Ekuma Ndea Bateki 2

Měma á Mokonga aki gǔ á babeeki ndea Yéso

1 K'esa á jaí á Pɛntɛkɔ́tɛ, babeeki ndea Yéso bɔbhu báodhondanaga k'ɔma moci. 2 Mɔngɔ moci, eongo áotoka na kobha, bea sumbu akpɛ phɛ̂ unge áɔbɛta. Eongo ndɔ áotuma k'endu bhui nde babeeki dábaiki kau. 3 Mpɔ báɔɔna kema bea ɛɛmbɛ á nsa n'ɛ̌sɛnɛkɛi. Ɛɛmbɛ ndɔ áokatanaga, áoika gǔ abɔ moci-moci. 4 Mpɔ, bɔbhu báotuma na Měma á Mokonga, báokpanga yɔnga ka yɔngɛa nɛngbo bíndɔ Měma ěteki gea, báyɔngɛ.

5 Cɔ, baYúdha bunde dábaom'banga Mokonga, dábatoki ka nji danga-danga á ka mokonda, báoba ka Yɛusalɛ́ma. 6 Bii eongo ndɔ áɔkɛkani, usɛsɛ á bakpa báodhondanaga, báotangaaga nga, nkpa moci-moci dáɔɔka babeeki na báɔyɔnga ka yɔngɛa nɛkɛ á bɔkɔtɛana. 7 Báotagaaga, báoyayama. Báogea: «Bakpa nde báɔyɔnga, bɔbhu báka phɔ́ batɔa ka Galiláia? 8 Cɔ, nkpa moci-moci sɔsɔbɛ asu áɔbɔka na báɔyɔnga ka yɔngɛa nɛkɛ á bɔkɔtɛana kabo? 9 Bakpa buangbo bá sɔsɔbɛ asu, batɔa ka Páati, baMɛ́dhi na baƐlámu, bundɔ báiki ka Mɛsɔpɔtamía, Yudhɛ́a na Kapadhɔkía, Pɔntɔ na Asía, 10 buangbo bátoki phɔtɔ na Phuigía, Pamphilía, Mísii na nji á Libhía, bhíbhí á Kuɛ́nɛ. Buangbo bátoki phɔtɔ na Lɔ́ma, 11 bundɔ baYúdha, na bundɔ bábeeki esomba ndea baYúdha, na batɔa ka Kɛɛ́tɛ na batɔa ka Alabhía. Cɔ, bɛɔbɔka na báɔyɔnga ketangaɔ ndea Mokonga ka yɔngɛa ndesu danga-danga kabo! » 12 Bii bɔbhu bátangaigi na yayama, báoyɔngaga sɔsɔbɛ abɔ gea: « Kantíti á nyɔngɔ nde abo? » 13 Buangbo bǎ gǎkɛ ɔ̌tɛbhɛaga babeeki gea: «Makana ɛ̌bhɛdi phɛ̂. »

Pɛ́tɛɛ aɔphɛa ka nkindi á bakpa

14 Mpɔ Pɛ́tɛɛ áǒmesia kimoci na bateki nkama na moci (11), áokpanga yɔnga k'ɛsɔ akpɛ gea: « Cɔ, benu baYúdha na benu batɔa ka Yɛusalɛ́ma bɔbhu, phéngani phɔ kecue anu, bɔ́ɔkɛ nyɔngɔ nde neonóngodea. 15 Makana kɛ́bhɛdi bakpa nde bíndɔ bookanisia nga, bii esa áse, aphɔtɔ ka nji asasi. 16 Cɔ, nnde ande gǎkɛ tɔtɔkɛana á nyɔngɔ nde mɔtu-nyɔngɔ Yɔɛ́li dáyɔngi.

17 Mokonga ayɔngi be:

‹ Ka matu á sungiaga á mokonda, nɛɛmbisande Měma ani ka bakpa bɔbhu,

Baniki bǒko na baseka nɛnu báɔtɔande nyɔngɔ,

Baganda nɛnu, báɔnande mphangiɔ.

Bagbɛga nɛnu bádande na njeki.

18 Eya, k'esa ndɔ abande phɔtɔ bó ka babhɛdanigi nɛmɔ bǒko na bake. Nɛɛmbisande Měma ani kabɔ, báɔtɔande nyɔngɔ.

19 Negeande ketangaɔ na kobha k'ego,

ně phɔtɔ ogea mphangiɔ kusi á mani.

Magia, nsa n'ebundu á maki abande bei.

20 Mani agaikanande, áoinda,

Songe anjɛnjɛmanande bea magia,

mosá á esa á kidia á Mɔkɔta. Esa ndɔ, abande esa angbó, esa á boombia.

21 Nkpa bhuakɛ mmbe, aɔphaneande ina á Mɔkɔta, aamande ka měma. ›

22 « Cɔ, baIsilaɛ́li baya, ɔkani phɔ́ nyɔngɔ nde: Yéso ba Najalɛ́ti, ande nkpa nde Mokonga dánsɔmbu ka úbhisa anu bhase gea, ana bukpɛkpɛ á tɔtɔkisa á ketangaɔ danga-danga na mphangiɔ sɔsɔbɛ anu bíndɔ boúbha sasanu. 23 Mokonga dámbhisi Yéso ka njaga anu bíndɔ dáúbhikani na anga i kala. Bômbhisa ka njaga á bakpa nde bákaomúbha Mokonga. Bakpa ndɔ, báommoa ka kɔkɛaga akɛ ka me á nkpatɔ. 24 Mokonga â gǎkɛ onjujukisa ka kukua, áonkodaga ka kokae á kukua. Nga, kukua dákátú na bukpɛkpɛ á tɔka akɛ. 25 Nga, Moamɛ Dhaúdhi dádigimisi nyɔngɔ nɛkɛ gea:

‹Dɛ́ɔmɔ̌na Mɔkɔta Mokonga mosá ani mbenɔ bhubhui,

ka nyɔngɔ nde, aka njaga ani á mǔku, ka gea kéemanɛgɛ.

