Maca á dhunga á Yéso ka bɔsɔmɛa
26
1 Bii Yéso agɔbi ye bɔphɛi bhui, áǒngodea bagoigi nɛkɛ te: 2 «Bûubha gea te, mbusa ésa ibɛ, abande esa á maseye á Pasáka. Ande gea te, esa á kanisia á toka a baYúdha na Mísii ka kɔkɔbɛ. Oa, eme Muna-Nkpa bámodhungande ka kangea ani ka nkpatɔ.»3 Mbenɔ ndɔ, bakɔta á baphɛ́i na bagbɛga á ka nji dábadhondani mɔtɛ a Kaiápha, moamɛ á baphɛ́i. 4 Báɔyɔngaga ka dhunga á Yéso ka bɔsɔmɛa, ka moa akɛ. 5 Dábaɔkani te, bákandhungɛmbɛ ka mbenɔ á madhondanɔ. Nga, báobanga eongo.
Dukiaga á nkoki ka mɔ á Yéso
6 Yéso dátú ka Bhɛtanía, bhibhi á Yɛusalɛ́ma. Dáiki mɔtɛ a Semó, mmbɔ dáami ka kukua á suú. 7 Oa, Yéso dáoeaga na bagoigi nɛkɛ. Bii dáoeaga, nke moci áombhikia na ngbanda á nkoki ésombi akpɛ phɛ̂. Aondukiaga ka mɔ. 8 Bii bagoigi nɛkɛ báɔni bo, báɔbɛa, báɔyɔnga te: «Nke nde akusi k'akɛ nkoki ésombi akpɛ etiti bende ka bo? 9 Nga, atókeni sombisai, bɛ́ɔbhɛda bangɔa kau, béǒopha bauki.»
10 Yéso áuubha kanisia abɔ, áǒngodea te: «Bókoncɛ mɔnɔ nke nde. Nga, amogii kema anja. 11 Bo na bauki esa bhui bhibhi anu. Eme kébɛku gǎkɛ na benu oani esa bhui. 12 Nga, mmbe amodukiigi nkoki nde, amɔbɔngisigi mosa á umba ani. 13 Nenógie, ɔma bhubhui ndɔ báphɛaeka nyɔngɔ anja á koboamɛ ndea Mokonga, báyɔngagande gu á kema nde agi.»
Ga á Yúdha mosa á bakɔta á baphɛ́i
14 Cɔ, ka bagoigi ndea Yéso, bundɔ nkama moti na babɛ, ina akɛ Yúdha Isikaliɔ́ta, dáɔki nyɔngɔ á dhunga á Yéso. Aoga mosa á bakɔta á baphɛ́i. 15 Auusia te: «Bomáɔyɔnga bo? Aoba nobomophendi ka phangia anu dhunga akɛ, nenóphangiande ɔma nde abéi kanga á bakpa ba asi.»
Mpɔ báonsikisia te: «Bekophendande bangɔa nkama isaɔ.»
Mbusa, Yúdha áǒbeekea. Bakɔta á baphɛ́i báotanga bangɔa ndɔ nkama isaɔ, báomopha.
16 Mbusa á Yúdha bhɛda á bangɔa ndɔ, áokaba mbenɔ anja á dhungisa á Yéso.
Ɔtɔa á tɔnga a Yéso
17 Dátú esa imoti á maseye á mbondo kanga á cacu, nnde baYúdha dábai ka kanisia á esa á toka abɔ na Mísii.
K'esa ndɔ, bagoigi dábage omǔsia Yéso gea te: «Ɔma sina nde okondi bɛ́bɔngisiɛ k'akɔ eea á maseye?»
18 Yéso áǒngodea te: «Gani na Yɛusalɛ́ma mɔtɛ a nkpa moti, bóngodeɛ te, mɔkɔta agi, mbenɔ nɛkɛ a bhibhi. Mɔkɔta ági goto te, yɛ, na bagoigi nɛkɛ, báeande eea á maseye mɔtɛkɔ.»
19 Mbusa, bagoigi báoga, báogea bíndɔ Yéso ěngodi.
20 Ɔgɔgɔ, Yéso áoika na bagoigi nɛkɛ nkama na babɛ k'ɔma á eaga.
