Yéso angi ka Yɛusalɛ́ma bea moamɛ
21
1 Yéso na bagoigi nɛkɛ, dábabhiimisi Yɛusalɛ́ma. Báojua ka Bhɛtɛphágɛ, ka mamba ndɔ Misɛitúni.Aǒteka ka bagoigi nɛkɛ babɛ mosa. 2 Aǒngodea te: «Gani ka nji ndɔ a mosa anu. Bɔmɔ̌nande mponda moti nabánkpaki n'anakɛ, naiki ka mpɛphɛ akɛ. Okodani bóbhikɛ n'abɔ mɔtɛmɔ. 3-7 Aoba nabánuusi nyɔngɔ abɔ, bógea te: ‹Mɔkɔta ambe ɛ̌̀ɔphanei.› Mbenɔ ndɔ bánosageande.»
Mpɔ bagoigi babɛ ndɔ báogea bíndɔ Yéso ěngodi. Báoga, báoja na banyama ndɔ. Báogbandua ngɔmbɛ nɛbɔ gu abɔ. Yéso áokambea gu á mponda moti. Yɛ na bagoigi nɛkɛ báɔmɛa, báoga na Yɛusalɛ́ma.
Cɔ, nyɔngɔ ndɔ áɔtɔtɔkɛana bíndɔ Mokonga dángodi mɔtu-nyɔngɔ Jakaía gea:
Ongodea batɔa ka nji Saóni, ógeɛ te: «Engani phɔ! Mɔkɔta nɛnu aobhika mɔtɛnu. Ande ntɔ-aphɔngɔ. Akambi gu á mponda. Muna-mponda ndɔ aotamba kimoti n'amakɛ.»
Nga, Saóni ande ina á Yɛusalɛ́ma nɛngbo.
8 Bii dábaotamba ka ga na Yɛusalɛ́ma, bakpa ba asi bundɔ dábatú oa, báogbandua ngɔmbɛ nɛbɔ k'aphe. Buangbo báotena nkokɔ á mbia, báocumaga ka mpɛphɛ aphe. 9 Bundɔ báotamba mosá á Yéso na mbusa akɛ, báokoga k'ɛsɔ akpɛ te: «Obhebhɔ ka Mosuko á Dhaúdhi! Obhebhɔ ka nkpa nde aokidia k'ina á Mɔkɔta! Obhebhɔ ka Mokonga!»
10 Mbusa, Yéso áongia ka Yɛusalɛ́ma. Bakpa á ka Yɛusalɛ́ma báɔɔka kidia akɛ, nyama abɔ áodhuuka, báogea te: «Nkpa sina mbe?»
11 Bundɔ dábatambi kimoti na Yéso báǒsikisia te: «Ande Yéso mɔtu-nyɔngɔ, ntɔa-Nasalɛ́ti á ka Galiláia.»
Ngia k'endu á Mokonga
12 Bii Yéso aju ka Yɛusalɛ́ma, áongia subi á oba éndu a Mokonga. Oa, bakpa dábaosombeanaga. Ande gea, dábaoanganisa bangɔa nɛbɔ na bangɔa éndu a Mokonga. Goto, dábaósombisa bamboe á phɛa. Yéso áǒbeaga, áokpungbumisa mɛsa ndea basombisigi na baanganisigi ndɔ. 13 Mbusa, áǒgea bakpa ndɔ te: «Dábadundu subi á buku á Mokonga, áogeae:
Endu nɛmɔ abande endu ɛ́mɛmi.
Cɔ, benu bogai ye goto k'endu a bakukuba.»
14 Oa ndɔ, bakeime-ime na badɔti báɔngɛndɛa Yéso subi éndu a Mokonga, áǒamisa. 15 Cɔ, baniki dábatú oa. Bii báɔni kema ndɔ Yéso dági, báokoga te: «Obhebhɔ ka Mosuko á Dhaúdhi.»
