Paulus ni surat luryain ber soranyar na Korintus
Salam
1 Ye surat nof yakw Paulus ma waninrar Sostenes ma taktem a talele Yesus. Yak kweluk Yesus ninr Ray Silai Ni mangsiduk klwarat Ratu Ni mpempeang. 2 Yak kurengi surat ye ber wangur a kmi na Korintus. Ratu nfil a nkese kmi ma myeluk Ni tomwatar fali dalmir lese myor Yesus ninr Ray Silai. Ratu to nfil a nkese lan kmi nempa tomwatar monuk ma ramin mpenempen a nbal ma rsampayang ber Yesus ninr Ray Silai, fali I neluk Mangnrure ber kit monuk. 3 Yak ktwak ma weni Amninrar Ratu ma Yesus ninr Ray Silai ma neluk ninr Mangnrure ne rfatutu Nir dalam ngamone, ma ral maline ber a kmi.
Paulus nose alang ber Ratu na berkat ma nal ber i
4 Yakw dedesar ma kose alang ber Ratu ma kswampayang ber I a ne, fali nfatutu Ni dalam ngamone ber a kmi. Ma I nose farane fali dalmir lese myor Yesus ninr Ray Silai lo. 5 Ma dalmir lese myor I lo, mpa nal kabain ngamonar yadin ber a kmi: I nose ma mkyaul myal Ratu Ni anftutw botunar, ma nose nbal ma bise ma mfyalyole anftutwar a ne ber tomwatar. 6 Ngriar a ne nfatutu feti anftutwar na Yesus ninr Ray Silai ma kam maftutu ber a kmi a ne nawakar na dalmir. 7 Mpa Ratu nal anfai monuk ma mpyerlu a ne nema mlyangun I. Ma noak ma msyabar ma mdyaf Yesus ninr Ray Silai nma saryamprene, keta anfayar a ne namin a kmi dedesar. 8 Yesus ninr Ray Silai keta nose nbal ma mimkoran ma milele I, nema noak ma nma nbali saryamprene, to mir sal a na Ratu sounlury. 9 Ratu nose safe-safe monuk nlarat safe ma nyoding. Mpa I nfil a kmi ma myorip e dalmir lese myor Anaky, I a ne Yesus ninr Ray Silai ma neluk ninr Mangnrure.
Tomwatar ma ralele Yesus na Korintus raale sir
10 Wangur, Yesus ninr Mangnrure ma neluk ninr Ray Silai, nal kuase ber yakw ma kswurat a kmi. Mpa ktwak ma ka dalmir lese ma mir andaun lese ma kete mikes misam a kmi. 11 Yakw kswurat a kmi farye fali Kloe ni dasdalam ketnir rma ma rfalak ber yakw feti miale kmi. 12 Yakw kfwalak farane fali mikes misam a kmi ma tomwatar ketnir nof a kmi a ne rfalak feti rlarat Paulus, ketnir rfalak rlarat Apolos, ketnir e rfalak rlarat Petrus, ma ketnir a nbal e rfalak feti rlarat Yesus ninr Ray Silai. 13 Kmi mfyalak farane iane farlan ma mikese Yesus ninr Ray Silai tenany, iane nangafel nre tate? Kmi mdyaun feti yakw ye ma rsangwalu yakw la ktwebus mir salar e? Nre radiris a kmi ror ngarangw nema mlyarat yakw e? Tate nre! 14 Yakw kose alang ber Ratu fali to fen lese nof a kmi ma kudiris i, lan Krispus ma Gayus, 15 mpa to tomwate fen lese ma nfalak feti yakw kudiris i kor ngarangw nema nlarat yakw. 16 O betno kunremi feti yakw kudiris Stefanus nor ni dasdalam, ma nlengan nof a ne to kunremi lo. 17 Fali ninr Ray Silai to nsiduk yakw ma kudiris tomwatar nempa nsiduk yakw ma kufwibar Ibar Ngamone. Ma noak ma kufwibar Ibar Ngamone yak to kuftutu kor ningw anfai silai fali keta rlarat lan ningw anfai ne, ma to ralele Yesus ninr Ray Silai Ni kuase ma nmat na katutun sangwalu.
