<<    <     Lukas     20     >    >> 
Ngengenrat na Yesus Ni kuase
1 Na ler sa e, Yesus naftutu mla nafwibar Ibar Ngamone ber tomwat ngayadin na Ratu Ni Das Silai. Ne mangsomp ulnir, ma mangaftutu Musa ni faretar, raktem mangfaret Yahudyar rti ain a ne, 2 ma rfalak ber Yesus, “No mfwalak ber kam Ko nim kuase safe la mose kabanir monuk ye? Ma ise nal kuase ne ber Ko?”
3 Ne Yesus a nfalak, “Mpe kwenrat kmi. 4 Ise nal kuase ber Yohanes la nadiris tomwatar? Ratu nre tomwate?”
5 Mpe rafalak ber sir, “Farlan kit tfalak feti, ‘nal Ratu Ni kuase e,’ keta nfalak, ‘Farane e, safema kmi to milele i?’ 6 Nempa farlan kit tfalak feti, ‘nal tomwate ni kuase,’ keta tomwatar monuk rakjai kit ror batyar, fali sir ralele feti Yohanes ye nabyar sa i.” 7 Mpa rfalak, “Kam to mafai feti ise ma nal kuase ber Yohanes ma nadiris tomwatar.”
8 Mpene Yesus nfalak ber sir, “Farane e to kfwalak ber a kmi a nbal feti ise nal kuase la kose kabanir monuk ye.”
Tnyanuk pupule na tomwatar ma rkarya na let anggur
9 * Ne Yesus nasaur tnyanuk pupule ye ber tomwat ngayadin a ne, “Ler sa e tomwatar sa ntanam anggur na ni lete. Betno nal ber tomwatar ma rsewe ma nti nus walyete ma namin a no far dodo.a
Anggur Lete (20:9)
10 Nait ni tewat ma rtikar anggur bunir e, lete nruany ne nluan ni mangkaryayar sa ma nti nakmat tomwatar ma rsewe ni lete ne nema ral ni wayat. Nempa tomwatar a ne rbabal i betno rluan ma nbali i ma to nonry sasaf.11 Ne nluan ni mangkaryayar sa nbal; nempa tomwatar ne rbabal ma rarikan i betno rluan ma nbali i ma to nonry sasaf.12 Ne nluan ni mangkaryayar sa nbal ma fen ratel. Nempa rbabal i a nbal terik ma namngal, betno ryebas i far kakyelap.
13 Ne lete nruany ne ndaun feti, ‘Keta kose farpe nbal? ni ngafele e klwuan motak anakw ma kwamis resi i ye. Nema bise ralang i!’
14 Nempa noak ma rsalan anaky ne, rafalak ber sir feti, ‘I ye ma keta nonri monuk let anggur ye. Mpa tfen i, nema tonri monuk lete ye.’ 15 Mpe romat ma rakei i far kakyelap betno rfen i.”
Ne Yesus nenrat tomwat ngayadin a ne, “Keta lete nruany ne nbali i e, nose farpe tomwatar a ne? 16 Botuan feti keta nma e nfen sir, betno nal lete ne ber tomwat walyetar.”
Tomwatar rkaul ral Yesus Ni ansaur ne mpa rfalak ber I, “Ka kete desar!”
17 * Nempa Yesus nfon dedesar sir ma nfalak, “Ngripupular farye ka rbotin fali na Kitap Lelerap dalam ni tnyai nfalak farye:
‘Bati ma tuknar a ryebas i,
lere ye neluk baty fakoran la nafkoran das,’
Mpa tnyai ye isiny farpe? 18 Ise ma ntutuk i a na bati ne keta namngal; ma farlan bati ne ntait i keta napris.”
Yesus naftutu na ma rbayar ulnirbatin
19 Mangaftutu Musa ni faretar mla mangsompar ulnir rafai feti Yesus nasaur tnyanuk pupule ne snyain sir. Mpa rose ma romat I lere ne nbal, nempa ramtaut tomwat ngayadin. 20 Mpa ranaumat desar Yesus. Sir rsewe tomwatar ma rose felnir farlan tomwat malonryar, ma rateman I ror ngengentar, nema natanuk sale e bise ma romat I ma ror I ber mangkuase Roma. 21 Mpe tomwatar ma rsewe sir a ne rfalak ber Yesus, “Tuangguru, kam mafai feti safe-safe monuk ma mfwalak ma muftutu ne botuan. Ma muftutu Ratu Ni mpempeang to musalan sou, fali mfwalak lan kabain malonryar mlwarat Ratu Ni mpempeang. 22 Mpa no mfwalak ber kam, nof kit ninr agame ni yayatrwar e, bise ma tbayar ulwbatyar ber Kaisarb nre tate?”
