N'dɔti moci aami
3
1 Esa moci ka yɛga á mani, Pɛ́tɛɛ na Yoáni, dábaoga k'endu á Mokonga k'aphe á ɛmɛmi. 2 Bhíbhí á kǐo moci á endu á Mokonga nnde báɔɔphana «kǐo anja», dátú na nkpa moci mmbe dákatuotamba kpanga á bɔkɔtɛana akɛ. Esa bhui dábaonkumbaga na bhisa akɛ ka kǐo ndɔ ka gea te á mɛmɛ kema á enga akɛ ka bakpa nde dábaongia k'endu ndɔ. 3 Cɔ, bii n'dɔti ndɔ dáɛbɔni Pɛ́tɛɛ na Yoáni na báobhika ongia k'endu ndɔ, áɔ̌mɛma bangɔa. 4 Báontumia n'iso. Mpɔ, Pɛ́tɛɛ áongea te: « Ɔ́sɔɛnjia. » 5 N'dɔti ndɔ áǒtumia n'iso, áoúbha te, bámophande ka kema. 6 Mpɔ, Pɛ́tɛɛ áongea: « Kena bangɔa, ke na ɔlɔ. Ne gǎkɛ okopha kema nde ne ně. Cɔ, k'ina á Yéso Kiísito ba Najalɛ́ti ma, ótambɛ! » 7 Mpɔ, Pɛ́tɛɛ áondhunga ka njaga á mǔku, áommesia. Mbenɔ ndɔ tɔ, endekpe na ecinji akɛ bhui áogbagaga. 8 Áǒsamboa phǒi! Áotamba, áongia kimoci na bateki ndea Yéso subi á endu á Mokonga, n'aotamba, n'aɔbɛkaga, n'aombhebha Mokonga. 9 Bakpa bɔbhu báɔmɔɔna n'aotamba, n'aombhebha Mokonga. 10 Báonengekisa gea, yɛ aámbe dátú oikaga k'aph'iso endu á Mokonga, n'aɔ́mɛmaga bakpa bangɔa. Dábaɔɔphana kǐo ndɔ: « Kǐo Anja. » Cɔ, báoba na kɔbɔbɔkɔ, báoyayama phɛ̂ ka nyɔngɔ ndɔ dágeani ka yɛ.Pɛ́tɛɛ aɔphɛa subi á endu ndea Mokonga
11 Nkpa ndɔ dákakondi ye katana na Pɛ́tɛɛ na Yoáni. Kabondɔ, bakpa bɔbhu báotangaaga phɛ̂, báǒteea ka ntua nde báiki kau nnde báɔɔphana: «Ntua ndea Sɔlɔmɔ́nɔa. » . 12 Bii Pɛ́tɛɛ aɔni ye bó, áǒngodea bakpa gea te: «BaIsilaɛ́li baya, bootangaaga nyɔngɔ nde? Bosótumii n'iso ka bó? Bokanisi gea, nkpa nde atambi tɔ ka bukpɛkpɛ na bonjanja nɛsu mosá á Mokonga? 13 Nna bó. Atambi ka bukpɛkpɛ ndea Mokonga, mmbɔ ba tatasub Abhalaámu, Isáka na Yakɔ́bɔ dábambhɛdaneigi. A phɔtɔ aámbé an'dokomisi mbhɛdanigi nɛkɛ Yéso ka ketangaɔ nde. Dóbombhisi ka njaga á Mɔamɛ Pilátɔ, bóon'ya. Nanga bii dákondi deketa akɛ, 14 dóbon'ye Yéso, ntɔa-bonjánja na ntɔa-doni ndɔ, bóokonda gea, bánkodɛ k'anu ntɔa-kaisoc. 15 Dóbonkusi Yéso, mɛnɛ á boamia, Mokonga â gǎkɛ onjujukisa sɔsɔbɛ á basí. Bende bamamei á nyɔngɔ ndɔ bhui. 16 Cɔ, n'dɔti nde bɔɔmɔ̌na na boomúbha oani, aami anja phɛ̂ ka nyɔngɔ á beekea á bukpɛkpɛ á ina á Yéso. Beekea ndɔ unge akpengeanisi boamia nde mosá anu.
17 «Cɔ, baya, neoúbha te, benu na bakɔta nɛnu, dóbogi bojede ndɔ ka kobhobho. 18 A gǎkɛ be: Mokonga atɔtɔkisi nyɔngɔ nde dáúbhisi kala ka moyo á baɔtu-nyɔngɔ gea, bántambisagande Kiísitod. 19 Cɔ, akeni phɔ́ bókětiɛ tambea anu, bóophaiɛ ka Mokonga. Mpɔ, áoima bojede nɛnu. 20 Ka bundɔ bámbeeki Mɔkɔta, aebhikisiande esa á Maseye-á-umbia, aetekisiande goto Yéso Kiísito mmbe dánsɔmbu, áoba Mɔkɔta nɛnu. 21 Kɛ̌kɛ nde gǎkɛ, akeni Kiísito áikɛ na kobha ka sungiaga bii Mokonga abɔngisiande goto kema bhui, bíndɔ déngodi baɔtu-nyɔngɔ á kala, batɔa-kanga á bojede. 22 Nga, Mósa dági te, ‹Mɔkɔta nɛnu Mokonga amesande mɔtu-nyɔngɔ k'ekombo nɛnu bea eme. Akeni bóbeekeɛ nyɔngɔ bhui nde anóngodeagande. 23 Nkpa bhuakɛ mmbé kámɔ̌kɛku mɔtu-nyɔngɔ ndɔ, bánkatisanande na bakpa ndea Mokonga na moa akɛe.› 24 Nga, baɔtu-nyɔngɔ bɔbhu kpanga á Samuɛ́li na bundɔ dábabhiki mbusa akɛ, dábaphɛi nyɔngɔ ndɔ á matu nde. 25 Benu gǎkɛ, bonde bampɛnɛ á baɔtu-nyɔngɔ. Bonde phɔtɔ bamɛnɛ á konsamba nde Mokonga dáɔngi na batatanu. Nga, dángodi Abhalaámu gea: ‹Ka basuko akɔ, něgeeande bonjánja k'ekombo bhui ka mokondaf.› 26 Ka bondɔ, Mokonga ammesi phɔ́ mbhɛdanigi nɛkɛ Yéso ka phɔanu mosá á batɔa ekuna nɛngbo, ka nyɔngɔ á bhisia anu njaga, gea te, bóbɛ na ngɔɔa ka kětia á tambea anu, nkpa moci-moci, ka bojede nɛnu. »