21 Cɔ, mbenɔ nde dábaoeaga, Yéso áǒngodea te: «Doni, ka benu moti amɔtɔngande ka kuisa ani.»
22 Mbenɔ nde bagoigi dábaɔki nyɔngɔ ndɔ, báoianaga phɛ̂. Báomǔsia Yéso moti-moti te: «Mɔkɔta, nna phɔ eme?»
23 Yéso áǒsikisia te: «Mmbe aotambua k'ɔphɛphɛ kimoti n'eme, a ambe amɔtɔngande, 24 bíndɔ dábadundu nyɔngɔ ani subi á buku á Mokonga. Nenógie, ande ngomi ka nkpa ndɔ amɔtɔngande. Atu ye phɔ oba anja ka nkpa ndɔ, ámbe dákábɔkɔtɛani.»
25 Yúdha, mmbɔ dántɔngi Yéso ndɔ, áomǔsia te: «Mphangigi, nna phɔ eme?»
Yéso áonsikisia te: «A tɔ bíndɔ ɔyɔngi.»
Phangia á bagoigi konsamba ndea Mokonga
26 Yéso na bagoigi dábaoea eea á maseye. Aɔbhɛda mokati, áombhebha Mokonga, áobunaga mokati ndɔ, áǒgabhea bagoigi nɛkɛ. Aǒngodea te: «Bhɛdani bóeɛ. Nga, nnde ande nyama ani.»
27 Mbusa, â goto ɔbhɛda kibe á makana anjɛ. Aombhebha Mokonga, áǒgabhea bagoigi. Mbenɔ á gabhea abɔ makana ndɔ, áǒgea te: «Noani benu bɔbhu. 28 Nga, nnde ande magia ani, magia á konsamba ndea Mokonga. Magia ani aduukani ka nyɔngɔ á sokosa á bojede á bakpa ba asi. 29 Nenógie, kénoɛku ye goto ibo á mbuka nde na ka bii esa abhikaeka, nenoaeka ye tɔ goto na benu ka koboamɛ ndea abhɛ.»
30 Mbusa, báoemba embɔ. Mpɔ báoga gu á mamba Misɛitúni.
Ɔtɔa á ngana á Pɛ́tɛɛ
31 Mbusa á ga abɔ ka mamba ndɔ Misɛitúni, Yéso áǒgea bagoigi te: «Kipha á k'esa nde, bomodeketande, bíndɔ dábadundu subi á buku á Mokonga:
Mokonga agie, nenkusande mbondigi-bamɔgɔgɔ. Mbusa, bamɔgɔgɔ ndɔ báophanjekana.
32 Mpɔ mbusa á moa ani, Mokonga amojujukisande ka kukua. Mpɔ negande mosa anu na Galiláia, bomodhondande ko.»
33 Pɛ́tɛɛ áonsikisia te: «Nanga badhani bɔbhu bákosaga, eme kékosagɛku gǎkɛ.»
34 Yéso áongea te: «Kipha á k'esa nde mosa á ɔsa a kɔkɔ omonganande mɔngɔ isaɔ mosa á bakpa.»
35 Pɛ́tɛɛ áongodea Yéso te: «Kékonganɛku gɔdɔ! nanga nékua kimoti n'obɛ!»
Bagoigi buangbo bɔbhu báɔyɔnga phɔtɔ bo.
Ɛmɛmi ndea Yéso mosa á dhunga akɛ
36 Mbusa, Yéso áoga na bagoigi nɛkɛ k'ɔma ndɔ dábaɔphana Gɛtɛsɛmáni. Aǒngodea bagoigi te: «Ikani phɔ oani. Négɛ phɔ mosa, néabhɛ n'Abhɛ-Mokonga.»
37 Aɔmbhɛda Pɛ́tɛɛ, na bana-Jɛbhɛdháiɔ babɛ, Yakɔ́bɔ na Yoáni. Aoga n'abɔ mosa k'aphe ɛ́mɛmi. 38 Aǒngodea bagoigi te: «Měma ani a bhibhi á kɔdɔka n'oiɔ. Ne bhibhi á kukua. Ikani oani, bɔ́phɛ̂ tɔ̌ kimoti n'eme.»
39 Aɔsɛkɛda sasa akɛ mosa, áǒmaka ka odo gbu! Aogbondoa endondo akɛ na odo. Aɔmɛma mbenɔ énda gea te: «Abhɛ, aobá́ natɔtɔkɛani, ómotokisia kukua ajede nde. Kabɛ bíndɔ nekondi, ábɛ ndiu bíndɔ okondi.»
