<<    <     Lukas     15     >    >> 
Tnyanuk pupule na domba ma nlai
1 * Na ler sa e, mangtak ulbatyar mla tomwat salar, rti rakmat Yesus ma rdengar I. 2 Mpa tomwat Farisyar ma mangaftutu Musa ni faretar nroke-nraki sir. Ma rfalak, “Tomwate ye nabut I nor tomwat salar ma ntame nor sir!” 3 Iane nwayat ma Yesus nasaur tnyanuk pupule ber sir farye, 4 “Farlan nof a kmi ye tomwatar sa ni domba rati, ne ni domba lese nlai, keta i nose farpe? Botuan feti keta tomwate ne nau kalin ni domba buty siu resiny siu ne na ain letkyape, betno nti nanriak domba ma nlai ne titerik ma ntungan i.
Domba ma nlai (15:4)
5 Farlan i ntungan a nbali domba ne, keta nsenang resi ma nabare domba ne,6 betno nor a nbali i. Mpene nait ni das e natare tbwarnir ma tomwatar na ni das seriny baldu a ne, ma nfalak feti, ‘Mya ma tampumpuki kit. Fali ktwungan a kbwali ningw domba ma nlai a ne lo!’7 Yak kfwalak ber a kmi, keta Ratu nor Ni malaektar rampumpuki nbal na surga fali tomwat salar sa ma ntate ni salar a ne. Sir rsenang desar ror i nlengan nof tomwat ngamone buty siu resiny siu ne ma rase feti to nir sal.”
Tnyanuk pupule na doit gobang ma nlai
8 Ne Yesus nasaur tnyanuk pupule nbal farye, “Farlan batar sa ni doit gobang buti ne doit gobngar sa nlai, keta nose farpe? I ntutun faduk betno nsol das dalam ma nanriak fengamone desar doit ma nlai ne titerik ma nbae.a 9 Lama nkeban doit ne, ntar tbwarnir numur tomwatar na ni das seriny baldu a ne, ma nfalak ber sir feti, ‘Mya ma tampumpuki kit. Fali kweban kbwali ningw doit ma nlai ne lo!’ 10 Yak kfwalak ber a kmi feleles a nbal nor Ratu Ni malaektar ma rampumpuki fali tomwat salar sa ntate nir salar lo!”
Tnyanuk pupule na kanak ma nlai
11 Yesus nfalak a nbal farye, “Maken sa anak merwanar du. 12 Ne anak famudi nfalak ber amany feti, ‘Amo, mswaman kit ninr kabanir lo nema kal ningw wayat.’ Mpe amany nsaman nir kabanir a ne ber angkir du a ne.b 13 Lerar fir a ne rsak anak famudi ne nfenri monuk ni kabanir a ne betno nti nus dodo. Na iano nfenri nlai monuk ni dotyar la naosfesta dedesar. 14 Nait ma ni dotyar omp monuk lo, lafar silai desar nsorw nuse ne, ma i to ni sasaf desar. 15 Mpa nti nkarya ber tomwatar sa na nuse ne, tomwate ne nluan i ma nti najake babyar na ni lete.
I nti najake babyar na letar (15:15)
c16 I namlafar resi nwayat ma i nmpeang desar ma nane babyar a ne nir tnyamar. Nempa to tomwate fen lese, ma nal babyar ni tnyamar ber i.17 Famudi e nfenai nbali ma nfalak feti, ‘Tomwatar ma rkarya ber amangw, nir tnyamar yadin desar, nempa yakw na ye ketla kmwate ningw lafar!18 Mpa keta kbwali yakw ber amangw, ma kfwalak feti: Amo, yak kose sale ber Ratu ma ber ko lo.19 To mdwaun feti ko angkam ber yakw lo. Ma mdwaun lan feti ko nim mangkaryae ber yakw.’20 Mpa nbali i nti nakmat amany.
Lolone dodo e amany nkeban i lo. Fali amany nlompang resi i mpa nafla nkakal anaky ne, ma natmpur i betno nbon i. 21 Ne kanak ne nfalak ber amany, ‘Amo, yak kose sale ber Ratu ma ber amangw lo. Mpa kete mdwaun feti ko angkam ber yakw lo.’ 22 Nempa amany ntar ni karwar ma nfalak feti, ‘Misnyalik! Ma mtyi myal rabit melawas ngafele desar la mfyonak i. Myal toslyange ma myolw na liman, ma myal sabatwemar la myolw na emnir. 23 Betno myal sapi anak madunkar sa ma mfyen i ma mdyane. Nema taktem a tame ma tampumpuki kit. 24 Fali yakw anakw ye nmat lo, nempa lere ye nmorip a nbali; bengfir a ne i nlai, nempa lere ye ktwungan a kbwali i lo.’ Ne raosfesta desar.
25 Ni lere ne nbal, anak keyai namin letar. Nait ma nbali i ma sesedin nir das lo, ndengar ma rbeu ma bulyar delkir mla rose anputar. 26 Ne ntar ni kawar, ma nenrat feti, ‘Rose safe na das a ne?’ 27 Kawar ne nfalak feti, ‘Waim a nbali i lo! Mpa amoi naluan kam ma mfen sapi anak madunak ne, fali waim ma nlai ne ntungan a nbali i lo ma nangamon motak!’
28 Kanak keyai ndengar farane nares desar nwayat ma to nlampir ma nti das dalam. Ne amany nti burit ma nalonge i nema nti das dalam. 29 Nempa nfalak ber amany feti, ‘Amo, yak kwarya ma kmwat a klwai desar ber ko ngarkar rose ngarkar. Ma to klwanre nim faretar lain lese. Nempa mwal safe ber yakw? mpimpy angkir sa nbal e to mwal ber yakw ma kuosfesta kor tbwarngur a fuky! 30 Safo angkam famudi ma nafere monuk nim kabanir ber bat yatkar, betno nbali i motak e, mfwen sapi anak madunak ber i lo!’ 31 Ne amany nfalak ber i feti, ‘Amo, mdwengar ma kfwalak, ‘ko dedesar ma mor yakw. Ningw safe-safe monuk ye ko nime nbal. 32 Mpa ka taosfesta ma tampumpuki kit, fali waim ma nmat a ne, nmorip a nbali lo; bengfir a ne nlai, nempa tungan a tbali i lo.’”