Tomwat Yahudyar nir Mangsomp ulnir rfat ma lese ma rfen Yesus
1 * Tomwat Yahudyar nir ler silai roti ma to ragi sesedin lo. Ler silai ne sir rfalak feti Paskah.a 2 Tomwat Yahudyar nir mangsomp ulnir ma mangaftutu Musa ni faretar reng ma rfen ramudim Yesus, fali ramtaut tomwat ngayadin ma rlarat Yesus ne.
Yudas nfenri Yesus
3 Ne smwangat yatkar nir ulun nsung Yudas ma rtar i feti Iskariot, i ye tomwatar sa nof Yesus Ni manglarat buti resiny du a ne. 4 I nti nakmat mangsompar ulnir ma mangajak ulnir na Ratu Ni Das Silai ma raale andaun feti felan farpe ma keta nor Yesus ber sir. 5 Mpa rsenang resi ma ryoding feti keta ral doit ber i. 6 Yudas nyoding a nbal ne nanriak lety ngamonar sa ma nor Yesus ber sir, nempa nose ma tomwat ngayadin kete rafai.
Yesus Ni manglartar rasusan tnyame na tomwat Yahudyar nir ler Paskah
7 Nait ni tewat lo ma ler silai roti ma to ragi na lere ne tomwatar ka rfen domba ma rane na ler silai Paskah. 8 Ne Yesus nfalak ber Petrus ma Yohanes, “Mtyi misusan tnyam Paskah ber kit.”
9 Mpa renrat, “Amangw, mpweang ma kam masusan tnyame na mpe?”
10 Yesus nfalak, “Nait ma mtyi kote dalam e, keta mtyungan merwan sa ma nabare weye na ngusi. Mlyarat i far das ma nsung a ne, 11 ma mfyalak ber das nruany a ne feti, ‘Tuangguru nenrat feti, ain mpeye ma keta I nor Ni manglartar a rane tnyam Paskah?’ 12 La das nruany ne nfatutu kamar silayar sa na loteng ber a kmi, ma kabanir monuk ramin lo. Mpa misusan monuk na iane.”
13 Ne Petrus ma Yohanes rti e, rtungan safe far ma Yesus a nfalak a ne. Mpa rasusan tnyam Paskah ne.
Yesus nor Ni manglartar rane tnyam Paskah
14 Nait ma Yesus nor Ni mangsidkwar ramtoran ma rane tnyam Paskah e, 15 I nfalak ber sir, “To dodo a nbal e Yak ktwungan maberat a leman yadin, mpa lere ye kmpweang desar ma kune tnyam Paskah ye kor a kmi! 16 Mpa, mdyengar fengamone: Keta to kune tnyam Paskah ye lo terik ma kufdiat tnyam faburat ye noak ma Ratu nfarete neluk Rai na saryamprene.”
17 Mpene Yesus nal anggur na kompi, ma nloik ber Ratu, betno nfalak, “Myal anggur ye, ma myenum mpane. 18 Yak kfwalak ber a kmi: Lama Paskah ye omp e to kenum anggur lo titerik ma Ratu nfarete neluk Rai na saryamprene.”
19 Lama renum monuk anggur e Yesus nal roti ma nloik ber Ratu, betno napuse ma nsaman ber sir. Ne nfalak, “Roti ma kal ber a kmi ye, iane Yak tenangw. Mpa myose farye nema minremi Yakw dedesar.” 20 * Lama rtame monuk, nose nbal far dine ne, I nal kompi ma anggur namin a ne ma nanrenre ber sir betno nfalak, “Anggur ye Yakw darangw ma ntarbui ber a kmi noak ma kmwat, iane neluk Ratu Ni yoyoding beberi ber tomwatar.
21 * Nempa kfwalak ber a kmi: tomwate ma keta nfenri Yakw, lere ye namtoran ma ntame nor Yakw! 22 Yakw, Tomwate Anaky keta kmwat farlan ma Ratu ntetak lo, nempa suse maberat desar ber tomwate ma nfenri Yakw!”
