Ramtoranbabe Yesus
1 Lama ramtoranbabe Yohanes to dodo e Kaisar Agustus nal farete ber ni mangkaryayar ma ral tomwatar monuk ngarnir na Roma ni ain farete. 2 Noak a ne Kirenius nose gubernur na provinsi Siria ma betno luryain ye ma ral ngarnir. 3 Mpa tomwatar monuk rti ma ral ngarnir na nir kotar mpane.
4 Yusuf a nbal nti a ntate kote Nazaret na Galilea ma nal far Betlehem na provinsi Yudea. Betlehem ye kote ma ramtoranbabe rai Daud, Yusuf empuny nusiny. 5 I nti a no e nor ni tnyiman Maria, nema ral ngarnir ber mangalngarar na kote ne. Noak a ne Maria nakenbansou i lo.
6 Lama rait Betlehem, nait ni tewat ma Maria namtoranbab. 7 Ma namtoranbab e anaky merwan keyai. Ne nal sikar la npule kanak ne, betno nfele I a na wanral dalam, fali na tomwatar nir dasar to ain ma ramin.
Maria npule Yesus nor sikar betno nfele I a na wanral dalam (2:7)
Mangajak dombayar rti rsalan Yesus ma betno ramtoranbabe I
8 Na nronram a ne mangajak dombayar rajake nir dombayar na ain mangkaku ma to dodo nof kote Betlehem.
Mangajak dombayar rajake nir dombayar (2:8)
13 Metryat farye malaektar yadin rbotin na ain a ne, ma raktem malaekat dine ne, rdangin Ratu ma rfalak,
14 “Mya ma tdangin Ratu Mangamin medase!
Ma tomwatar monuk ma rafsenange Ratu dalamy keta ronri maline!”
15 Lama malaektar a ne rti a rtate sir ma rbali sir far surga, mangajak dombayar a ne rafalak ber sir, “Mya ma ti Betlehem ma tsalan safe ma nbotin na iano, far ma Tuhan Ni malaekat a nfalak ber kit a ne.” 16 Mpene rasnyalik ma rti Betlehem ma ranriak ain a ne. Lama rait e, rtungan Maria ma Yusuf numur kanak memeye ma narwa na wanral dalam. 17 Noak ma mangajak dombayar rsalan kanak memeye ne, sir rasaur safe ma malaektar a rfalak na kanak memeye ne ber tomwatar monuk na iane. 18 Tomwatar monuk rampriang ma rdengar safe ma mangajak dombayar a ne rfalak. 19 Nempa Maria nau ngriar monuk a ne ma nfarnyobak na dalamy. 20 Mpene mangajak dombayar ne rbali sir far ain mangkaku, ma rdangin Ratu fali safe-safe monuk ma rdengar ma rsalan na kanak memeye ne, feleles far malaekat ma nfalak.
Yusuf ma Maria rsomp Yesus ber Tuhan na Ratu Ni Das Silai
21 * Lama kanak memeye ne ni lerar walw e rsunat I. Ne rafneni I a na Yesus farlan malaekat nafbotin ber Maria, noak ma to nakebansou fuky.
22 * Nait ni tewat ma Yusuf radu Maria raflerap tenir, rlarat Musa ni tetetak. Sir rti e ror Yesus ma rsomp I ber Tuhan na Ratu Ni Das Silai na Yerusalem. 23 * Rose farane fali na Ratu Ni tetetak dalam nfalak feti, “Kanak merwan keyayar monuk, ka rsomp sir ber Ratu.” 24 Sir a nbal ka rsomp manik wetruar du nre manik merpati angkir du, rlarat safe ma rarengi na Ratu Ni tetetak dalam.
Simeon ma Hana
25 Na Yerusalem tomwat sa ngarany Simeon. I ye tomwat ngamonar sa i ma namlonry, ma Ratu Smwangtany nor i. I ndaf ni tewat ma Ratu nfair tomwat Israelar. 26 Ratu Smwangtany nafbotin ber i lo feti, keta nsalan Rai Mangtebus a fuky betno nmat. Ratu nyoding Rai ye lo ma nfair Ni tomwatar. 27 Ratu Smwangtany nrure Simeon ma nti Ratu Ni Das Silai. Na lere ne nbal Yusuf radu Maria ror Yesus ma lolone memeye ne far Ratu Ni Das Silai ma rsomp I. Rose rlarat safe ma rarengi na Musa ni tetetak dalam. 28 Simeon nal memeye ne ma npot I, mla ndangin Ratu ma nfalak,
29 “Tuhan, lere ye Ko mufdiat Nim yoyoding lo,
mpa mwinrang yakw ma kmwat na maline dalam.
