Kete myayat ma tomwatar rfufw far sale dalam
1 * Yesus nfalak ber Ni manglartar, “Botuan feti kabain yatkar a rwayat ma tomwatar rose sale. Nempa suse desar ber tomwate ma nwayat tomwatar rose sale! 2 Ni ngafele e, rkete bati na tomwate ne nawan, ma ryebas i far tasik dalam. Rose farane nema kete nwayat tomwatar sa nof tomwatar ma dalmir to ramkoran a fuky ye nose sale. 3 * Mpa, mijak fengamone!
Farlan soranyar sa ma nose sale ber ko, ka mtwampu i nema ka kete nose farane lo. Farlan nasesal i e, ka mlwure i. 4 * Farlan i nose sale ber ko lere lese e lain itw, ma nma lain itw ma ntak ma mlwure i, ka mlwure i.”
Anlele ma namkoran
5 Ne Yesus Ni mangsidkwar a rfalak ber I, “Tuhan, mufkoran kam mamy anlele nbal.” 6 Tuhan Yesus nfalak, “Farlan mir anlele slyain lan sasawi batin, bise ma mfyalak ber katutun silai ye ma ntarpal nof ompak ma nti natkyal na sawak dalam,’ ne keta katutun ne nlarat mir fafalak ne.”a
Safe ma Ratu nfalak, ka myose monuk myor dalmir kateman
7 Mpene Yesus nfalak, “Farlan tomwatar sa nof a kmi ye ni karwar sa ma nabali ompak na lete nre neluk mangajak dombayar. Nait ma kawar ne nbali i e, keta tomwate ne to nfalak ber i feti, ‘Mwa mumtoran ma mtwame?’ 8 Nempa keta nfalak ber kawar ne feti, ‘Mose tnyame ber yakw. Mfwonak rabit ngalerap ma myangar yakw titerik ma ktwame monuk; betno ko mtwame.’ 9 Keta ndangin kawar ne nre tate? Fali nkaryae monuk safe ma nruany a nfalak a ne, tate nre? 10 Kmi a nbal. Farlan mkyaryae monuk safe ma Ratu nal ber a kmi a ne lo e, ka mfyalak feti, ‘Kam ye mangkarya biase motak; kam mkaryae mlarat lan safe ma Ratu nal ber kam.’”
Tomwat Samariar sa ma nose alang ber Ratu
11 Noak ma Yesus nor ni manglartar rmpan far Yerusalem, sir ralyole yampren Samaria ma Galilea snyapy. 12 Lama Yesus nait pnu sa e, mangampaul buti rti rakmat I.b Nempa ramdir dodo rof I 13 ne rafwayak ma rfalak, “Yesus! Tuangguru! Mlwompang kam!”
14 * Ne Yesus nfon sir, ma nfalak, “Mtyi mikmat ninr mangsompar, nema rlolak tenmir feti mingamon lo nre lolone.”
Noak ma lolone dalamtene lety e, sir rangamon lo.c 15 Tomwatar sa nof sir nsalan tenany e nangamon lo, mpa nbali i ma nampumpuki mla ndangin Ratu. 16 Ne i nsatngur na Yesus souny lury, ma nose alang ber I. Tomwate ne tomwat Samaria. 17 Mpene Yesus nfalak, “Dine Yak kufngamone tomwate buti kmi nre? Ma rasiu ne sir mpe? 18 Falisafe ma lan tomwat mangum ye ma nbali i ma nose alang ber Ratu ma Yahudyar a ne tate?” 19 Ne Yesus nfalak ber tomwate ne, “Mumdir, ma mbwali ko. Ko mulele Yakw, mpa mungamon.”
Ratu nma ma nfarete neluk Rai
20 Tomwat Farisyar ketnir renrat Yesus bengfir e Ratu neluk Rai ma nfarete tomwatar na saryamprene ye. Yesus nbali, “Keta Ratu neluk Rai ma nfarete tomwatar nempa to fanikar ma sir rsalan, 21 mpa keta tomwatar to bise ma rfalak feti, ‘Ratu neluk Rai ma nfarete na ye nre, na i a no!’ Fali botuan e Ratu neluk Rai nfarete na kmi dalmir lo.”
22 Mpene Yesus nfalak ber Ni manglartar, “Keta nait ni tewat e kmi mpyeang resi ma myor yakw, boloka fen lere lese, nempa to bise. 23 Keta tomwatar rfalak ber kmi feti, ‘Mya ma msyalan, I a na ye!’ Nre ‘Msyalan I a no!’ Nempa kete mtyi. 24 Fali nait ni tewat ma Yakw, Tomwate Anaky kmwa e tomwatar monuk keta rafai. Felan farlan fitik ma idak ma nodir langit, nof tubnir sa nti nait tubun walyetar. 25 Nempa luryain e Yakw, Tomwate Anaky ka kubare maberat a leman yadin ma tomwatar na are ye rasipur Yakw. 26 * Noak ma Yakw, Tomwate Anaky kmwa, keta tomwatar nir momorip felan farlan na are Nuh. 27 * Tomwatar rtame renum, ma rafasawe sir; nti nait na lere ma Nuh nti kabal dalam betno kdyaip silai nma ma nloram tomwatar ne ma rmat monuk. 28 * Farlan a nbal na are Lot. Tomwatar rtame renum, rabely kabain, raosbo ma rafdiri nir dasar. 29 Nempa na lere ne nbal, noak ma Lot a nti a ntate kote Sodom, Ratu ntolar au ma belerang nof langit farlan udan ma napu sir titerik ma rmat monuk. 30 Na lere ma Yakw, Tomwate Anaky kbwotin keta feleles a nbal na are Nuh ma Lot.d
31 * Na lere ne tomwatar ma ramin nir bubungan dasyar kete rtompur ma ral nir kabanir na das dalmir lo. Farlan tomwatar ma ramin letar a nbal kete rbali sir far nir dasar.e 32 * Ka minremi safe ma diat Lot sawany lo! 33 * Tomwatar ma to ral nir momorip ber Ratu, keta to ronri momorip dedesar. Nempa tomwatar ma ral nir momorip na saryamprene ye ber Ratu la ronri momorip dedesar. 34 Yak kfwalak ber a kmi: Na nronram ma kbwali Yakw e, tomwatar du a rarwa na arwan ain lese, nempa Ratu keta nfair tomwat sa ma nau kalin sa ne fali i to nalele Yakw. 35 Batar du a rloli gandum, keta Ratu nfair bat sa ma nau kalin sa ne.
36 [Farlan tomwatar du a rkarya na lete, keta Ratu nfair tomwatar sa ma nau kalin sa.]” 37 Yesus Ni manglartar renrat feti, “Tuhan, bengfir e mbwali Ko a mwa saryamprene?”
Ne Yesus nal tnyanuk pupule ma nbali, “Na ain ma mpusuk bobar ne ramin, iane ma manik akar rabut sir ma rane. Keta felan farlan ma kmwa kbwal. Yak kmwa e to kumudim ma keta tomwatar monuk a rsalan.”f