<<    <     Lukas     24     >    >> 
Yesus nmorip a nbali
1 Ni Minggu bobolisin dalam desar e, batar a ne ronry ngul angat ngafelar ma rasusan a ne lo far kubur.a 2 Lama rait bange ma rafonak Yesus a ne, rsalan bati ma nepat bange ne nlalau lo.
Bati ma nepat bange ne nlalau lo (24:2)
3 Ne rti bange dalam, nempa to rtungan Tuhan Yesus tenany.4 Lolone ramdir ma to rafai feti rose safe, metryat e tomwatar du a rfonak rabit ngaidkar ramdir rlosir sir.5 Batar a ne ramtaut desar ma rsatngur, ne tomwatar du a ne rfalak ber sir, “Kmi minriak ise, safema minriak tomwate ma nmorip na mangmwatar anir?6 * I to namin ye, I nmorip a nbali lo. Minremi nre tate, safe ma nfalak ber a kmi noak ma lolone namin nus Galilea.7 I nfalak feti, ‘Tomwate Anaky ka ranrenre ber tomwat salar ma rsangwalu I, nempa keta lerar tely e nmorip a nbali.’”
8 Mpe batar a ne ranremi rbali Yesus Ni ngribatnir a ne. 9 Lama rbali sir rof kubur e, rasaur monuk ngrie ne ber Yesus Ni mangsiduk buti resiny lese numur Ni manglarat walyetar a nbal. 10 Batar a ne Maria Magdalena, Yohana, Maria Yakobus enany, ma bat walyetar ma raktem a ne. Sir ye ma rasaur ber Yesus Ni mangsidkwar. 11 Nempa mangsidkwar a ne to ralele sir fali rdaun feti batar a ne rasaur lan nir lepuskwar.
12 Nempa Petrus namdir ma nafla nti bange. Nait bange e, namdu ma nfon far dalam, nempa nkeban lan maloly buri e. Ne nbali i ma nfalak na dalamy feti safema farye?
Yesus nafbotin I na dalamtene ma nal far Emaus
13 * Na lere ne nbal, Yesus Ni manglartar du a rti pnu sa ngarany Emaus. Pnue ne doan fafa kilo buti resiny lese nof kote Yerusalem. 14 Radu a rmpan e, rasaur safe-safe monuk ma diat Yesus. 15 Sir lolone ratanuk ma raale andaun e, metryat e Yesus koko I a nma ma raktem a rmpan. 16 Sir rsalan Yesus nempa kabanir sa nose ma to rserap ral I. 17 Ne Yesus nenrat sir, “Misaur safe ye?”
Rdengar farane e ramdir a rtabu sir ror dalmir suse. 18 Ne Ni manglarat sa ngarany Kleopas nenrat Yesus, “Amangw, safe nre lan ko ye mangmwar sa na Yerusalem ma to mufai ngri safe na i a no bete ye e?”
19 Ne Yesus nenrat, “Safe ne?”
Mpa sir rfalak, “Yesus tomwat Nazaret a ne, I ye nabyar sa i. Ratu ma tomwatar monuk e ryoding I fali Ni ngribatnir ma karyayar e rfen ber kuase. 20 Nempa kit ninr mangsomp ulnir ma mangfaretar ranrenre I ber mangfaret Romar ma rtetak Ni mamate ma rsangwalu I. 21 Safo luryain e kam malele feti, I ye ma keta nalin Israelar kit. Nempa I nmat ma lere ye fen lerar tely e lo. 22 Ma batar ketnir ma maktem a ne rfetryat kam a nbal, fali bobolisin makrokap motak e sir rti kubur lo, 23 nempa to rtungan Yesus tenan na i a no. Ne rbali sir ma rfalak ber kam feti, sir rkeban malaektar ma rfalak feti Yesus nmorip a nbali lo. 24 Mdengar farane tbwarmyamar ketnir rti kubur, ma rsalan e kubur a ne kape far ma batar a ne rfalak. Nempa to rkeban desar Yesus.”
