Ekuma Ndea Bateki 7

Sɛtɛphánɔ abhɛdi boabhi subi á ntua angbó á bɔphɛi

1 Ntobei-phɛa angbóngbó áomúsia Sɛtɛphánɔ te: «Nyɔngɔ nde bakpa bánɔ́tɔngi ně ande á doni? » 2 Sɛtɛphánɔ áǒsikisia be: «Babhɛ na bana-ayi, ɔkani phɔ! Mokonga, mɛna-boombia dánkidianei tatasu Abhalaámu n'aphɔ́tɔ ka nji á Mɛsɔpɔtamía, na káikimbɛ ka kenombe á Aláni. 3 Aongodea, ‹ Toka k'ekombo nɛkɔ na ka nji nɛkɔ. Ógɛ ka nji nde nekophangiande. › 4 Mpɔ, Abhalaámu áoboa ekombo nɛkɛ, áotoka ka nji nɛkɛ á Kaadhɛ́a, áoga oika ka Aláni. Kó, mbusa á kukua á abhakɛ, Mokonga áontoisa, áombhikisa ka nji nde boiki kau kɛ̌kɛnde. 5 Mokonga dákámophi tanda miki á ɔma ka bhisa ecinji ka nji ndɔ ka gea ábɛ botukɔ nɛkɛ, â ndiu ɔmɔkɔa gea, amophande nji ndɔ bhubhui, yɛ na basuko akɛ mbusa akɛ. Oa ndɔ, Abhalaámu dákám'bɔkɔtimbɛ gǎkɛ miki mmbe atɔande botukɔ nɛkɛ. 6 Cɔ, Mokonga dángodi Abhalaáma ka Kanána te, ‹ Basuko akɔ báikande phɔ́ ka nji nɛngbo bea bakɛni. Oa, béegaiande bɔ bakɔbɛ. Batɔa ka nji ndɔ béetambisagande ajede phɛ̂ ka basaga mia gena (400). 7 Ka bondɔ, batɔa ka nji bunde bégaiande bakpa nɛmɔ bakɔbɛ, netenande nyɔngɔ nɛbɔ akpɛ. Mbusa, néǒtokisa bakpa nɛmɔ ka nji ndɔ, báoga omodokomisa k'ɔma nde bokau k'esande. › 8 Mpɔ Mokonga áɔɔnga konsamba na Abhalaámu. Cina á konsamba ndɔ áoba gǔ á ganja. Mpɔ, áombhisia njaga, Abhalaámu áɔm'bɔkɔta Isáka. Mbusa á pɔsɔ moci, Abhalaámu áongusa Isáka ganja. Isáka amɔti ye gǎkɛ, áɔm'bɔkɔta Yakɔ́bɔ, áongusa ganja. Yakɔ́bɔ â phɔtɔ ogea bó ka baniki nɛkɛ nkama na babɛ (12). »

9 « Ka batatabɔ, moci dátú Yɔsɛ́phu. Bamunamakɛ nkama na moci (11), báoba na nsengo gǔ akɛ. Ka bondɔ, báonsombisa, áoba nkɔbɛ na Mísii. Nanga bo, Mokonga áoba kimoci na yɛ. 10 Áontokisa ka tambaga ndɔ, áomopha kɔbɔngɛ na bonjánja á ekondi ndea Mokonga gea te, Phaláɔ, moamɛ á Mísii, áombisa mɔkɔta gǔ á Mísii n'endu nɛkɛ. » 11 « Cɔ, monganya angbó phɛ̂ áogua ka Mísii bhui na Kanána. Bakpa báotambaga phɛ̂, batatasu phɔtɔ bákabɛ n'eea. » 12 Bii Yakɔ́bɔ dáɔki ye gea eea ana Mísii, áǒteka batatasu mɔngɔ á ko imoci kó. 13 Ka mɔngɔ á ko ibɛ, Yɔsɛ́phu áǒngodisaga na bana-amakɛ. Mpɔ Phaláɔ áoúbha cina á ekombo ndea Yɔsɛ́phu. 14 Mpɔ, Yɔsɛ́phu áǒteka bana-amakɛ k'aphe á ɔphana á abhakɛ Yakɔ́bɔ n'ekombo nɛkɛ bhui. Dábatú bakpa nkama ngia á njaga ibɛ na bɔku (75). 15 Ka bondɔ, Yakɔ́bɔ, n'ekombo nɛkɛ bhui, báoga na Mísii. Kó, yɛ na batatasu bunɛngbo báosía. 16 Báokumbaga mǒnda abɔ ka gǎ ne na Sɛkɛ́mu á ka Kanána. Oa, báoúmbaga ka ngbangbata nde Abhalaámu dásombi na bangɔa mɔtɛ á bana-Ɛmɔ́a.