Goto, bakɔta á baphɛ́i na baphangigi-ɛɔphi dábatú oa. Bii bɛ́ɔni baniki nabákogi na ɔna á ketangaɔ ndɔ Yéso agi, báɔbɛa phɛ̂. 16 Ka bondɔ, báomǔsia Yéso: «Ɔɔki nyɔngɔ ndɔ baniki báyɔngi ndɔ?»
Aǒsikisia te: «Eya. Bókótangimbɛ mɔnɔ subi á buku á Mokonga?
Obhebhɔ nɛkɔ ajuanande k'aphe á nɔkɔ á baniki na bambɛnjɛ.»
17 Mbusa, Yéso áǒdeketa bakpa ndɔ, áoga na Bhɛtanía, áoda ko.
Ɔmɔkaka á me
18 Mama i ka mbimba, Yéso áoja na bagoigi na Yɛusalɛ́ma. Bii dáotamba, nja áɔmbhɛda. 19 Aɔɔna me bea ebombi ka mpɛphɛ á aphe. Aoketa ka ɛnjiai, áodhonda nakágɔmbi. Aɔnsɛmɛaga me ndɔ te: «Kɔgɔmbɛeka.» Mɔngɔ moti, me ndɔ áɔɔmɔkaka.
20 Bii bagoigi báɔni ketangaɔ ndɔ, báoyayama, báɔyɔnga te: «Me nde aɔmɔkaki bo?»
21 Yéso áǒgeae: «Nenógie, aobá́ nobobeeki doni kanga á ngaka, bɔtɔkande gea á kema sumbii negi ka me nde. Goto, bobande na bukpɛkpɛ á gea á mamba, ‹Mamba ma, óguiɛ k'ibo!› Aotoa. 22 Aoba nɔbɔmɛmi na beekea á doni, Mokonga anóphande kema ndɔ bɔɔmɛma.»
Cina á bukpɛkpɛ ndea Yéso
23 Mbusa, Yéso áojua ka Yɛusalɛ́ma, áongia subi éndu a Mokonga. Bii angi, áǒphangiaga bakpa. Na phɔtɔ óphangiaga, bakɔta á baphɛ́i na bagbɛga á ka nji báɔngɛndɛa, báomǔsia: «Otoki na boombia nde oa? Animbe akophi bukpɛkpɛ nde?»
24 Mpɔ Yéso áǒgea te: «Mosa-mosa á sikisia anu nyɔngɔ, nekondi phɔ gǎkɛ nénuusiɛ nyɔngɔ moti mosa pɛ. Aoba nobomosikisii, nenóngodeande phɔtɔ cina á bukpɛkpɛ nɛmɔ. 25 Cɔ, animbe dánteki mɔnɔ Yoáni-Mbatisi k'aphe á batisa á bakpa? Mokonga ambe dánteki mɔnɔ? Ande gǎkɛ gea bakpa ba unge dábanteki?»
Báokpanga yɔngaga sɔsɔbɛ abɔ, báogea te: «Aoba nebegi te, atoki na bukpɛkpɛ ndɔ ka Mokonga, ámbe asúusiande: ‹Cɔ, nyɔngɔ sina nde dóbókómbeeki Yoáni?› 26 Beyéogea, atoki na bukpɛkpɛ nɛkɛ ka bakpa, beobanga usɛsɛ á bakpa, bundɔ báokanisia te, Yoáni dátú mɔtu-nyɔngɔ.»
27 Ka bondɔ, báonsikisia Yéso te: «Békéuubha.»
Yɛ, â gǎkɛ ǒsikisia te: «Eme phɔtɔ kénongodeɛku cina á bukpɛkpɛ nɛmɔ.»
Mɛni á baganda babɛ
28 Yéso áotutuisa yɔnga ka bakɔta á baphɛ́i be: «Bogi gu á mɛni nde bo? Nkpa moti dátú na baganda nɛkɛ babɛ. Aonsosea moti: ‹Mukuamɔ, ga phɔ ɔ́bhɛdanɛgɛ k'esa nde ka ciko.› »
29 «Aonsikisia abhakɛ te: ‹Kékondi.› Mbusa, áoianaga, áoga.»
