Malíkɔ 7

Asii ndea baYúdha n'ɛɔphi ndea Mokonga

( Ɔna phɔtɔ Mat 15.1-9)

1 Esa moci, baPhaisáiɔ na ka baphangigi-ɛɔphi bunde dábatoki na Yɛusalɛ́ma, dábadhondanigi mosá á Yéso. 2 Báɔ̌bɔna ka bagoigi ndea Yéso na báoeaga njaga abɔ n'ajɔɔkani, ande gea te kanga á sokosa á njaga bíndɔ asii nɛbɔ asosi. 3 Nga, baPhaisáiɔ bea baYúdha bɔbhu, bákáoeaga kanga á sokosa á njaga anja. Nndɔ ande asii á batatabɔ. 4 A phɔtɔ bó aobá́ na bátoki ka mosomba, bákáoeaga kanga á sokosa njaga. Bá phɔtɔ obea moangɔ ásii á asíi nɛbɔ bea: sokosa á kibɛ, mbeka á toko na mbeka nde báconji na ngɔa.

5 Ka bondɔ unge, baPhaisáiɔ na baphangigi-ɛɔphi báomǔsia Yéso te: «Ka nyɔngɔ eke nde bagoigi nɛkɔ bánaobea asii ndea batatasu, báoeaga kanga á sokosa á njaga abɔ?» 6 Yéso áǒsikisia te: «Batɔa-maibhe nde ca! Isáia dági anja ka tɔ̌mia á nyɔngɔ kaphɔa anu nga, dádundu be,

‹Bakpa nde bá tɔ omobhebha k'aphɛnɔkɔ,

měma abɔ a gǎkɛ danga n'eme.

7 Obhebhɔ nɛbɔ k'eme a tɔ á jǎi nga,

bɔphɛi nde báɔphɛa a tɔ á ko kpa.›

8 Yéso â goto ǒngodea te, aphɔtɔ bo ka benu. Bodeketi ɛɔphi ndea Mokonga, bóotetemisa asii á ko kpa.

9 Eya, bogi anja ka ya ɛɔphi ndea Mokonga ka gea te bótetemisɛ asii nɛnu. 10 Cɔ, Mósa dáyɔngi gea: ‹N'dokomisa abhakɔ n'amakɔ.› Dáyɔngi phɔtɔ: ‹Mmbe aɔnphɔta abhakɛ, kabɛ amakɛ bámmoɛ, ákuɛ.› 11 Cɔ, benu bɔɔyɔnga gea, nkpa aɔtɔka n'angodi abhakɛ kabɛ amakɛ gea: ‹Nkumba bhui nde ne ně ka enga akɔ, nebhisi ye u ka Kɔɔbhani (ande gea te nebhisi u k'ɔphɛɔ ka Mokonga).› 12 Aoba n'ayɔngi bo, bóonsosea nkpa ndɔ gea, kageɛ kema ka babɔkɔti akɛ. 13 Ka bondɔ, bomoe nyɔngɔ á Mokonga ka nyɔngɔ á asii nde boophanaga. Bɔ phɔtɔ ogea kema ásii nnde akengeani ně.»

Kema danga-danga nde aɔnjɔɔkisa nkpa

( Ɔna phɔtɔ Mat 15.10-20)

14 Mbusa á oa, Yéso â goto ɔphana usɛsɛ á bakpa, áǒgea te: «Ɔ́mɔɔkani anja benu bɔbhu, digimisani boabhi ndee: 15 Nna kema nde nkpa aoea aunge aɔnjɔɔkisa mosá á Mokonga. Andiu nnde aojuana subi á kɛ aunge aɔnjɔɔkisa. [ 16 Mmbe a na ketue ka ɔkapha, áɔkɛ. ]»