23 Lama rdengar farane raenrat sir feti ise ma keta nose farane.
Yesus Ni manglartar rabangal feti ise ma silai i
24 * Mpene Yesus Ni manglartar rabangal feti ise ma silai i a nlengan nof sir monuk. 25 * Mpa Yesus nfalak ber sir, “Rayar nof nusar ma to ramtaut Ratu rtean nir tomwatar rlarat nir suke, betno rfalak feti ‘Kam ye ma majake mamy tomwatar.’ 26 * Nempa kmi kete myose farane. Ise ma silai i nlengan nof a kmi, ka ntomu i, ise ma neluk ulun ka nose felan farlan mangkaryae. 27 * Nof a kmi e ise ma silai i: tomwate ma namtoran ma ntame, nre tomwate ma nlangun? Botuan feti tomwate ma namtoran ma ntame ne nre! Nempa kit ma tamin ye Yak ma klwangun a kmi.
28 Noak ma kwoman susar monuk, kmi ye ma myor Yakw dedesar. 29 Mpa keta kal kuase ber a kmi ma mfyarete farlan ma Amangw nal ber yakw. 30 * Noak ma kweluk Rai, keta mimtoran ma mtyame na Ningw ain farete. Betno kal kuase ber a kmi nema mimtoran na rai ni kadere, la mfyarete suku buti resiny du a na Israel.”
Petrus keta namsoal Yesus
31 Yesus nfalak ber Simon Petrus, “Simon, Simon, mdwengar fengamone! Ratu ninrang smwangat yatkar nir ulun lo ma nateman kmi monuk; mpa keta nateman a kmi nlie nlengan desar farlan tomwatar ma rsile gandum. 32 Nempa kswampayang ber ko lo, nema nim anlele namkoran. Ma farlan mbwali ko ber Yakw lo e, ka mufkoran a nbal soranyar nir anlelar.”
33 Petrus nbali, “Tuhan, yak kmpweang desar ma klwarat Ko boloka ktwi sel dalam ma kmwat kor Ko!”
34 Nempa Yesus a nfalak, “Petrus, ka munremi! Nronram ye sife to nkikyeu fuky e, keta mumsoal Yakw lain tel.”
Yesus nafkoran Ni Manglartar
35 * Mpene Yesus nfalak ber sir, “Noak ma kswiduk a kmi ma mtyi e to myonry doit, lufu ma sabatwemar nre! Ma kabanir ma ramin a kmi a ne dengan nre tate?”
Sir rfalak, “Dengan lo.”
36 Yesus nfalak ber sir, “Nempa lere ye, ise ma ni doit nre lufu ka nonry; ma ise ma to ni smade, ka nfenri ni rabit melawas la nselir smade. 37 * Yak kfwalak farane ber a kmi, fali ka kufdiat tnyai ma rarengi na Kitap Lelerap dalam feti,
‘Keta rose I farlan tomwat yatkar.’
Safe ma rarengi na Kitap Lelerap dalam na Yakw ne lere ye rafdiat.
38 Ni manglartar a rfalak, “Tuhan, mswalan smadar du ye.”
Ne Yesus nfalak, “Dengan lo!”
Yesus nti nsampayang na lenran Zaitun
39 Ne Yesus nti a ntate kote ma nti lenran Zaitun farlan biase, ne Ni manglartar rlarat I a nbal. 40 Lama rait ain a ne, nfalak ber sir, “Ka msyampayang, nema nait ma smwangat yatkar nir ulun nateman a kmi kete myose sale.”
41 Ne Yesus nkatar I nof sir fafa meter buty tel,b betno nsangitil ma nsampayang, 42 “O Amo, farlan Ko mpweang e, mwal suse ye mof Yakw lo. Nempa ka kete mose mlwarat Yakw ningw mpempeang, ma mose mlwarat Ko nim mpempeang.” 43 [Ne malaektar sa nof surga nma nakmat Yesus ma nafkoran I. 44 Yesus ntafal ma nsampayang fali dalam suse desar. Ni yatin farlan dar batnir ma ntur far ompak.]
45 Lama Yesus nsampayang monuk e, nbali I far Ni manglartar. Nempa nait ma nsalan e rarwa lo fali dalmir suse resi. 46 Ne nfalak ber sir, “Safe ma mirwa? Mpyote kmi ma msyampayang nema nait ma smwangat yatkar nir ulun nateman a kmi e kete myose sale.”