30 Fali koko yak kswalan desar I lo ma Ko mswiduk ma nfair tomwatar.
31 Mangtebus ne Ko mfwil I mala nfair tomwatar monuk na saryamprene,
32 * I farlan ngaodir ma nodir dalamtene ber tomwatar ma to rof dasdalam Israel. Ma keta I nonri dadangin ber Nim tomwat Israelar.”
33 Enany aman rampriang desar ma rdengar safe ma Simeon nfalak na Yesus. 34 Ne Simeon ntak Ratu ma nberkat Yusuf radu Maria. Mpene i nfalak ber Kanak ne enany, “Ratu nfil Kanak ye lo nema keta silai I e nafufu tomwat Israelar yadin ma nfair yadin a nbal. I farlan fanikar sa nof Ratu, ma nwayat tomwatar ranremi nir salar, nempa keta tomwatar yadin rbangal I, 35 farane nema safe ma namin tomwat ngayadin ne dalmir keta rbotin. Ma Maria ko, keta dalam suse resi, farlan smade ma nane la rtebak batim.”
36 Na iane nbal e nabi batar sa ma nabatmaken desar lo. Ngarany Hana. I ye Fanuel anaky, nof dasdalam Asyer. Radu sawan rmorip ngarkar itw, 37 mpe lere ye nsom lo ma ni ngarak buty walw resiny fat. Lere nronram e nafmodam i ma dedesar nti Ratu Ni Das Silai ma nsampayang. 38 Na lere ne nbal i nti ain a ne ma nose alang ber Ratu, betno nfalak na Kanak ne ber tomwatar monuk ma lolone rdaf ni tewat ma Ratu nalin tomwat Israelar nof nir kanrar.a
39 * Lama Yusuf ma Maria rose rlarat Ratu Ni tetetak e, rbali sir far nir pnue sori na kote Nazaret na Galilea. 40 Kanak ne ntafal ma naslyai mla namkoran. I ni anfai silai, ma Ratu nkamis resi I.
Yesus na Ratu Ni Das Silai
41 * Ngarkar monuk Yesus enany aman rti Yerusalem ma rose ler silai Paskah.b 42 Noak ma Yesus Ni ngarak buti resiny du, enany aman ror I far Yerusalem ma rose ler silai ne far biase. 43 Rose monuk ler silai ne rbali sir, ma Yesus lolone namin Yerusalem, nempa enany amany to rafai. 44 Sir rafliak feti I nor tomwatar ma rmpan a ne. Mpa rmpan ler ngadoe ne betno sir ranriak I a na anir wanir ma nir fatnyemar. 45 Nempa to rtungan I, mpa rbali sir ma ranriak I a na Yerusalem. 46 Ranriak lerar tel, betno rbae I a na Ratu Ni Das Silai. I namtoran nor tuanggurw agamar ma rabali ngengentar. 47 Tomwatar monuk ma rdengar Ni tnyangkwar a ne, rampriang desar fali I nafai resi ma nbali nir ngengentar. 48 Noak ma enany amany rsalan I, ramngangebab. Ne enany nfalak, “Amo, ka kete mose farye ber kam lo! Madu amoi dalmyamar suse desar ma manriak Ko.”
49 Ne Yesus nfalak ber sir, “Safema enangw amangw minriak Yakw? Fali mpe kmi to mifai feti ka kumin Amangw Ni das e?” 50 Nempa enany amany to rkaul ral safe ma I nfalak ber sir a ne. 51 Ne Yesus nor enany amany rbali sir far Nazaret; ma ndengar sir desar. Enany nau ngriar monuk a ne na dalamy.
52 * Yesus ntafal ma naslyai, ma ni anfai silai nbal. Ratu nkamis I ma tomwatar rsenang ror I.