Nyɔngɔ á ngbɔa éndu a Mokonga
24
1 Mpɔ Yéso áojuana subi éndu a Mokonga, áoga. Na phɔtɔ otamba, bagoigi nɛkɛ báombhikia, báɔmɔ̌nisa bonjanja á mɔphɛkɔ éndu a Mokonga. 2 Mpɔ Yéso áǒgea te: «Bɔɔni mɔphɛkɔ nde? Nenógie, ɛtɛ moti á mɔphɛkɔ ndɔ, káikɛku gu á dhakɛ, bhui angbɔɔkanande.»Ɔtɔa á nyɔngɔ á sungia á mokonda
3 Yéso áokidia ka mamba Misɛitúni. Aodapha, áoika ko ka goisaga. Bagoigi nɛkɛ sasa akɛ báɔngɛndɛa, báomǔsia: «Osongodea phɔ mbenɔ ndɔ á geana á nyɔngɔ éndu a Mokonga. ?Goto, mphaniɔ á jua akɔ ka sungia á mokonda nde, abaeka bo?»
4 Yéso áǒsikisia boabhi te: «Oambani, nkpa kanódhemɛ mɔnɔ. 5 Nga, bakpa ba asi bábhikande, báǒsoa ina ani, báogeae: ‹Eme ambe nende Kiísito.› Bakpa ndɔ bédhemagande bakpa ba asi phɛ̂.»
6 «Bɔɔkande ndu émani, n'ɛ́phɛ-ɛ́phɛi. Bókobangɛ mɔnɔ gǎkɛ. Akeni nyɔngɔ ndɔ ájuɛ. Nga, nna gǎkɛ sungia á mokonda ungɔ. 7 Goto ekuna k'ekuna bámanande. Koboamɛ ka koboamɛ bámanande. Monganya na baningina aguande k'ɔma danga-danga. 8 Kema ndɔ bhubhui abande bea kpanga á ama-ka-eme boae.»
9 «Oa, bánodhungande, báonóbinda, báonóma, batɔ-ékuna bhui bánokangeande ka nyɔngɔ ani. 10 Bakpa ba asi básagande beekea nɛbɔ. Bátɔnganande, bákangeanande.»
11 «Baɔtu-nyɔngɔ á mbɛa bákidianande, báǒdhema bakpa ba asi. 12 Ka bondɔ, bojede abikande, ekondani ndea bakpa ba asi asiande.»
13 «Nkpa nde aphiphiande gǎkɛ beekea ani, a ambe Mokonga anamisande. 14 Babeeki báphɛande nyɔngɔ anja á koboamɛ ndea Mokonga ka mokonda bhui. Cɔ, oa unge abaeka sungia á mokonda.»
Bɔphɛi á matu á ea a minyɔ
15 «Bɔɔnande ‹Iii á ntɔa-ɔjɔɔkana›, nndɔ mɔtu-nyɔngɔ Danyɛ́ɛ dádundu nyɔngɔi, bakɛni nabámesi subi éndu a Mokonga.»
Ndundu Matáiɔ dági: «Mmbe aotanga, ádigimisɛ.»
16 Yéso dégi goto te: «Bundɔ bábande ka Yudhɛ́a, bágɛ k'aphe ɛ́sɔmɛana. 17 Mmbe a ka ntɔndɔ éndu nɛkɛ, ákiɛ ágɛ mbangɔ. Kangiɛ mɔnɔ subi éndu nɛkɛ ka bhɛda a nkumba nɛkɛ. 18 Mmbe a ka ciko, kajɛ mɔnɔ mbusa ka bhɛda a bhɔngɔ nɛkɛ mosa á tea akɛ. 19 Oo! ayo ka bama-ka-eme, na bama-mbɛnjɛ k'esa ndɔ! 20 Mɛmani Mokonga phɛ̂ ka gea ga anu mbangɔ kabɛ mɔnɔ mbenɔ á bɛjɔ, goto k'esa á sabato. 21 Ea á minyɔ ndea k'esa ndɔ, akaaeka phɛ̂ kɔnyɛnya kokae bhubhui ndea mokonda á kala na nnde abhikaeka. 22 Atúoba Mokonga nakángbiimisi esa á ea a minyɔ ndɔ, ambe ka bakpa kátóamɛeka. Angbiimisande gǎkɛ ka nyɔngɔ á bakpa ndɔ ɛ̌̀sɔmbu.»
23 «Ka bondɔ, bókǒbeekeɛ mɔnɔ bundɔ báonógeae: ‹Kiísito a oa!›, ‹Kiísito a ko!›. 24 Nga, bakiísito á mbɛa, na baɔtu-nyɔngɔ á mbɛa, bákidianande, báogea ketangaɔ angbo phɛ̂. Bákabande dhema á bundɔ Mokonga ɛ̌̀sɔmbu. 25 Ɔkani, nenúubhisi mosa, bókǒdhemisɛ mɔnɔ na badhemigi ndɔ.»
