Bɛ́sɔmbu bakpa ngia á njaga ibɛ (7) ka enga á bateki ndea Yéso
6
1 Mbenɔ nde bagoigi ndea Yéso dábabiki phɛ̂, BaYúda bundɔ báɔyɔnga kiGiíki báɔ̌ngɔngɔnɛaga phɛ̂ badhabɔ bundɔ dábaɔyɔnga kiƐbhulanía. Nga bɔ, dábaǒbosea bake á k'ekusa ndea bunde dábaɔyɔnga kiGiíki mbenɔ égabhɔ. 2 Ka bondɔ, bateki ndea Yéso nkama moci na ibɛ (12), báǒdhondanisa bagoigi bɔbhu, báoge te: « Kakeni bedeketɛ phɛa á bakpa nyɔngɔ á Mokonga, béikiɛ ndiu gabha eea. 3 Cɔ baya, ɔ́sɔmbɔani bakpa ngia á njaga ibɛ (7) sɔsɔbɛ anu, bunde bana tambea anja, bátumi na Měma á Mokonga na bana kɔbɔɔngɛ, bébhisɛ k'ekuma á egabhɔ. 4 Besu gǎkɛ, beikande nɛsu k'ekuma á ɛmɛmi na phɛa á bakpa nyɔngɔ á Mokonga. » 5 Nyɔngɔ ndɔ áɔ̌bɔngɛa bakpa bɔbhu. Mpɔ báɔ̌sɔmbɔa bakpa ndee: Sɛtɛphánɔ, mmbɔ dátúmi na beekea ásii, phɔtɔ na Měma á Mokonga, Philípɔ, Pɔɔkɔ́ɔ, Nikanɔ́a, Timɔ́ni, Paamɛ́na, Nikɔláɔ ntɔa ka Antiɔkía, mmbɔ dábeeki esomba ndea baYúdha. 6 Báǒbhisa mosá á bateki, bateki báǒbhisia njaga, báɔmɛma Mokonga ka nyɔngɔ abɔ. 7 Mpɔ, nyɔngɔ á Mokonga áɔɛmba phɛ̂, bagoigi báobika phɛ̂ ka Yɛusalɛ́ma. Batobei-phɛa básii bǎ phɔtɔ om'beekea Yéso.Bándhungi nengi kanisa Sɛtɛphánɔ
8 Cɔ Sɛtɛphánɔ, mmbɔ dátúmi na bonjánja á ekondi ndea Mokonga na bukpɛkpɛ nɛkɛ, dátúogea ketangaɔ ángbó na mphangiɔ sɔsɔbɛ á bakpa. 9 Bakpa buangbo dábatú ka batɔa k'endu á bɔphɛi ndea baYúdha, nnde dábaɔɔphana « Bakɔbɛ na bekodi. » Bakpa ndɔ dábatoki na Kuɛ́nɛ na Alɛsanduía. Buangbo dábatoki na Kilikía na Asía. Cɔ, bakpa ndɔ báokpanga pua na Sɛtɛphánɔ. 10 Dábákántɔki gǎkɛ ka nyɔngɔ á bii dáɔyɔnga na kɔbɔngɛ nde Měma á Mokonga dámophi. 11 Ka bondɔ, báǒpha bakpa bangɔa gea, báyɔngɛ be: «Bɛmɔ̌ki nkpa nde n'aombhóma Mósa na Mokongaa! » 12 Bakpa ndɔ báɔɔsɔia bakpa, bagbɛga na baphangigi-ɛɔphi. Bɔ, báondhunga Sɛtɛphánɔ, báombhika ně mosá á ntua angbó á bɔphɛi. 13 Bâ phɔtɔ ǒbhika na batɔngi á mbɛa. Bɔ, báogea te: « Mogaa nde nn'aodeketa yɔnga ajede gǔ á endu á Mokonga, n'ɛɔphi nɛsu. 14 Nga, dɛ́bɛmɔ̌ki n'aɔyɔnga gea, Yéso ba Najalɛ́ti angbɔande endu ndea Mokonga, áogaia asii nde Mósa dásophi. » 15 Mpɔ, bakpa bɔbhu bunde dábadhondanigi oa, báontumia Sɛtɛphánɔ n'iso, báɔɔna keongi akɛ n'akengi keongi á malaeka.