Paulus ni surat ber soranyar na Galatia
Salam
1-2 Ye surat nof yakw Paulus, ber soranyar monuk na provinsi Galatia. Yak ye Yesus Ni mangsiduk. Yak kweluk Ni mangsiduk to nof ma tomwatar rfil ma rfair yakw. Yak kweluk Mangsiduk fali Yesus ninr Ray Silai ma Amninrar Ratu ma rfil yakw. Ma Amninrar Ratu ne ma nafmorip a nbali Yesus. Waninrar ma ralele Yesus ma rkarya ror yakw na ye rkirim salam ber kmi a nbal. 3 Ka weni Amninrar Ratu ma Yesus ninr Ray Silai ma neluk ninr Mangnrure ne rfatutu Nir dalam ngamone ma ral maline ber a kmi. 4 Yesus ninr Mangnrure ye ma nanrenre I, ma nmat la ntebus kit nof ninr salar, nema nalin kit nof saryamprene ma nfen ber kabain yatkar na are ye. I nose farane fali nlarat Amninrar Ratu Ni mpempeang. 5 Mpa mya ma tdangin Ratu titerik ma dedesar! Amin.
Ibar Ngamone lan lese
6 Wangur, yak dalangw suse desar na kmi fali manrilak desar ma mitliur Ratu ma mlyarat ibar walyetar ma tomwatar ketnir rfalak feti iane ibar ngamone. Safo Ratu nfil a kmi lo ma myeluk Ni tomwatar nema Yesus ninr Ray Silai nfatutu Ni dalam ngamone ber a kmi. 7 Ni botuan e Ibar Ngamone ye lan lese, iane ibar ma kam mafwibar ber a kmi. Nempa tomwatar ketnir rma ma rfule kmi, ma rose ma to mifai feti ibar mpe ye ma botuan. Sir a ne rpeang ma rlikur Ibar Ngamone na Yesus ninr Ray Silai. 8 Yak kfwalak ber a kmi, tomwate ma nafwibar ibar ngamone ma to feleles nor Ibar Ngamone ma kam mafwibar ber a kmi a ne, la Ratu nukun i, boloka tomwate ne nof kam nre malaekat sa nof surga. 9 Luryain e kam mfalak ber a kmi lo nre! Ma lere ye yak kfwalak a nbal, ise motak ma nafwibar ibar ngamone ma to feleles nor Ibar Ngamone ma kmi mlyangun myof kam a ne, la Ratu nukun i.
10 Yak kfwalak farane to feti kpweang ma kufsenange tomwatar nempa kpweang ma kufsenange Ratu dalam. Mpa kete mdyaun feti yakw kureke ma tomwatar rdangin yakw. Fali farlan kureke ma tomwatar rdangin yakw, iane to kweluk Yesus ninr Ray Silai Ni mangkaryae.
Ratu nfil Paulus ma neluk Yesus Ni mangsiduk
11 Soranyar mir kateman, mdyengar fengamone safe ma kfwalak ye nema mifai desar feti Ibar Ngamone ma kufwibar a ne, to nof tomwatar nir andanwar. 12 Sir to raftutu ma rfalak ibar ne ber yakw. Nempa Yesus ninr Ray Silai ye ma nafbotin ma nose ma kwaul kal Ibar Ngamone ne.
13-14 Wangur, kmi mdyengar lo nre, feti noak ma klwarat agame Yahudi ni yayatrwar a ne ningw momorip farpe. Ningw tubwar a ne rlarat agame Yahudi nbal, nempa yak klwengan sir monuk, fali kngwabo ma klwarat empung nusingw nir wewelmpampanar ma raftutu ber kam. Noak a ne yakw kuyatak desar fali dedesar ma kswiksa tomwatar ma ralele Yesus ma kureke ma kfwen sir. 15 Boloka farane Ratu Ni dalam ngamone ber yakw. Noak ma to ramtoran babe yakw fuky e, I nfil ma nfair yakw ma kweluk Yesus Ni mangsiduk. 16 Ratu nafbotin Anaky ber yakw ma nose ma kwaul kal Anaky ne nema kufwibar Ibar Ngamone na I ber tomwatar ma to Yahudi sir. Ma to kuale andaun kor kekes na ngrie ne. 17 Ma to ktwi a nbal Yerusalem ma ktwak sir ma reluk Yesus Ni mangsiduk baluan rof yakw ne ma rsurat yakw. Nempa kusnyalik ma ktwi nus Arab, betno kof a ne ma kbwali yakw far kote Damsyik. 18 Ngarkar tely relak betno yak ktwi Yerusalem ma kutungan kor Petrus. Yak kumin ni das lan lere buti resin lim. 19 Ma to kutungan kor mangsiduk walyete fen lese nbal, lan Yakobus, Tuhan Yesus wainy.
20 Wangur, Ratu nafai feti safe ma kurengi ye botuan ma to klwepusuk.
21 Nof a ne yak ktwi kote Siria ma Kilikia. 22 Nempa soranyar ma ralele Yesus ninr Ray Silai na kotar ma ramin provinsi Yudea ne to rafai felangw fuky. 23 Sir rdengar lan feti tomwate ma luryain e nsiksa sir ma ralele Yesus ninr Ray Silai ne, lere ye nafwibar ibar ma luryain e nose ma nkes kalin a ne. 24 Mpe sir monuk rdangin Ratu fali nafbweberi nbali ningw momorip lo.