Ekuma Ndea Bateki 4

Báge na Pɛ́tɛɛ na Yoáni mosá á bateni nyɔngɔ

1 Bii Pɛ́tɛɛ na Yoáni dábatú phɔ́tɔ ɔyɔngaga na bakpa, batobei-phɛa ndea Mokonga, báǒkidianea kimoci na mɔkɔta á babondigi-endu á Mokonga na baSadhukáiɔ. 2 Báɔbɛa phɛ̂ nga, Pɛ́tɛɛ na Yoáni bábaǒgoisaga bakpa nyɔngɔ á jujuka á Yéso ka kukua. Nga, jujuka akɛ ka kukua, aunge aengekisi gea basí bajujukande ka kukua. 3 Ka bondɔ, báǒdhunga, báǒmakea ka mɛkakɔ na kabii esa dágeokodokana nga, dá ye tɔ ɔgɔgɔ. 4 Bakpa básii bundɔ dábaɔki gǎkɛ bɔphɛi ndɔ, báobeekea, babeeki báobika phɛ̂. Bǒko báoba bea ɛlɛphu bɔku (5000).

5 Cɔ, mama i, bakɔta á baYúdha, bagbɛga na baphangigi-ɛɔphi báodhondanaga ka Yɛusalɛ́ma. 6 Sɔsɔbɛ abɔ dábatú phɔtɔ na: Anási, ntobei-phɛa angbóngbó dátú oa, kimoci na Kayápha, Yoáni, Alɛsandúɔ na batɔa-k'ekombo ndea batobei-phɛa bangbóngbó. 7 Báǒmamisisa Pɛ́tɛɛ na Yoáni mosá abɔ, báǒbúsiaga gea: «Bogima ketangaɔ nde ka bukpɛkpɛ sina, na k'ina á ani? » 8 Mpɔ, Pɛ́tɛɛ áotuma na Měma á Mokonga, áǒsikisia te: « Oo!, benu bakɔta na bagbɛga, 9 boosóúsiaga k'esa nde ka nyɔngɔ á kema anja nde begi ka n'dɔti ndɔ na ka ama akɛ. 10 Ambe benu bhɔbhu na baIsilaɛ́li bɔbhu, bóúbhɛ gea, n'dɔti ndɔ aami na ame mosá anu ka bukpɛkpɛ á ina á Yéso Kiísito ba Najalɛ́ti, mmbɔ dóbonkusi ka me á nkpatɔ. Mokonga anjujukisi gǎkɛ ka kukua. 11 Yéso a bea ɛtɛ ndɔ benu baphɛki dóboye. Cɔ, ěphangisi ye tɔ kɛ̌kɛ nde ɛtɛ á tetee á mɔphɛkɔ, bíndɔ dábadundu kala subi á buku á Mokonga. 12 A tɔ yɛ aámbé aóamisa bakpa ka měma. Nga, ka mokonda bhui nna tanda na ina nde Mokonga aebophi bakpa n'ana bukpɛkpɛ á amisa á bɔ ka měma. »

13 Bakpa nde dábaka ntua ndɔ, báoyayama phɛ̂ bii bɛ́ɔni Pɛ́tɛɛ na Yoáni na báɔyɔnga kanga á kɔbɔbɔkɔ, na úbha gea dábatú batɔa-jǎi-jǎi, bundɔ dábákángi ka kaasi. Báoúbha phɔtɔ gea, bɔ dábatú na Yéso. 14 Bii dábamɔ̌ni ye gǎkɛ nkpa ndɔ n'aami, n'ame goto kimoci na bɔ, dábákátu ye tanda na kema á yɔnga. 15 Ka bondɔ, báǒsosea gea, bájuanɛ ka ntua angbó á bɔphɛi. Báokpanga yɔngaga nguungu abɔ. 16 Báogea te: «Beǒgeea bakpa nde bo? Nga, batɔa ka Yɛusalɛ́ma bɔbhu báoúbha bhase gea, bɔ báunge dábagi mphangiɔ angbo. Béké gǎkɛ ɔtɔka na bengani. 17 Cɔ, bébangisɛni gea te, bákaɛmbisɛ mɔnɔ nyɔngɔ ndɔ na bákakumiɛmbɛ phɔtɔ ina á Yéso ka nkpa. »

18 Mbusa, bâ goto ɔɔphana na imisia abɔ akpɛ gea: «Bɔ́kɔyɔngɛmbɛ tanda na phangiaga á bakpa k'ina á Yéso. » 19 Mpɔ, Pɛ́tɛɛ na Yoáni báǒsikisia te: «Tenani phɔ́ nyɔngɔ nde sasanu. A anja mosá á Mokonga ɔka anu kanga á ɔka Mokonga? 20 Nga, besu bɛ́kɛ́ɔtɔka deketa á yɔnga á kema nde dɛ́bɛɔni, na nde dɛ́bɛɔki. » 21 Mbusa á bangisa abɔ goto, báǒdoa. Dábákáɔni nyɔngɔ á tambisaga abɔ kau nga, bakpa bɔbhu dábaombhebha Mokonga ka nyɔngɔ á kema nde dágeani. 22 N'dɔti ndɔ dáami ka ketangaɔ, dátú na basaga kɔnyɛ́nya nkama gena (4o).

