Zakheus nlangun Yesus
1 Lama Yesus nait kote Yerikho, I nmpan naloran ma nalyole kote ne. 2 Na kote ne tomwat sa ma naoskai, ngarany Zakheus, ma neluk ulun ber mangtak ulbatyar. 3 I nmpeang ma nsalan feti Yesus felan farpe, nempa tomwatar yadin mpa to nkeban Yesus, fali ngotu i. 4 Mpa nafla nbalun nof tomwat ngayadin, ne nkafar katutun ara na dalamtene seriny nema bise ma nsalan Yesus ma keta nlanre nof a ne. 5 Noak ma Yesus nait katutun ne sepan, i nsalan far das ma nfalak, “Zakheus, musnyalik ma mtwompur! Fali lere ye ktwi nim das.”
6 Zakheus dalamy nsenang resi, ne ntompur nasnyalik ma nlangun Yesus. 7 Nempa tomwatar monuk ma rsalan a ne nroke-nraki sir ma rfalak, “No! I nti nol motak tomwat sale ne!”
8 Mpene Zakheus namdir Yesus souny lury ma nfalak, “Tuhan, ntabw nof lere ye keta kal a kfwardue ningw kabanir ber tomwatar ma rawatan. Ma sir ma ktwak a klengan, ma rbayar ulnir batin ber yakw ne keta kal a kbwali fen lain fat ber sir!”
9 Ne Yesus a nfalak ber i, “Ntabw nof lere ye Ratu nfair ko mor nim dasdalam, fali ko a nbal mof dasdalam Abraham.a 10 Yakw, Tomwate Anaky kmwa ma kunriak mla kfwair tomwatar ma rlai.”
Tnyanuk Pupule na doit mase
11 Noak ma Yesus ketla sesedin kote Yerusalem, tomwatar rafliak feti I ntabw ma nfarete neluk rai na saryamprene. Ne Yesus naloran Ni tnyangkwar ma nasaur tnyanuk pupular sa ber sir farye, 12 “Na ler sa e, tomwat mel sa nose ma nti yampren dodoe ma rfair i neluk rai, betno nbali i. 13 To nti a fuky e, ntar ni mangkaryae buti, ma nasaman doit masar leles mpane ber sir ma nfalak, ‘Dotyar ye la msyelir kabanir ma mfyenri titerik ma kbwali yakw.’ 14 Nempa tomwatar ketnir na ni pnue ne rkedan i. Mpa, rsiduk tomwatar ma rti rfalak ber tomwatar ma keta rfair i a ne feti, ‘Kam to mpeang tomwate ne ma nose rai ber kam.’
15 Lama rfair tomwat mele ne ma neluk rai e, nbali i far ni pnue. Ne nluan tomwatar ma rtar ni mangkaryayar ma nasaman dotyar ber sir a ne, nema nenrat feti dotyar a ne raosanak e slyain fir lo. 16 Mangkarya baluan nma ma nfalak, ‘Maken, doit mase lese ma mwal ber yakw ne, naosanak terik buti lo.’ 17 Ne rai ne nfalak ber tomwate ne, ‘Nangafel desar, ko ye mangkarya ngamone. Kabain angkir motak e bise kulele ko, mpa keta ko mkuase kote buti.’
18 Ne mangkarya sa nma ma nfalak a nbal, ‘Maken, doit mase lese ma mwal ber yakw ne, naosanak terik lim lo.’ 19 Ne rai ne nfalak ber i, ‘keta ko mkuase kotar lim.’
20 Mangkaryayar sa nbal nma nfalak, ‘Maken, nim doit ye; yak kal lenso la kpwule ma knwau. 21 Yak kumtaut ko maken, fali mures rutw. Ko mwal safe ma to ko nime, ma mwal isnir mof ain ma to mtwanam.’ 22 Ne rai ne nfalak ber tomwate ne, ‘He mangkaryae yatak e ko! La kukun ko klwarat nim tnyangkwar a ne. Mufai lo feti kures rutw: kal safe ma to yakw ningw ma kal isnir kof anir ma to ktwanam. 23 Safema to mnwau doit ne na bank nema kbwali yakw farye e keta kal numur ma naosanak a ne!’
