Malíkɔ 13

Yéso aɔɔtɔa nyɔngɔ á ujukana á endu á Mokonga

( Ɔna phɔtɔ Mat 24.1-2; Lóka 21.5-6)

1 Ka juana á Yéso k'endu á Mokonga, ngoigi nɛkɛ moci áongodea te: «Mphangigi, ɛnjia phɔ etae anja nde na mɔphɛkɔ ángbó ndee!»

2 Yéso áonsikisia te: «Ootangaaga mɔphɛkɔ ángbó nde? Cɔ, etae kájigɛku gǔ á dhakɛ. Nga, mɔphɛkɔ nde bhui angbɔɔkanande.»

3 Mbusa, Yéso dáiki ka mamba Mijɛitúni, áoenga endu á Mokonga. Cɔ Pɛtɛ́ɛ, Yakɔ́bɔ, Yoáni na Andée báobhika omuisia ka mpɛphɛ te: 4 «Ósongodea phɔ́ mbenɔ sina nde nyɔngɔ ndɔ ageanaeka.»

5 Mpɔ, Yéso áɔɔtɔa nyɔngɔ be: «Ɛngɛphani ka nyɔngɔ á badhemigi. 6 Nga, bakpa básii bábhikande na ina ani. Nkpa na nkpa ayɔngande: ‹Eme aámbé nende Kiísito.› Bédhemande bakpa básii. 7 Mbenɔ nde bɔɔkaeka nyɔngɔ émani á bhíbhí na nnde á danga, bókobɛmbɛ na kɔbɔbɔkɔ i. Nga, nndɔ bhui akeni ágeanɛ. Nndɔ kabɛku gǎkɛ sungiaga á mokonda. 8 Ande gea te, batɔa k'ekuna danga-danga bámanande. Na batɔa kako boamɛ moci bámanande na batɔa ka koboamɛ nɛngbo. Baningina adengisande ɔma danga-danga. Nja aguande phɔtɔ k'oma danga-danga. Nndɔ bhubhui abande tɔ bea kpanga á boae. 9 Benu gǎkɛ, ɛngɛphani. Bakpa bánokidisande mosá á ntua á tena á nyɔngɔ. Bánobindande phɛ̂ subi á endu á bɔphɛi ndea baYúdha. Bánobhisande ka njaga á bakɔta na baamɛ ka nyɔngɔ ani. Ko, bɔ̌tɔmiande gǎkɛ nyɔngɔ nɛmɔ. 10 Eya, mosá á sungiaga a mokonda, akeni Mbino Anja áɛmbɛ ka batɔa á k'ekuna bhubhui. 11 Cɔ, mbenɔ nde bánokidisande ka ntua ka tɔnga anu, bókóianɛgɛmbɛ phɔ́ ka nyɔngɔ á boabhi nde bosikisande. Ka mbenɔ ndɔ, yɔngani tɔ yɔnga nde anobhikiande ka mɔ̌. Nga, nna gǎkɛ benu baunge bɔyɔngande, andiu Měma á Mokonga a unge aɔyɔnga. 12 Nkpa antɔngande munamakɛ ka gea, bámmoɛ. Aba-miki ageande phɔtɔ bo ka pɔa anakɛ. Na baniki bábande babibia á babɔkɔti abɔ, na kusisa abɔ. 13 Eya, bakpa bɔbhu bánósekande ka nyɔngɔ nde, bomobeeki. Nkpa nde aphiphiande gǎkɛ tambaga ndɔ na ka sungiaga i, mmbɔ áambe aamande.

Yéso aɔtɔ̌mia mbenɔ á tambaga angbó

( Ɔna phɔtɔ Mat 24.15-28; Lóka 21.20-24)

