Tnyanuk pupule na mangomat doit ma to namlonry nempa nafai resi
1 Ne Yesus nfalak nbal ber Ni manglartar, “Tomwat mangoskayar sa, nal tomwatar sa ma nomat doit mla nurus ni kabanir. Mangoskai ne ndengar feti tomwate ne to najake fengamone ni kabanir. 2 Mpa ntar i ma nfalak feti, ‘ko nim karyae farpe ye? Lere ye nbal ka mufbotin monuk nim karyae ma mose ne. Ma ko to mkwarya lo.’ 3 Tomwate ne ndengar farane nfalak na dalamy feti, ‘Kose farpe ye? Ningw bos nose ma nalin yakw. Ma to boangw nal ma kuosbo, ma kweluk mangtake e, kmweat. 4 O tate la kose farye; farlan makene nalin yakw e la kunriak tbwarngur fen yadin nema rmpeang ma rlangun yakw na nir dasar!’ 5 Mpa i ntar mpane tomwatar ma nir utngar na ni makene ne. I nfalak ber mangbaluan, feti, ‘Ko nim utngar fir a na ningw makene?’ 6 Tomwate ne nfalak feti, ‘Ningw utang ngul zaitun ngusi rati.’ Ne nfalak feti, ‘Mal ko nim surat utang ye. Ma murengi musnyalik feti: ngusi but lim.’a 7 Mpene i nfalak ber tomwat sa nbal feti, ‘Ko nim utngar fir a nbal?’ Tomwate ne nfalak feti, ‘Gandum kadute ribun.’ Ne nfalak feti, ‘Ko nim surat utang ye. Murengi feti raty walw motak.’b 8 Ne makene ne ndangin ni mangomat doit ma to namlonry a ne fali ni aklar yadin; Yesus nfalak a nbal feti tomwatar na saryamprene ye rafai resi ma rurus nir momorip ror tomwat walyetar rlengan rof tomwatar ma rmorip a na ngaodir dalam ma rlarat Ratu Ni mpempeang.”c
9 Yak kfwalak ber a kmi, “Myal kabain saryamprene ye la myose ngomene ber tomwatar, nema farlan mir kabanir a ne omp lo, Ratu keta nlangun kmi a na surga. 10 Tomwate ma nalarat liry na kabain marumtar, keta nalarat liry a nbal na kabain silayar. Ma tomwate ma to nalarat liry na kabain marumtar, keta to nalarat liry a nbal na kabain silayar. 11 Mpa, farlan kmi to milarat liry ma mijake kabain saryamprenar ye, keta Ratu to nalele ma mijake kabanir na surga. 12 Farlan tomwatar to ralele kmi a na nir kabanir lo keta to ral sasaf neluk kmi mire?
13 * Mangkaryayar to rkarya ber tomwatar du; fali keta nkamis sa nlengan nof sa ne, ma keta nlarat dedesar sa nlengan nof sa ne. Kmi to bise ma mkyamis Ratu feleles ma mkyamis dotyar.”
Ratu Ni ngribatnir nmon titerik dedesar
14 Tomwat Farisyar ma ramin iane rdengar Yesus nfalak farane. Ne rmalip I, fali ramkeus resi doit. 15 Ne Yesus a nfalak ber sir, “Na tomwat ngayadin e kmi myose felmir farlan tomwat ngamonar, nempa Ratu nafai dalmir. Fali safe ma tomwatar rmpeang, Ratu to nmpeang.
16 * Musa ni tetetkar ma nabyar nir kitpar, rmpan dedesar ti nait are Yohanes mangadiris. Ntabw nof are ne Ibar Ngamone na Ratu neluk Rai ma nfarete tomwatar nsorw saryamprene. Ma tomwatar yadin rareke desar ma rti Ratu Ni farete dalam.d 17 * Langit numur saryamprene ye keta ramwer, nempa to huruf fen lese nlai nof Musa ni tetetkar.
18 * Merwane ma nyebas sawany ma nafsau nor bat walyete, merwane ne nalalin. Ma merwane ma nafsau nor bate ma sawany nyebas i a ne, merwane ne nalalin a nbal.”
Tomwat mangoskai ma Lazarus ma nawatan
19 Yesus nasaur, “Tomwat mangoskayar sa ni rabit ngafelar, feleles far rai ni rabtyar, rose rof maloly ngafele desar.e Lerar monuk e ni momorip farlan tomwate ma naosfesta. 20 Na mangoskai ne ni fakar souny e, tomwatar rfele mangtak sa na i a ne. Mangtak a ne ngarany Lazarus. Tenany nfen ber wempar ma rampampur ma npusuk lo. 21 I namlafar resi nwayat ma nmpeang ma tomwatar ral mangoskai ne ni tnyam linir ma rfuf rof mede ma nane. Ne ntafal a nbal ma aswar rma ralebe ni mngalar a ne.
22 Mpene Lazarus a nmat ne malaektar ror i far surga ma rti raftoran i a na Abraham seriny. Ne mangoskai ne nmat a nbal ma rti rafonak i. 23 Ne i nti naraka dalam ma nkoman suse silai desar. Noak ma nfon far das e, nsalan Lazarus a nsenang resi ma namtoran Abraham seriny. 24 Ne i nafwayak ma nfalak, Amangw Abraham!’ Mlwompang yakw nrela. Muluan Lazarus ma nsobw limany na weye ma nafmpwetan keringw ye fuky. Fali yak kwoman suse silai desar na au dalam ye!’
25 Nempa Abraham nfalak, ‘Amo: ka munremi, noak ma lolone mworip e ko nim safe-safe monuk ramin nempa Lazarus e to ni sasaf. Mpe lere ye i nsenang na ye ma ko e mkwoman suse. 26 To lan i a ne, fali na lety ko a ma kam e tetebin silai namin a ne. Nwayat ma tomwatar ma rof ye to bise ma rti iano, ma tomwatar ma rof iano to bise ma rma ye nbal!’ 27 Mangoskai ne nfalak, Amangw,’ farane ye yak ktwak kof ko desar ma mlwuan Lazarus ma nti amangw ni das a fuky. 28 Fali wangur lim lolone ne. Ma Lazarus nsurat sir, nema ka mprangu sir rmat e ka kete rma au dalam ye rbalak yakw.’
29 Nempa Abraham nfalak, ‘Sir romat Musa numur nabyar nir kitpar lo! Mpa la rlarat safe ma rarengi na kitap dalmir a ne!’ 30 Ne tomwate ne nfalak, ‘Tate, i a ne to dengan a fuky, keta mangmwatar sa nmorip a nbali ma nakmat sir, betno rtate nir salar.’ 31 Nempa Abraham nfalak, ‘Farlan sir to rmpan a rlarat Musa ma nabyar nir kitpar, botuan feti keta sir to ralele nbal, boloka mangmwatar sa ma nmorip a nbali.’”