17 Oa, Yéso áodeketa usɛsɛ á bakpa, áongia k'endu. Mbenɔ nde angi, bagoigi nɛkɛ báomǔsia kantíti á mɛní ndɔ. 18 Yéso áǒsikisia te: «Benu phɔtɔ, bókóúbhapha? Bókóodigimisa gea te, kema nde aotoka na nsɛngɛ n'angi subi á nkpa nn'aɔtɔka na njɔɔkisi? 19 Nga, eea nna ongia subi á měma á nkpa. A ndiu ongia subi á sɔphɔ. Mbusa, eea ndɔ áoga ka kabinɛ.» Ka yɔnga akɛ bó unge Yéso dádigimisi gea, bakpa báeɛ eea bhui. 20 Yéso â goto ogea te: «Kema nde aotoka subi á nkpa, aunge aɔnjɔɔkisa. 21 Nga, subi á měma á nkpa, aunge kanisia ajede aojuana kabɛ: iɛbɛ, kuba, moa á nkpa, 22 gua á n'etoa, kuma, kokae, maibhe, mambɔ, nsengo, ɛphɔti, ébhebha, kobhobho.

23 Kema ajede ndɔ bhui a ye ojuana subi á nkpa, áɔnjɔɔkisa.»

Nke nde nna muYúdha am'beeki Yéso

( Ɔna phɔtɔ Mat 15.21-28)

24 Yéso, atoki ye na Galiláia, áoga na kenombe á Tílɔ. Akidi ye, áongia subi á endu. Dákákondi bakpa báúbhɛ nndɔ. Nanga a bo, nyɔngɔ á kidia akɛ áoubhikana. 25 Nke moci mmbe nseka nɛkɛ dátú na kukua á bansombo, áɔɔka nyɔngɔ á Yéso, kɛ̌kɛ ndɔ áombhikia, áogua k'ecinji akɛ. 26 Nke ndɔ dákátú muYúdha, dátú ndiu ntɔa á ka kenombe á Phɔinikía ka nji á Sulía. Yɛ, áon'dengemisaga Yéso gea, étokisɛ bansombo subi á nseka nɛkɛ. 27 Yéso â gǎkɛ onsikisia te: «Beekea phɔ́ gea, baniki bákutɛ. Nga, nna na kantíti ka bhɛda eea nɛbɔ, óǒmakea baniki á mbɔa.» 28 Nke ndɔ áonsikisia te: «Eya Mɔkɔta, baniki á mbɔa ndiu tɔ baunge báoea dhue nde baniki báogusa kusi á mɛja.» 29 Mpɔ, Yéso áonsikisia te: «Ka nyɔngɔ á boabhi ndɔ ɔyɔngi, gǎ, bansombo bájuani subi á nseka nɛkɔ.» 30 Nke ndɔ áoja mɔtɛkɛ, áondhonda anakɛ n'ěnanu k'eka, bansombo na bájuani ye subi akɛ.

Yéso anamisi n'dakekanigi-kecue

31 Mbusa á oa, Yéso áotoka na nji á Tílɔ, áɔnyɛ́nya ka Sidhɔ́na, na ka nji Dekapɔ́le, ka gǎ jua n'etuú Galiláia. 32 Kó, báombhikia na n'dakekanigi-kecue, n'ande phɔtɔ kauma. Báon'dengemisaga ka gea te, ámbhisiɛ njaga. 33 Yéso â gǎkɛ ɔm'bhɛda nkpa ndɔ ka nkindi á bakpa, áonga ně ka mpɛphɛ, áongisa njaga ka kecue akɛ, áosúa soki ka njaga, áonsia nkpa ndɔ k'edaka. 34 Mpɔ, áoenga na kobha, áosúa ɛphɛu. Mpɔ áongodea nkpa ndɔ ka yɔngɛa nɛkɛ: «Ɛphata!» Ande gea: «Kodokana!» 35 Kɛ̌kɛ ndɔ, kecue á nkpa ndɔ áoukukana. Aphenɔkɔ akɛ áokodokana. Aɔyɔnga anja. 36 Yéso â gǎkɛ ǒngodea te, bákántɔmiɛ mɔnɔ nkpa. Cɔ, nanga bii ěngodi gea, bákatɔmiɛmbɛ nkpa, bâ ndiu oga na báɔ̌tɔmia bakpa phɛ̂. 37 Bakpa báotangaaga phɛ̂. Báogea te: «Aɔtɔtɔkisa kema bhui anja phɛ̂. Badakekanigi-kecue bá ye tɔ ɔɔkapha na bakauma bá ye tɔ ɔyɔnga.»