26 «Bókombeekeɛ mɔnɔ gǎkɛ nkpa nde aonóngodea te: ‹Kiísito a k'osaa!› Bókogɛ mɔnɔ ko. Nkpa ba angbo ayɔngande: ‹Kiísito ɛ̌̀sɔmɛani k'endu ndɔ!› Bókombeekeɛ mɔnɔ. 27 Nga, eme Muna-Nkpa nebhikande bea phenua á mbua, nnde báɔɔna ka mokonda bhui.»
28 «Nenóngodi ka mɛni gea: ‹Bii monda abéi, a unge bandia bá gǎkɛ odhondanaga.› »
Matu á ja á Muna-Nkpa
29 «Cɔ, mɔngɔ imoti, mbusa á matu á ea a minyɔ, mani kábɛtɛku, songe kábɛtɛku, basɛɛngɔa báguande. Kobha adenga-dengande. 30 Mpɔ mphaniɔ á Muna-Nkpa asɛnɛkande na kobha. Nebhikande na boombia, na bukpɛkpɛ phɛ̂ subi á motondo-égugu. Bii báɔnande bo, bakpa á k'ekuna bhui bágamaeka ka nyɔngɔ á bojede nɛbɔ. 31 Ɛsɔ á mbengu angbo aɔkɛkanande. Nětekande bamalaeka, bédhondanisande bundɔ Mokonga ɛ̌̀sɔmbu ka mokonda bhui.»
Mɛni á me bea cɛnjɛ
32 «Digimisani phɔ mɛni á me bea cɛnjɛ. Bii ntabhi akɛ aokpanga tɛmbɔa, ubhani gea, okame a ye tɔ bhibhi. 33 Boyéɔɔna kema ndɔ bhubhui, ubhani gea, eme Muna-Nkpa ne ye tɔ k'aphe íso éndu. 34 Nenógie, ɛbɔkɔti nde kásiɛku na ka bii kema ndɔ bhui nakágeani. 35 Kobha na mokonda asiande, nyɔngɔ nɛmɔ kásiɛku gǎkɛ.»
Ja á Muna-Nkpa, nna na mosenda
36 «Cɔ, nna gǎkɛ na nkpa nde auubha nyɔngɔ á esa ndɔ á jua ani, nanga bamalaeka, nanga eme Muna-Mokonga. Abhabhisa ambe auubha. 37 Bindɔ dátú matu ndɔ á Nɔ́a, abaeka gǎkɛ tɔ bo mbenɔ ndɔ Muna-Nkpa ajuaeka. 38 Nga, k'esa ndɔ, mosa á tuma a ibo ka mokonda bhui, bakpa dábaigi, báonoa, báɔɔmana na ka bii Nɔ́a dángi subi á koko. 39 Dábákáubhaphi ye na ka bii ibo dátumi, áǒmia bakpa bɔbhu ko! Abaeka tɔ bo esa ndɔ Muna-Nkpa abhikaeka.»
40 «Mbenɔ ndɔ, boko babɛ bábhɛdanagande ka ciko, bamalaeka bámbhɛdande moti, báonsaga moti. 41 Bake babɛ bábande odhoa mponga. Bámbhɛdande moti, báonsaga moti. 42 Cɔ, óambani pɛ anja. Nga, bókûubha esa ndɔ Mɔkɔta nɛnu abhikaeka.»
43 «Mɛna-endu dátûubha esa ndɔ nkukuba aomǔbia, dáphɛande tɔ ka amba a endu nɛkɛ. 44 Ka bondɔ, bani phae na masendɔ. Nga, eme Muna-Nkpa, nebhikande mbenɔ ndɔ bókóomosenda.»
Mɛni á mbhɛdanigi anjanja na mbhɛdanigi ajede
45 «Cɔ, mbhɛdanigi anjanja sina mbe auubhapha phɛ̂? A ambɔ aobá́ mɔkɔta nɛkɛ nasɛi tamba, áombhisa gu á badhakɛ ka gabhea abɔ eea, nja nɛ̌̀bhɛdi. 46 Maseye ka mbhɛdanigi ndɔ mbenɔ nde mɔkɔta nɛkɛ aojua, áondhonda naogea bo. 47 Nenógie, mɔkɔta ambhisande ba á nengi-nkumba nɛkɛ bhui.»
48 «Cɔ, a gǎkɛ oba mbhɛdanigi ndɔ na ajede, akanisiande gea: ‹Mɔkɔta aiphi phɛ̂!› 49 Aokpanga binda á badhakɛ, áoeaga, áonoa kimoti na batɔa-buita. 50 Mpɔ mɔkɔta áojua na ka bii mbhɛdanigi ndɔ nna na mosenda. 51 Bii mɔkɔta nɛkɛ aɔni ye gǎkɛ odhemayɔ ndɔ, áondhunga mogaa ndɔ, áombinda phɛ̂. Nga, bámakande k'oanga á nsa. Ko, abaeka ngamɔ na ea á minyɔ.»