Ekuma Ndea Bateki 5

Ananía na Saphíla bági odhemayɔ

1 Dátú phɔtɔ na nkpa moci, ina akɛ Ananía, ina á nkakɛ Saphíla, dábaɔkani ka sombisa á odo nɛbɔ. 2 Mbusa, áɔsɔmɛa phaeka á bangɔa kau, nkakɛ dáúbhi phɔtɔ nyɔngɔ ndɔ bhui. Mpɔ, Ananía áobhisa phaeka á bangɔa ka njaga á bateki ndea Yéso. 3 Pɛ́tɛɛ â gǎkɛ ongodea te: « Ananía caa! Eke nde Sɛtáni, angi ně ka měma akɔ, na dhema á Měma á Mokonga bende? Nga, ɔsɔ̌mi phaeka á bangɔa nde ɔtɔi ka ciko ndɔɔ. 4 Cɔ, mosá á sombisa i, kátú akɔ? Mbusa á sombisa i, bangɔa i dákátú phɔtɔ akɔ? Cɔ, nyɔngɔ sina nde dóangi gea bo? Kóndhemi nkpa, ondhemi ndiu Mokonga. » 5 Ka ɔka á nyɔngɔ ndɔ, Ananía áogua ka odo gbu! Áokua. Bakpa báɔki ye nyɔngɔ ndɔ, báobanga phɛ̂. 6 Mbusa, baganda báɔbhɛda mǒnda akɛ, báoboaga na bhɔngɔ, báoga oúmba.

7 Mbusa á mbenɔ bea mbenɔ isaɔ, nkakɛ áojua kanga á úbha á nyɔngɔ nde dángui munyakɛ. 8 Mpɔ Pɛ́tɛɛ áomúsia te: « Ómongodea, sungia á bangɔa nde bɔtɔi bii dóbosombisi odo nɛnu a tɔ unge? » yɛ áobeekea: « Eya, a tɔ ungɔ. » 9 Mpɔ Pɛ́tɛɛ â gǎkɛ ongodea te: «Bobeekeani ka jɔbhisaga á Měma á Mɔkɔta? Cɔ, ɔɔbɔna bakpa nde bátoge omúmba munyakɔ, bá ungɔ ba k'iso á mpume. Bákogande phɔtɔ ně bo. » 10 Mɔngɔ moci, áogua mosá akɛ gbu! Áokua. Baganda ndɔ báongia, báondhonda n'aku. Báokumba mǒnda akɛ, bâ goto oga oúmba ka mpɛphɛ índe á munyakɛ. 11 Ka bondɔ, batɔa ka kanisa bɔbhu na bunde dábaɔki nyɔngɔ ndɔ báobanga phɛ̂.

Bateki ndea Yéso bági ketangaɔ

12 Bateki ndea Yéso dábaɔtɔtɔkisa ketangaɔ na mphangiɔ ásii sɔsɔbɛ á bakpa. Babeeki dábaɛmbani dhondanaga kimoci ka ntua ndea Moamɛ Sɔlɔmɔ́nɔ. 13 Bundɔ dábákátú babeeki, nna na kabɔ nde dáokinia dhondanaga na bɔ. Nanga bó, bakpa dábaǒbhebha babeeki phɛ̂. 14 Bakpa nde dábaom'beekea Mɔkɔta, bǒko na bake dábaǒyamea phɛ̂. 15 Ka nyɔngɔ á kema bhui nde dágeani, bakpa báǒbhika na basambi na bébhisi k'eka na ka kɛsɛ báǒbhisa ka aphe, báosebea gea, iii á Pɛ́tɛɛ égbukumiɛ mbenɔ nde aophoda. 16 Usɛsɛ á bakpa á ka kenombe á ka mpɛphɛ á Yɛusalɛ́ma, bâ phɔtɔ ǒbhika na basambi, na batɔa kukua á bansombo, báoama ka njaga á bateki.

Bateki ndea Yéso báotambaga

17 Mpɔ, ntobei-phɛa angbóngbó, na bunde dábatú kimoci na yɛ ande gea te batɔa-k'ekombo ndea baSadhukáiɔ, báoba na nsengo ka bateki na kanea abɔ. 18 Ka bondɔ, báǒdhunga bateki, báǒmakea ka mɛkakɔ angbo. 19 Kǐpha, malaeka ndea Mɔkɔta â ndiu oukua kǐo á mɛkakɔ, áǒjuanisa bateki. Áǒgea te, 20 « Gǎni, k'endu á Mokonga, bɔ́ɔtɔ̌miɛ bakpa nyɔngɔ á enda á kɛ̌kɛ. » 21 Báobeekea. Mɔkɛsuɛ, báongia k'endu á Mokonga, báophangiaga. Mbusa, ntobei-phɛa angbóngbó ndea baYúdha, kimoci na badhakɛ, báɔ̌ɔphana bagbɛga bɔbhu ndea Isilaɛ́li ka ntua á ngbó á bɔphɛi. Mpɔ, báɔ̌teka bakpa ka gǎ bhɛda bateki. 22 Bundɔ báge ɔ̌bhɛda, bákědhondɛ subi á mɛkakɔ. Báoja, báɔyɔnga be, 23 « Bedhondi kǐo á mɛkakɔ na báphati akpɛ, babondigi na báme k'ɔma á bhɛdanaga abɔ mosá á endu. Bii beúku ye gǎkɛ kǐo, bɛ́kɛmɔ̌nɛ ka nkpa subi. » 24 Bii mɔkɔta á babondigi-endu á Mokonga na bakɔta á batobei-phɛa báɔki tɔ nyɔngɔ ndɔ, měma abɔ áɔ́kɔba phɛ̂. Báoúsianaga nguungu abɔ te: «Nyɔngɔ sina nde ěgui bateki. » 25 Mpɔ, nkpa moci áobhika, áǒngodea te: « Ɔkani phɔ! Bakpa nde botóomaki ka mɛkakɔ, bá k'endu á Mokonga, báɔ̌phɛa bakpa. »