40 Aɔgɔba ɛmɛmi, áoja k'ɔma ndɔ atósagi bagoigi ndɔ basaɔ. Aǒdhonda bagoigi nabáde, áǒjujukisa. Aongodea Pɛ́tɛɛ te: «Bɔ́kɔ́ɔtɔka phɛa tɔ̌ kimoti n'eme ka mbenɔ moti tɔ? 41 Phɛani tɔ. Bɔ́mɛmɛ ka nyɔngɔ á banga a odhemayɔ. Nga, měma a nkpa akondi phɛ̂ gea á kema anja. Nyama akɛ a átamba.»
42 Mbusa, áoga goto, áɔmɛma goto mbenɔ énda gea te: «Abhɛ, aobá́ nakeni nékuɛ, gea bíndɔ okondi.»
43 Aɔgɔba ɛmɛmi, áoja, áǒdhonda bagoigi nabáde goto. Nga, dábákátɔki phɛa á tɔ. 44 Yéso áǒsaga mɔngɔ á ko isaɔ. Aɔmɛma bíndɔ amá tɔ ɔmɛma.
45 Mbusa, áoja ka bagoigi. Aǒdhonda nabáde. Aǒjujukisa. Aogea te: «Ai! bɔ phɔtɔ oda? Ɔkani, mbenɔ a ye tɔ bhibhi. Eme Muna-Nkpa, nebande ka njaga á bakpa ba ajede. 46 Mani, bégɛni! Ɔkani! Mmbe aomodhungisa a ye tɔ bhibhi!»
Dhunga á Yéso
47 Mbenɔ nde Yéso dá phɔtɔ ɔyɔnga, Yúdha áokidiana. Dátú ka bundɔ bagoigi ndea Yéso nkama na babɛ. Bakpa ba asi dábaombea. Buangbo dábabhɛdi pindi, buangbo gbutu. Bakɔta á baphɛ́i na bagbɛga á ka nji bá unge dáběteki.
48 Cɔ, Yúdha, mmbɔ dántɔngi Yéso, déngodi bakpa kema sina nde ageande ka dhungisa akɛ. A te: «Nkpa nde nenyambeande, a ambe bondhungande. Ndhungani.»
49 Cɔ, Yúdha áoga mosa á Yéso dhɛ, áonyambea, áonsesea: «Mɔkɔta samba!»
50 Yéso áonsikisia te: «Dhani, gea kema nde okondi.»
Cɔ, bakpa ndɔ dábaombea Yúdha, báɔsɛnɛka, báondhunga Yéso.
51 Ka bagoigi ndea Yéso moti, áophuiana pindi, áɔmbɛta na mbhɛdanigi ndea moamɛ á baphɛ́i ta! Aontena ketue ce!
52 Mpɔ Yéso áongodea ngoigi ndɔ te: «Sikisa pindi ndɔ ka obɔ, ka nyɔngɔ nde bundɔ báomana na pindi, básiande na pindi 53 Kûubha gea te, netókeni ɔphana á abhɛ, ámotekisiɛ mɔngɔ moti ekombo émani á bamalaeka kɔnyɛnya nkama moti na ibɛ? 54 Atúoba bamalaeka ndɔ nadábakidi, nyɔngɔ á buku á Mokonga dákátɔtɔkɛanɛku gǎkɛ.»
55 Mpɔ Yéso áǒngodea bakpa ndɔ te: «Botóbhiki na pindi na gbutu ka dhunga ani ka bo? Uubha te, nende nkukuba? Nga, esa bhui dɛ́ɔphɛa k'endu a Mokonga. Cɔ, dóbókóomodhunga oa. 56 Kɛkɛ nde, bomodhungi gǎkɛ gea, nyɔngɔ nde baɔtu-nyɔngɔ dábadundu subi á buku á Mokonga, átɔtɔkɛanɛ.»
Kɛkɛ ndɔ, bagoigi nɛkɛ báonsaga, báotea.
Yéso mosa á bateni-nyɔngɔ
57 Bakɔta á baphɛ́i na bagbɛga á ka nji dábadhondani mɔtɛ a Kaiápha, moamɛ á baphɛ́i nɛbɔ, nabáobondea dhunga á Yéso. Mpɔ bakpa ndɔ dábage ondhunga Yéso, báombhika ne.
