Ca á baphangigi-ɛɔphi
23
1 Mpɔ Yéso áongodea madhondanɔ na bagoigi nɛkɛ gea: 2 «Béophi baphangigi-ɛɔphi na baPhaisáiɔ bukpɛkpɛ á tɔmiaga ɛɔphi ndea Mósa. 3 Ka bondɔ, ɔ́ɔkani na gea á kema bhubhui nde báonóngodea. Bókobeɛmbɛ gǎkɛ tambea abɔ, ka nyɔngɔ nde bánaogea kema ndɔ báɔphɛa. 4 Nga, bɔphɛi nɛbɔ a bea nkumba. Báǒkumbisa bakpa nkumba ndɔ, nanga na adoko, bánaokonda sambɔai na miki á njaga abɔ. 5 Goto, báogea kema nɛbɔ bhubhui mosa á bakpa gea bébhebhɛ. Báodundua nyɔngɔ danga-danga á Mokonga k'ikanga angbo phɛ̂, báɔ̌bɔɛa k'endondo na njaga. Goto bii asii ndea bakpa ande phopha á masɛmbɛ ka sese a ngɔmbɛ, masɛmbɛ nɛbɔ aenda phɛ̂. 6 Báokonda ika ka kakaanga mosa á bakpa mbenɔ á jai, na k'endu á bɔphɛi . 7 Bákondi gea te bakpa béseseɛ ka mosomba, bɛ́ɔphanɛ ‹Baphangigi›. 8 Benu, bákanóseseɛ mɔnɔ gǎkɛ ‹Baphangigi›, ka nyɔngɔ nde bonde batɔa-komunaměma. Bo na mphangigi moti tɔndɔ. 9 Bɔ́kɔmɔphanɛ mɔnɔ gǎkɛ nkpa ka mokonda nde ‹Abhɛ›. Nga, abhanu a tɔ moti mmbe a na kobha. 10 Bákanɔ́ɔphanɛ mɔnɔ gǎkɛ tanda ‹Bakɔta›. Nga, bo tɔ na mɔkɔta moti, eme mmbe Mokonga amɔsɔmbu. 11 Nga, nkpa nde a na boombia sɔsɔbɛ anu, ábɛ ndiu nkɔbɛ nɛnu. 12 Mmbe ědokomisi sɔsɔbɛ anu, Mokonga ankusaeka na soni. Mmbe ɛ̌̀bhɔbhɔmisi gǎkɛ sɔsɔbɛ anu, Mokonga andokomisaeka.»Sɛmɛaga á baphangigi-ɛɔphi
13-14 «Ayo! benu baphangigi-ɛɔphi na baPhaisáiɔ. Bonde badhemigi! Boodaka aphe á ngia ka nji á koboamɛ ndea Mokonga, na benu bókóongia sasa anu ka nji ndɔ. Bo goto odaka aphe ka bakpa buangbo, bundɔ bákondi bángiɛ, ka nyɔngɔ á kpaga a ɛɔphi nɛnu.»
15 «Ayo! benu baphangigi-ɛɔphi na baPhaisáiɔ. Bonde badhemigi! Bokai obenge, bophodi nji angbongbo, ka nyɔngɔ á kabaga a ngoigi moti tɔndɔ. Ka bii bɔmɔ̌ni ngoigi ndɔ, mbusa á goisaga akɛ, áoba ntɔa-koboamɛ ndea Satani, mɔngɔ ibɛ kɔnɔ́nyɛnya.»
16 «Ayo! benu bamɛi-mosa bakeime-ime nde ca! Bɔɔphɛa te: ‹Aoba nkpa nanu esomba k'ina éndu a Mokonga, nndɔ kabɛ kema. Aoba nanu gǎkɛ esomba k'ina á ɔ́lɔ nnde a subi éndu a Mokonga, esomba ndɔ a na bukpɛkpɛ.› 17 Babhobho bakeime-ime nde! Eke nde a anja phɛ̂: ɔlɔ? endu á Mokonga nde adokomisi ɔ́lɔ?»
18 «Bɔɔphɛa goto te: ‹Aoba nkpa nanu esomba k'ina á kankɛngɛ, kabɛ kema. Aoba nanu gǎkɛ esomba k'ina ɔ́phɛɔ gui, esomba ndɔ a na bukpɛkpɛ.› 19 Bakeime-ime nde ca! Kema sina nde a na boombia phɛ̂, ɔphɛɔ ndɔ? Kankɛngɛ nde adokomisi ɔphɛɔ? 20 Ka bondɔ, nkpa nde anu esomba k'ina á kankɛngɛ, anu ye gǎkɛ tɔndɔ k'ina á kema bhubhui, nnde a gu á kankɛngɛ. 21 Goto, nkpa nde anu esomba k'ina éndu a Mokonga, mmbɔ aonoa k'ina akɛ na k'ina á Mokonga, mmbɔ aoikaga ko. 22 Goto, nkpa nde anu k'ina á kobha, anu k'ina á kakaanga ndea Mokonga na k'ina á Mokonga.»
