Tnyanuk pupule na bat some mla mangtetak
1 Ler sa e Yesus nasaur tnyanuk pupular sa ber Ni manglartar mala naftutu ber sir feti ka dedesar ma sir sampayang ma kete raleti. 2 Yesus nfalak, “Na kot sa e mangtetak sa to nalang Ratu, ma to nfaduli tomwate fen lese. 3 Na kote ne nbal bat somar sa nti nakmat mangtetak ne dedesar ma ntak feti, ‘Amo, mtwulung yakw na ningw ngrie ye fuky fali to boang ma kbwangal ningw kanre. 4 Luryain e mangtetak ne to nfaduli desar nor bat some ne. Nempa famudi e nfalak na dalamy feti, ‘Boloka yakw to kwalang Ratu ma to kfwaduli tomwate fen lese, 5 nempa bat some ye dedesar nma nakmat yakw, mpa ni ngafele e ktwulung i a na ni ngrie ne. Nema, kete nma dedesar koli nose ma yakw sisrat.’” 6 Tuhan nfalak a nbal, “Mdyengar fengamone safe ma mangtetak to namlonry a ne nfalak! 7 Ni botuan e, Ratu la ntulung Ni tomwatar ma nfil sir a ne, ma lere nronram e rtak rtulung rof I dedesar. Ma keta I to ndaf dodo ma ntulung sir. 8 Yak kfwalak ber a kmi: Na lere ne nbal Ratu ntulung sir desar! Nempa noak ma Yakw, Tomwate Anaky kmwa kbwali saryamprene e, keta lolone ktwungan tomwatar ma ralele Yakw nbal nre tate?”
Ratu nlangun tomwatar ma to rafdas sir
9 Yesus nasaur tnyanuk pupule nbal ber tomwatar ma dalmir medase ma rdaun feti tomwat ditar sir, mpa rtayatak tomwat walyetar.a 10 Yesus nfalak farye, “Lain sa e tomwatar du rti rsampayang na Ratu Ni Das Silai. Tomwatar sa e nof Farisi, ma sa nbal e mangtak ulbati. 11 Tomwat Farisi ne namdir a nkese i ma nsampayang na dalamy farye, ‘O Ratu, yak kose alang ber Ko, fali yakw to far tomwatar monuk, ma ramnang, nir adat yatkar, nre ralalin. Ma kose alang a nbal fali yakw to kbwalak mangtak ulbati ne. 12 Yak kpwuase minggu dalam lain du, ma yak klwoik ber Ko sepersepuluh nof yakw ningw karya dalmir monuk.’ 13 Nempa mangtak ulbati ne namdir nof dodo motak ma to nfon desar far das. Mpene nasoke motak mpumpryanyar ma nfalak feti, ‘O Ratu Ko, mlwompang, tomwat sale yakw!’”b 14 * “Yak kfwalak ber a kmi, noak ma mangtak ulbati ne nbali i far ni das e, Ratu nlure ni salar lo nempa Ratu to nlure tomwat Farisi ne. Fali ise ma nafdas i la Ratu nafufu i; nempa tomwate ma ntomu i la Ratu nafdas i.”
Yesus nberkat kangkir
15 Tomwatar ror angkir ma lolone marumtar ber Yesus nema nasyol mla nberkat sir. Ni manglartar rsalan farane, sir rarese tomwatar ne. 16 Nempa Yesus ntar kangkir a ne ma nfalak ber Ni manglartar, “Msyalan lonri sir ma rakmat Yakw! Kete myose mtyeri sir, fali tomwatar ma farlan kangkir ye ma keta reluk Ratu Ni tomwatar noak ma Ratu nfarete saryamprene. 17 Yak kfwalak ber a kmi! Farlan kmi to milele Ratu far kangkir ye, keta to mimin Ratu Ni ain farete.”
