<<    <     Lukas     3     >    >> 
Yohanes mangadiris nafwibar Ratu Ni snyurat ber tomwatar
1 Kaisar Tiberius nose rai ma nfarete na Roma ngarak buti resiny lim lo. Pontius Pilatus nose Gubernur na Yudea, ma Herodes nfarete na Galilea. Herodes wainy Filipus nfarete na nus Iturea ma Trakhonitis, mla Lisanias nfarete na Abilene.a 2 Noak a ne Hanas ma Kayafas reluk Yahudyar nir Mangsomp Silayar.b Ne Ratu nal snyurat ber Yohanes, Zakharia anaky na ain letkyape. 3 Mpene Yohanes nti monuk yampren na weri Yordan seriny baldu, ma nafwibar ber tomwatar feti ka rtate nir salar ma radiris sir nema Ratu nlure sir. 4 * Yohanes ni mamae farlan ma rarengi na nabi Yesaya ni kitap dalam farye,
“Keta tomwatar sa nfalere na ain letkyape feti,
‘Miflerap dalamtene ber Tuhan,
ma miflyonri dalamtene ber I.
5 Mfyan monuk ngolpir,
mifnese buburir mla lenir.
Miflyonri dalamtenar ma raleleku
mla miflawar dalamtenar ma rabubutu.
6 Ma keta tomwatar monuk na saryamprene rsalan feti Ratu nfair Ni tomwatar nof nir salar!’”
7 * Ne tomwat ngayadin rti rakmat Yohanes ma nadiris sir, nempa i nfalak ber sir, “He tomwat yatkar a kmi! Ise ma nfalak feti keta Ratu to nukun a kmi? 8 * Mpa miftutu mir wewelmpampane feti mtyate mir salar lo! Kete midaun feti nusmir ber Abraham mpa keta Ratu nlure mir salar! Yak kfwalak ber a kmi: Ratu bise nbal ma nose batyar ye fen Abraham empuny nusiny. 9 * Ratu nose ma nukun tomwatar ma to rtate nir salar, felan farlan tomwate ma nomat kmwayan nose ma nketan katutun nor wakrir monuk. Katutun ma bunir to rangamon e keta rketan ma ryebas far au dalam.”
10 Ne tomwat ngayadin renrat Yohanes, “Farane e kam mose farpe?”
11 Yohanes nfalak ber sir, “Tomwate ma ni rabtyar du, ka nal sa ber tomwate ma to ni rabit. Ma tomwate ma ni tnyamar, ka nsaman a nbal ber tomwate ma to ni tnyam.”
12 * Mangtak ulbatyar a nbal rma rakmat Yohanes ma nadiris sir. Ne sir renrat i, “Tuangguru, ma kam e mose farpe?”
13 Yohanes nfalak, “Kete myal a mlyengan safe ma rtetak ber a kmi lo.”
14 Suldadwar ma ramin a ne nbal renrat Yohanes, “Ma kam e? Keta mose farpe?”
Yohanes a nfalak, “Kete mtyean tomwatar ma myal nir dotyar, ma kete msyoi lamain tomwatar ma myal nir dotyar, fali mir sewe dengan ma myorip lo!”
15 Noak a ne tomwatar yadin rdaf Rai Mangtebus mpa raenrat na dalmir feti, Yohanes ye Rai Mangtebus i ye lo e? 16 Yohanes a nfalak ber sir monuk, “Yak kal weye la kudiris a kmi, nempa tomwat sa ma nma ye keta nal Ratu Smwangtany mla au ma nadiris a kmi. Ni kuase nlengan nof yakw. Ma ktwatar Ni sabatwem firsir motak e to bise.
Yahudyar nir sabatweme (3:16)
17 Ratu keta nukun tomwat yatkar na naraka farlan mangosboe ntafy kalin fas kiktir. I nafburat gandum isiny na anfyamping ain, ma kiktir e nyebas far au dalam.”