17 «Bhíbhí á tɔtɔkɛana á mɔkɔ ndea Mokonga ka Abhalaámu, batatasu báobika phɛ̂ ka Mísii. 18 Mpɔ, moamɛ nɛngbo áomamea nji á Mísii, kabɛ ye oúbha ekombo ndea Yɔsɛ́phu. 19 Aǒdhemaga batatasu, áǒgeea ajede, áǒsosea gea, báesagɛ bambɛnjɛ, básiɛ. 20 Ka matu ndɔ, Mósa â gǎkɛ ɔbɔkɔtɛana. Dátú miki anjánjá phɛ̂. Mokonga áonkonda. Babɔkɔti akɛ báɔmmɔtisa k'endu nɛbɔ basonge basaɔ. 21 Mbenɔ nde babɔkɔti akɛ dában'deketi ye, nseka ndea Phaláɔ áɔmɔ̌na, áɔmbhɛda, áɔmmɔtisa bea anakɛ. 22 Báomúbhisa Mósa kɔbɔngɛ bhubhui ndea baMísii. Áoba mǒko akpɛkpɛ ka boabhia nɛkɛ n'ekuma nɛkɛ. 23 Mbenɔ nde Mósa dátú na basaga nkama gena (40), áosuia gǎ á ɛnjia á bana-amakɛ baIsilaɛ́li. 24 Akidi ye mɔtɛ á bɔ, áɔmɔɔna munamakɛ moci na ntɔa-Mísii aontambisaga. Aɔni ye bo, áogisia nyɔngɔ á muna-amakɛ, áɔm'bɛta ntɔa ka Mísii ndɔ áokua. 25 Oa, áoúbha te, bana-amakɛ baIsilaɛ́li bámɔ̌nande na sesea akɛ bea namisi nɛbɔ mmbe Mokonga anteki. Bɔ, bákadigimisɛ gǎkɛ nyɔngɔ ndɔ. 26 Mama í, Mósa áǒdhonda baIsilaɛ́li babɛ na báomana, áogea éunɛ. Aǒngodeae, ‹Baya, bókó phɔ́ batɔ á ekita? Eke nde bootambisanaga kau? › 27 Kabɔ moci mmbe dáonjakadisaga dhakɛ, áontiba Mósa, áongea be, ‹ Moko, ani mmbe akophi kɔkɔta á tena á nyɔngɔ nɛsu? 28 Oma ogea, ómomoɛ bíndɔ omoema ntɔa-ka-Mísii ndɔ nǎma? › 29 Bii Mósa aɔki ye bo, áotea, áoga oika na Midhiáni ka nji á bakɛni. Kó, áɔ̌bɔkɔta baniki babɛ.

