BaYúdha bántɔngi Pɔ́lɔ
24
1 Mbusa á b'esa bɔku (5), ntobei-phɛa angbóngbó Ananía, áoga na Kaisalía kimoci na bagbɛga buangbó á bakpa na n'yɔngɛi moci ina akɛ Tɛɛtúlɔ. Báomama mosá á mɔkɔta Phɛlíki ka nyɔngɔ á tɔnga á Pɔ́lɔ. 2 Báɔmɔphana Pɔ́lɔ, Tɛɛtúlɔ áokpanga tɔnga akɛ be: « Mɔkɔta, ka nyɔngɔ akɔ aunge bena bɔjɛjɛ ángbó ndee. Ka bhɛdanaga akɔ na kɔbɔngɛ aunge moangɔ á nji aotamba anja ka baniki á nji. 3 Mɔkɔta Phɛlíki, bekophi bosegi phɛ̂ ka kema bhui nde bɛɔtɔa ɔma bhui. 4 Cɔ, kékondi nyɛ́nyisia akɔ mbenɔ ásii, neodengemisigi te, ɔ́sɔɔka phɔ́ ka mbenɔ abhɔa. 5 Nga, bɛmɔni nkpa nde, ande ntɔa-ɔyɔmbɔ phɛ̂. Aǒyombokisa baYúdha ka mokonda bhui. Yɛ, ande mɔkɔta á ekombo á ba Najalɛ́tia. 6 Dákengisi phɔtɔ jɔɔkisa á endu á Mokonga, besu béondhunga. [ Débekondi tena á nyɔngɔ nɛkɛ ka beana na ɛɔphi nɛsu, 7 mɔkɔta Lusía â gǎkɛ ongama, áɔmkpɔa ka njaga asu. 8 Mbusa i, áǒsosea bakpa nde bantɔngi bábhikɛ mɔtɛ akɔb.] Kabɛ n'omúsigi mogaa nde, ɔbɛ sasakɔ ôúbha kodoni á kema bhui nde bɛntɔngɛi. » 9 BaYúdha bâ phɔtɔ osoea nyɔngɔ nɛkɛ gea: « Ande doni. »Pɔ́lɔ aɔyɔnga mosá á mɔkɔta Phɛlíki
10 Mbusa, mɔkɔta Phɛlíki ánsosea Pɔ́lɔ na njaga ka gea áyɔngɛ, áonsikisia te: «Neoúbha gea, onde nteni-nyɔngɔ á k'ekuna nde ka basaga básii. Ka bondɔ, ne na maseye ka měma ka ngodea akɔ nyɔngɔ á ka phɔa ani. 11 Cɔ, ɔbɛ sasa akɔ ɔtɔkande digimisa i nga, kányɛnyimbɛ besa nkama moci na babɛ (12) bii déju ka Yɛusalɛ́ma k'aphe á bhebha á Mokonga. 12 Bakpa nde bákámɔɔni tanda na neopua na nkpa, kabɛ n'ande subi á endu á Mokonga, kabɛ k'endu á bɔphɛi ndea baYúdha na ka kenombe. Bákámɔɔni phɔtɔ na neoyombokisa usɛsɛ á bakpa. 13 Bákáɔtɔka na bákophangisi kodoni á nyɔngɔ nde bámɔtɔngi kau kɛ̌kɛ nde. 14 Nyɔngɔ nde nebeeki gǎkɛ mosá akɔ a be: Nɛɔmbhɛdaneaga Mokonga ndea batatasu na bea aphe nde bági ande á odhemayɔ. Nebeeki gǎkɛ nyɔngɔ bhui nde bádundu subi á buku á ɛɔphi ndea Mósa, na subi á buku ndea baɔtu-nyɔngɔ. 15 Nena nsebeɔ ka Mokonga, bíndɔ bakpa ndɔ bá ně gea, bakpa ba anja na bakpa ba ajede bɔbhu bájujukande ka kukua.c. 16 Ka bondɔ unge, neogea bukpɛkpɛ ani esa bhui, nébɛ kanga kisɛki ka měma mosá á Mokonga na mosá á bakpa.
17 Cɔ, bii dékétú ka Yɛusalɛ́ma ka basaga básii, débhiki goto ka nyɔngɔ á gabha á bangɔa ka batɔ-ekuna nɛmɔ, na phuia á ɔphɛɔ. 18 Dábamodhondi oa, mbenɔnde détú osokosa nkiki á ka měma ani subi á endu á Mokonga. Cɔ, usɛsɛ, n'oyombɔ á bakpa dákátú gǎkɛ bei. 19 Ka baYúdha á ka nji á ka Asía baunge dábatu oa. Bɔ, baunge bátókeni tɔnga ani mosá akɔ kabɛ na dábátú na nyɔngɔ ka phɔa ani. 20 Bakpa nde bá oani, bá yɔngɛ phɔ bojede sina nde dábaɔni k'eme, mbenɔ nde détú mosá á ntua angbó á bɔphɛi, 21 na nna tɔ nyɔngɔ nde déyɔngi na nemamege mosá abɔ n'ɛsɔ akpɛ gea te, ‹ Ka nyɔngɔ á jujuka á basí ka kukua a unge báotena nyɔngɔ nɛmɔ k'esa nde!› »
22 Cɔ, bii Phɛlíki dáengekisi anja nyɔngɔ á aphe ndea Mɔkɔta, áososea gea bátenɛ nyɔngɔ ndɔ esa nɛngbó, áogea te: «Netenande nyɔngɔ nɛnu mbenɔ nde mɔkɔta á batɔa-emani Lusía ajuande. » 23 Mpɔ, áonsosea mɔkɔta á batɔa-emani gea, ánambɛ Pɔ́lɔ ka mekakɔ, án'deketeɛ phɔtɔ mbenɔ, kabɛmbɛ gǎkɛ na nkpa nde áǒimisia badhakɛ ka enga akɛ.
Pɔ́lɔ aɔyɔnga mosá á Phɛlíki na nkakɛ Dhuusíla
24 Mbusa á esa abhɔa, Phɛlíki áombhika na nkakɛ Dhuusíla, mmbe dátú moYúdha. Áogea bámɔphanɛ kakɛ Pɔ́lɔ, ka gea áɔkɛ nyɔngɔ nde aɔyɔnga ka phɔa á beekea á Kiísito Yéso. 25 Bii Pɔ́lɔ dátú ɔyɔnga nyɔngɔ á kodoni, ɛngɛpha na tena á nyɔngɔ ákpɛ nde abhikaeka, Phɛlíki áoba na kɔbɔbɔkɔ. Áongea Pɔ́lɔ te: « Ka kɛ̌kɛ nde, gǎ phɔ! Nɛkɔɔphanande goto mbenɔ nɛngbo. » 26 Dá phɔtɔ osebea gea, Pɔ́lɔ amophande bangɔa. Ka bondɔ unge, dáɔmɔphanaga Pɔ́lɔ ka yɔngaga na yɛ. 27 Mbusa á basaga babɛ, Pɔɔkíɔ Phɛ́sitɔ áɔmpɛna Phɛlíki. Phɛlíki dákondi ekondisaga na baYúdha, ka bɔndɔ áon'deketa Pɔ́lɔ ka mekakɔ.