Tomwatar ror Yesus ber Pilatus
1 Mpene sir monuk ma ramin iane ramdir, ma ror Yesus ber Pilatus.a 2 Na iano sir rsoi I ma rfalak, “Kam mtungan tomwate ye nfule kam mamy tomwatar. I nfalak ber sir nema kete rbayar ulnirbatin ber Kaisar, ma nfalak feti I ye Kristus iane feti Rai sa I.”
3 Ne Pilatus nenrat I, “Mpe Ko ye Yahudyar nir Rai e?”
Ne Yesus a nfalak, “Koko ko ma mfwalak.”
4 Mpa Pilatus nfalak ber mangsomp ulnir ma tomwatar monuk ne, “Yakw to kukun I fali to kbwae Ni sal.”
5 Nempa sir rtafal ma rfalak, “I nfule tomwatar nor Ni anftutu na Yudea ni kateman; ntabw nof Galilea, ma ti la nait ye nbal.”
6 Pilatus ndengar farane, i nenrat, “Ali tomwate ye tomwat Galilea I e?”
7 Sir rfalak, “Au! I nof Galilea.” Mpa Pilatus nluan tomwatar ma ror I ber Herodes mangkuase Galilea, fali noak a ne namin Yerusalem a nbal.
Tomwatar ror Yesus ber Herodes
8 Herodes ndengar na Yesus doan ye lo mpa nmpeang desar ma natungan nor I ma nsalan I nose fanikar sa. Mpa nait ma nsalan Yesus e nsenang resi. 9 I nenrat kabanir yadin nof Yesus, nempa Yesus namlin motak. 10 Ne mangsomp ulnir ma mangaftutu Musa ni faretar ral far lury ma rsoi Yesus ror sal mabertar la rafufu I. 11 Ndengar farane, Herodes nor ni suldadwar rarikan I, rkosy I ma rmalip I. Sir rwolu rabit melawas farlan rayar ni rabtyar na I betno ror a rbali I ber Pilatus. 12 Noak a ne Herodes radu Pilatus rakedan sir, nempa na lere ne nbal radu rangamon a rbali.
Pilatus nal tetetak mamate ber Yesus
13 Mpene Pilatus nafburat mangsomp ulnir, mla mangfaretar, numur tomwatar, 14 betno nfalak ber sir, “Kmi myor tomwate ye ber yakw ma msyoi feti I nfule tomwatar. Msyalan ma mdyengar ma kwenrat I lo, nempa to Ni sal sasaf far ma mfyalak ne. 15 Herodes a nbal e ni andaun farane mpa nluan ma myor a mbyali I ber yakw. Tomwate ye to nose sal maberat sasaf ma nwayat ma kal tetetak mamate ber I. 16 Mpa keta kluan ma raus a rbabal I, betno ktwate I.”
17 [Pilatus nfalak farane fali na Yahudyar nir ler silai Paskah mpane e ka nalin tomwatar sa nof sel dalam.] 18 Nempa tomwatar monuk ma ramin a ne yoyouk lese ma rafwayak, “Mfwen I! Ma mtwate Barabas ber kam!” 19 (Sir ral Barabas far sel dalam fali nfen tomwate ma nose tomwatar to rdengar mangfaret Roma.)
20 Pilatus nose ma ntate Yesus, mpa nenrat sir a nbal. 21 Nempa rafwayak dedesar, “Sangwalu I! Sangwalu I!”
22 Pilatus nfalak fen lain tel ber sir, “Ali Ni sal safe ye? Yakw to ktwungan Ni sal sasaf ma nwayat ma kal tetetak mamate ber I! Mpa keta kluan ma raus a rbabal I, betno ktwate I.”
23 Nempa rtafal ma rafwayak, “Msangwalu I lo.” Mpa famudi e nlarat nir mpempeang. 24 Mpene Pilatus nal tetetak mamate ber Yesus nlarat nir mpempeang, 25 ma ntate tomwate ma namin sel dalam ma nafyatak kote ma nafen a ne. Betno nanrenre Yesus ber ni suldadwar ma rfen I rlarat Yahudyar nir suke.
Tomwatar rsangwalu Yesus
26 Mpene suldadu Romar ror Yesus. Na dalamtene lety e sir rtungan tomwat sa ngarany Simon, nof kote Kirene, i nose ma nti kote dalam. Ne suldadwar a ne romat i betno ribut i ma nabare katutun sangwalu nlarat Yesus.
