Tena á nyɔngɔ á kukua á Yéso
27
1 Mɔkɛsuɛ, bakɔta á baphɛ́i na bagbɛga á ka nji dábadhondanigi, báɔɔkana te, bámoɛ Yéso. 2 Báondhunga, báomboaga ka njaga, báonga ne mosa á Moámɛ á kenombe Pilátɔ, mmbe moLɔ́ma.3 Cɔ, Yúdha, mmbɔ dántɔngi Yéso mosa á bakɔta á baphɛ́i, dáɔni te, báomoa Yéso, áɔ̌yɛnɛa ka měma akɛ. Aǒsikisia bagbɛga á ka nji na bakɔta á baphɛ́i bangɔa ndɔ nkama isaɔ. 4 Aǒgea te: «Negi ajede, ka nyɔngɔ nde, nɛntɔngi nkpa nakági ajede.»
Báonsikisia te: «Nna nyɔngɔ nɛsu. Ande nyɔngɔ nɛkɔ sasa akɔ.»
5 Ka bondɔ, Yúdha áomaka bangɔa ndɔ subi éndu a Mokonga gbuɛ! Aɔmɛa, áoga ǒkpata ka kingo gbi!
6 Cɔ, bakɔta á baphɛ́i báɔbhɛda bangɔa ndɔ, báogea te: «Kákeni bébhisɛ bangɔa nde subi ísɛngɔ éndu a Mokonga. Ka nyɔngɔ nde, ande ophendɔ á magia á nkpa.»
7 Báɔɔkana, báɔbhɛda bangɔa ndɔ, báosomba ciko, ina á ciko ndɔ ande Ciko á Moki-Mbungu, áoba bhota ka umba á bakɛni. 8 Ka bondɔ, ciko ndɔ bá phɔtɔ kɔɔphana Ciko á Magia.
9 Cɔ, nyɔngɔ ndɔ mɔtu-nyɔngɔ Yɛɛmía dáyɔngi kala áɔtɔtɔkɛana:
Dábabhɛdi bangɔa nkama isaɔ, nndɔ baIsilaɛ́li dábaɔkani ka phenda á moa akɛ. 10 Báosomba na ciko ndea Moki-Mbungu, bíndɔ Mɔkɔta dámongodi négeɛ.
11 Cɔ, Yéso dámame mosa á Moámɛ á kenombe Pilátɔ. Pilátɔ áomúsia te: «Onde moamɛ ndea baYúdha?»
Yéso áonsikisia te: «A bíndɔ ɔyɔngi.»
12 Mpɔ bagbɛga á ka nji na bakɔta á baphɛ́i báɔntɔnga, kěsikisiɛ tanda nyɔngɔ.
13 A unge Pilátɔ angodi goto Yéso te: «Caa moko! Kómáɔɔka nyɔngɔ nde báodukia ka mɔ akɔ kuunga ani nde?»
14 Yéso dákásikisi goto nyɔngɔ. Ka bondɔ Pilátɔ áoyayama.
15 Cɔ, dátú asii ndea moámɛ á kenombe mbenɔ á maseye ka juanisa a ntɔa-mɛkakɔ, mmbɔ bakpa bánkondi. 16 Mbenɔ ndɔ, dátú ntɔa-mɛkakɔ moti naombi phɛ̂, ina akɛ Yéso Bhalábha.
17 Bii Pilátɔ dáɔyɔnga na Yéso, bakpa ba asi báodhondana mosa éndu nɛkɛ. Pilátɔ áojuana ka nsɛngɛ, âkuusia bakpa te: «Bokondi nénkodɛ nkpa sina: Yéso Bhalábha? Yéso, mmbɔ báɔmɔphana Kiísito ndɔ?»
18 Pilátɔ dági bondɔ ka nyɔngɔ nde dáubhi te, baYúdha bá na ngini gu á Yéso, ka nyɔngɔ nde, bakpa dábankondi Yéso kɔ̌nyɛnya bɔ. Ka bondɔ unge dábambhisi Yéso ka njaga a Pilátɔ.
19 Cɔ, bii Pilátɔ dáiki ka kakaanga á tena a nyɔngɔ, nkakɛ áontekisia mbino gea te: «Kǒngisɛ mɔnɔ subi á nyɔngɔ ndea ntɔa-doni ndɔ. Nga, k'esa nde kipha kéde anja na njeki á nkpa ndɔ.»
20 Mpɔ bakɔta á baphɛ́i na bagbɛga á ka nji bâ gǎkɛ ǒdhondanisa bakpa, báǒngodea gea, bánkodisɛ Bhalábha, bánkusɛ ndiu Yéso.
21 Mpɔ Pilátɔ â goto kuusia bakpa te: «Bokondi nkpa sina mbe nénkodisɛ sɔsɔbɛ a bakpa nde ba babɛ nde?»
Báonsikisia te: «Bhalábha!»
22 Pilátɔ â goto kuusia bakpa te: «Bokondi néngeɛ Yéso bo, mmbe báɔmɔphana Kiísito?»
Báonsikisia bɔbhu te: «Nkɔkɛagani gu á me á nkpatɔ!»