18 Yohanes nal snyurtar yadin ber tomwatar noak ma i nafwibar Ibar Ngamone. 19 * Nempa Yohanes ndotar Herodes fali nafsawe wainy sawany Herodias. Herodes ye rai mangkuase Galilea. Yohanes ndotar i a nbal na ni adat yatkar ma nose ne lo. 20 Nempa rai ne nose ni adat yatkar a ntafal ma nal Yohanes far sel dalam.
Yohanes nadiris Yesus
21 Lama Yohanes nadiris monuk tomwatar ne, nadiris Yesus a nbal. Noak ma Yesus nsampayang, langit ntakbanril, 22 * ne Ratu Smwangtany nose felan farlan manik merpati ma ntompur I. Ne liliri nof langit ma nfalak, “Ko ye Yakw Anakw ma kwamis Ko, ma mufsenange dalangw.”
Ratu Smwangtany nose felan farlan manik merpati ma ntompur Yesus (3:22)
Yesus empuny nusiny
23 Noak ma Yesus ntabw Ni karyae, Ni ngarak fafa buty tel. Ma tomwatar rdaun feti, Yesus ye Yusuf anaky.
Yusuf ne Eli anaky.
24 Eli ne Matat anaky,
Matat ne Lewi anaky.
Lewi ne Malkhi anaky.
Malkhi ne Yanai anaky.
Yanai ne Yusuf anaky.
25 Yusuf ne Matica anaky.
Matica ne Amos anaky.
Amos ne Nahum anaky.
Nahum ne Hesli anaky.
Hesli ne Nagai anaky.
26 Nagai ne Maat anaky.
Maat ne Matica anaky.
Matica ne Simei anaky.
Simei ne Yosekh anaky.
Yosekh ne Yoda anaky.
27 Yoda ne Yohanan anaky.
Yohanan ne Resa anaky.
Resa ne Zerubabel anaky.
Zerubabel ne Sealtiel anaky.
Sealtiel ne Neri anaky.
28 Neri ne Malkhi anaky.
Malkhi ne Adi anaky.
Adi ne Kosam anaky.
Kosam ne Elmadam anaky.
Elmadam ne Er anaky.
29 Er a ne Yesua anaky, Yesua ne Eliezer anaky,
Eliezer a ne Yorim anaky.
Yorim ne Matat anaky.
Matat ne Lewi anaky.
30 Lewi ne Simon anaky.
Simon ne Yehuda anaky.
Yehuda ne Yusuf anaky.
Yusuf ne Yonam anaky.
Yonam ne Elyakim anaky.
31 Elyakim ne Melea anaky.
Melea ne Mina anaky.
Mina ne Matata anaky.
Matata ne Natan anaky,
Natan ne Daud anaky.
32 Daud ne Isai anaky,
Isai ne Obet anaky.
Obet ne Boas anaky.
Boas ne Salmon anaky.
Salmon ne Nahason anaky.
33 Nahason ne Aminadab anaky.
Aminadab ne Admin anaky.
Admin ne Arni anaky.
Arni ne Hezron anaky.
Hezron ne Peres anaky.
Peres ne Yehuda anaky.
34 Yehuda ne Yakub anaky.
Yakub ne Ishak anaky.
Ishak ne Abraham anaky.
Abraham a ne Terah anaky.
Terah ne Nahor anaky,
35 Nahor a ne Serug anaky.
Serug ne Rehu anaky.
Rehu ne Peleg anaky.
Peleg ne Eber anaky.
Eber a ne Salmon anaky.
36 Salmon ne Kenan anaky.
Kenan ne Arpakhsad anaky.
Arpakhsad ne Sem anaky.
Sem a ne Nuh anaky.
Nuh a ne Lamekh anaky.
37 Lamekh ne Metusalah anaky.
Metusalah ne Henokh anaky.
Henokh ne Yared anaky.
Yared ne Mahalaleel anaky.
Mahalaleel ne Kenan anaky.
38 Kenan ne Enos anaky.
Enos ne Set anaky.
Set a ne Adam anaky.
Adam a ne Ratu anaky.