Ratu nfatutu Ni kuase ma Ni anfai silai nalyole Yesus ninr Ray Silai Ni mamate na katutun sangwalu
18 Tomwatar ma keta Ratu nukun sir a ne, rfalak feti ibar na Yesus ninr Ray Silai ma nmat na katutun sangwalu ne, to uban. Nempa kit ma Ratu nfair kit ye tafai feti nof ibar a ne Ratu nfatutu Ni kuase ma nlie nlengan. 19 Fali na Kitap Lelerap dalam Ratu nfalak farye,
“Tomwatar ma nir anfai silai ne
keta kose ma nir anfai ne to namin.
Ma keta kose safe-safe ma rafai ne ma to uban.”
20 Farlan farane uban safe ber tomwatar ma nir anfai silai? Uban safe ber mangaftutu Musa ni faretar? Ma uban safe ber sir ma rafai ma rabali ngengentar? Fali na Ratu sounlury e tomwatar nir anfai silai ne to uban sasaf. 21 Boloka tomwatar nir anfai silai nempa to bise ma rafai Ratu nof nir anfai ne. Ma Ratu Ni anfai silai mpa nof Ibar Ngamone ma kam mafwibar a ne, I ntetak ma nfair tomwatar ma ralele Yesus. Nempa tomwatar ma to ralele Yesus rfalak feti ibar a ne to uban. 22 Tomwat Yahudyar to rpeang ma ralele Yesus farlan kam to mfatutu kabain mpasalnar ber sir. Ma tomwatar ma to Yahudi sir a ne to rpeang ma ralele Yesus farlan kam to maftutu sir mor anfai silai. 23 Kam mafwibar na lan Yesus ninr Ray Silai ma nmat na katutun sangwalu. Nempa tomwat Yahudyar rdaun feti kam marikan sir mor ibar ma kam mafwibar a ne. Ma tomwatar ma to Yahudi sir a ne rfalak feti ibar a ne to uban. 24 Nempa Ratu nfil tomwatar ketnir ma ralele I. Sir a ne tomwat Yahudyar, ma tomwatar ma to Yahudi sir a nbal. Noak ma rdengar Ibar Ngamone na Yesus ninr Ray Silai ne, sir ralele I. Ma sir rafai feti Ratu nfatutu Ni kuase ma Ni anfai silai ber tomwatar a ne. Ratu Ni anfai silai ne, iane feti I nsiduk Yesus ninr Ray silai ma nfair tomwatar. 25 Noak ma kam mafwibar feti Yesus ninr Ray Silai nmat na katutun sangwalu, tomwatar rdaun feti kam mod. Safo ni botuan e ibar nof Ratu ne nlengan nof tomwatar nir anfai. Ma sir rfalak a nbal feti Ratu to Ni kuase sasaf fali nose ma Yesus ninr Ray Silai ne nmat na katutun sangwalu. Safo ni botuan e Ratu Ni kuase silai nlengan nof tomwatar.
26 Wangur, minremi nre tate noak ma Ratu nfil a kmi ma milele Yesus. Noak a ne to yadin nof a kmi ma nir anfai silai, ma nir kuase. Ma to yadin nof a kmi ma tomwatar ralang kmi. 27 Boloka farane Ratu nfil sir ma tomwatar rdaun feti rmod a ne, nema rafmweat tomwatar ma nir anfai silai ne. Ma I nfil sir a nbal ma tomwatar rdaun feti to ubnir sasaf a ne, nema rafmweat sir ma tomwatar ralang sir. 28 Ma Ratu nfil sir ma tomwatar to releng sir ma rdaun feti to ubnir sasaf a ne. I nfil sir nema nose ma tomwatar ma rdaun feti silayar sir a ne, to ubnir sasaf. 29 I nose farane nema to tomwate fen lese ma nafdas i a na Ratu souny lury. 30 Ratu koko I ma nose ma dalminrar lese tor Yesus ninr Ray Silai. Ma nalyole I kit bise ma tkaul tal Ratu Ni anfai silai. Ma nalyole I a nbal, Ratu nfil a nkese kit ma teluk Ni tomwatar, ma nfair kit nof ninr salar. 31 Fali rarengi na Kitap Lelerap dalam feti ise npeang ma nafdas i, ka nafdas i a na kabanir ma Ratu nose.