23 Nempa Yesus nafai nir andaun yatkar a ne. Mpa nfalak ber sir, 24 “No myal doit perkar sa ma kswalan. Ise walun ma ngarany na doit a ne?”
Ne rfalak “Kaisar!”
Doit gobang na are ne (20:24)
25 Mpa Yesus nfalak ber sir, “Farane e, safe ma Kaisar nie myal ber Kaisar, ma safe ma Ratu nie myal ber Ratu.”
26 Sir rampriang safe ma Yesus a nfalak a ne. Ma to rbae Yesus Ni sale fen lese nbal. Iane nwayat ma to ain ma romat Yesus na tomwat ngayadin sonir lury, mpa ramlin motak.
Yesus naftutu na mangmwate nmorip a nbali
27 * Tomwatar ketnir rof faburat Saduki rma rakmat Yesus. (Sir ye ma to ralele feti mangmwatar bise ma rmorip a rbali.) Mpa renrat Yesus, 28 * “Tuangguru, Musa narengi tetetkar ye ber kit lo feti: farlan merwanar sa nmat ma to anaky, ka merwane ne wainy nafsau nor sawany a ne nema nal anaky ber wainy mangmwate ne. 29 Nangin sa e farye: Tomwatar itw ye awayar sir. Keyai nafsau nor batar sa, ne to memey a fuky e merwane nmat lo. 30 Ne bate ne nafsau nor merwan metwale to memey a fuky e merwane ne nmat a nbal. 31 Bate ne nafsau nor merwan metwale nbal terik ma nafsawe raitw a ne, nempa rmat monuk ma to nir memey. 32 Famudi e bate ne nmat a nbal. 33 Nait ma Ratu nafmorip a nbali mangmwatar e, keta ise sawan botuan ber bate ne? Fali raitw a ne rafsaw ror i.”
34 Ne Yesus nfalak, “Tomwatar ma rmorip a na saryamprene e rafasawe sir. 35 Nempa tomwatar ma Ratu nfil sir ma rmorip a rbali rof mamate, ma rmorip na are ma nma ye, keta to rafasawe sir. 36 Ma keta to rmat fali nir momorip farlan malaektar. Sir reluk Ratu angkir lo, fali Ratu nafmorip a nbali sir. 37 * Musa koko i a nfalak lo feti keta mangmwatar a rmorip a rbali. Fali ni rerengi na skiki-kakari ma nfolur ne, nfatyot feti ‘Tuhan ye Ratu ber Abraham, Ishak ma Yakub.’
Musa nsalan skiki kakari ma nfolur (20:37)
38 Iane feti na Ratu souny lury tomwatar monuk a rmorip! Fali lan mangmorpyar ma rsompe ber I nempa mangmwatar e tate.”
39 Rdengar farane, mangaftutu Musa ni faretar ketnir a rfalak, “Tuangguru safe ma mfwalak ne diat desar.” 40 Ntabw nof lere ne rsare ma raenrat sasaf rof Yesus lo.
Rai Mangtebus ye rai Daud ni dasdalam ma ni Tuhan a nbal
41 Mpene Yesus nenrat sir, “Safema tomwatar rfalak feti Rai Mangtebus ye Daud ni dasdalam? 42 * Safo Daud koko i narengi na kitap Mazmur dalam feti,
‘Ratu nfalak ber ningw Tuhan:
Mumtoran na seringw fian ye,c
43 titerik ma kose Nim kanrar ma ryouk ber Ko.’
44 Mpa farlan Daud nfalak feti ni Tuhan ber Rai Mangtebus, nof mpe ma rfalak feti Rai Mangtebus ye nof dasdalam Daud?
Ka kete mlyarat mangaftutu Musa ni faretar nir langtwar
45 Noak ma tomwat ngayadin lolone rdengar Yesus natanuk e, nfalak ber Ni manglartar, 46 * “Ka mijake kmi. Kete miwese mangaftutu Musa ni faretar. Sir rmpan e rmpeang ma rfonak rabit melaswar, ma rmpeang ma tomwatar ralang sir a na nus ngayadin. Farlan rti das sampayang nre festayar e rmpeang lan ma ramtoran lury. 47 Sir rlepusuk bat somar ma ral nir dase babe. Ma rsampayang e dodo rut la rteri nir adat yatkar, keta Ratu nukun sir nlie ma nlengan!”