26 Ka nyɔngɔ indɔ unge měma ani ana maseye, nɛɔyɔnga na maseye,

goto nena nsebeɔ gea, nyama ani aumbiande.

27 Ka nyɔngɔ nde, obɛ Mɔkɔta Mokonga, kómodeketɛku eme ka nji á basí,

phɔtɔ, kómodeketɛku eme mɛnɛ á bonjanja nɛkɔ néphoɛ.

28 Dómophangi aphe á enda,

omotumisande na maseye bii nɛɔnande keongi.› akɔ.

29 «Cɔ baya, ómodeketani phɔ́ nenoúbhisɛ bhase nyɔngɔ ndea tata asu, Moamɛ Dhaúdhi. Yɛ, dáku phɔtɔ, báomǔmba. Na ka k'esande bhota akɛ a phɔ́tɔ sɔsɔbɛ asu. 30 Yɛ, dátú gǎkɛ mɔtu-nyɔngɔ, dáúbhi gea, Mokonga dámɔku, ka nɔɛa akɛ esomba gea, ka batɔa k'ekombo nɛkɛ moci, abande moamɛ ka mpɛnɛ akɛ. 31 Dhaúdhi dáɔni phɔ́ mosá nyɔngɔ á jujuka á Kiísito ka kukua. Dádundu gǎkɛ be,

‹ Dákánsagi, áikɛ ka nji á basí.

Nyama akɛ dákáphoe. ›

32 Yéso ndɔ tɔ aámbé Mokonga dánjujukisi ka kukua. Besu bɔbhu bende bamamei á nyɔngɔ ndɔ. 33 Bii Mokonga antaisi na bhisa akɛ ka njaga akɛ á mǔku. Áoba na Měma á Mokonga nnde yɛ abhakɛ dámɔku. Yéso aámbé aɛmbisi kema nde bɔɔka na nnde bɔɔna ka besu. 34 Nga, nna Dhaúdhi aámbé dátai na kobha. Dáyɔngi ndiu sasakɛ gea:

‹Mɔkɔta Mokonga dángodi Mɔkɔta nɛmɔ gea,

ika nkɛkɛɔ á njaga ani á mǔku,

35 na ka bii něbhisande babibia akɔ kusi á ecinji akɔ.›

36 Eya, ambe benu baIsilaɛ́li bɔbhu, bóúbhɛ bhase gea, Yéso mmbɔ dóbɔnkɔkɛigi gǔ á me á nkpatɔ, yɛ aámbé Mokonga ambhisi, Mɔkɔta na Kiísito. »

37 Bii bakpa dábaɔki nyɔngɔ ndɔ, áǒsumba ka měma. Báomúsia Pɛ́tɛɛ na bateki buangbo te: «Baya, begeande bo? » 38 Mpɔ, Pɛ́tɛɛ áǒsikisia te: « Ketiani tambea ánu ajede, bánobatisɛ moci-moci ka ina á Yéso Kiísito gea te, Mokonga áimɛ bojede nɛnu, mpɔ bobande na bokambia á Měma á Mokonga. » 39 Nga, mɔkɔ ndea Mokonga a ka benu, baniki nɛnu na bɔhu bunde bá danga na bɔbhu bunde Mɔkɔta nɛsu Mokonga ɛ̌ɔphanande. »

40 Pɛ́tɛɛ â goto otutuisa boabhi nɛngbo ásii, áɔ̌phɛa na gbagisaga abɔ ka měma be: « Óamisani n'ɛbɔkɔti ajede nde. » 41 Cɔ, bakpa nde dábabeeki nyɔngɔ ndea Pɛ́tɛɛ, báǒbatisa. K'esa ndɔ tɔ, bakpa bea ɛlɛphu isaɔ (3000), báǒyamea ka nkindi á babeeki.

Tambea á bateki á ka mosá-mosá

42 Babeeki ndɔ dábatú na moingi ka ɔka bɔphɛi ndea bateki, báoika ka komunaměma, báoeaga kimoci, na mɛma á Mokonga phɔtɔ kimoci. 43 Cɔ, babeeki bɔbhu dábaom'banga Mokonga, ka nyɔngɔ nde, dáɔtɔtɔkisa ketangaɔ na mphangiɔ danga-danga ka njaga á bateki. 44 Babeeki bɔbhu dábatu tɔ k'imoci, báogabheanaga nkumba nɛbɔ bhui ngǔngu abɔ. 45 Nga, dábaosombisaga nkumba danga-danga, na osaa nɛbɔ, báokatisanaga bangɔa i sɔsɔbɛ abɔ ka tɔtɔkisa siki nde nkpa moci-moci dá ně. 46 Esa bhui dábaodhondanaga k'endu á Mokonga na měma mo. Báoeaga kimoci k'endu danga-danga. Dábáoeaga kimoci na maseye na měma á edhidhisa. 47 Babeeki dábaombhebha Mokonga, bakpa bɔbhu báǒkonda. Mɔkɔta Mokonga áoyamea bunde ěamisi ka měma ka nkindi á babeeki.