Mɛni ɛ́kɛka
22
1 Yéso déphangi goto bakpa ka mɛni áogeae: 2 «Koboamɛ ndea Mokonga a be. Dái tɔ moamɛ moti mmbe dábɔngisigi moangɔ ɛ́kɛka k'anakɛ, 3 áǒteka babhɛdanigi nɛkɛ k'aphe á ɔphana á bakpa gea, bángiɛ k'endu ɛkɛka. Bakpa ndɔ bákakondɛ gǎkɛ.»4 «Ka bondɔ, áǒteka babhɛdanigi buangbo na moyo ka bundɔ bɛ́ɔphani gea, ‹Ɛkɛka nɛmɔ a ye tɔ bhibhi kɛkɛ nde. Nětenisi buku á ngɔmbɛ na bamponjɔ á nyama danga-danga nabánɔni phɛ̂. Kema bhubhui abɔngi. Bhikani ka jai ɛ́kɛka.› »
5 «Cɔ, bundɔ dábɛ̌̀ɔphani, bákabhisɛ měma abɔ kau, bâ ndiu tɔ osuia gea á kema nɛbɔ. Moti áoga na ciko nɛkɛ, moti k'endu a nkumba nɛkɛ. 6 Buangbo, báǒdhunga babhɛdanigi, báǒbinda, báǒma.»
7 «Bii moamɛ aɔki tɔ nyɔngɔ ndɔ, áɔbɛa phɛ̂. Aǒteka batɔ-émani nɛkɛ, báǒma bundɔ béme babhɛdanigi nɛkɛ. Mbusa, báotoboa nji ndɔ ko!»
8 «Mpɔ áǒngodea babhɛdanigi nɛkɛ te: ‹Cɔ, ɛkɛka abɔngi. Bundɔ nɛ̌̀ɔphani gǎkɛ bákákeni. 9 Ka bondɔ, gani k'aphe ndɔ a angbo kubii bakpa bábiki. Bundɔ bɔ̌bɔnande, ɔ́ɔphanani, bódhondanisɛ bɔbhu.› »
10 «Babhɛdanigi báogea bo, báoga k'aphe ndɔ a angbo ka dhondanisa á bakpa bɔbhu bundɔ ba anja na bundɔ ba ajede. Mpɔ endu ɛ́kɛka áotuma na bakpa ndɔ bɛ́ɔphani.»
11 «Cɔ, bii moamɛ angi ye gǎkɛ k'endu ɛkɛka, áɔmɔ̌na nkpa moti mmbe dákáɔli ngɔmbɛ ɛ́kɛka, áongea te: 12 ‹Moko, ongi oani nɔkɔ́ɔli ngɔmbɛ ɛ́kɛka ka bo?› Nkpa ndɔ dákánsikisii ye tanda nyɔngɔ moti.»
13 «Oa, áǒngodea babhɛdanigi nɛkɛ te: ‹Mboagani nkpa nde k'ecinji na njaga, bómakɛ ka keiphe. Ko, abaeka ngamɔ na ea á minyɔ.› »
14 Yéso áǒgea te: «Nga, Mokonga ɛ̌̀ɔphani bakpa ba asi, bakpa ba abhɔa bábeeki mɔphani ndɔ.»
Phenda á manjanja
15 Mpɔ baPhaisáiɔ báoga onca Yéso ka tomba akɛ. 16 Bii báɔkani ye, báǒteka bagoigi nɛbɔ kimoti na bakpa ndea moamɛ Ɛlɔ́dhɛ. Báombhikia Yéso, báongodea te: «Mphangigi, beuubha gea onde ntɔa-doni. Nga, ǒphangiaga bakpa kodoni, na kema nde Mokonga akondi. Goto kóombanga nkpa, nanga ába ntɔa-boombia. 17 Ɔsɔtɔmia phɔ nyɔngɔ nde. Ɛɔphi asósosi phenda á manjanja ka moamɛ ndea baLɔ́ma mɛna-nji nɛsu?»
18 Oa, Yéso áuubha kanisia abɔ ajede, áǒgeae: «Benu badhemigi nde ca, eke nde boomotombaga ne cɛɛ, baya? 19 Cɔ, ómophangiani phɔ bangɔa nde akeni ka phenda á manjanja.»
Báomphangia ngɔa moti.
20 Mpɔ Yéso âkuusia: «Keongi, na ina nde bábɛti oani, ande á nkpa sina?»
21 Báonsikisia te: «Ande á mɔkɔta á baamɛ ndea baLɔ́ma.»
Mpɔ Yéso áǒgeae: «Cɔ, mphendani pɛ mɔkɔta ndɔ kema nɛkɛ, mpɔ bómphendɛ gǎkɛ Mokonga nɛkɛ.»