30 «Abhabɔ áɔngɛndɛa mmbɔ ba á ko babɛ, áongodea sumbii atóngodi mmbɔ ba á mosa. Miki ndɔ áobeekea: ‹Negande.› Mbusai, kagɛ.»
31 «Cɔ, sɔsɔbɛ á baniki ndɔ ba á babɛ, animbe dági kema ndɔ abhakɛ dákondi?»
Báonsikisia te: «Mmbɔ ba á mosa.»
Ka bondɔ, Yéso áǒgea te: «Nenógie, baphendisigi-manjanja na bake á komusɔngɔ, bá bea miki ndɔ ba á mosa. Bángiande ka koboamɛ ndea Mokonga mosa anu.»
32 «Nga, Yoáni-Mbatisi dábhiki mɔtɛnu ka phangia anu tambea anja, dóbókómbeeki gǎkɛ. Baphendisigi-manjanja na batɔa-komusɔngɔ bá unge dábambeeki ndiu. Nanga bii dɔ́bɔɔni bo, dóbókóketi gǎkɛ tambea anu ka beekea akɛ.»
Mɛni á bagubhi ba ajede
33 Yéso áǒgea bakɔta á baphɛ́i te: «Ɔkani phɔ goto mɛni nɛngbo. Nkpa moti dákoni ciko á mbuka aɛkɛ, áoga. Aɔphɛkɛa ɔma á kama ibo á mbuka ndɔ, áɔphɛka mutumbe ka babondigi-ciko. Bii dáoga danga, áɔ̌ɔphana bagubhi ka bhɛdaneaga akɛ. Mbusa áɔmɛa tamba.»
34 «Bii esa á dungu akpeengeani ye, áǒteka bateki nɛkɛ ka bagubhi gea bámophɛ phaeka a dungu nɛkɛ. 35 Báju ye, bagubhi báǒdhunga bateki ndɔ, báombinda moti, báomoa moti, báɔmbɛta moti n'ɛtɛ, áokua.»
36 «Mɛna-ciko ndɔ áǒteka bateki buangbo ba asi kɔnyɛnya bundɔ á mosa. Bagubhi báǒgeea bundɔ bíndɔ dáběgii bundɔ á mosa.»
37 «Mpɔ mbusa, mɛna-ciko áonteka ngɔmu nɛkɛ, áokanisia te: ‹Bámɔ̌kande mukuamɔ.› »
38 «Bii bagubhi ndɔ bámɔ̌ni ye ngɔmu ndɔ naobhika, báɔyɔngaga te: ‹Miki nde ambe ajigande na ciko nde bhui mbusa á kukua á abhakɛ. Béndhungɛni, bémoɛ, béombeɛ ciko nde.› 39 Báondhunga ngɔmu ndɔ, báonga ne na ta á ciko, báomoa.»
40 «Cɔ, esa nde mɛna-ciko abhikaeka, ěgeaeka bagubhi ndɔ bo?»
41 Báonsikisia te: «Emande bakpa ba ajede ndɔ bɔbhu kanga á ngomi. Mbusa áɔɔkana goto na bagubhi buangbo bundɔ báambande ciko nɛkɛ anja, goto bámphendande phaeka a dungu nɛkɛ.»
42 Mpɔ Yéso áǒgea te: «Bókótangimbɛ mɔnɔ mɛni nde subi á buku á Mokonga?
Ɛtɛ nde baphɛki-endu dábanye, Mokonga dánsɔmbu ka ba bea itimo. Kema nde Mokonga agi, bɛɔni na anja phɛ̂.
43-44 Ka bondɔ, nenógie, Mokonga a bea mɛna-ciko ndɔ. Anúutande koboamɛ nɛkɛ, áǒopha bundɔ bágeande kema ndɔ akondi.»