Mɛni á baseka nkama
25
1 «Ka sungia á mokonda, koboamɛ ndea Mokonga abande bende: Baseka nkama moti, dábabhɛdi ɔbhɛa nɛbɔ, ka dhondana na moko-ɛkɛka. 2 Baseka bɔku dábatú babhobho, baseka bɔku buangbo dábatûubhapha. 3 Bundɔ babhobho dábabhɛdi ɔbhɛa kanga á kanisia á gamba nɛngbo á oisai. 4 Bundɔ baubhaphi ndɔ, dábabhɛdi mboso á gamba, n'ɔbhɛa nɛbɔ, báotamba ne kimoti. 5 Bii moko-ɛ́kɛka aiphi ye mɔtɛ a bakio akɛ, baseka bɔbhu báoyengia, báoda. 6 Ai tɔ kotendekete, eongo asi áɔɔkɛkana. Nkpa moti áokoga: ‹Moko-ɛ́kɛka aju. Bhikani bédhondanɛ n'abɔ!› »7 «Mpɔ baseka ndɔ bɔbhu báojujuka, báotoboa ɔbhɛa nɛbɔ. 8 Bundɔ babhobho ndɔ, báɔ̌mɛmaga bundɔ baubhaphi ndɔ be: ‹Osopani phɔ ka gamba nɛnu. Nga, ɔbhɛa nɛsu aoimika.› »
9 «Baubhaphi báǒsikisia: ‹Bɛndɔ. Gamba nɛsu kákeni ka besu bɔbhu. Gani ka basombisigi, bósombɛ nɛnu.› »
10 «Ai ye bii babhobho ndɔ báge k'aphe á somba a gamba, moko-ɛ́kɛka áokidia mbusa abɔ. Bundɔ baubhaphi bɔku ndɔ, báongia na moko-ɛ́kɛka ka jai. Báophatia kio gbonge! 11 Mbusa, bundɔ babhobho ndɔ báojua, báɔɔphanaga: ‹Mɔkɔta oo! Mɔkɔta! Osuukuia phɔ!› »
12 «Mɔkɔta áɔ̌kpɛmɛa. Aǒgeae: ‹Bɛndɔ, kéonúubha!› »
13 Yéso áɔgɔbɛa nyɔngɔ bende: «Oambani anja! Nga, bókûubha esa na mbenɔ nde mɔkɔta nɛnu ajuaeka!»
Mɛni á babhɛdanigi basaɔ na ɔlɔ
14 «Koboamɛ ndea Mokonga abande goto bende ka sungia a mokonda. Dái tɔ nkpa moti namɛi tamba, áɔ̌ɔphana babhɛdanigi nɛkɛ, áǒbhisa ka amba ɛtɔi nɛkɛ. 15 Aǒgabhea babhɛdanigi nɛkɛ bangɔa ka beana na ubhapha ndea nkpa. Aomopha moti ɔlɔ phaeka mia bɔku, mbhɛdanigi ba angbo mia ibɛ, ba angbo mia moti. Aoga danga. 16 Mɔngɔ moti, mmbɔ a na ɔlɔ mia bɔku, áoga k'aphe á somba na sombisaga. Aobikisa bangɔa nɛkɛ. Aɔtɔa goto ɔlɔ mia bɔku. 17 Mɛna-ɔlɔ mia ibɛ, áogea bíndɔ dhakɛ agi. Aɔtɔa goto ɔlɔ mia ibɛ. 18 Mɛna-ɔlɔ mia moti, áoga otongea odo, áɔsɔmɛa.»
19 «Mbusa ésa asi, mɔkɔta ndea babhɛdanigi ndɔ áojua. Aɔ̌ɔphana babhɛdanigi ndɔ bɔbhu, ka nyɔngɔ á tanga a bangɔa ndɔ dégabhei. 20 Mɛna-ɔlɔ mia bɔku, áɔsɛkɛda ka mpɛphɛ akɛ, áomopha phaeka ɔlɔ ɛlɛphu moti, áogeae, ‹Ɔlɔ mia bɔku nɛkɔ a unge. Mia bɔku nde nɛtɔi na bangɔa ndɔ a unge.› »
21 «Mɔkɔta nɛkɛ áonsega te: ‹Onde mbhɛdanigi anjanja phɛ̂. Ogi anja na bangɔa ba abhɔa ndɔ dékophi. Cɔ, nekophande ekuma á amba bangɔa asi. Ngia ka jai nɛmɔ!› »
22 «Mɛna-ɔlɔ mia ibɛ, áɔsɛkɛda ka mpɛphɛ akɛ, áomopha phaeka ɔlɔ mia gena, áogeae, ‹Ɔlɔ mia ibɛ nɛkɔ a unge. Ɔlɔ mia ibɛ nde nɛtɔi na bangɔa ndɔ a unge.› »
23 «Mɔkɔta nɛkɛ áonsega te: ‹Onde mbhɛdanigi anjanja phɛ̂. Ogi anja na bangɔa ba abhɔa ndɔ dékophi. Cɔ, nekophande ekuma á amba a bangɔa asi. Ngia ka jai nɛmɔ!› »
