<<    <     Lukas     21     >    >> 
Snyompe nof bat some ma nawatan
1 Noak ma Yesus namin Ratu Ni Das Silai dalam, nsalan mangoskayar ma rnau nir dotyar na babatak snyompe dalam. 2 I nsalan a nbal bat somar sa ma nawatan, nau ni doit gobngar dua na babatak snyompe ne dalam.
Bat some ma nawatan nau ni gobngar du (21:2)
3 Ne Yesus a nfalak, “Mdyengar fengamone: bat some ma nawatan ye nau doit yadin a nlengan nof tomwatar monuk a ne.4 Fali mangoskayar a ne ral nir dotyar rof nir kabanir ma nres a ne. Nempa bat some ma nawatan ye, nal monuk ni dotyar la nmorip a ne.”
Yesus nfalak feti Ratu Ni Das Silai keta namsos
5 Noak a ne tomwatar ketnir a rfalak feti Ratu Ni Das Silai ne nangafel resi, fali rafyamping ror baty ngafelar numur kabanir ma rloik ber Ratu. Ne Yesus a nfalak ber sir,
Ratu Ni Das Silai: A) Das dalam B) Latyompur (21:5)
6 “Keta nait ni tewat e, safe-safe monuk ma msyalan ye keta tomwatar rsose monuk; ma to bati fen lese nbal ma namtoran ain!”
Lere ma keta tomwatar rkoman suse
7 Mpene sir renrat Yesus, “Tuangguru bengfir a betno kit tsalan safe ma mfwalak a ne? Ma farlan nbotin e ni faniak farpe?”
8 Ne Yesus a nfalak, “Ka mijak fengamone, nema tomwatar kete rfule kmi. Fali keta yadin a rma ma rfalak feti sir ye Rai Mangtebus. Ma rfalak a nbal feti, ‘saryamprene sesedin ma namsos lo.’ Nempa ka kete milele sir. 9 Farlan mdyengar ibar feti tomwatar ramdiri yayat nre kafreye ka kete mimtaut. Botuan feti keta safe-safe monuk a ne rbotin. Nempa to ni tewat ma saryamprene namsos a fuky.”
10 Ne Yesus nfalak naloran, “Keta yamprenar raale sir ma rayar raale sir a nbal. 11 Keta ruku silai desar ma lafar silai numur maninik anraul nsorw mpenempen. Keta msyalan faniak yatkar ma rbotin na langit, rose ma mimtaut. 12 Keta tomwatar rose kmi farye fuky: Romat ma rsiksa kmi, rsidang a kmi a na das sampangar ma ror a kmi far sel dalam. Keta rakei kmi ber rayar ma mangfaret silayar fali mlyarat Yakw. 13 Iane lety ber a kmi ma mifwibar Ibar Ngamone ber sir. 14 * Mpa ka mimkoran ma kete dalmir suse ma mbyali nir ansoyar ber a kmi a ne. 15 La kal ngribatin anfayar ber a kmi, nema mir kanrar a ne to fen lese nbangal nal mir tnyangkwar a ne. 16 Keta enmir amir, urmir wamir, mir dasdalmir ma tbwarmir rfenri kmi. Ma keta rfen tomwatar ketnir rof a kmi. 17 Keta tomwatar monuk to rmpeang a kmi fali mlyarat Yakw. 18 Nempa keta to sasaf diat a kmi ma to buke fen lese nbal ma ntarpal nof ulmir. 19 Mpa farlan mir anlele namkoran ma mlyarat Yakw dedesar, keta kmi myonri momorip dedesar.”
Kote Yerusalem keta namsos
20 Yesus a nfalak, “Farlan msyalan suldadwar rbebar kote Yerusalem, keta mifai feti to dodo a nbal e kote ne namsos. 21 Na lere ne tomwatar ma ramin provinsi Yudea ka rafla far buburir. Tomwatar ma ramin kote dalam ka rafla far burit, ma tomwatar ma ramin kote burit ka kete rbali sir far dalam. 22 * Fali lere ne ni tewat ma Ratu nukun tomwatar ye, iane la nafdiat safe ma rarengi na kitap dalmir. 23 Na lere ne batar ma rlenr, nre rasusw keta rkoman suse silai! Fali sir to rafla ral. Fali na lere ne keta Ratu nukun nuse ye nwayat ma tomwatar ma ramin kote ye rkoman suse silai desar. 24 Keta ral smade la rfen ketnir ma keta ror ketnir far nus walyetar ma rmpan kawar; keta tomwatar ma to Yahudi sir, rma ratai kote Yerusalem ye nti nait ngongolin ma Ratu ntetak ber sir a ne.”
Yesus nfalak a nbal na Ni mamae
25 * Yesus nfalak a nbal, “Keta tomwatar rsalan fanikar na bulan, ftunar ma lere. Tomwatar monuk na saryamprene keta ramtaut ma to rafai anir fali rdengar uman ma rsalan lalawar ma ner silayar rafefar na dol. 26 Keta ramtaut ma rmat desar fali rsalan safe ma keta nbotin na saryamprene ye, mla kabanir monuk na langit a ne ranryorun. 27 * Noak a ne tomwatar keta rsalan Yakw, Tomwate Anaky kof mutan das a kmwa kor snyaingw ngaidak ma kuase. 28 Noak ma msyalan kabanir monuk a ne rbotin lo e, ka milele ma miftesi dalmir fali sesedin ma Ratu nfair a kmi lo.”
Tnyanuk pupule na katutun ara
29 Ne Yesus nal tnyanuk pupule ber sir farye, “No msyalan katutun ara ma katutun walyetar. 30 Farlan ratrisan lo e, iane mifai feti ler metyefu sesedin lo. 31 Feleles a nbal farlan ma msyalan fanikar a ne, iane sesedin ma Ratu nfarete neluk Rai lo.
32 Yak kfwalak ber a kmi: Tomwatar na are ye keta to rmat a fuky terik ma rsalan kabanir monuk ma kfwalak a ne. 33 Langit numur saryamprene keta rlie, nempa Ningw ngribatnir rmon titerik ma dedesar.”
Mijake kmi fengamone ma msyampayang
34 Yesus a nfalak, “Mijake kmi fengamone, kete mdyaun lan festayar, anabuk, nre mir momorip lerar, nema ni lere ma kmwa e kete myetrat. 35 Fali Ningw mamae ye keta nfetryat tomwatar monuk farlan kekete ntey babyar. 36 Mijake kmi fengamone, ma msyampayang dedesar nema mimkoran ma bomir myal kabanir monuk ma keta rbotin a ne, terik ma mitungan myor Yakw, Tomwate Anaky noak ma kmwa ma kukun tomwatar na saryamprene.”
37 * Lerar monuk e Yesus nti naftutu na Ratu Ni Das Silai, ma nronmar e nbali I far lenran Zaitun ma narwa i a no. 38 Bobolisnir monuk e tomwatar yadin rti Ratu Ni Das Silai ma rdengar Yesus naftutu sir.