Yesus nafngamone mangafanas na Yahudyar nir ler sanari
1 Na Yahudyar nir ler sanari sa e, Yesus nti ntame na tomwat Farisi ulun ni das. Tomwatar ma ramin a ne ranaumat I desar. 2 Metryat e tomwatar sa nma ma namdir Yesus souny lury. Tomwate ne maninik mangbare diat i. 3 Ne Yesus nenrat mangaftutu Musa ni faretar ma tomwat Farisyar ma ramin a ne, “Na ler sanari e, bise ma tafngamone mangafansar nre tate?”
4 Nempa sir ramlin motak. Mpa Yesus nomat mangafanas ne liman ma nafngamone i, betno naluru ma nbali i. 5 * Ne nfalak ber tomwatar ne, “Ise ma nof a kmi ye, anaky nre ni sapyar sa nfufu nti perigi dalam na ler sanari, keta to mfyair i a mya das na lere ne nbal e?”
6 Nempa to fen lese nbal ma nbali Yesus na ngrie ne.
Yesus naftutu tomwatar nema kete rafdas sir
7 Yesus nsalan tomwatar ma rma festa ne ranriak lan ma ramtoran lury. Mpa Yesus naftutu sir farye: 8 * “Farlan rundang ko ma mtwi festa nikah e, kete munriak ma mumtoran kader luryar. Nrema kete rundang tomwatar sa lo ma nlengan nof ko, 9 nwayat ma das nruan a ne keta nma ma nakmat ko ma nfalak, ‘Kete mures nre, koli knwau ain ye ber tomwate ne lo.’ Ne keta mweat desar ma mtwi mumtoran lolo mudy. 10 Nempa, farlan rundang ko e, ka mumtoran lolo mudy, nema das nruany a nma e keta nfalak ber ko, ‘Kes, mtwi mumtoran lury a no.’ Mpe keta tomwatar ralang ko a na tomwat ngayadin. 11 * Tomwatar ma rafdas sir keta Ratu nafufu sir, nempa tomwatar ma rtomu sir e Ratu la nafdas sir.”
12 Ne Yesus nfalak ber das nruany, “Farlan ko mtwar tomwatar ma rane tnyam faburat na lere nre nronram e, ka kete mtwar tbwarim nre aim waim, nre nim fatnyimar nre das seriny baldu ma raoskay. Fali keta sir rundang ko a nbal, ma rbalas nim ngamone ne. 13 Mpa, farlan mose tnyam faburtar sa e, ka mtwar tomwatar ma rawatan, sabaloyar, mangamluktwar mla matbolar. 14 Nema keta monri nimet, fali tomwatar a ne to bise ma ririt nim ngamone ne. Keta Ratu nbalas ber ko noak ma tomwat ngamonar rmorip a rbali.”
Tnyanuk pupule na tomwatar ma rmpeang ma rose nir aklar
15 Lama Yesus natanuk farane e tomwatar sa ma raktem a rtame ne nfalak, “Ngamone desar ber tomwate ma raktem Ratu rtame noak ma I nfarete neluk Rai na saryamprene!”
16 Ne Yesus nfalak tnyanuk pupule ber i, “Ler sa e tomwatar sa nose festa silai ma nundang tomwatar yadin. 17 Noak festa ne ketla nmpan, tomwate ne nluan ni mangkaryae ma nfalak feti, ‘Mtwi mtwar tomwatar ma kundang sir a ne ma weni rma, koli festa ma nmpan ye lo!’ 18 Nempa tomwatar ma nundang sir a ne rose nir aklar ma to rti festa ne. Mangbaluan nfalak feti, ‘Kete murese yakw koli keta to ktwi. Fali betno kswelir ompak mpa ktwi kswalan a fuky.’ 19 Ma sa nbal e nfalak feti, ‘kete murese yakw koli keta to ktwi fali betno kswelir sapi pasngar lim a mpa ktwi kswalan sir feti bonir ral ma rbajak ompak nre tate,’ 20 Sa nbal e nfalak feti, ‘betno kufsaw mpa keta to ktwi.’
21 Mpene mangkaryae ne nbali i ma nfalak ber nruany na safe ma tomwatar rfalak a ne. Das nruany ne nares desar, mpa nfalak ber ni mangkaryae ne, ‘Musnyalik ma mtwi dalamten kaumpwar ma srat angkir monuk na kote ye! Ma mutare tomwatar ma rawatan, sabaloyar, matbolar numur mangamluktwar.’ 22 Ne mangkaryae ne nafbotin feti, ‘Maken, kufmpwane monuk nim farete ne lo, nempa ain kapar lolone yadin.’ 23 Mpa nruany a ne nfalak, ‘Farane ye, mtwi dalamten kaumpwar ma srat angkir a na kote burit, ma mrwibut ise nre se motak ma mtwungan sir a ne ma rma, nema rafen ain kapar ye. 24 Fali tomwatar ma kundang sir baluan a ne keta to fen lese ma nane tnyamar na ningw festa ye!’”
Ise nmpeang ma nlarat Yesus ka nau kalin ni safe kabain
25 Na ler sa, tomwat ngayadin rmpan a rlarat Yesus. Ne nbal I ma nfon sir ma nfalak, 26 * “Ise nmpeang ma neluk ningw manglarat, ka nkamis Yakw nlengan nof enany amany, sawany anaky, urany wainy, ma nlie nlengan koko i desar. 27 * Tomwate ma to nabare ni sangwalua ma nlarat Yakw, keta to bise neluk ningw manglarat.
28 Farlan tomwatar sa, nose ma nafdiri menara, keta nfayaki doit a fuky feti dengan ma nafdiri nre tate. 29 Ma farlan naftoran fanderen lo nempa to naloran ni karyae ne fali doit omp lo, keta tomwatar rmalip i. 30 Ma keta rfalak feti, ‘No msyalan i a, to boan ma nafdiri ni das silai fali doit omp lo!’
31 Farlan rayar sa ni suldadu ribun buti rose ma ramdiri yayat ror rai walyete ma ni suldadu ribun buty du, botuan feti keta rai ne ndaun a fuky feti ramkoran nre tate, ma ramdiri yayat ror nir kanre ne. 32 Nempa farlan ndaun feti ni suldadwar to ramkoran e, noak ma kanre ne lolone dodo e keta nluan ni mangaflaaswar sa ma nti nfalak feti tose ngamone motak.” 33 Ne Yesus nfalak, “Kmi a nbal. Farlan to mpyeang ma mnyau kalin mir safe kabain fali Yakw, keta to myeluk Ningw manglarat.”
Sire ma to matelas lo