<<    <     Lukas     1     >    >> 
Ibar ngamone nof
Lukas
Luryain
1-2 Amangw Teofilus,
Tomwatar ketnir koko sir rsalan kabanir monuk lo ma Yesus nose nof luryain. Sir rafwibar monuk kabanir a ne. Ma tomwatar yadin rareke ma rarengi kabanir ma nose ber kit a ne lo. Sir ye rarengi farlan safe ma tdengar lo nof tomwatar ma rsalan a ne. 3 Yak kwenrat kulyole kabanir monuk a ne lo nof luryain. Mpa yak kdwaun e nangafel farlan yak kurengi iane monuk ma ralarat mpane sir na kitap sa dalam ber ko. 4 Yak kose farane, nema ko mufai feti safe ma raftutu ber ko a ne lo, botuan desar.
Malaekat Gabriel nafbotin na Yohanes mangadiris ni farawe dalamy
5 * Noak Herodes nose rai na provinsi Yudea, mangsompar sa nof klop Abia ngarany Zakharia. Sawany ngarany Elisabet, i a nbal nof dasdalam mangsompe. 6 Radu nir momorip e rafsenange Ratu dalamy, ma rlarat monuk Ratu Ni faretar mla tetetkar ma to rlanre fen lese nbal. 7 Nempa radu to nir memey, fali Elisabet nmakw ma radu ramtu lo.
8 Na ler sa e, wayat ber Zakharia ni klope, mpa i nafmpwane ni karyae neluk mangsompe na Ratu Ni Das Silai. 9 Fali noak sir rose onde rlarat mangsompar nir mpampane, onde ne nfufw ber Zakharia ma napu natan na Ratu Ni Das Silai dalam. 10 Noak ma i napu natan, tomwatar yadin ramin burit ma rsampayang.
Zakaria napu natan na Ratu Ni Das Silai (1:10)
11 Metryat e Ratu Ni malaektar sa nafbotin i ber Zakharia. Malaekat ne namdir snyompe ain ma napu natan a ne balisya fian.12 Noak ma Zakharia nsalan malaekat a ne i nmetryat ma namtaut.13 Nempa malaekat ne nfalak ber i, “Zakharia, kete mumtaut! Fali Ratu nsaluk nim tatakar lo. Sawam Elisabet keta namtoranbabe kanak merwane, ma ka mufngare i a na Yohanes.14 Keta ko mswenang resi, ma tomwatar yadin keta rampumpuki sir fali rafrawe dalamy kanak ne.15 * Fali keta neluk Ratu Ni mangsiduk silai. Keta i to nenum desar anggur nre tuak. Noak ma lolone namin enany kampuny dalam, Ratu Smwangtany norang i lo.16 Keta i nwayat ma tomwat Israelar yadin rbali sir ber Ratu.17 * Keta i neluk Ratu Ni mangsiduk ma namkoran ma ni kuase farlan nabi Elia. Ma keta i nbalun ma naflawar dalamtene ber Tuhan nema tomwat Israelar rasusan nir momorip la rdaf Ratu Ni mamae. Ma keta nafngamone amar ror angkir nema rangamon a rbali. Tomwatar ma to rlarat Ratu keta nwayat ma rlarat Ratu. Nose farane, nema nasusan tomwatar dalmir ma rlangun Ratu.”
18 Ne Zakharia nenrat malaekat ne, “Keta kufai farpe? Yakw e kumaken lo, ma sawangw e nabatmaken a nbal lo.”
19 * Ne malaekat ne nfalak, “Yakw ye Gabriel. Yak klwangun Ratu, ma I nsiduk yakw ma kufbotin Ibar Ngamone ye ber ko. 20 Keta nait ni tewat e safe ma yak kfwalak ye I nafdiat. Fali ko to mulele yakw mpa keta ko mumomou terik safe ma kfwalak ye I nafdiat.”
21 Tomwatar rdaf dedesar Zakharia. Sir monuk rafalak na dalmir feti, safe ma dodo desar i a na Ratu Ni Das Silai dalam ye. 22 Noak ma nma burit e, i na momou lo, mpa i nampuat lan limnir ber sir. Tomwatar rsalan farane sir rafai feti i nsalan kabain mpasalan lo na Ratu Ni Das Silai dalam.