23 «Ayo! baphangigi-ɛɔphi na baPhaisáiɔ. Bonde badhemigi! Bɔɔphɛa phaeka nkama ndea miki á kema bhubhui bea nkaya, ngbagu, boii. Cɔ, bodeketi ndiu ɛɔphi nde a angbo phɛ̂ bea: gea anja ka badhakɔ, kuia á ngomi, gea á kodoni. Atókeni bóbeekeɛ ɛɔphi angbo kanga á deketa miki ɛ́ɔphi nɛngbo. 24 Bamɛi-mosa bakeime-ime nde ca! Aoba ɔmbɔɔ nangi ka saa nɛkɔ, ɔ́ɔnkɛndɛa, óonoa. Mpɔ nyama bea njae aongia ka saa ndɔ, bɔ́kɔnkɛndɛɛ, bô ndiu onoa.»
25 «Ayo! baphangigi-ɛɔphi na baPhaisáiɔ. Bonde badhemigi! Boosokosa bhǎnyɛnyɛ a saa n'ɔphɛphɛ nɛnu anja. Nga, bookanisia te, boogea anja mosa á Mokonga. Měma anu atumi gǎkɛ na nkiki á kuba na kuma. 26 Benu baPhaisáiɔ bakeime-ime, sokosani phɔ subi á saa. Mpɔ mbusa, bhǎnyɛnyɛi abande goto anja.»
27 «Ayo! baphangigi-ɛɔphi na baPhaisáiɔ. Bonde badhemigi! Bokengeani na bhota nnde bátɔndi na dɔphɛ abhu tuu! Bakpa bɔbhu báɔɔna na anja, kǎsi subii atumi na nkua na nkiki asi. 28 Bende, bhǎnyɛnyɛ anu, bakpa báɔɔna na anja, kǎsi subi anu botumi n'odhemayɔ na bojede.»
29 «Ayo! baphangigi-ɛɔphi na baPhaisáiɔ. Bonde badhemigi! Bɔ̌phɛkɛa baɔtu-nyɔngɔ á kala endu gu á bhota abɔ. Bɔ́ɔtɔnda bhota á babeeki bundɔ tambea abɔ dátú anja phɛ̂. 30 Oa, bôgea te: ‹Dátúoba mbenɔ á batatasu, dɛ́bɛ́kɛ́ɔkanɛku n'abɔ ka ma a baɔtu-nyɔngɔ.› 31 Ka bondɔ, bɔɔ́yɔngɛa gea te, bonde basuko á bakpa ndɔ dáběme baɔtu-nyɔngɔ. 32 Cɔ, gani bɔ́gɔbɛ kema ndɔ batatanu dábakpangi bhui!»
33 «Benu banjɔka, ekombo á banjɔka nde ca! Boteaeka esui ndea Mokonga bo, ka makea anu k'oanga á nsa? 34 Ka bondɔ, ɔkani phɔ. Nenótekeande baɔtu-nyɔngɔ, batɔa-ubhapha na baphangigi. Bǒmande k'abɔ, buangbo bǒmande gu á nkpatɔ. Bǒbindande buangbo k'endu á bɔphɛi nɛnu, na beaga abɔ nji ka nji. 35 Ka nyɔngɔ nde, esuia ndea Mokonga ka maga a batɔa-doni anóguiaeka. Ka kpanga á moa á Abɛ́i, ntɔa-doni, ka sungia a Jakaía muna-Baakía, mmbɔ batatasu dábamoe ka meme éndu a Mokonga n'ɔma á kankɛngɛ. 36 Nenógie, esuia ndea Mokonga ka nyɔngɔ á ma a batɔa-doni ndɔ, abande gu á batɔa ka matu nde.»
37 «Ho! batɔa ka Yɛusalɛ́ma ee! Dóbǒme baɔtu-nyɔngɔ, dɔ́bɔ̌bɛtigi bateki ndea Mokonga n'ɛtɛ. Mɔngɔ kungani nde netókondi dhondanisa anu bea kɔkɔ naókotoa banakɛ kusi á kepupe akɛ. Bókó gǎkɛ okonda. 38 Ka bondɔ, nji nɛnu abande esimɔ. 39 Nenógie, kpanga a kɛkɛ nde, bɔ́kɔ́mɔɔnɛeka ye, ka bii bɔyɔngande gu ani te:
Mokonga ábhisɛ njaga akɛ gu á nkpa nde abhiki k'ina akɛ.»