30 «Bii, saga nkama gena (40) anyɛ́nyi ye gǎkɛ, Mósa áoba bhíbhí á mamba Sinái. Oa, áɔɔna esasa n'aǒtoboaga, malaeka n'asubi á ɛɛmbɛ á nsa ndɔ. 31 Ka ɔna í, Mósa áotangaaga, áɔsɛkɛda bhíbhí á nsa ndɔ ka gea áengekisɛ. Oa, áɔɔka ɛsɔ á Mɔkɔta n'aogea be, 32 ‹ Eme aámbé nende Mokonga, mmbe batatakɔ Abhalaámu, Isáka na Yakɔ́bɔ dábambhɛdaneigi. › Nyama á Mósa áɔɛkana na kɔbɔbɔkɔ, katɔkɛ ye tanda ɛnjia á kubei. 33 Mpɔ, Mɔkɔta áongodea, ‹ Phuia biato nɛkɔ, ka nyɔngɔ nde bii omamege, ande ɔma á bonjanja. 34 Cɔ, nɛɔni ye tɔ tambisaga á bakpa nɛmɔ ka Mísii. Nɛɔki phɔtɔ ngamɔ nɛbɔ. Neki gǎkɛ ka mokonda, k'aphe á phuia abɔ ka kɔkɔbɛ. Cɔ bhika, neokoteka kɛ̌kɛnde na Mísii. ›

35 «Cɔ, Mósa aámbɔ baIsilaɛ́li dában'ye na gea akɛ te, ‹ Ani mmbe akophi kɔkɔta á tena á nyɔngɔ? › Mokonga dánteki kagea ábɛ moamɛ na namisi nɛbɔ, malaeka nde dátú subi á ɛɛmbɛ á esasa ndɔ, yɛ aámbé dátú onenga. 36 Mósa phɔtɔ aámbé dáetokisi baIsilaɛ́li ka Mísii, dáetoisi n'aɔtɔtɔkisa ketangaɔ na mphangiɔ ka Mísii na k'Obenge Áotaneaga. Â phɔtɔ ogea bó ka nkanda, ka basaga nkama gena (40). 37 A phɔtɔ Mósa mmbɔ déngodi baIsilaɛ́li nyɔngɔ gea, ‹ Mokonga anjuanisande mɔtu-nyɔngɔ bea eme. Abande k'ekombo nɛnu. › 38 A phɔtɔ aámbɔ dédhondanisigi baIsilaɛ́li ka nkanda. Dáiki na batatasu, phɔtɔ na malaeka, mmbɔ dáyɔngi na yɛ ka mamba Sinái. Yɛ aámbe dá phɔ́ ɔɔka mbino á endisa, mpɔ áɔsɔtɔnganisia u. » 39 Batatasu bákakondɛ gǎkɛ ɔka á mbino nde Mósa dáɔki. Báɔnkpɛmɛa, bâ tɔ okonda sikianaga na Mísii. 40 Báongodea ntobei-phɛ́a Alɔ́ni te, ‹ Bɔngisiaga k'asu iii á bakɔta á na kobha bunde básɔmɛɛande mosá. Nga Mósa, mmbɔ dásotokisi na Mísii, békéoúbha nyɔngɔ sina nde angui. › 41 Mpɔ, báɔsɛka iii á mɔkɔta á na kobha, nnde akengeani na miki á ngɔmbɛ. Báotobea phɛa mosá i, báoba k'ekai ángbó, ka ɔna ekuma á ka njaga abɔ. 42 Mokonga aɔni ye bo, áǒmakea baIsilaɛ́li ngɔngɔ. Aǒdeketea gea, bángiɛ k'esomba á basɛɛngɔa, bíndɔ bádundu ka buku á baɔtu-nyɔngɔ gea,

‹ BaIsilaɛ́li baya, ande ka phɔani

aunge dóbotobu nyama á phɛa bámotobei banyama ɔ́phɛɔ

ka saga nkama gena (40) nde dóbotú ka nkanda?

43 Dóbokumbigi ndiu ɛma ndea mɔkɔta á na kobha Mɔlɛki.

Bô phɔtɔ ogea bó na iii á sɛɛngɔa nnde ande mɔkɔta á na kobha mmbe báɔmɔphana Lɛpháni. Bɔ́ɔsɛka iii abɔ ka dokomisa abɔ.