23 Lama ni wayat omp na Ratu Ni Das Silai, nbali i far das. 24 To dodo a nbal e, sawany Elisabet nlenr. I namin lan das dalam doan bulnar lim. 25 Ne i nfalak, “Ratu nlompang yakw lo, ma I npote soungw nof tomwatar lo.”
Malaekat Gabriel nafbotin na Yesus Ni farawe dalamy
26 Nait ma Elisabet nakebansou i ma ni bulnar nem e, Ratu nluan malaekat Gabriel ma nti kote Nazaret, na provinsi Galilea. 27 * I nti nakmat batdarar sa, ngarany Maria. Batdare ne natnyiman lo nor merwane ngarany Yusuf, nof rai Daud ni dasdalam. 28 Malaekat ne nti nakmat Maria ma nfalak, “Ngamone ber ko, Ratu nal nimet ber ko lo ma I nor ko dedesar.”
29 Noak ma Maria ndengar ngribatnir a ne i nampriang ma nfalak na dalamy feti, ngribatnir a ne isiny farpe. 30 Ne malaekat ne nfalak, “Maria! Kete mumtaut, fali Ratu nal nimet ber ko lo. 31 * Keta mukebansou ma mumtoranbabe kanak merwane, ma ka mufngare I a na Yesus. 32 * Keta I neluk tomwat silai ma rtar feti Ratu Anaky Mangamin medase. Ma keta Ratu nfair I neluk Rai farlan empuny nusiny rai Daud. 33 Keta I neluk Rai ma nfarete tomwat Israelar terik ma dedesar, ma Ni ain farete ne to terik.”
34 Ne Maria nfalak ber malaekat ne, “Yakw to kufsau fuky ma kukebansou farpe?”
35 Ne malaekat ne nfalak, “Keta Ratu Smwangtany ntompur ber ko, ma Ratu Mangamin futu Ni kuase nlitan ko. Iane nwayat ma kanak ma mumtoranbabe I a ne keta rtar I a na Ratu Anaky Manglerap. 36 Mswalan, waim Elisabet a ne boloka tomwatar rfalak feti nmakw ma nabatmaken lo, nempa nakebansou i e kanak merwane, ma ni bulnar nem lo. 37 * Fali Ratu bise ma nose safe-safe motak.”
38 Ne Maria nfalak, “Yakw ye Ratu Ni mangkaryae. Ma klwangun safe motak ma Ratu nal ber yakw.” Mpene malaekat ne nti a ntate i.
Maria nti naninuk Elisabet
39 Lama malaekat ne nti a ntate Maria, to dodo a nbal e, Maria nasnyalik ma nti kote sa ma namin bubuar na Provinsi Yudea. 40 Na iano i nti Zakharia ni das. Lama nait das dalam e, nose tabe ber Elisabet. 41 Noak ma Elisabet ndengar Maria ni tabe ne, anaky ma namin kampuny dalam ne naforak i. Ma Ratu Smwangtany norang Elisabet. 42 Mpa nfalak nor lirin silai, “Ratu nberkat ko lo nlengan nof batar monuk, ma nberkat a nbal ko angkam ma namin kampum dalam! 43 Ise yakw ye, mampe ningw Tuhan enany ko mwa muninuk yakw? 44 Noak ma mose tabe ber yakw e kanak ma namin kampungw dalam ye naforak i fali nsenang resi. 45 Ngamone ber ko fali mulele feti safe ma Tuhan ma nfalak ber ko a ne la I nafdiat!”
Maria nbeu la ndangin Ratu
46 * Ne Maria nleru,
“Yak kdwangin Tuhan kor dalangw kateman,
47 yak kswenang resi, fali Ratu nma ma nfair yakw.
48 Yakw ye Ni mangkaryae ma to ubany sasaf nempa I dedesar ma nsalan yakw.
Ntabw nof lere ye keta tomwatar monuk rfalak feti, ngamone desar ber yakw.
49 Fali Ratu Mangkuase nose kabain silayar ber yakw lo. Ma ngarany a ne nanglerap.
50 * Ratu nfatutu Ni ngamone dedesar ber tomwatar ma ralang I titerik empnir nusnir.
51 I nose kabain silayar nor Ni kuase,
ma nakese nasame tomwatar ma dalmir medase.
