Farlan to rtate nir salar, keta Ratu nukun sir
1 Noak ma Yesus naftutu tomwat ngayadin a ne, tomwatar ketnir rfalak ber Yesus feti Pilatus nfen tomwat Galilear ketnir noak ma rloik nir snyompe ber Ratu. 2 Ndengar farane, Yesus nfalak ber sir, “Kmi mifliak feti tomwat Galilear ma rmat farane, nir salar maberat a nlengan nof tomwat Galilear monuk e? 3 Tate! Mdyengar fengamone: Farlan to mtyate mir salar, keta mkyoman suse terik ma myat far sir a nbal. 4 Kmi lolone minremi menara na Siloam, ma namsos a npalam tomwate buti resiny walw ma rmat a ne nre? Mifliak feti sir a ne nir salar maberat a nlengan nof tomwatar monuk ma ramin Yerusalem a ne e? 5 Tate desar! Mpa kfwalak ber a kmi: farlan to mtyate mir salar, keta Ratu nukun a kmi farane nbal.”
Tnyanuk pupule na katutun ara ma to buan
6 Ne Yesus a nfalak tnyanuk pupular sa farye, “Tomwatar sa ni katutun ara ma namin ni lete anggur dalam. Ler sa e nti nanriak katutun a ne bunir, nempa to nbae fen lese nbal.
_HK00088B.jpg)
Ara bunir (13:6)
8 Nempa mangajake ne nfalak feti, ‘Amangw farane motak a ma tsalan ngarak ye nbal a fuky, la kswayal ompak a kbwebar ma kyefar pupuk na. 9 Se nafai feti ngarak ma nma ye nabu. Farlan to nabu a nbal e, la kwetan i lo.’”
Yesus nafngamone tomwatar sa na Yahudyar nir ler sanari
10 Na Yahudyar nir ler sanari sa e, Yesus naftutu na das sampangar sa. 11 Na iane batar sa ma nafanas ngarak buti resiny walw e lo, fali smwangat yatak nsung i. Nwayat ma nadungun, ma namdir e to namlonry. 12 Noak ma Yesus nsalan bate ne nfalak, “Batmaken, mungamon lo!” 13 Ne nti nsaup liman na bate ne, mpe ntabw nof a ne i namdir e namlonry ma ndangin Ratu.
14 * Nempa ulun na das sampayang ne nares, fali Yesus nafngamone tomwate na Yahudyar nir ler sanari, mpene nfalak ber tomwat ngayadin a ne, “Na minggu dalam e kit tkarya lerar nem; mpa mya ma nafngamone kmi a na lerar ne, ma kete na ler sanari!”
15 Nempa Yesus nfalak, “He lepuskwar a kmi! Koko kmi desar e mkyarya na ler sanari nre? Kmi myalin mir sapyar nre keledayar rof nir owar ma myor sir ma rti renum. 16 Ma na ye bat sa nof dasdalam Abraham, ma smwangat yatak nir ulun a nsung i ngarak buti resiny walw e lo. Mpe to bise tafngamone i a na ler sanari e?” 17 Yesus nfalak farane nwayat ma ni kanrar rmeat resi; nempa tomwatar monuk ne rampumpuki sir fali rsalan kabain mpasalnar ma Yesus nose ne.
Tnyanuk pupule na sawi batin ma ragi
18 Lama Yesus nafngamone bate ne, I nenrat sir farye, “Ratu nfarete saryamprene ye, keta felan farpe? Keta kal safe la kpasal i? 19 Ratu nfarete na saryamprene felan farlan tnyanuk pupule ye. Tomwatar sa nal sawi batina ma nyefar na ni lete. Ne natrump tila neluk katutun, ma mangkyar rti rose nir ngengyar a na sangnir.”
20 Ne Yesus nfalak a nbal, “Keta kal safe la kpasal Ratu nfarete na saryamprene? 21 Iane farlan ragi ma batar sa nal betno nabali nor terigu silai,b titerik ma nbar monuk.”
Tasosonge ma ti surga
22 Mpene Yesus naloran Ni mpampane far kote Yerusalem, I nlole kotar ma pnuar ma naftutu tomwatar. 23 Ne tomwatar sa nenrat, “Amangw, mpe lan tomwatar ketnir ma Ratu nfair sir e?”
24 * Mpa Yesus nfalak, “Ka mireke ma milyole myof fofolat lolany ne far dalam. Yak kfwalak ber a kmi, tomwatar yadin rareke ma rti dalam, nempa to bise. 25 Noak ma das nruany npote i ma nfolat, keta kmi mimdir motak burit ma mdyelak dedesar fofolat ma mfyalak, ‘Amang o, mbwanril fofolat ber kam a fuky!’ Nempa keta i nfalak ber a kmi, ‘mpear a kmi ye, to kufai kmi!’ 26 * Ne keta kmi mfyalak, ‘Kam ye ma mtame menum mor Ko, ma Ko muftutu kam a nbal na srat dalmir na mamy kote!’ 27 * Nempa keta i nfalak ber a kmi feti, ‘Mpear a kmi ye, to kufai kmi. Tomwat salar far a kmi ye, ka kete mya ye. Mbyali kmi!’ 28 * Ma keta kmi mkyeban Abraham, Ishak ma Yakub ror nabyar monuk a rsenang resi na Ratu Ni ain farete, ma kmi e mtyasing ma mkyoman suse fali keta ratian a kmi far burit! 29 * Ma tomwatar ma to Yahudi sir keta reluk Ratu Ni tomwatar na Ratu Ni ain farete. Sir a ne keta rma rof timur, barat, trangan mla marmar, ma keta rampumpuki sir na Ratu Ni ain farete. 30 * Mpa ni botuan e, tomwatar ma lere ye rarikan i, keta Ratu nafdas sir. Ma tomwate ma lere ye nalolobi i, keta Ratu nafufu i.”
Yesus natanuk na kote Yerusalem
31 Na lere ne nbal, tomwat Farisyar ketnir rti rfalak ber Yesus, “Mbwie ma mtwi anir sa koli rai Herodes nose ma nfen Ko.”
32 Ne Yesus a nfalak ber sir, “Mtyi mfyalak ber asw alas a ne feti, ‘Lere ye ma bobole keta kutian smwangat yatkar ma kufngamone tomwatar, ma bengdu e ksworu ningw karyae.’ 33 Nempa ka kuloran ningw mpampane far Yerusalem lere ye, bobole ma bengdu, fali biase tomwatar rfen nabyar na Yerusalem ma to na ain walyet.
34 He tomwat Yerusalemar a kmi! Kmi ma mfyen nabyar! Ma mikdyai Ratu Ni mangsidkwar myor batyar titerik ma rmat! Lain fir ye lo Yak kmpweang resi ma kufburat a kmi monuk, farlan sif ene ma nafburat angkir a na slyapan lebabnir, nempa kmi to mlyampir! 35 * Mpa keta Ratu to nor a kmi lo. Yak kfwalak ber kmi, keta to mkyeban Yakw lo, titerik ma mfyalak feti, ‘Mya ma tdangin I ma nma nal Tuhan ngarany.’”