Suldadu Romar ribut Simon ma nabare katutun sangwalu (23:26)
27 Tomwat ngayadin rlarat Yesus rof mudy. Nof sir a ne ye batar ketnir a nbal rlarat Yesus ma rtasing I. 28 Nempa Yesus nmange I ma nfalak, “He bat Yerusalemar a kmi! Kete mtyasing Yakw. Nempa mtyasing a mbyali kmi numur angkimir. 29 Fali keta nait ni tewat e tomwatar rfalak feti, ‘Ngamone ber batar ma rmakw, ma to nir memey ma to rasusw.’ 30 * Na lere ne keta tomwatar rfalak feti, ‘Ka weni buburir ma lenir mimkei mpyalam kam!’ 31 Katutun mate motak e tomwatar rose farye lo, ma keta katutun mangu e rose farpe i a nbal! Feleles farlan Yakw ma to ningw sal sasaf e rose Yakw farye lo, ma tomwat salar a kmi e keta rose rlengan a nbal.”
32 Sir ror tomwat yatkar du a nbal ma rukun a rfen sir numur Yesus. 33 Rait ain ma ngarany Ulwar e, rsangwalu Yesus numur tomwat yatkar du a ne, sa namin Yesus balisya fian ma sa namin balisya bayal. 34 * Ne Yesus nsampayang, “O Amo. Mlwure sir! Koli to rafai safe ma sir rose.”
Ne tentara Romar a ne rose onde ma rasaman Yesus Ni rabit melawas. 35 Tomwat ngayadin ramdir iane ma rsalan safe ma rose ne, nempa mangfaret Yahudyar rarikan Yesus ma rfalak, “I nfair tomwat walyetar lo; mpa farlan botuan feti I ye Rai Mangtebus ma Ratu nfil I e, no tsalan feti bise ma nfair a nbali I nre tate!”
36 Suldadwar rasalik I. Ma ral anggur manilu ber I 37 ma rfalak, “Farlan Yahudyar nir Rai Ko e, mfwair a mbwali Ko!”
38 Na Yesus Ni katutun sangwalu unruny e, rarengi feti: “‘I ye Yahudyar nir Rai.’”
39 Tomwat yatkar sa ma rsangwalu i a ne nafbwere Yesus. Ma nfalak, “Rai Mangtebus Ko ye nre? Mpa mfwair Ko numur kam a nbal!”
40 Nempa tomwat yatkar sa nbal ne ntampu i ma nfalak, “Ali to mumtaut Ratu e? Sir rtetak mamate ber ko farlan I a nbal. 41 Botuan feti tadu e rukun kit a rlarat ninr salar. Nempa I ye to Ni sal sasaf!” 42 Betno nfalak a nbal, “Yesus, farlan mweluk Rai ma mfwarete na Nim ain farete e, ka kete mumlufe yakw!”
43 Ne Yesus nfalak, “Ni botuan e na lere ye nbal ko mor Yakw na Firdaus dalam.”
Yesus nmat
44 Noak a ne lere nfat langit lo, nempa nuse ni kateman makrokap resi titerik jam tiga, fali lere to idak. 45 * Ma maloly melabar ma ntikloi neluk sasake na Ratu Ni Das Silai dalam, ne ntarbis a nmpan du.
Maloly melabar na Ratu Ni Das Silai dalam ne ntarbis a nmpan du (23:45)
47 Noak ma suldadwar nir ulun nsalan farane, ndangin Ratu. Ma nfalak, “Botuan, I ye tomwat ngamone!”
48 Tomwat ngayadin rafburat sir na ain a ne, sir rsalan ngrie ne ma rbali sir e rsok mpumprir fali rasesal sir. 49 * Ma Yesus tbwarnir monuk, numur batar ma rlarat I rof Galilea, ramdir motak dodo ma rsalan monuk ngrie ne.
Tomwatar rafonak Yesus
50-51 Ne tomwat sa ngarany Yusuf, nof kote Arimatea na nus Yudea. I ye tomwat ngamonar sa ma namlonry, ma ndaf dedesar tewat ma Ratu nfarete neluk Rai. Boloka Mangtetak Agamar sa i, nempa to nyoding mangtetkar nir tetetak ne. 52 I nti ntak Pilatus ma nal Yesus tenany. 53 Ne nti ntolar Yesus tenany nof katutun sangwalu, betno nal maloly buri ngafele la nbebe I. Nof a ne nti nfele Yesus na bange. Bange ne rkaly e lo nempa to rnau mangmwat a na fuky. 54 Lere ne ler Jumat; lere ma Yahudyar rasusan sir fali ketla nait nir ler sanari.
55 Batar ma raktem Yesus rma rof Galilea ne rlarat Yusuf ma rsalan kubur a ne. Ma rsalan a nbal feti rfele Yesus farpe na kubur dalam. 56 * Ne rbali sir ma rasusan ngul angat ngafelar ma ryefar Yesus tenany.
Mpene na ler sanari e, rsanari sir rlarat faret agame.