<<    <     Malíkɔ     15     >    >> 
Yéso mosá á Pilátɔ
15
1 Abí ye mɔkɛsuɛ, bakɔta á batobei-phɛa, bagbɛga á ka nji, baphangigi-ɛɔphi na batɔa-ntua á tena nyɔngɔ dábadhondanigi bɔbhu, báɔbɔngisia moangɔ. Mpɔ, báososea gea báom'boɛgɛ Yéso, báonga ně mosá á Pilátɔ. 2 Pilátɔ áomuisia Yéso: «Onde moamɛ ndea baYúdha?» Yéso áonsikisia: «A bíndɔ ɔyɔngi.» 3 Mpɔ, bakɔta á batobei-phɛa báɔntɔnga ásii phɛ̂. 4 Pilátɔ â goto omuisia: «Cɔ, kósikisɛku ka boabhi? Kɔ́ɔɔna nyɔngɔ nde báɔkɔtɔnga kau nde?» 5 Yéso dákásikisi gǎakɛ ka nyɔngɔ. Pilátɔ aɔni ye bo, áoyayama.
6 Ka maseye bhubhui, moamɛ Pilátɔ dáɛmbani na juanisa á ntɔa-mɛkakɔ moci, mmbe bakpa dábatú ɔmmɛma. 7 Mbenɔ ndɔ gǎkɛ, nkpa moci dátú ka mɛkakɔ, ina akɛ n'ande Bhalábha. Dábandhungi kimoci na badhakɛ ka mbenɔ á batɔa-nsengo na batɔa-kaiso. 8 Cɔ, usɛsɛ á bakpa báokidia mɔtɛ á Pilátɔ. Báongea: «Gea tɔ bíndɔ omóogeaga mosá.» 9 Pilátɔ áǒsikisia: «Bokondi nénkodɛ k'anu moamɛ ndea ba Yúdha?» 10 Pilátɔ dáúsi bo nga, dáúbhi gea, bakɔta á batɔbei-phɛa dábankangi Yéso ka nyɔngɔ á nsengo. 11 Kɛ̌kɛ ndɔ, bakɔta á batobei-phɛa báǒyombokisa usɛsɛ á bakpa te, bánkodisɛ ndiu k'abɔ Bhalábha. 12 Pilátɔ â goto ǒúsia: «Negeande bo na nkpa nde bogi te, ande moamɛ ndea ba Yúdha?» 13 Bakpa bɔbhu bâ goto ɔyɔnga akpɛ: «Nkɔkɛagani gǔ á me á nkpatɔ!» 14 Pilátɔ áǒbuisia: «Omoúbhisani phɔ́ bɔjede sina nde agimɔnɔ?» bâ tɔ ɔyɔnga akpɛ phɛ̂: «Nkɔkɛagani gǔ á me á nkpatɔ!» 15 Pilátɔ gǎkɛ, bii dáokonda ékondisɛgɛ na usɛsɛ á bakpa, áonkodisa Bhalábha. Áǒdeketea batɔa-emani gea te bám'bindɛ Yéso mpɔ, bánkɔkɛɛgɛ gǔ á me á nkpatɔ.
Batɔ-emani báontondea Yéso.
(Ɔna phɔtɔ Mat 27.27-31; Yoáni 19.2-3)
16 Batɔ-emani báonga na Yéso ka ntanga á endu ndea mɔkɔta Pilátɔ. Báɔ̌bɔphana badhabɔ batɔ-emani bɔbhu bádhondanɛgɛ. 17 Báɔmɔ̌lisa Yéso ngɔmbɛ anjɛa, báóoka kuku á ngenge, báommakea ka mɔ̌, kíu! 18 Mpɔ, báonsesea be: «Moamɛ ndea baYúdha, samba!» 19 Báɔm'bɛta na gbutu ka mɔ̌, Báonsuia soki, báogbuka muanku abɔ, báotumia mɔ̌ abɔ ka odo mosá akɛ. 20 Bii bágɔbi ye tɛba akɛ bó, báomphuia ngɔmbɛ nde bátɔ́mɔ̌lisi, mpɔ, báɔmɔ̌lisa ngɔmbɔ nɛkɛ sasa akɛ. Báonjuanisa ka nsɛngɛ ka gea, bánkɔkɛɛgɛ gǔ á me á nkpatɔ.
