoáni M'batisi ajujuki ka kukwa sɔsɔbɛ á basi. Ka bondɔ unge, ana bukpɛkpɛ á tɔtɔkisa á ketangaɔ.» 15 Buangbo báogea te: «Ande Ɛlía.» Bunɛngbo goto te: «A bea ká baɔtu-nyɔngɔ á kala.» 16 Ɛlɔ́dhɛ, bii aɔki ye na báɔyɔnga nyɔngɔ á Yéso, áogea te: «Ai! ande Yoáni M'batisi! Mmbɔ netenisima mɔ̌ akɛ aámbɔ ajujuki ka kukwa!»

17 Nga, Ɛlɔ́dhɛ aámbé dáeteki bakpa bándhungɛ Yoáni. Áongisisa subi á mekakɔ na bám'boege. Ɛlɔ́dhɛ dági bo ka nyɔngɔ á nkakɛ Ɛlɔdhía, mmbe muna-amakɛ Philípɔ dámuki phɔ́ mosá. Mbusa i, Ɛlɔ́dhɛ â goto omuka. 18 Yoáni dángodi Ɛlɔ́dhɛ te: «Kákeni ómukɛ nka muna-amakɔ.» 19 Ɛlɔdhía áobá na nginí ka phɔa Yoani, áokaba kusisa akɛ. Dákátɔki gǎkɛ. 20 Nga, Ɛlɔ́dhɛ dáom'banga Yoani. Dáubhi gea te, Yoáni ande ntɔa-doni na ntɔa-bonjánja. Ka bondɔ, áonamba. Mbenɔ nde dáɔki, áotangaaga ka boabhi ndea Yoani nanga bii dáokonda ɔka á yɔnga akɛ phɛ̂. 21 Cɔ, esa moci, Ɛlɔ́dhia áɔtɔa mbenɔ ánjá ámoa Yoani. Dátú ka jaí á kanisia esa á bɔkɔtɛana á Ɛlɔ́dhɛ, bii dáobɔngisia eea ka bakɔta á emani ndea Ɛlɔ́dhɛ na bakɔta á kobɔamɛ nɛkɛ na bakɔta á Galilaía, báokidia ka jaí kau. 22 Oa ndɔ, nseka ndea Ɛlɔdhía áongia ka maseye, áobina mosá á bakpa bɔbhu. M'bina kau aɔm'bɔngɛa Ɛlɔ́dhɛ na bakpa nde dátú na bɔ ka maseye. Mpɔ, Moamɛ Ɛlɔ́dhɛ áongodea nseka ndɔ te: «Ɔmɔmɛma kema nde okondi, nekophande.» 23 Ɛlɔ́dhɛ â phɔtɔ kɔɔpha gea: «Kema bhui nde ɔmɔmɛmande, nanga ába gbutuka á koboamɛ nɛmɔ, nekophande.» 24 Mpɔ, nseka ndɔ, áojuana, áongodea amakɛ te: «Kema sina nde okondi nɛ́mɛmɛ?» Amakɛ áonsikisia te: «Mɛma tɔ mɔ̌ á Yoáni M'batisi.» 25 Nseka ndɔ áokamisaga sikianaga kubii Ɛlɔ́dhɛ aɔ. Aɔmɛma gea: «Nekondi kɛ̌kɛ nde, ómopɛ mɔ̌ á Yoáni M'batisi k'ɔphɛphɛ.» 26 Ɛlɔ́dhɛ áoba na ngomi phɛ̂. Nanga bo, ka nyɔngɔ á ɔphá nde dáɔphí mosá á batɔa-jaí, moamɛ dákákondi ye kpɛma na mɔ̌ á Yoani. 27 Kɛ̌kɛ ndɔ tɔ áonteka ntɔa-emani moci ka bunde dábaonamba. Áonsosea gea te, ábhikɛ na mɔ̌ á Yoáni M'batisi. Ntɔa-emani ndɔ áoga, áotena mɔ̌ akɛ ka mekakɔ, 28 áobhika na mɔ̌ ndɔ k'ɔphɛphɛ, áomopha nseka. Mpɔ nsɛka ndɔ áoga omopha amakɛ. 29 Bii bagoigi ndea Yoáni báɔki ye nyɔngɔ ndɔ, báobhika ɔbhɛda mǒnda akɛ. Báoga oúmba u.

Yéso aǒisa bǒko ɛlɛphu bɔku (5.000)

( Ɔna phɔtɔ Mat 14.13-21; Lóka 9.10-17; Yoáni 6.1-14)

30 Mbusa i, bateki ndea Yéso báosikianaga, báodhondanaga ka mpɛphɛ akɛ. Báɔntɔmiaga ekuma bhui nde dábagi n'inde á phɛa á bakpa. 31 Mpɔ, Yéso áǒngodea te: «Bhikani sasa anu, beikɛ ka mpɛphɛ, ka nkanda Bóumbiɛ abhɔa.» Nga, bakpa básii dábaokidia, na bunɛngbo báoga. Yéso na bagoigi nɛkɛ, bákábɛ ye na mbenɔ á eaga. 32 Ka bondɔ, báokambea ka koko, báoga sasabɔ ka nkanda. 33 Bii bakpa básii báɔni ye gǎkɛ Yéso na bagoigi na básɛi, báoúbha ɔma nde báge. Báǒbea na báɔnyɛ́nya n'ecinji kubhi . Báǒtenisia mbangɔ, báokidia mosá. Dábatoki ka nji bhui.