Ka bondɔ, nenótoisande danga kɔnyɛ́nya Bhabhilɔ́ni. ›

44 «Cɔ, ka nkanda ndɔ, batatasu dábatú na ɛma nde dábabhisi obaɔ nde bádundu nyɔngɔ á konsamba nde Mokonga dáɔngani na bɔ. Ɛma ndɔ, dábabɔngisigi bíndɔ Mokonga dámɔkusigi Mósa na phangia akɛ kaengekɔ i. 45 Ɛma ndɔ aunge batatasu dábaodeketeanaga k'ɛbɔkɔti nde mbusa, na ka bii dábangi ně ka nji á mɔkɔ nnde dábadhungi na Yɔsúa aámbé aemamei. Mokonga áobeaga ekuna bhui mosá abɔ ka nji ndɔ. Ɛma ndea Mokonga áoika kó na ka bii kɔkɔta á Dhaúdhi dáju. 46 Dhaúdi áoba na bonjánja á ekondi ndea Mokonga na ka bii dámɛmi mokonga nde ba Yakɔ́bɔ gea yɛ Dhaúdi á mphɛkɛɛ endu. 47 Sɔlɔmɔ́nɔ mpɛnɛ á Dhaúdhi, aámbé dámphɛkɛi ye tɔ ɔma á buiki kau. 48 Ande gea te, cɔ Mokonga, Mmbe a na kɔkɔta bhui, nn'aoika doni k'endu bakpa na báphɛki, bíndɔ mɔtu-nyɔngɔ dáyɔngi,

49 ‹ Mokonga agie: Ego ande kankaanga nɛmɔ á koboamɛ.

Mokonda, ande ɔma á bhisa á ecinji ani.

Cɔ, endu sina nde bɔmɔphɛkɛande? Ɔma sina nde neumbiande?

50 Kéconji kema á ka mokonda bhubhui ka njaga ani?›

51 « Cɔ, benu batɔa-mɔ̌ akpɛ nde ca! Bauo á ka měma na badaki-kecue nde ca! Esa bhui boopua na Měma á Mokonga bíndɔ batatanu dábatú ogea. 52 Ka baɔtu-nyɔngɔ sina nde batatanu dábákántambisigi? Eya, dáběme bundɔ dábaɔtu kidia á mbhɛdanigi nɛkɛ, Ntɔa-doni. Benu gǎkɛ, bɔ́ɔntɔnga, bóommoa. 53 Benu phɔtɔ, dɔ́bɔtɔi nyɔngɔ á ɛɔphi, nnde bamalaeka dábanoophi, bokobeɛ. »

Bámoe Sɛtɛphánɔ

54 BaYúdha, bunde dábatú ka ntua, bii báɔki ye bó, báonkokea Sɛtɛphánɔ minyɔ na bɛɛa akɛ phɛ̂. 55 Sɛtɛphánɔ â gǎkɛ otuma na Měma á Mokonga, áoenga na kobha, áɔɔna boombia ndea Mokonga, Yéso n'amamege ka njaga á mǔku akɛ. 56 Áɔyɔnga te: « Ɔmɔɔkani! Nɛɔni kobha n'akodokani, Muna-Nkpa, n'amamege ka njaga á mǔku á Mokonga. » 57 Oa, bakɔta á ka ntua á bɔphɛi angbó ndea baYúdha báokoga akpɛ na bádakigi kecue abɔ na Bɔbhu báombhutukia Sɛtɛphánɔ, 58 báonga ně bhâ á kenombe. Mpɔ, báomoa ka makeaga akɛ ɛtɛ ka mɔ̌. Bamamei á nyɔngɔ ndɔ báɔbhɛda bhɔngɔ nɛbɔ, báobhisa ka njaga á moganda moci, ina akɛ Saúlɔ. 59 Na bá phɔ́tɔ ɔm'bɛta Sɛtɛphánɔ n'ɛtɛ, yɛ áɔmɛma gea te: « Mɔkɔta Yéso, bhɛda měma ani! » 60 Mpɔ, áogbuka muanku, áokoga akpɛ phɛ̂, áogea: « Mɔkɔta Yéso, kobhisɛmbɛ nyɔngɔ á bojede nɛbɔ ka měma. » Mbusa á yɔnga akɛ bondɔ, áokua.