23 Akuusia goto te: «Bojede sina nde agi?»
Bɔbhu báokoga k'ɛsɔ angbo te: «Nkɔkɛagani gu a me á nkpatɔ!»
24 Mbenɔ nde Pilátɔ dáɔni te, kátɔkɛku nagi kema ka nyɔngɔ á ogoma a bakpa, áɔbhɛda ibo, áosokosa njaga akɛ mosa á bakpa bɔbhu. Aɔyɔnga te: «Bɔkɔngɔ á kukua á nkpa nde, nna ye k'eme, a ye tɔ ka benu.»
25 Báonsikisia te: «Bɔkɔngɔ á kukua akɛ ábɛ gu asu na baniki nɛsu.»
26 Ka bondɔ, Pilátɔ áonkodisa Bhalábha, áombindisa Yéso, áondeketa ka njaga a batɔ-émani gea te, bánkɔkɛɛ gu á me á nkpatɔ.
Sungisiaga á Yéso
27 Mbusa á tena a nyɔngɔ á kukua á Yéso, batɔ-émani ndea Pilátɔ báondhunga, báonjuanisa ka ntanga éndu ndea moamɛ, k'ɔma ndɔ batɔ-émani bádhondanigi. Batɔ-émani báontimba, 28 báomphuia ngɔmbɛ nɛkɛ, báɔbhɛda ngɔmbɛ anjɛ ndea ntɔ-émani. Ngɔmbɛ anjɛ ndɔ a bea ngɔmbɛ ndea moamɛ. Báɔmɔ̌lisa. 29 Báooka kekombo á ngenge, báomakea ka mɔ. Báɔmbhɛdisa motumbɔ á kɔkɔta ka njaga á muku. Báogbuka muanku abɔ mosa akɛ, báonsungisiaga te: «Moamɛ ndea baYúdha samba!»
30 Báonsuia soki, báɔbhɛda mutumbɔ ndɔ, báɔmbɛta ne ka mɔ.
31 Mbusa á gɔba á sungisiaga akɛ, báomphuia ngɔmbɛ anjɛ ndɔ, báɔmɔ̌lisa goto ngɔmbɛ nɛkɛ. Báonga ne ka kɔkɛaga akɛ ka me á nkpatɔ.
Kɔkɛaga á Yéso ka me á nkpatɔ
32 Batɔ-émani, bundɔ dábandhungi Yéso mbusa á tena a nyɔngɔ nɛkɛ mosa á Pilátɔ, 33 báɔmɛa ne ka ga abɔ na Gɔɔgɔ́ta. Gɔɔgɔ́ta ande gea te: «Gangata á mɔ.» Mbenɔ nde dábaotamba, báodhondana na Semó, ntɔa ka Kuɛ́nɛ, Kuɛ́nɛ á ka Aphiíka. Báonsosea te, ákumbɛ me á nkpatɔ ndea Yéso.
34 Báojua ka Gɔɔgɔ́ta. Oa, báomopha Yéso makana nabádhadu na manga bea ibo á masii. Yéso áokengea, áɔkpɛma noai.
35 Batɔ-mani báomphuia ngɔmbɛ nɛkɛ, báɔbɛta bana-mɛlɔɛ. Mpɔ báɔnkɔkɛa Yéso ka me á nkpatɔ ko, ko, ko! 36-38 Mbusa, báomesa me ndɔ. Mpɔ báodundua kɛtɔngi akɛ ka kasa be: «MMBE ANDE YESO, MOAMƐ NDEA BAYUDHA.» Báobambea kɛtɔngi ndɔ gu á mɔ akɛ. Mpɔ báomesa me ndɔ.
Báǒbhika phɔtɔ na bakukuba babɛ, báɔ̌kɔkɛaga ka me á nkpatɔ nɛngbo. Báoncuma moti ka njaga á muku, moti ka njaga á nkei akɛ. Mbusa, báoika ka odo.
39 Bakpa nde dábaɔnyɛnya oa, báonsungisiaga, báɔnkɔngɔmiaga mɔ 40 na gea te: «Obɛ, dógi te, ɔngbɔande endu á Mokonga, ɔ́ɔphɛka goto k'esa isaɔ. Cɔ, kóǒamisa sasa akɔ ee? Aoba nonde Muna-Mokonga, kia phɔ ka me á nkpatɔ ndɔ.»
41 Goto, bakɔta á baphɛ́i, bateni-nyɔngɔ na bakɔta á ka nji dábatú oa. 42 Báonsungisiaga gea te: «Dóamisi bakpa buangbo, kóǒamisa sasa akɔ ee? Aoba n'onde moamɛ ndea Isilaɛ́li, kia phɔ ka me ndɔ, bekobeekeande. 43 Dóbhisi beekea nɛkɔ ka Mokonga gea te, onde anakɛ. Cɔ, ákoamisɛ phɔ aobá́ n'akondi.»
