Jujuka á Yéso ka kukua
28
1 Esa á ko imoti mbusa á sabato, ka kodokana a esa, Malía Magadhála na Malía ama-Yakɔ́bɔ, dábage k'aphe á ɔnjia á bhota. 2 Báɔɔka baningina akpɛ rrr! Mpɔ malaeka áokia natoki na kobha, áuukua ɛtɛ adoko, nndɔ Yɔsɛ́phu dádaki na bhota. Aotiba ɛtɛ ndɔ, áoika gui. 3 Keongi akɛ naɔnyɛkaga bea phenua a mbua bhiɛ, bhiɛ, bhiɛ! Ngɔmbɛ ndɔ dáɔli na gǎkɛ abhusuu bea nsɔkɔ. 4 Ko, batɔ-émani, bundɔ dábabondi bhota, báombanga malaeka phɛ̂, báɔkpɔkpɔmaga, nyama abɔ áɔɛkana. Báogua bea bakpa nabâsi.5 Bake ndɔ dábame tɔndɔ k'ego.
Mpɔ malaeka áǒngodea bake ndɔ te: «Bókobangɛmbɛ. Nga, neuubha te, boonkaba Yéso, mmbɔ dábankɔkɛi ka me á nkpatɔ. 6 Cɔ, nnabéi. Mokonga anjujukisi ka kukua, bíndɔ Yéso dánongodi. Bhikani phɔ bɔ́ɔnɛ k'ɔma nde dábabhisi monda akɛ.»
Cɔ, bake ndɔ báoga na bhota. Báoenga subii. Mpɔ báosikianaga mosa á malaeka.
7 Malaeka áǒngodea goto te: «Gani mbangɔ, bóngodeɛ bagoigi nɛkɛ gea te: ‹Mokonga anjujukisi sɔsɔbɛ a bundɔ dábasi. Ɔkani, Yéso aoga mosa anu na Galiláia. Bɔmɔ̌nande ko. Nnde nenóngodi a ungɔ.› »
8 Cɔ, bake báoga mbangɔ, báoba na kɔbɔbɔkɔ, goto na maseye phɛ̂. Báoga ɔ̌tɔmia bagoigi nyɔngɔ ndea Yéso. 9 Mbenɔ nde dábaoga, Yéso áodhondana na bɔ. Aǒsesea: «Sambani.»
Bake báɔnsɛkɛdɛa, báogbuka muanku abɔ, báondhunga k'ecinji, báombhebha. 10 Mpɔ Yéso áǒngodea te: «Bókobangɛ mɔnɔ. Gani bóngodeɛ badhani bágɛ na Galiláia. Bámɔɔnande ko.»
Mbɛa á bakɔta á baphɛ́i
11 Bii bake ndɔ dábaotamba, ka batɔ-émani bundɔ dábaoenga bhota, báoja na nji. Ko, báǒngodea bakɔta á baphɛ́i nyɔngɔ bhui ndɔ dágeani. 12 Bakɔta á baphɛ́i na bagbɛga á ka nji báodhondana, báɔɔkana. Bii báɔkani ye, báǒphenda batɔ-émani bangɔa asi phɛ̂. 13 Báǒngodea batɔ-émani te: «Bɔyɔngande be: ‹Bagoigi nɛkɛ bá unge báubi monda akɛ kipha nebe ka tɔ.› 14 Aoba moámɛ á kenombe naɔki nyɔngɔ á kuba ndɔ, ámbe besu bɛyɔngagande na yɛ gea kanógeɛ mɔnɔ ajede. 15 Mpɔ batɔ-émani báɔbhɛda bangɔa ndɔ, báogea bíndɔ dáběngodi. Nyɔngɔ á kuba ndɔ áophanjekana sɔsɔbɛ a baYúdha. Nanga nande mbɛa, nyɔngɔ ndɔ a phɔtɔ ɔɔkɛkana k'esa nde.»
Teka á bagoigi ka mokonda
16 Cɔ, mbusa á ɔka a nyɔngɔ á jujuka á Yéso ka kukua, bagoigi nɛkɛ nkama na moti, dábage na Galiláia. Báokidia ka mamba ndɔ Yéso dɛ́ɔku mosa á kukua akɛ. Mbusa á kidia abɔ, Yéso áɔsɛnɛka mosa abɔ. 17 Bagoigi báogbuka muanku abɔ. Buangbo dábatú gǎkɛ na ngaka.
18 Mpɔ Yéso áǒngodea te: «Koboamɛ ndea na kobha na ndea ka mokonda bhui a ka njaga ani. 19 Ka bondɔ, gani bɔ́phɛ̂ bakpa á k'ekuna bhui. Bóbatisɛ bundɔ bábeeki k'ina á abhɛ, k'ina á anakɛ, na k'ina á Měma á Mokonga. 20 Bóphangiɛgɛ bundɔ bǒbatisi. Bágeɛ nyɔngɔ bhubhui nde nenóngodi. Ubhani gea, ne kimoti na benu esa bhui na ka bii mokonda asungiagaeka.»