22 Bii báɔki tɔ nyɔngɔ ndɔ, báoyayama phɛ̂. Mpɔ báondeketa, báoga.
Mǔsiɔ gu á jujuka á basi
23 Esa ndɔ tɔ, baSadhukáiɔ báombhikia Yéso. BaSadhukáiɔ bá ungɔ dábákátúobeekea nyɔngɔ á jujuka á nkpa mbusa á kukua. Báomǔsia Yéso te: 24 «Mphangigi, ɛɔphi ndea Mósa agi te,
Aoba nkpa naku kanga á bɔkɔta, munama-moko ndɔ angiiande nke ndɔ ka nyɔngɔ á bɔkɔtɛa a mmbɔ aku ndɔ baniki.
25 Cɔ, beuubha baganda saba k'ekombo moti. Ange dámbu nke, áokua kanga á bɔkɔta. 26 Ba ko babɛ áongiia nke á k'ekusa ndɔ, áokua goto kanga á bɔkɔta. Ba ko basaɔ, áongiia nke ndɔ, áokua goto tɔ kanga á bɔkɔta. Bɔbhu báotinda ko! 27 Mpɔ mbusa, nke ndɔ áokua. 28 Cɔ, esa á jujuka á basi, nke ndɔ abande nka-nkpa sina? Nga, baganda ndɔ bɔbhu dábambu.»
29 Yéso áǒsikisia te: «Baya, bǒdhemisigi phɛ̂. Nga, bókûubha buku á Mokonga na bukpɛkpɛ nɛkɛ. 30 Nga, bii basi bájujukande, bábande bea bamalaeka bundɔ bá na kobha. Bákáɔmanɛku.»
31 «Cɔ, nyɔngɔ á jujuka á basi a bende: Bókótangimbe mɔnɔ subi á buku á Mokonga? Dánongodie:
32 Nende Mokonga ndea Abhalaámu, Isáka, na Yakɔ́bɔ.
Cɔ, bakpa ndɔ bási bɔbhu. Nyɔngɔ ndɔ asóngodi gǎkɛ gea, bájujuki ka kukua. Nga, Mokonga nna Mokonga á basi, ande Mokonga á baendi.»
33 Bii madhondanɔ aɔki nyɔngɔ ndɔ, bakpa ndɔ báoyayama phɛ̂ ka nyɔngɔ á bɔphɛi nɛkɛ.
Ɛɔphi ibɛ, nnde angbo phɛ̂
34 Bii baPhaisáiɔ dábaɔki gea, Yéso ědhakanisi baSadhukáiɔ, báodhondana, báombhikia. 35 K'abɔ moti dátú mphangigi-ɛɔphi, áomǔsia ka tomba akɛ be: 36 «Mphangigi, ɛɔphi sina nde anyɛnyi ɛɔphi nɛngbo bhui?»
37 Yéso áonsikisia te:
«Nkonda Mɔkɔta-Mokonga na měma akɔ bhui, na kanisia akɔ bhui, na tambea akɔ bhui.
38 Ɛɔphi nde unge anyɛnyi ɛɔphi nɛngbo bhui. 39 Ɛɔphi a ko ibɛ nnde akengeani n'ɛɔphi á konda a Mokonga, ande:
Nkonda dhakɔ bíndɔ ǒkondi sasa akɔ.
40 Ka bondɔ, ɛɔphi ndea Mósa na bɔphɛi ndea baɔtu-nyɔngɔ, atoki k'ɛɔphi ibɛ ndɔ.»
Boabhi gu á Kiísito
41 Bii baPhaisáiɔ dábadhondani phɔtɔ oa, Yéso âkuusia: 42 «Bookanisia gu á Kiísito bo? Ande mosuko ani?»
Bɔbhu báonsikisia te: «Ande mosuko á Dhaúdhi.»
43 Yéso áǒgea te: «Nyɔngɔ sina nde Měma-Anja ndea Mokonga amphangi Dhaúdhi na yɛ ansǔ Kiísito mɔkɔta nɛkɛ? Nga, Dhaúdhi adundu:
44 Mɔkɔta-Mokonga angodi Kiísito, mɔkɔta nɛmɔ: ‹Ika nkɛkɛɔ ani á muku, na ka bii někusande babibia akɔ na soni mosa akɔ.›
45 Cɔ, aobá́ gǎkɛ Dhaúdhi nansǔ Kiísito, mɔkɔta nɛkɛ, ka nyɔngɔ sina nde Kiísito abande gǎkɛ mosuko á Dhaúdhi?»
46 Ka bondɔ, nna na nkpa nde dátɔki sikisia akɛ nyɔngɔ. Kpanga esa ndɔ tɔ, ka bakpa dábákáyéokinia usia akɛ ka tomba akɛ.