Masumput desar ber mangoskai ma nti Ratu Ni ain farete
18 Mangfaret Yahudyar sa nenrat Yesus, “Amangw Tuanggurw ngamone ko, ka kose safe nema konri momorip dedesar?”
19 Ne Yesus nfalak, “Safema ko mfwalak feti kungamon?” To tomwate fen lese ma nangamon ma lan Ratu koko I. 20 * Ko mufai monuk Ratu Ni faretar lo: ‘Kete mulalin, kete mufen, kete mumnang, kete mlwepusuk, ma mwalang anoi amoi.’”c
21 Tomwate ne nfalak, “Nof ningw tabweri e Yak kose monuk faretar ne lo.
22 Yesus ndengar farane, nfalak ber i, “Bait sa nbal ma ka mose: Mfwenri monuk nim kabanir, betno mswaman dotyar a ne ber tomwatar ma rawatan, nema monri kabanir na surga. Mose farane betno mlwarat Yakw.” 23 Lama i ndengar ma Yesus nfalak farane, dalamy suse fali naoskai resi.
24 Yesus nafai feti dalamy suse resi, mpa nfalak, “Masumput desar ber mangoskai ma nti Ratu Ni ain farete! 25 Merawe desar ma unta lese nsung nof jarum matan, nlengan nof mangoskai ma nti Ratu Ni ain farete.”
26 Tomwatar rdengar ma Yesus nfalak farane sir rfalak, “Farlan farane e ise ma keta Ratu nfair i?”
27 Yesus nfalak, “Safe ma tomwatar to bonir ral, keta Ratu boan nal. Ratu bise ma nfair ise motak!”
28 Petrus nfalak, “No mswalan! Kam mnau kalin kam mamy kabanir monuk lo ma mlarat Ko.”
29 Ne Yesus nfalak ber sir, “Ise ma nau kalin ni das, nre sawany, uran wainy, enany amany, nre angkir, fali nlangun Ratu, 30 na are ye, keta Ratu nal sewe yadin nlengan desar ber i ma keta are ma nma ye i nmorip dedesar nor Ratu.”
Yesus natanuk na Ni mamate
31 Yesus ntar Ni manglarat buti resiny du a ne, ma nfalak, “Mpe, ma ti kote Yerusalem ye lo. Na iano, safe-safe ma nabyar rarengi monuk na Yakw, Tomwate Anaky lo, la nafdiat. 32 Fali keta tomwat Yahudyar ranrenre I ber tomwatar ma to Yahudi sir, ma tomwatar ne keta rkosy a rmalip, rafbwere, ma rdikat I. 33 Keta sir raus a rbabal ma rfen I, nempa keta lerar tel e, I nmorip a nbali.”
34 Nempa Yesus Ni manglartar to rkaul ral desar safe-safe monuk ma I nfalak ne, Fali sir to rafai Ni ngribatnir a ne isnir.
Yesus nafngamone matbolar sa
35 Noak ma Yesus ketla nait kote Yerikho, matbolar sa namtoran dalamtene seriny ma natak. 36 Tomwate ne ndengar tomwat ngayadin rlanre, mpa i nenrat, “Safe ne?”
37 Sir rfalak, “Yesus tomwat Nazaret a ne, nlanre ye.
38 Ndengar farane i nafwayak, “Yesus, Daud empuny! Mlwompang yakw!”
39 Tomwatar ma rmpan a rbalun a ne, rares ma rtampu i. Nempa i ntafal ma nafwayak a nbal, “Daud empuny! Mlwompang yakw!”
40 Ne Yesus namdir a ntabu I ma nluan tomwatar ma ror tomwat matbole ne ber I. Lama rait e, Yesus nenrat i, 41 “Mpweang ma Yak kose safe ber ko?”
Ne i nbali, “Tuhan, yak kmpweang ma kukeban.”
42 Mpe Yesus nfalak ber i, “Mukeban lo! Fali mulele Yakw mpa mungamon.”
43 Na lere ne nbal i nakeban desar, ne nlarat Yesus ma ndangin Ratu. Noak ma tomwat ngayadin a rsalan ngrie ne, sir rdangin Ratu.