44 Goto, bakukuba ndɔ, dábɛ̌kɔkɛigi na Yéso ka me á nkpatɔ, báonsungisiaga bíndɔ bakpa buangbo dábaonsungisiaga.
Kukua á Yéso
45 Suamani, keiphe dágbukumi mokonda bhui, áoiphia ka mbenɔ isaɔ. 46 Kengetana á mani, Yéso áokoga k'ɛsɔ angbo te: «Ɛlí, Ɛlí, lema sabakatani?» Ande gea te: «Mokonga nɛmɔ, Mokonga nɛmɔ. Omodeketima ka bo?»
47 Bii ka bundɔ dábame oa, dábaɔki nyɔngɔ ndɔ, báokanisia te: «Aɔmɔphana Ɛlía!»
48 K'abɔ moti áokamisaga bhɛda á ngɔmbɛ, áɔdhɛkisaga na makana akae, áoboaga ka gbutuka a matikɛ, áondaphisia Yéso k'aphe-nɔkɔ gea ámumɛ. Kamumɛ gǎkɛ. 49 Buangbo bâ gǎkɛ ɔyɔnga te: «Deketa kema ndɔ oogea. Bɛ́ɔnɛ phɔ, aobá́ Ɛlía nabhikande k'aphe á amisa akɛ!» 50 Mpɔ Yéso â goto okoga k'ɛsɔ angbo, áodusukana.
51 Mbenɔ ndɔ, ngɔmbɛ ndɔ a subi éndu á Mokonga, nnde ěkatisani bakpa na ɔma motakatephu, áɔnyɔka ka meme juɛ! Mokonda áodenga-denga. Moimba áobhomoka. 52 Bhota asi áuukukana. Babeeki bundɔ dábasi kala, báojujuka. 53 Báojuana ka bhota. Mbusa á jujuka á Yéso ka kukua, báongia ka Yɛusalɛ́ma, nji ndea Mokonga. Báokidiana mosa á bakpa ba asi.
54 Mbusa á kukua á Yéso, moamɛ á batɔ-émani na bundɔ dábaoamba monda akɛ, bii báɔni baningina na kema bhubhui ndɔ, báobanga phɛ̂, báogea: «Mmbe dátú Muna-Mokonga doni!»
55 Bake ba asi dábatú oa, bundɔ dábaoenga nabáme danga. Bɔ bá unge dábatoki na Yéso na Région ndea Galiláia, dábatú ɔmbhɛdaneaga. 56 Ina buangbo a unge: Malía-Magadhála, Malía ama-Yakɔ́bɔ na Yɔsɛ́phu, n'ama-bana-Jɛbhɛdháiɔ.
Yɔsɛ́phu amǔmbi Yéso
57 Ɔgɔgɔ, mbusa á kukua á Yéso, nkpa moti dáge ondhonda Pilátɔ. Ina akɛ dátú Yɔsɛ́phu ba-Aimatáiɔ. Dátú ntɔi, goto ngoigi ndea Yéso. 58 Bii ansɛkɛdɛi Pilátɔ, áɔmɛma monda á Yéso. Pilátɔ áobeekea gea, bámophɛ Yɔsɛ́phu monda á Yéso.
59 Cɔ, Yɔsɛ́phu áɔbhɛda monda ndɔ, áoboa na ngɔmbɛ abhu, áoga sasa akɛ ka umba a Yéso ka bhota ndɔ dátongisi. 60 Bhota ndɔ dátongisi k'ɛtɛ ka buuka a mamba. Mbusa á umba a Yéso, áoingitisaga ɛtɛ adoko, áodaka na bhota, áoga nɛkɛ.
61 Kɛkɛ ndɔ, Malía-Magadhála na Malía ama-Yakɔ́bɔ, dábatú oa, nabáiki danga abhɔa na bhota. 62 Cɔ, nyɔngɔ á kukua á Yéso dátɔtɔkɛani esa á bɔngisia á nyɔngɔ á Sabato.
Amba á bhota a Yéso
Mamai, bakɔta á baphɛ́i na baPhaisáiɔ buangbo dábage mosa á Pilátɔ. 63 Báongodea te: «Mɔkɔta, bekanisi te, yɛ, ndhemigi-Yéso, mosa á kukua akɛ, déngodi bagoigi nɛkɛ te, akuande. Mbusa á esa isaɔ, ajujukande ka kukua. Cɔ, bɛɔni te, esa á ko isaɔ ndɔ a ye tɔ bhibhi. 64 Ambe, óteka batɔ-émani ka bhota a Yéso, báengɛ ka sungia a esa isaɔ. Ka nyɔngɔ nde beobanga te, bagoigi nɛkɛ bákaubɛmbɛ monda akɛ na dhema á bakpa te: ‹Yéso ajujuki ka kukua!› Ambe mbɛa ndea bagoigi anyɛnyande mbɛa ndea Yéso.»
65 Pilátɔ áǒsikisia te: «Nebeeki boabhi nɛnu. Batɔ-émani ba unge. Gani bóbondisɛ bhota ndɔ anja phɛ̂.»