25 Ne Yesus nfalak ber sir, “Mir mode desar ye, mir andanwar to nmpan, nwayat ma to milele safe-safe monuk ma nabi luryanir rfalak a ne. 26 Ka mifai feti Rai Mangtebus ka nkoman suse terik ma nmat a fuky, betno nmorip a nbali ma nonri dadangin.” 27 Ne Yesus nfalyole safe-safe ma rarengi na kitap dalmir monuk na I, ntabw nof Musa ni kitpar ma nabyar nir kitpar.
28 Noak ma ketla rait pnu Emaus, Yesus nose lole ma nmpan naloran. 29 Nempa radu a rtayan desar I ma rfalak, “Murwa ye fuky, koli lere da lo ma ketla makrokap.” Mpa Yesus nlarat ma narwa nir das. 30 Noak ma ramtoran ma rtame, Yesus nal roti ma nloik ber Ratu, betno napuse ma nal ber sir. 31 Mpe nof a ne betno rfenai ma rafai feti I a ne Yesus, nempa metryat e to namin lo. 32 Ne rafalak ber sir, “Farye mpema dalminrar rsenang resi ye, noak ma natanuk nor kit a na dalamtene lety, mla naflyonri Kitap Lelerap isiny ber kit.”
33 * Nronram a ne nbal rbali sir far Yerusalem. Radu a rait e rti rakmat Yesus Ni manglarat buti resiny lese ma rafburat sir ror Ni manglarat walyetar na i a no. 34 Manglartar a ne rfalak, “Botuan feti Tuhan Yesus nmorip a nbali lo ma nafbotin I ber Simon.” 35 Ne radu a ne rasaur na safe ma diat sir na dalamtene lety, ma sir rafai I farpe noak ma napuse roti.
Yesus nafbotin I ber Ni manglartar
36 Lolone rasaur ngriar ne, metryat e Yesus namdir twalelenir ma nfalak, “Maline ber kmi!” 37 Sir rmetryat ma ramtaut fali rafliak feti rsalan isnruan. 38 Nempa nfalak ber sir, “Safema ma mimtaut? Ma lolone misoru safe? 39 No msyalan limangw ma emangw: mpe Yakw ye lo. No mfyofur Yakw ma msyalan, fali isnruan to isiny ma to duriny far ma msyalan Yakw ye.”
40 Mpe natanuk a ma nfatutu limany eman ber sir. 41 Rdengar farane rampriang desar ma dalmir a rsenang nempa lolone rasoru. Mpa Yesus nenrat sir, “Mir a tyame namin e?” 42 Mpe ral ian tutunu tukar ber I. 43 Ne Yesus nal ian a ne, betno nane na sonir lury.
44 Betno nfalak ber sir, “Noak ma lolone kor a kmi a ne, kufbotin monuk kabanir monuk ye lo feti, safe ma rarengi monuk na Musa ni kitpar, nabyar nir kitpar, mla Masmur e ka rafdiat.”
45 Mpene Yesus naflawar nir andanwar mpa rafai Kitap Lelerap dalam. 46 Ne nfalak a nbal, “Na Kitap Lelerap dalam e rarengi farye, Yakw, Rai Mangtebus ka kwoman suse ma kmwat, ma lerar tely e kmworip a kbwali. 47 Ma na Kitap Lelerap dalam e rarengi nbal feti, ka Ningw manglartar ral ngarangw la rafwibar ber tomwatar feti ka rtate nir salar nema Ratu nlure sir, ntabw nof Yerusalem nti nait yamprenar monuk. 48 Mpe koko kmi a msyalan kabanir monuk ye lo. 49 Ma keta kswiduk Ratu Smwangtany ber a kmi, farlan ma Amangw nyoding a ne. Nempa ka mimin kote ye fuky terik ma Ratu nal Ni kuase ber a kmi.”
Yesus nfangat far surga
50 * Mpene Yesus nor sir a rbie kote ne ma rti sesedin pnu Betania. Na iano npote liman ma nberkat sir. 51 Noak ma nberkat Ni manglartar a ne, nfangat far surga nti a ntate sir. 52 Sir rsatngur ber I, betno rbali sir far Yerusalem ror dalmir senange resi, 53 ma lerar monuk e rabut sir a na Ratu Ni Das Silai dalam ma rdangin Ratu.