34 Bii Yéso aki ye ka koko, áɔɔna usɛsɛ ángbó á bakpa, áǒkuia ngomi nga, dábatú bea bamɔgɔgɔ kanga á m'bondigi. Ka bondɔ, áokpanga goisaga abɔ kema ásii. 35 Bii esa dágɔgɔmani, bagoigi nɛkɛ báondhonda, báongea te: «Be oani ka nkanda. Esa agɔgɔmani. 36 Cɔ, ójisa bakpa nde kagea, bágasombɛ ka bɔ eea ka motumbe na ka nji nde a bhîbhíbhí.» 37 Yéso â gǎkɛ ǒsikisia te: «Benu sasa anu, óbophani eea!» Bagoigi báonsikisia: «Okondi gea, betogɛsombɛ mokati á bangɔa mia ibɛ (200) na bebophɛ bɔ báeɛ?» 38 Yéso â gǎkɛ ǒbuisia te: «Bona mokati angaani? Gani bɔ́ɔnjiɛ.» Báoga oúsianaga. Báubhi ye, báogea: «Bena mokati boku na basu babɛ.» 39 Mpɔ, Yéso áǒsosea te, báěikisɛ bakpa bhɔbhu k'etunda-etunda k'ɔma nde a na manganga. 40 Báoika k'etunda-etunda. Etunda moci áoba na bakpa mia moci (100), etunda nɛngbo áoba na bakpa nkama bɔku (50). 41 Yéso áɔbhɛda mokati bɔku na basu babɛ, áoenga na kobha, áonsega Mokonga k'ɛmɛmi. Áobunaga mokati ndɔ, áǒbopha bagoigi ka gea, bágabhɛ ka bakpa. Yéso â phɔtɔ ǒngodea bagoigi nɛkɛ bégabeɛ bakpa bɔbhu basu ndɔ. 42 Bɔbhu báoeaga, báokuta. 43 Bagoigi báodhondanisaga dhue á mokati na basu. Dhue ndɔ dátumi jɔ nkama na ibɛ (12). 44 Sɔsɔbɛ á bakpa nde dábai mokati ndɔ, bǒko dábatu ɛlɛphu bɔku (5.000).

Yéso aotamba gǔ á etuú

( Ɔna phɔtɔ Mat 14.22-33; Yoáni 6.15-21)

45 Kɛ̌kɛ ndɔ tɔ, Yéso áǒsosea bagoigi nɛkɛ bákambeɛ ka koko, bágɛ mosá. Bájabhɛ na Bhɛtɛsaída. Yɛ, áojiga mbusa ka ɔkɔana na bakpa. 46 Mbusa á ɔkɔana na bɔ, áodapha mamba k'aphe á mɛma á Mokonga. 47 Abi ye ɔgɔgɔ, koko áoba ka meme étuú, Yéso sasakɛ n'a phɔ́tɔ kubhi. 48 Dáɔni gea, bagoigi nɛkɛ báotambaga phɛ̂ ka nyɔngɔ nde maiphianɔ dátú ǒjisa mbusa. Ka ɔsa á kɔkɔ, Yéso áǒbhiimisia n'aotamba gǔ á etuú. Aokonda phaɔa bɔ. 49 Bii bagoigi bámɔ̌ni Yéso n'aotamba gǔ étuú, báoúbha te ande oketi. Báokoga 50 nga, bɔbhu dábamɔ̌ni, báoba na kɔbɔbɔkɔ phɛ̂. Kɛ̌kɛ ndɔ tɔ, Yéso áɔyɔnga n'abɔ áǒgea te: «Bhisani měma anu! Eme aámbɔ, bókobangɛmbɛ!» 51 Mpɔ áokambea ka koko ndea bagoigi, maiphianɔ áɔphɔnga. Bagoigi bâ gǎkɛ oyayama phɛ̂. 52 Nga, dábákádigimisi kantíti á ketangaɔ á bikisa á mokati, ka nyɔngɔ nde měma abɔ dátú akpɛ.

Yéso ěamisi batɔa-esambɔ na Gɛnɛsalɛ́ti

( Ɔna phɔtɔ Mat 14.34-36)

53 Cɔ, Yéso na bagoigi bájabhi ye, báodhunduisa koko bii bákidi ka Gɛnɛsalɛ́ti. 54 Ka juana abɔ subi á koko, kɛ̌kɛ ndɔ tɔ bakpa báonengetisa Yéso. 55 Oa, báophanjekana mbangɔ ka nji bhui ka tɔ̌mia á nyɔngɔ á kidia á Yéso. Mpɔ báokpanga kumba á basambi k'eka, ka gǎ n'abɔ kubhii báɔki gea Yéso aɔ. 56 Cɔ, ɔma bhui nde Yéso dátú ongia, kabɛ kenombe, nji, na motumbe, báǒbhisa batɔa-esambɔ ka ntanga á nji. Báon'dengemisaga Yéso gea, ambe bakpa bátodhungɛ phɔ́ sese á bhɔngɔ nɛkɛ. Bakpa bɔbhu bunde dábatúodhunga, báoama.