24 Mpene rai ne nfalak ber tomwatar ma ramdir a ne feti, ‘Myal doit ne myof i ma myal ber mangkaryae ma ni doit mase buti ne.’ 25 Nempa tomwatar ne rfalak feti, ‘Maken, ni doit mase buti lo.’ 26 * Ne rai ne nfalak, ‘Ka minremi: ise ma ralele i a na kabanir sa, keta ral a rtafal ber i. Nempa ise ma to ralele i a na kabanir ma ral ber i a ne, keta ral a rbali monuk rof i. 27 Ma lere ye mtyi mifburat monuk tomwatar ma to rmpeang ma kweluk rai ber sir a ne. Myor sir a mya ye ma mfyen sir a na soungw lury!’”
Tomwat ngayadin rdangin Yesus noak ma nti Yerusalem
28 Lama Yesus nasaur monuk tnyanuk pupule ne nmpan a nbalun nof sir ma rti kote Yerusalem. 29 Ketla sesedin pnu Betfage ma pnu Betania na lenran Zaitun, Yesus nluan Ni manglartar du ma rbalun. 30 Ne nfalak ber sir, “Mtyi pnue luri no, keta myait e mkyeban keledai anak ma rkete i. Keledai ne to rfangat desar i a fuky. Mtyatar ma myor i a mya. 31 Farlan tomwatar renrat kmi feti, ‘Safema mtyatar keledai ne?’ Ka mfyalak, ‘Tuhanb nmpeang ma nfangat i.’”
32 Ne manglartar du a ne rti, ma rtungan safe-safe monuk far ma Yesus a nfalak a ne. 33 Noak ma rtatar keledai ne, nruany nenrat sir, “Safema mtyatar keledai ne?”
34 Ne rfalak, “Tuhan nmpeang ma nfangat i.” 35 Mpe ror keledai anak ne ber Yesus. Ne rnau nir rabit melawas la rafin feuny betno romat I ma nfangat. 36 Ne tomwatar rbelar nir rabit melaswar na dalamtene nema Yesus nlanre nof dasyar.
Tomwatar rbelar nir rabit ma Yesus nlanre (19:36)
37 Noak ma Yesus ketla nait Yerusalem, nrunrunrur lenran Zaitun, Ni manglartar monuk ma raktem a ne ma rdangin Ratu ma rose alang ber I. Sir rose farane fali rsalan monuk kabain mpasalnar ma Yesus nose ne lo. 38 * Ne rfalak ror lirnir mengarat,
“Mya ma tdangin Rai ma nma nal Tuhan ngarany!
Ma maline na surga dalam,
ma tafbwerat Ratu mangamin futu!”
39 Nempa tomwat Farisyar ketnir nof tomwat ngayadin ne rfalak ber Yesus, “Tuangguru, mtwampu Nim manglartar a ne.”
40 Ne Yesus nfalak ber sir, “Farlan ramlin e, keta batyar ye rafwayak ma rdangin Yakw.”
Yesus nsalan kote Yerusalem e ntasing
41 Noak ma Yesus sesedin kote Yerusalem e, nsalan kote ne, ma ntasing. 42 Ne nfalak, “Yore desar, farlan mifai feti safe ma nwayat ma kmi myonri maline lere ye! Nempa to mifai mpa to bise ma myonri maline ne. 43 Keta nait ni tewat e, mir kanrar rkolu kmi ma rose lalangnar rbebar mir kote; betno rsekan kmi rof susnir monuk.c 44 Keta rsose mir kote myor tomwatar monuk; ma to rinrang bati fen lese nbal ma nlatan batyar sa das. Kabanir monuk a ne keta rbotin fali to mfyaduli noak ma Ratu nma ma nfair a kmi!”
Yesus natian tomwatar ma rafenri kabain na Ratu Ni Das Silai
45 Mpe Yesus nti Ratu Ni Das Silai ni latyompur ma natian tomwatar monuk ma rafenri kabanir na iane. 46 * Ne nfalak ber sir, “Na Kitap Lelerap dalam rarengi farye: Yakw Ningw Das ye ain ma rsampayang; nempa kmi myose farlan mangamnange anir!”