Yesus Ni mangsidkwar nir ansarwar
Ratu nyoding Smwangtany
1 Amangw Teofilus, yak kurengi safe-safe monuk ma Yesus nose ma naftutu, na ningw kitap luryain a ne, 2-3 ntabw nof ma nkarya terik ma nfangat far surga. Lama nmat ma nmorip a nbali nfatutu I ber Ni mangsidkwar ma nfil sir a ne. Ma nose fanikar yadin la nfatnyot feti I nmorip lo. I nfatutu felany dedesar terik lere buty fat ma natanuk ber sir na Ratu neluk Rai ma nfarete tomwatar. I nal Ratu Smwangtany la nsurat sir betno nfangat far surga. 4 Na ler sa, noak ma ntame nor mangsidkwar e I nfalak, “Kete mbyie myof Yerusalem, la mdyaf safe ma Amangw nyoding ber a kmi. Iane ma luryain e kufbotin ber a kmi lo. 5 Fali Yohanes nal weye la nadiris tomwatar, nempa to dodo a nbal e Amangw nadiris a kmi. Iane kmi mfyen ber Ratu Smwangtany lo.”
Yesus nfangat far surga
6 Na ler sa mangsidkwar rabut sir ror Yesus ma renrat, “Tuhan, lere ye bise ma mwal a mbwali ninr nuse e, nema tomwat Romar kete rfarete kit lo?” 7 Ne Yesus nfalak ber sir, “To mpyerlu ma mifai feti begfir e ngrie ne nbotin, fali lan Amangw ma Ni kuase ma ntetak ngrie ne. 8 Nempa keta myonri kuase noak ma mfyen ber Ratu Smwangtany ma keta mifwibar ibar na Yakw na Yerusalem, Yudea ni kateman, Samaria nti nait saryamprene ni kateman.” 9
Yesus Ni mangsidkwar rsalan I nfangat far surga (1:9)
Mangsidkwar rfil Matias ma nlikur Yudas
12 Lama Yesus nfangat far surga e mangsidkwar a ne rbali sir rof lenran Zaitun far Yerusalem ma doan fafa kilo lese.a 13 Noak ma rait kote ne, sir rti ain ma ralosy a ne ma rfangat far loteng. Sir a ne Petrus, Yohanes, Yakobus, Anrreas, Filipus, Tomas, Bartolomeus, Matius, Yakobus Alfeus anaky, Simon tomwat Zelotb ma Yudas Yakobus anaky. 14 Ne dalmir lese ma rafburat sir ma rsampayang dedesar, ror Maria Yesus enany, ainwainy, mla batar ketnir. 15 Na ler sa e, tomwatar ma ralele Yesus ne rafburat sir. Sir a ne fafa tomwate rati buty du. Ma noak a ne Petrus namdir twalelenir ma nfalak, 16 “Wangur mir kateman! Safe ma rarengi na Kitap Lelerap dalam ka rafdiat. Fali luryain e Ratu Smwangtany nafbotin ber Daud na Yudas ma keta nrure tomwatar ma romat Yesus. 17 I ye tomwatar sa nof kam, ma Yesus nfil i lo ma maktem a mkarya.” 18 (Yudas nal doit nof ma nanrenre Yesus ne la nselir ompak. Ne npelak natlabar i ma kampuny ntarbisy nwayat ma kampuny ene anaky rmadas mpa nmat. 19 Tomwatar monuk ma ramin Yerusalem rafai ni mamate ne, nwayat ma rafngare ompak a ne feti, ‘Hakal-dama’. Nir liliry isiny feti Ompak Dare.) 20 Petrus nfalak a nbal, “Na kitap Mazmur dalam rarengi feti, ‘Farane nema ni das a ne kape’ ma to kekes a ramin. Ma keta ‘tomwat walyetar ronri ni kadere.’* 21-22 Mpa ka tfil tomwatar sa ma ntafal kit nema taktem a tafwibar ber tomwatar feti Yesus nmorip a nbali. Ka tfil tomwate ne nof tomwatar ma dedesar rafburat sir ror kit ma tlarat Yesus, ntabw nof Yohanes nadiris tomwatar terik ma Yesus nfangat far surga.” 23 Ne rfil tomwatar du, sir a ne Yusuf ma Matias. Yusuf ne ma rtar feti Barsabas, ma rtar a nbal feti Yustus. 24 Betno rsampayang, “Tuhan, Ko mufai monuk tomwatar dalmir, mpa mfwatutu ber kam feti, nof tomwatar du ye ise ma Ko mfwil i, 25 ma nlikur Yudas ma neluk mangsiduk ma nkarya ber Tuhan. Fali Yudas ye nmat a ntate ni karyayar ma nonry ni wayat lo”. 26 Ne sir rose undi na tomwatar du a ne, ne undi ne nfuf ber Matias. Mpa ral i ma ntafal mangsiduk buti resiny lese ne.