Yakobus ni surat
Ngribatin luryanir
Tomwate ma narengi surat ye ngarany Yakobus. I ye Yesus wain (Markus 6:3; Galatia 1:19) ma neluk mangnrure ber soranyar na Yerusalem. I narengi surat ye ber tomwat Yahudyar ma ralele Yesus lo ma ramin mpene mpen na saryamprene ye. I narengi nof ngarak buty fat resin lim terik buty fat resin siw noak ma ramtoran babe Yesus lo.
Na surat dalam ye Yakobus nsurat tomwatar ma ralele Yesus na nir wewelmpampane. I nsurat sir nema rtafal ma ramkoran ma ralele Yesus ninr Ray Silai, nema bise ma rmorip ma nangafel (Yakobus 1:4). I nfalak farane fali na Palestina e tomwatar yadin ma rawatan. Ma lan tomwatar ketnir ma raoskay. Tomwatar na iano suse tyame (11:28). Ma noak a ne nbal, Tomwat Yahudyar rabangal dedesar na ise ma keta neluk nir Mangnrure.
Iane nwayat ma Yakobus nfalak ber soranyar nema noak ma rkoman suse e kete dalmir suse ma dedesar ma rsabar (Yakobus 1:2-8). Yakobus nsurat a nbal tomwatar ma rawatan ma raoskay (Yakobus 1:9-10; 5:1-6). I nfalak a nbal ber tomwatar ma ralele Yesus Ma ranremi ma dedesar e rose rlarat Ratu Ni anftutwar (Yakobus 1:22), kete rasalan sow (Yakobus 2:1), rkamis tomwat walyetar (Yakobus 2:17), kete rmeat (Yakobus 3:2), Ma rngabo ma rsampayang (Yakobus 5:13). I nfalak a nbal ber sir feti farlan ise ma nfalak feti nafai resi ma nafai safe ma botuan ma safe ma to botuan, ka nfatutu na ni momorip ngamone (Yakobus 3:13).
Surat ye isin farye:
1:1 Salam
1:2-8 Ka dedesar ma milele Ratu noak ma mtyungan anteman
1:9-11 Tomwate ma nawatan ma tomwate ma naoskai
1:12-18 Ka mifkoran dalmir noak ma mtyungan anteman
1:19-27 Ka tdengar Ratu Ni ngribatnir ma tose tlarat
2:1-13 Kete misalan sow
2:14-26 Ninr adat ngamonar nfatutu feti talele Ratu
3:1-12 Ka tajake sukninrar fengamone
3:13-18 Andaun ngamone nof Ratu
4:1-10 Kete tlarat makeus saryamprenar ma ka tlarat Ratu
4:11-12 Ka kete mifmpusuk tomwatar ngarnir
4:13-17 Ka kete mimlufe Ratu na safe ma mryeng
5:1-6 snyurtar ber mangoskayar
5:7-11 Ka dedesar ma tafkoran dalminrar noak ma tkoman suse
5:12-20 Kete msyompe ma ka msyampayang ber mangafansar