58 Pɛ́tɛɛ dáotamba mbusa danga abɔ ka nyɔngɔ nde dáǒbanga. Aongia ka oba, áojua ka ntanga éndu ndea Kaiápha, áoika sɔsɔbɛ a baengi-ekuma éndu á Mokonga ka nyɔngɔ á ubha a sungiaga á nyɔngɔ ndea Yéso.
59 Cɔ, k'endu ndea Kaiápha, bakɔta á baphɛ́i na bateni-nyɔngɔ bɔbhu dábaokaba batɔngi danga-danga, ka nyɔngɔ nde dábaokaba aphe á moa a Yéso. 60 Nanga batɔngi á mbea ba asi dábaju, nyɔngɔ nɛbɔ dátú akpɛ ka beekeai.
Cɔ, batɔngi á mbɛa babɛ báojua. 61 Báɔtɔmia gea te: «Yéso dági te, aɔtɔka nangbɔi endu á Mokonga, na phɛkai k'esa isaɔ.»
62 Mbusa á nyɔngɔ ndɔ, Kaiápha áoma, áomǔsia Yéso te: «Kó phɔ osikisa tanda ka nyɔngɔ moti, nnde bakpa báɔkɔtɔnga ne nde?»
63 Yéso áɔkɔba. Kaiápha â goto ongodea Yéso te: «Nɛkɔsɛmisi k'ina á Mokonga, mmbe a na kobha, ósongodea phɔ aobá́ nonde Kiísito, Muna-Mokonga, mmbe dánsɔmbu.»
64 Mpɔ Yéso áongodea te: «A bíndɔ ɔyɔngi. Nenógi goto te, eme Muna-Nkpa, bɔmɔɔnande goto kɛkɛ nde neniiki ka njaga á muku á Mokonga, Mɛna-Bukpɛkpɛ, nenebhiki goto ka boombia égugu á na kobha.»
65 Oa, Kaiápha áonyua ngɔmbɛ nɛkɛ juɛ! Aokoga te: «Nkpa nde ěkengisi na Mokonga. Ntɔngi sina mbe be ye goto onkaba? Bɔɔki ye nyɔngɔ nɛkɛ. 66 Cɔ, bogi gǎkɛ bo?»
Báonsikisia te: «Akeni tɔ ákuɛ.»
67 Mbusa, báonsuia soki ka keongi, báombinda. Buangbo báodaka iso akɛ na ngɔmbɛ, báɔmbɛta ka ngaga. 68 Báongodea te: «Ɔsɔtɔmia phɔ, obɛ Kiísito, mmbe Mokonga dánsɔmbu, ani mbe akɔbɛti?»
Onganɔ ndea Pɛ́tɛɛ
69 Oa ndɔ, Pɛ́tɛɛ áoika subi á oba ndea moamɛ á baphɛ́i. Nke moti mbhɛdanigi ndea moamɛ ndɔ, áombhikia Pɛ́tɛɛ, áongea te: «Obɛ, dótú phɔtɔ otamba kimoti na Yéso baGaliláia.»
70 Pɛ́tɛɛ áongana mosa á bakpa bɔbhu te: «Caa! kéuubha nyɔngɔ nde ɔɔyɔnga.»
71 Mpɔ áoga bhibhi á kio á ntanga. Ko, nke ba angbo mbhɛdanigi áɔmɔ̌na, áǒngodea bundɔ dábatú oa gea: «Mmbe dátú na Yéso ba-Nasalɛ́ti.»
72 Pɛ́tɛɛ áongana goto te: «Nenu esomba te, kéomǔbha nkpa nde.»
73 Mbusa, bakpa ndɔ dábatú oa, báɔnsɛkɛdɛa Pɛ́tɛɛ, báongodea te: «Doni, onde ka bakpa ndɔ. Yɔngɛa akɔ aongodokisi tɔ bhase.»
74 Cɔ, oa, Pɛ́tɛɛ áɔyɔnga te: «Aoba nɛnɛyɔngi mbɛa, idhɔngɔ ani tɔndɔ. Kabɛ neneomǔbha nkpa nde, Mokonga ámotambisɛgɛ.»
Mɔngɔ moti, kɔkɔ áɔɔsa. 75 Oa, Pɛ́tɛɛ áokanisia nyɔngɔ ndɔ Yéso dángodi gea: «Mosa á ɔsa a kɔkɔ, omonganande mɔngɔ isaɔ mosa á bakpa.»
Aojuana ka nsɛngɛ, aokpanga ngamɔ akpɛ phɛ̂, ka nyɔngɔ nde dángani Yéso.