26 Mbusa, mɔkɔta á babondigi-endu á mɛkakɔ, áoga kimoci na babhɛdanigi nɛkɛ k'aphe á jisa á bateki. Dábědhungi bokɛ-bokɛ, nyɔngɔ nde dábabangi oyombɔ gea, bakpa bákěmakeɛmbɛ babhɛdanigi ndɔ ɛtɛ ka kusa abɔ. 27 Báǒbhika ně, báǒbhisa ka ntua angbo á bɔphɛi. Mpɔ, ntobei-phɛa angbóngbó áǒúsia te, 28 « békénoimisima akpɛ gea bɔ́kɔphɛ̂ ye k'ina á mogaa ndɔ? Cɔ, kɛ̌kɛ nde, bɔɛmbisi ye tɔ bɔphɛi nɛnu ka Yɛusalɛ́ma bhui, bokondi phɔtɔ, bóbhisɛ mengombo á kukua akɛ ka mɔ̌ asu!. » 29 Pɛ́tɛɛ, kimoci na badhakɛ bateki, báǒsikisia te: « Akeni bɛ́mɔ̌kɛ Mokonga, kɔ̌nyɛ́nya bakpa. 30 Mokonga, mmbe batatasu bámbhɛdaneigi, anjujukisi Yéso mmbɔ dóbonkɔkɛigi gǔ á me á nkpatɔ, bóomoa. 31 Yɛ aámbé Mokonga an'dokomisi, áombhisa nkɛkɛɔ á njaga akɛ á mǔku gea, ábɛ moamɛ na Namisi ndea batɔa ka Isilaɛ́li gea, bákětiɛ tambea nɛbɔ na Mokonga áimɛ bojede nɛbɔ. 32 Bende phɔtɔ bamamei á nyɔngɔ ndɔ bhubhui. Měma á Mokonga mmbe Mokonga déophi bundɔ báɔmɔ̌ka a phɔtɔ ogea bó. »

33 Bii batɔa ka ntua angbo á bɔphɛi dábaɔki bó, nyɔngɔ ndɔ áǒsumba ka měma, Báokaba aphe á moa bateki. 34 Mophaisáiɔ moci dátú gǎkɛ sɔsɔbɛ abɔ, mmbɔ báɔmɔphana Gamaliɛ́li. Dátu phɔtɔ mphangigi-ɛɔphi, mmbe bakpa bɔbhu dábátú ɔmɔɔka phɛ̂. Áoma, áɔmɛma gea béjuanisɛ bateki ka ntua angbo á bɔphɛi ka mbenɔ abhɔa. 35 Mpɔ, áǒngodea te: «BaIsilaɛ́li baya, óengani anja na kema nde boogea bogeɛ kaphɔa bakpa ndee. 36 Nga, kanyɛ́nyimbɛ esa ásii, mogaa moci dásɛnɛki ina akɛ Tɛúdha. Dáǒdokomisa gea, ande nkpa angbongbo, bakpa bea mia gena (400) báom'bea. Bakpa buangbo bâ gǎkɛ omoa na bundɔ dábambii, báophanjekana bɔbhu ko! Nyɔngɔ ndɔ áoba etiti. 37 Mbusa abhɔa, Yúdha ntɔa ka Galiláia áɔsɛnɛka ka matu á tanga á bakpa, áǒbotea bakpa, â phɔtɔ okua. Bunde dábam'bii báophanjekana bɔbhu. 38 Nenóngodi gǎkɛ kɛ̌kɛ nde geae, deketani nyɔngɔ á bakpa ndee nga, aobá́ nyɔngɔ nɛbɔ, n'ekuma nɛbɔ n'ande á kokpa, aujukanande. 39 A gǎkɛ oba n'atoki ka Mokonga, bɔ́kɔ́tɔkɛku na botukatuki. Ɛngɛphani, bokomanisɛmbɛ Mokonga. » Mbusa, báobeekea nyɔngɔ ndea Gamaliɛ́li, 40 báɔ̌ɔphana bateki, báǒbindisa. Báǒimisia gea, bákayɔngɛmbɛ ye k'ina á Yéso. Mpɔ, báǒdeketa. 41 Mbusa í, bateki báojuana ka ntua angbo angboá bɔphɛi na maseye. Nga Mokonga dáɔni anja bɛ́tɛbhɛɛgɛ na bátambɛgɛ k'ina á Yéso. 42 Esa bhui, k'endu ndea Mokonga na k'endu nɛbɔ, dábákádeketi goisaga na tɔ̌mia á Mbino Anja ndea Yéso Kiísito.