Báɔnkɔkɛaga Yéso na sungisiaga akɛ gǔ á me á nkpatɔ
(Ɔna phɔtɔ Mat 27.32-44; Lóka 23.26-43; Yoáni 19.17-27)
21 Nkpa moci ina akɛ Simɔ́ni ntɔa na Kuɛ́nɛ, abhakɛ na Alɛsandúɔ na Lúphub, dátú ɔnyɛ́nya ka toka akɛ na ciko. Batɔ-emani bâ gǎkɛ ombhɛda, báonkumbisa me á nkpatɔ ndea Yéso. 22 Mpɔ, báonkidisa Yéso ɔma nde dábatú ɔɔphana Gɔɔgɔta, ande gea: «Ɔma á gangata.» 23 Oa ndɔ, báokengisa opha akɛ makana na bádhadu na manga nde báɔɔphana manɛmanɛc. Yɛ dákánu gǎkɛ. 24 Mbusa, báɔnkɔkɛaga gǔ á me á nkpatɔ, báɔbɛta bana-mɛlɔɛ ka ubha a nkpa sina nde abhɛdande ngɔmbɛ kau. 25 Dátú nji-asasi unge dábankɔkɛigi Yéso gǔ á me á nkpatɔ. 26 Dábadundu kitɔngi akɛ gǔ á obaɔ be: «Moamɛ ndea baYudha.» 27 Dábɛ̌kɔkɛigi phɔtɔ ka me á nkpatɔ bakukuba babɛ, moci njaga á mǔku, moci njaga á nkei. 28 [Ka bondɔ unge, nyɔngɔ á buku á Mokonga dátɔtɔkɛani. Nga, dábadundu gea: ‹‹Dábambhisi kimoci na batɔ-bojeded. »]
29 Cɔ, bakpa nde dábatú ɔnyɛ́nyaga oa, báɔmphɔta Yéso, báɔnkɔngɔmɛaga mɔ̌, báogea: « Coo, obɛ ntɔa-ngbɔa endu á Mokonga na phɛka i mbusa á esa isaɔ, 30 óamisa phɔ sasa akɔ, ókiɛ ka me á nkpatɔ!» 31 Bakɔta á batobei-phɛa na baphangigi-ɛɔphi bâ phɔtɔ onsungisiaga na báɔyɔngaga nguungu abɔ te: «Déamisi bakpa buangbo, cɔ, nn'aɔtɔka n'ěamisi sasa akɛ. 32 Aoba n'ande Kiísito doni, moamɛ ndea baIsilaɛ́li, ákiɛ phɔ kɛ̌kɛ nde ka me á nkpatɔ, mpɔ, bɛ́ɔɔna, béobeekea.» Bakukuba ndɔ dábɛ̌kɔkɛigi na Yéso kimoci, bâ phɔtɔ onsungisiaga.
Kukua á Yéso
33 A ju ye kantende, keiphe áoba ka nji ndɔ bhui na kabii dágeojua ka akpaala. 34 Ka akpaala, Yéso áotobea: «Ɛlɔ́i, Ɛlɔ́i, lama sabakatáni?» ande gea: «Mokonga nɛmɔ, Mokonga nɛmɔ, omokambi ka boe?›› 35 Ka bakpa bunde dábatú oa, mbenɔ nde dábaɔki nyɔngɔ ndɔ, báogea: «Bɔɔki, amɔphani Ɛlía.» 36 Ka bɔ moci áoga mbangɔ, áɔbhɛda siphɔngɔf, áoubhia subi á makana nde aángai-ngai. Áoboa ka gbutuka á me, áon'daphisia Yéso gea, ámumɛg. Nkpa ndɔ áogea: «Ɔkaneani! Bɛ́ɔnɛ phɔ́ kabɛ Ɛlía abhikande onkisa.» 37 Yéso â gǎkɛ okoga, áɔdɔɛa.
38 Ka mbenɔ ndɔ, ngɔmbɛ á subi á endu á Mokonga áɔnyɔka ka phaeka ibɛ, k'ego áobhika osungia kusih. 39 Cɔ, mɔLɔ́ma moci, mɔkɔta á batɔa-emani á baLɔ́ma, dátú mosá á Yéso. Bii aɔni ye dɔɛa akɛ, áogea: «Doni, nkpa nde dátú Muna-Mokonga.» 40 Bake buangbo dába phɔtɔ wa. Dábaoenga na báme danga. Ina á ka bɔ aungee: Salɔ́mɛ, Malía ba Magadhála na Malía ama-moganda Yakɔbɔ na Yɔ́sɛ. 41 Bake ndɔ baunge dábatú ombea Yéso na bhɛdaneaga akɛ mbenɔ nde dátú ka Galiláia. Bake básii bunɛngbo bunde dábage na Yɛusalɛ́ma kimoci na ye, dába phɔtɔ oa.
Úmba á Yéso
(Ɔna phɔtɔ Mat 27.57-61; lóka 23.50-56; Yoáni 19.38-42)
42 Cɔ, dátú ye ɔgɔgɔ. Ka nyɔngɔ nde dábatú ɔbɔngisiaga esa á sabatɔ, 43 nkpa moci, ina akɛ Yɔsɛ́phu, ntɔa ka Aimatɛ́ai, dátú ka bakɔta á bateni-nyɔngɔ ndea baYúdha áokidia. Dátú phɔtɔ obondea kidia á koboamɛ ndea Mokonga. Cɔ, yɛ dáge ondhonda Pilátɔ, kanga á banga, ka mɛma mǒnda á Yéso. 44 Pilátɔ â gǎkɛ oyayama ka ɔka gea te, Yéso a ye ku. Cɔ, áɔmɔphana mɔkɔta á batɔ-emani, áomúisia ámbe Yéso adɔima kala. 45 Mɔkɔta á batɔ-emani áobeekea: «Eya.» Mpɔ, Pilátɔ áobeekea gea te, Yosɛ́phu ábhɛdɛ mǒnda á Yéso. 46 Wa ndɔ, Yosɛ́phu áosomba ngɔmbɛ á umba na mǒnda, áokisa mǒnda á Yéso gǔ á me á nkpatɔ, áoboaga u na ngɔmbɛ ndɔ, áoga oúmba ka kubhu ókanga. Áodaka bhota ndɔ n' etae angbo. 47 Malía ba Magadhala na Malía ama-yɔ́sɛ, dábatú ɔɔnjia ɔma nde dábamǔmbi Yéso.