52 I ntolar rayar nof nir kaderar, ma nal kuase ber tomwat marumtar.
53 Ratu nal tnyam ngafelar ma nlie nlengan ber tomwatar ma ramlafar, ma natian mangoskayar ma to ronry sasaf.
54-55 * Ratu ntulung Ni tomwat Israelar.
I nanremi Ni yoyoding ma nose ber nusninrar Abraham ma ni dasdalam feti keta I nfatutu Ni ngamone dedesar ber sir.”
56 Maria namin Elisabet ni das ketla bulnar tel, betno nbali i far ni pnue.
Ramtoranbabe Yohanes mangadiris
57 Nait ni tewat ma Elisabet namtoran bab. Ne namtoranbabe kanak merwane. 58 Tomwatar na ni das seriny baldu mla uran wainy rdengar feti Ratu nfatutu dalamy ngamone ber Elisabet lo, mpa dalmir senange ror i a nbal.
59 * Noak ma memeye ne ni lerar walw, sir a ne rma ma rsalan ma rsunat i. Sir rose ma rafngare i a na Zakharia, rlarat amany ngarany, 60 nempa enany nfalak, “Kete! Ka mifngare i a na Yohanes.”
61 Ne sir rfalak, “Uram waim e to kekes ma ngarnir farane.” 62 Ne sir rampuat limnir ma renrat Zakharia, “Ko mpweang ma rafngare i a na ise?”
63 Zakharia ntak batu tulis betno narengi feti, “Ngarany Yohanes.” Mpa sir monuk rampriang. 64 Lama narengi monuk ngare ne bise ma natanuk desar, ma ndangin Ratu.
65 Tomwatar monuk ma ramin ain a ne ramtaut ma rose alang ber Ratu ma ansaur a ne nsorw monuk buburir na Yudea. 66 Tomwatar monuk ma rdengar farane, raenrat na dalmir, “Keta ler famudi e i neluk safe ye!” Sir rfalak farane fali rafai feti Ratu ni kuase nor i.
Zakharia nbeu la ndangin Ratu
67 Ratu Smwangtan norang Yohanes amany Zakharia, mpa nafbotin snyurat nof Ratu ma nfalak,
68 “Mya ma tdangin Tuhan, Israelar nir Ratu,
fali I nma lo ma nfair Ni tomwatar kit.
69 I nal mangtebus ber kit ma Ni kuase silai ma nma ma nfair kit.
I ye nof dasdalam rai Daud. Ma rai Daud ye Ratu Ni mangkaryae noak luri ne.
70 Noak luri ne Ratu nfalak ber Ni nabyar
ma nfil sir a ne lo feti,
71 Keta I nalin kalin kit nof ninr kanrar
ma nof tomwatar monuk ma to rmpeang kit.
72 I nfatutu dalamy ngamone ber nusninrar a ne
ma nafdiat Ni yoyoding lelerap.
73-74 Ratu nyoding lo ber nusninrar Abraham feti,
keta I nalin kalin kit nof ninr kanrar
nema to tamtaut ma tsampayang.
75 Noak ma lolone tmorip na saryamprene ye, kit teluk Ratu Ni tomwatar ma tkarya ber lan I ma tose lan kabain ngamonar ma tafsenange dalamy.
76 * Ma Yohanes, yakw anakw ko, keta tomwatar rfalak ‘Ko ye, Ratu Mangamin medase Ni mangsiduk.’
Fali keta ko mbwalun ma muflawar dalamtene ber Tuhan ma keta nlanre.
77 Keta ko mufbotin ber Ratu Ni tomwatar feti Ratu bise nlure nir salar ma nfair sir.
78 Kit ninr Ratu nma ma nfair kit,
fali dalamy nangamon resi ma nkamis kit a nbal.
Ma keta Tomwate ma Ratu nsiduk I ma nfair kit a ne farlan lere ma nma das bobolisin,
79 * ma nodir tomwatar ma rmorip a na makrokap dalam ma ramtaut mamate. I nrure kit far dalamten maline.”
80 Zakharia anaky ne ntafal ma naslyai ma ni andaun ngamone. Ma dalamy e makoran a nbal. I namin ain letkyape, titerik ni tewat ma nbotin ma nafbotin Ratu Ni snyurat ber tomwat Israelar.