Romat Yesus
47 Noak Yesus natanuk, metryat e Yudas nor tomwatar yadin a rma. Yudas ye Yesus Ni manglartar sa ma nrure tomwatar ne. I nti nlosir Yesus betno nbon I. 48 Nempa Yesus nfalak ber i, “Yudas, mpe nim bobone ye la mfwenri Yakw, Tomwate Anaky e?”
49 Yesus Ni manglartar rsalan farane rfalak, “Tuhan, tal smade ye la tpet sir lo!” 50 Ne Ni manglartar sa nlesy smade la npet mangsomp silai ni karwar sa, tlingan fian ma namosit.
51 Nempa Yesus a nfalak, “Dengan lo!” Ne Yesus nomat tomwate ne tlingan ma nafngamone i.
52 Mpene Yesus nfalak ber mangsomp ulnir ma mangajak ulnir na Ratu Ni Das Silai ne, numur Yahudyar nir mangfaretar a nbal ma rti romat I a ne, “Kmi mifliak feti Yakw ye tomwat yatak, mpa myonry smadar ma ebnar la myomat Yakw e? 53 * Lerar monuk kor a kmi na Ratu Ni Das Silai e to myomat Yakw. Ma makrokap a betno myomat Yakw fali lere ye ni tewat lo ma smwangat yatkar nir ulun nfarete.”
Petrus namsoal Yesus
54 Mpene sir romat Yesus ma ror I far mangsomp silai ni das. Ma Petrus nlarat motak nof dodo. 55 Na das a ne ni latyompur twalelean e tomwatar rasuni au ma raflaran, mpa Petrus nti naflaran nor sir. 56 Bat karwar sa nsalan Petrus namtoran ma naflaran au ne. Ne nfon dedesar Petrus, ma nfalak, “Tomwate ye dine raktem Yesus a nbal!”
57 Nempa Petrus nulak ma nfalak, “Batmaken, yakw to kufai Tomwate ne desar!”
58 To dodo a nbal e, tomwatar sa nsalan Petrus ma nfalak, “Ko ye Ni manglartar sa ko a nbal nre!”
Nempa Petrus nfalak, “Tate!”
59 Ketla nlanre jam lese, tomwatar sa nbal nfalak, “Botuan nre tomwate ye Yesus Ni manglarat, fali tomwat Galilea i a nbal!”
60 Nempa Petrus a nfalak, “Yakw to kufai feti ko mfwalak safe ye!”
Nait ma Petrus lolone natanuk e, sife nkikyeu. 61 Yesus nmange I ma nfon Petrus. Mpe Petrus nanremi safe ma Yesus nfalak ber i a ne feti, “Keta sife to nkikyeu fuky e, ko mumsoal Yakw lain tel lo.” 62 Mpa Petrus nbie nof ain a ne ma ntasing ma nasmetur.
Tomwatar rkosy Yesus ma rbabal I
63 Tomwatar ma rajake Yesus ne, rkosy a rmalip ma rbabal I. 64 Ral maloli la repat souny betno renrat, “He nabi! No mbwetw feti ise ma ntutw Ko ye?” 65 Betno rtafal ma rarikan ma rafmweat I a nbal.
Rsidang Yesus
66 Ni bobolisin e, mangfaret Yahudyar, mangsompar ulnir, ma mangaftutu Musa ni faretar rabut sir, ma ror Yesus far nir Mangtetak Agame. 67 Sir rfalak ber Yesus, “No mfwalak ber kam, botuan feti Ko ye Rai Mangtebus e?”
Ne Yesus nbali, “Boloka kfwalak ber a kmi, keta to myoding Yakw. 68 Ma farlan kwenrat a kmi e, keta to mbyali Yakw. 69 Nempa to dodo a nbal e Yakw, Tomwate Anaky kumtoran Ratu Mangkuase seriny fian.”c
70 Sir monuk a rfalak, “Farane ye, Ko ye Ratu Anaky e?”
Yesus nfalak, “Koko kmi ma mfyalak.”
71 Ne sir rfalak, “Kit tdengar monuk safe ma koko I a nfalak lo, mpa to tanriak mangtungan lo!”