Babeeki báɔmɛma Mokonga

23 Bii dábědu ye, Pɛ́tɛɛ na Yoáni báosikianaga, báogaǒdhonda badhabɔ babeeki. Báɔ̌tɔmiaga nyɔngɔ nde batobei-phɛa bangbóngbó na bagbɛga á ka nji dáběngodi. 24 Bii báɔki ye nyɔngɔ ndɔ, báɔmɛma Mokonga n'ɛsɔ moci gea: « Mɔkɔta, obɛ aámbé oconji kobha, mokonda, obenge, na kema bhui nde a subi í. 25 Obɛ aámbé dɔyɔngi nyɔngɔ nde ka bukpɛkpɛ á Měma á Mokonga ka aphɛnɔkɔ á mbhɛdanigi nɛkɔ tatasu mɔamɛ Dhaúdhi gea,

‹Nyɔngɔ sina nde batɔa-k'ekuna nɛngbo báyomboki ně?

Nyɔngɔ sina nde goto bakpa báobikisa maca jǎi-jǎi bende?

26 Nga, baamɛ á ka mokonda bámɛi emani,

bakɔta bádhondanigi

ka manisa á Mɔkɔta na Kiísito, mmbe dɔnsɔmbu.›

27 Ande doni, moamɛ Ɛlɔ́dhɛ, mɔkɔta Pɔntíɔ Pilátɔ, batɔa ka Isilaɛ́li na batɔa-k'ekuna nɛngbo dábádhondanigi ka kenombe nde ka maca á dhunga á Yéso, ntɔa-bonjanja na mbhɛdanigi nɛkɔ nde dɔ́nsɔmbu ábɛ Kiísito. 28 Ka bondɔ, bádhondanigi ka gea kema nde dósui kala. Nga, ona bukpɛkpɛ ka tɔtɔkisa á kema nde okondi. 29 Cɔ, Mɔkɔta, ɔna phɔ́ bii bákpangi bangisa asu. Ósopha bukpɛkpɛ ka tɔ̌miaga á nyɔngɔ nɛkɔ kanga kɔbɔbɔkɔ nga, bende babhɛdanigi nɛkɔ. 30 Phangia bukpɛkpɛ nɛkɔ ka tɔtɔkisa á boamia, mphangiɔ na ketangaɔ k'ina á mbhɛdanigi nɛkɔ Yéso, ntɔa-bonjánja. » 31 Bii bágɔbi ye ɛmɛmi, ɔma nde bádhondanigi áoemanaga. Oa, báotuma bɔbhu na Měma á Mokonga, mpɔ báɔtɔmiaga nyɔngɔ á Mokonga kanga kɔbɔbɔkɔ.

Babeeki báokatisanaga nkumba nɛbɔ nguungu abɔ

32 Cɔ, usɛsɛ á babeeki báɔɔkana ka měma moci, n'ɛsɔ moci. Nna na ka bɔ moci nde dáɔyɔnga gea te, Nkumba nɛmɔ u. Nkumba bhui dá tɔ ka bɔ bɔbhu. 33 Bateki báomamea na bukpɛkpɛ ángbó ka ɛmbisa á nyɔngɔ á jujuka á Mɔkɔta Yéso ka kukua. Mokonga áǒbhisia bɔbhu njaga. 34 Nna na ka bɔ moci, mmbe dáuki kema. Nga, nkpa nde dátú na ciko, n'endu, dásombisi, áɔbhɛda bangɔa kau, 35 áobhisa ka njaga á bateki ndea Yéso. Mpɔ, báǒgabhea nkpa na nkpa kabeana na mɔphɛ nɛkɛ. 36 Cɔ, nkpa moci dátú sɔsɔbɛ abɔ, ina akɛ n'ande Yɔsɛ́phu moLáwi mmbe abɔkɔtɛani ka nji á Kipúɔ, mmbe bateki dábaɔmɔphana Bhaanábha. Ande gea te: «Nkpagisigi. » 37 Áosombisa odo nɛkɛ, áobhisa bangɔa nde atɔi kau ka njaga á bateki.