24 «Mpɔ mɛna-ɔlɔ mia moti áɔsɛkɛda ka mpɛphɛ akɛ, áongeae: ‹Mɔkɔta, neuubha gea te, onde nkpa akpɛkpɛ. Oodungusa mbuka ndɔ kókoni. 25 Netóobangi. Ka bondɔ, dɛ́sɔmi bangɔa nɛkɔ subi á odo. Cɔ, bhɛda bangɔa nɛkɔ unge!› »
26 «Mɔkɔta áonsikisiae: ‹Mbhɛdanigi ajede na mǔtu nde ca! Uubha doni gea, neodungusa mbuka ndɔ kékoni. 27 Cɔ, eke nde dókóbhisi bangɔa nɛmɔ subi á banki, ka nyɔngɔ nde batɔa-banki báobhisa bokambia? Dótú ogea bo, ámbe dɛ́tɔi goto ɔlɔ mia moti ndɔ na bokambia.› »
28 «Oa, áǒphaia ka babhɛdanigi buangbo, áǒgea te: ‹Mutani bangɔa nɛkɛ bhui ko! Bómophɛ nkpa nde a na phaeka a ɔlɔ ɛlɛphu moti. 29 Ka nyɔngɔ nde nkpa nde a na nkumba asi, nemophande goto nɛngbo. Nkpa nde a gǎkɛ na nkumba abhɔa, nemutande, nanga nkumba nɛkɛ ádɛda. 30 Gu á mbhɛdanigi ajede nde, makani na ntanga ka keiphe.› Ko, abaeka ngamɔ na ea á minyɔ.»
Tena á nyɔngɔ á bakpa bɔbhu ka sungia a mokonda
31 «Bii Muna-Nkpa ajuaeka ka bophombia bea moamɛ kimoti na bamalaeka bɔbhu, aikande ka kakaanga á tena a nyɔngɔ. 32 Bamalaeka bédhondanisande bakpa ékuna bhui mosa akɛ. Mpɔ áǒkatisana bakpa ba anja na bakpa ba ajede bíndɔ mbondigi-banyama aókatisana bamɔgɔgɔ na bamɛmɛ. 33 Ebhisande bundɔ bá bea bamɔgɔgɔ ka njaga akɛ á muku. Na bundɔ bá bea bamɛmɛ ka njaga akɛ á nkei. 34 Mpɔ Mɔkɔta áǒngodea bundɔ bá ka njaga akɛ á muku: ‹Bhikani, Mokonga anóphi koboamɛ nde anɔ́bɔngisiigi ka kpanga á conja á mokonda. 35 Nga, détú na nja, dóbomopi eea. Détú n'ɛnɔta, dóbomopi ibo á onoa. Détú mɔkɛni, dóbomosesi. 36 Détú ndumbu, dɔ́bɔmɔ̌lisi ngɔmbɛ. Détú na ngobho, dóbobhiki omoenga. Détú ka mekakɔ, dóbobhiki omoenga.› »
37 «Batɔa-doni bámǔsiande te: ‹Mɔkɔta, mbenɔ sina nde dɛ́bɛkɔɔni no na nja, béokopha eea? no n'ɛnɔta, béokopha ibo? 38 Mbenɔ sina nde dɛ́bɛkɔɔni bea mɔkɛni, béokosesea? no ndumbu, bɛ́ɔkɔɔlisa ngɔmbɛ? 39 Mbenɔ sina nde goto, dɛ́bɛkɔɔni no na ngobho, no ka mekakɔ, béokoenga?› »
40 «Mpɔ moamɛ ěsikisiande te: ‹Nenógie, kema nde bogi ka badhani bundɔ bána na boombia, a unge bogi k'eme.› »
41 «Mpɔ ěgeande bundɔ bá ka njaga akɛ á nkei: ‹Tokani oa ca! benu bandua amɔ. Gani k'oanga á nsa nde Mokonga abɔngisigi ka moamɛ á bansombo na bansombo nɛkɛ. 42 Nga, détú na nja, dóbókómopi eea. Détú n'ɛnɔta, dóbókómopi ibo á noa. 43 Détú mɔkɛni, dóbókómosesi. Détú ndumbu, dɔ́bɔ́kɔ́mɔ̌lisi ngɔmbɛ. Détú na ngobho, détú ka mekakɔ, bókomoengɛ.› »
44 «Mpɔ bámǔsiande te: ‹Mbenɔ sina nde dɛ́bɛkɔɔni na nja, n'ɛnɔta, nonde mɔkɛni, no ndumbu, no na ngobho, no ka mekakɔ, débékékoengi?› »
45 «Moamɛ ěsikisiande te: ‹Nenógie, kema nde bɔnkpɛmɛi dhani mmbɔ nna na boombia, bɔmɔkpɛmɛi phɔtɔ!› »
46 Yéso áɔgɔbɛa bɔphɛi nɛkɛ be: «Ka bondɔ, moamɛ ětekande bakpa ndɔ k'ɔma á binda abɔ kanga á sungia. Eophande batɔa-doni enda bea mɛyɔ.»