14 Mbenɔ akidiande nnde bɔmɔ̌nande ntɔa-Jɔɔkana n'aiki k'ɔma nde kánkeni ně. (Cɔ obɛ imbe ootanga ódigimisa ye ánja!) Ka mbenɔ ndɔ, akeni batɔa ka Yudhɛ́a, bágɛ mbangɔ ka mamba-mamba. 15 Mmbe aokambea bhakijɔ, ka kia akɛ, kángiɛmbɛ ka bhɛda á nkumba nɛkɛ subi á endu ka gǎ ně. 16 Mmbe á ka ciko, kásikianɛgɛmbɛ na nji ka bhɛda á bhɔngɔ nɛkɛ á gǔ ka gǎ ně. 17 Ngomi k'esa ndɔ ka bama-kaeme na bama-mbɛnjɛ. 18 Ka bondɔ, mɛmani Mokonga gea, esa ndɔ kabɛmbɛ ka mbenɔ á bɛjɔ. 19 Nga, mbenɔ ndɔ abande mbenɔ á tambaga ásii phɛ̂, nnde kágeanimbɛ mɔnɔ kpangea á bii Mokonga dáconji mokonda na ka kesande. Tambaga bíndɔ, kábɛeka ye tanda. 20 Atúoba Mɔkɔta na kángbimisi mbenɔ á tambaga ndɔ, ka bakpa kátúamaeka. Angbimisi ndiu ka nyɔngɔ á bakpa nde aesɔmbu gea, bábɛ bunɛkɛ. 21 A gǎkɛ oba nkpa n'anɔ́tɔ̌mi te: ‹Kiísito awani!› ‹Kiísito a kosii!› Cɔ bókǒbeekeɛmbɛ. 22 Nga, bakpa bábhikande na báɔyɔnga mbɛa gea te bánde Kiísito. Na baɔtu-nyɔgɔ á mbɛa bákidianande phɔtɔ. Bátɔtɔkisande mphangiɔ na ketangaɔ ásii. Kabɛ n'atɔtɔkɛanande, bédhemande nanga bundɔ Mokonga aɛsɔmbu. 23 Benu gǎkɛ, ɛngɛphani, ka nyɔngɔ nde dénɔtɔ̌mi ye nyɔngɔ bhui mosá.»

Bhika á Muna-Nkpa

( Ɔna phɔtɔ Mat 24.29-31; Lóka 21.25-28)

24 Mpɔ k'esa ndɔ á tambaga, mani abande kaiphiɔ,

songe kábhɛnyɛku.

25 Basɛɛngɔa báguande.

Na kema bhui ákpɛkpɛ á na kobha, adengande.

26 Wa, bámɔ̌nande Muna-Nkpa n'abhiki k'egugu. Abhikande na bukpɛkpɛ phɛ̂. 27 Mpɔ, áǒteka bamalaeka ka nkɛkɛɔ gena á mokonda. Kó, áǒdhondanisaga bakpa nde aɛsɔmbu . Ande gea, bunde aɛsɔmbu ka mokonda bhui.

Mě á tini

( Ɔna phɔtɔ Mat 24.32-35; Lóka 21.29-33)

28 Digimisani phɔ mɛní á me á tini. Bɔ ye ɔɔna gea, ntabhi i n'akpangi tɛisa nsoo á kasa, bûubha te, kabhadu a ye tɔ bhíbhí. 29 A tɔ ka benu. bo ye ɔɔna nyɔngɔ ndɔ bhui n'akidiani, ubhani gea Muna-Nkpa a ye tɔ bhíbhí, amame ka aphe iso á endu. 30 Nenongodi doni: Ɛbɔkɔti nde bhui kásíɛku, kema ndɔ bhui n'akákidianimbɛ. 31 Nga, kobha na mokonda, anyɛ́nyande. Yɔngɔ nɛmɔ kányɛ́nyɛku.

Mokonga tɔ aámbé aoúbha esa á sungiaga á mokonda

( Ɔna phɔtɔ Mat 24.36-44)

32 Ka nyɔngɔ á esa ndɔ na mbenɔ ndɔ, nna na nkpa nde aoúbha u. Kabɛ bamalaeka na kobha, kabɛ eme Muna-Nkpa, tɔndɔ Abhɛ. 33 Eya, ɛngɛphani, bokodɛmbɛ. Nga, bókóúbha esa ndɔ. 34 Ande bea nkpa n'aɔmɛa tamba. Áǒkambea babhɛdanigi nɛkɛ moangɔ endu. Mbhɛdanigi moci-moci áoba n'ekuma nɛkɛ. Â phɔtɔ ongodea nengi-kǐo gea, áɛngɛphɛ. Mpɔ, áoga. 35 Bondɔ unge negi, ɛngɛphani. Nga, bókoúbha mbenɔ nde mɛnɛ á endu ajuande, kabɛ ɔgɔgɔ, kǐpha, ka ɔsa á kɔkɔ, na ka m'bimba. 36 Aoba n'asɛnɛki, cɛdɛ! kánódhondɛmbɛ ka tɔ. 37 Nyɔngɔ nde nɛnɔtɔ̌mi, atɔ unge nɛ̌tǒmi bakpa bɔbhu, cɔ, ɛngɛphani!